Omutumini Waholama Wouye Waholololua

JESUS nthiki imwe wapopila ovanthu okuti: “Omutumini wouye uno pahe matahuako.” Konyima, ayawisako okuti ‘omutumini wouye uno utupu etyi apondola okundinga.’ Tupu ati, “omutumini wouye uno wakoyesua.” (João 12:31; 14:30; 16:11) Olie ankho Jesus ekahi nokupopia?

Okutala nawa etyi Jesus apopia konthele “yomutumini wouye uno,” tyimoneka nawa okuti oe ankho kekahi nokupopia Tate yae, Jeova Huku. Iya olie “omutumini wouye uno”? Oñgeni “matahuako”, iya oñgeni “akoyeswa”?

“Omutumini Wouye Uno” Ulihololola Oe Muene

Ngetyi ongangala apeho ilipanda mokonda yepondolo liayo, Neliapu otyo lialinga etyi lialola Jesus, Omona wa Huku. Etyi alekesa Jesus “omauhamba aeho” ouye, Satanasi emupopila okuti: “Mandyikuavela omautumini aa aeho, nenkhimano liao, mokonda nevipewa iya ndyiviavela ou nahanda. Atyiho etyi matyikala tyove, inkha ufenda vala kuame otyikando tyike.”—Lucas 4:5-7.

Inkha Eliapu olusoke vala luovivi, ngetyi vamwe vapopia, oñgeni ehongiliyo olio malihangununwa? Okuti Jesus ankho ukahi vala nokulolwa nolusoke oluvi ine ehangayalo mokati kae liemutumbukila etyi ambatisalwa? Inkha ongotyo, oñgeni tupondola okuti “mwe mutupu onkhali”? (1 João 3:5) Jesus kapatanene okuti Satanasi utumina ovanthu, nae wetyipopia etyi ati “omutumini wouye” emuti oe “omuipai” “nonkhembi.”—João 14:30; 8:44; The New Jerusalem Bible

Etyi palamba omanima 60 tunde etyi Kristu elivasa ne Liapu, apostolu João wahinangelesa Ovakristau konthele youtumini we Liapu, etyi ati “ouye auho ukahi pomaoko ondingavivi.” João tupu wapopia konthele yae okuti, ‘ukahi nokuyondya ovanthu aveho.’ (1 João 5:19; Revelação [Apocalipse] 12:9) Tyotyili, Ombimbiliya ipopia konthele yoandyu imwe okuti “omutumini wouye.” Mahi uhongiliya ovanthu alo pi?

Omutumini Wouye Wavela Omapanga ae Ounene

Etyi apostolu Paulu ahoneka konthele yovilwa vio Vakristau vekolelo, walekesa nawa ovalie onondyale mbavo ononene. Oe wapopia neyandyuluko okuti: “Katukahi nokulwa nohitu nohonde. Anthi, tuna ovilwa ovinene nomautumini, novatumini venthiki liouye uno, onoandyu onombi keulu.” (Efésios 6:12) Ngotyo, ovilwa ovio ha novanthu “vohitu nohonde,” mahi ono “noandyu onombi.”

Ovapitiyi ovanyingi Vombimbiliya hono valekesa okuti, “onoandyu onombi,” mbapopiwa apa, halusoke luovivi, anthi ovanthu vopaspilitu ovakalavi vena epondolo. Onombimbiliya mbumwe, mbupitiya onondaka ombo okuti, “ononkhono mbopaspilitu mbovivi mbukala keulu” (Tradução na Linguagem de Hoje). “Onospilitu mbovivi mbukala keulu” (Bíblia de Jerusalém). “Onoandyu mbovivi mbuhamoneka” (Tradução Interconfessional). Ngotyo, Eliapu litumina onoandyu ononkhuavo “mbasapo omphangu yambo yaviuka” keulu.—Judas 6.

Omukanda wo Mbimbiliya wa Daniele waula oñgeni “ovatumini vouye” ovo vekahi nokuhongolela ouye tunde kohale. Nokuasukalala unene novakuatate vae ova Judeu vakondoka ko Jelusalei mo 537 P.K.E., okutunda koukonde Mombambilonia, omuuli Daniele welikuambela okuveitilako mo nosimano ononthatu. Oandyu imwe yatuminwe na Huku opo ipameke omuuli, aimupopila oityi yasetela. Yati: “Omunene woutumini wo Persia, wanthyilika mononthiki omakwi evali na ike.”—Daniel 10:2, 13.

Olie ‘omunene oo wo Persia’? Tyimoneka nawa okuti oandyu ankho kaikahi nokupopia Siru, Ohamba yo Persia, mokonda pomuvo opo Siru ankho ukahi nokukuatesako Daniele novanthu vae. Tupu, oñgeni omunthu wopahitu ankho apondola okulwa nomunthu wopaspilitu onosimano ononthatu tyina oandyu ike vala motyinthiki tyike yaipaele omatolopa 185.000? (Isaías 37:36) ‘Omunene oo wo Persia’ oandyu onkhalavi ankho yatumwa ne Liapu, otyilulu ankho tyikahi nokuyunga Ouhamba Omunene wo Persia. Konyima oandyu ya Huku aiti maikondoka vali okukalwa no “munene wo Persia,” notyilulu otyikuavo, “omunene wo Grécia.”—Daniel 10:20.

Oityi tulilongesila kuotyo? Tulilongesa okuti tyotyili kuna “ovatumini vouye” vahamoneka, ovilulu vikahi nokutumina ouye uhongolelwa nomutumini wavio Satanasi Eliapu. Mahi oityi vihanda hono?

Omutumini Wouye Ulekesa Oñgeni Tyili Atuwa

Mu Revelação omukanda Wombimbiliya, apostolu João ulekesa oñgeni Jesus, Mingeli arkandyu afinda Eliapu novilulu viae, nononkhumbi mbatuka kuetyi vatahua keulu. Tutangamo okuti: “Tatiei ove oohi . . . mokonda Eliapu lialaukila kuonue nonyengo onene, mokonda lityii okuti omuwo walio kauhi.”—Revelação [Apocalipse] 12:9, 12.

Oñgeni Eliapu lilekesa onyengo onene? Ngetyi onongangala mbuhanya atyiho mbuvila tyina mbahulilwa, Eliapu novilulu vialio, navo vatokola ‘okuhanya oohi’ novanthu kumwe navio. Mokonda lityii okuti omuvo walio kauhi, Eliapu liatokola okuundapesa ovitanda ovinene mokonda viakolela kovanthu, pala okuvehongiliya elungavi liokumona unene. Iya otyo tyituala ovanthu okumana omalumono oohi, nokuhanya omphepo youye auho, okupaka motyiponga omuenyo wovanthu.—Revelação 11:18; 18:11-17.

Tunde ponthyimbi yovanthu, outumini we Liapu tupu ulekesua nopulitika no nongeleya. Omukanda wa Revelação upopia ovatumini vopulitika okuti enyama liapewa “outumini omunene” ne Liapu. Tupu upopia oupanga ukundisa ukahi pokati kopulitika no nongeleya ngatyina valinga oumbalehi mopaspilitu. (Revelação 13:2; 17:1, 2) Soka kononkhumbi, noupika, novita, novilwa viomihoko viaipaa ovanthu ovanyingi mokueenda kuomanima. Okuti kuna omunthu upondola okuti ononkhumbi ombo mbuetesa omatuenyonga mbapita pokati kovanthu, ovo umwe vala vahinda okuvilinga? Ine vahindilwa no noandyu onombi?

Ombimbiliya ilekesa nawa nokuhololola olie ukahi nokuhongiliya ovatumini nomauhamba ouye. Tyilinge vetyii ine kavetyii, ovanthu valekesa ovituwa viomutumini wavo nonkhalelo yae yokuhanya oohi. Mahi alo pi ovanthu mavamono ononkhumbi noutumini we Liapu?

Omuwo Woutumini we Liapu Kauhi

Ovilinga via Kristu pano pohi Pomuvo wo Vakristau votete, vialekesa okuti apa katutu Eliapu novilulu vialio mavaipawa. Etyi ovalongwa va Jesus vapopia oñgeni vatundisa ovilulu movanthu, oe eveti: “Nahimbika okumona Satanasi ukahi nokutoka ngomuliakulo wo keulu.” (Lucas 10:18) Nonondaka ombo, Jesus walekesa okuti ankho wahambukua mokonda mafindi omutumini wouye, tyina amakondoka keulu akala Mingeli arkandyu. (Revelação 12:7-9) Okulilongesa nawa omaulo Ombimbiliya, alekesa okuti keulu Jesus wafinda mo 1914 ine etyi palamba katutu.a

Tunde opo, Eliapu lityii okuti omuwo wesalako opo ahanyueko kauhi. Namphila ‘ouye auho ukahi pomaoko ae,’ ovanthu ovanyingi hono kavekahi nokuyondyua nomakengelelo ae okuhanda okuvetumina. Ombimbiliya yeveikula omaiho okuvelekesa oñgeni Eliapu tyili liatuwa novilinga vialio. (2 Coríntios 2:11) Vavasa ekevelelo monondaka Paulu apopila ovakuatate vae Ovakristau mbati: “Huku yombembwa, konthele yae, apa katutu makamiangula Satanasi mombuelo yonomphai mbenyi.”b—Romanos 16:20.

Apa katutu Eliapu malinyimuako! Moutumini woluembia wa Kristu, ovanthu ovaviuki mavapilulula oohi aikala omphangu yombembwa. Oungangala, noundyale, nelungavi, mavikanyimako apeho. Ombimbiliya yati: “Ovipuka ovio viokohale kavikahinangelwa vali.” (Isaías 65:17) Matyikakala otyiwa unene ngatyi kuaveho mavayovolwa moutumini womutumini waholama wouye uno!

[Onondaka Poutoi]

[Ehangununo liolutalatu pefo 9]

Moutumini woluembia wa Kristu, ovanthu ovaviuki mavapilulula oohi aikala omphangu yombembwa