Jesus Oñgeni Atyindile Omuenyo Wae

“Okulia kuange okulinga ehando lia una wanthuma, nokumanuhula ovilinga viae.”—JOÃO 4:34.

ONKHALELO Jesus apopia onondaka ombo pombanda, ilekesa oityi ankho asuka vali natyo. Jesus novalongwa vae onthiki oyo, ankho vaendaenda omuhuka auho mo Samaria otyilongo tyo nomphunda. (João 4:6, okatoi) Iya ovalongwa vae avasoko okuti Jesus waliua nondyala, moluotyo, avemupe okulia. (João 4:31-33) Mekumbululo liae, Jesus walekesa oityi oe ankho ahanda okulinga momuenyo wae. Ku Jesus okulinga ovilinga via Huku ankho tyakolela vali tyipona okulia. Muetyi apopia netyi alinga, Jesus ankho ukahiko opo alinge etyi Huku emuhandela. Otyo ankho tyakutikinya tyi?

▪ Okuivisa Ouhamba wa Huku nokulongesa Ombimbiliya ipopia ovilinga via Jesus, okuti: ‘Oe waendaenda o Galileia aiho, okuivisa . . . nokulongesa, onondaka onongwa mbouhamba wa Huku.’ (Mateus 4:23) Jesus kaivisile vala Ouhamba wa Huku ku vakuavo. Oe tupu walongesa ovanthu, okuvehangununina, nokuvelekesa, mokuyandyulula nawa ondaka ya Huku. Osapi yonondaka mba Jesus, ankho Ouhamba wa Huku.

Mokueenda kuovilinga viae viokuivisa, Jesus walongesa ovateheleli vae oityi Ouhamba wa Huku netyi maukalinga. Tala otyili konthele Youhamba, kumwe no Vihonekwa vitulekesa onondaka mba Jesus, mavilandulako.

▪ Ouhamba wa Huku, outumini wo keulu, iya Jesus oe Ohamba yaholovonwa na Jeova.—MATEUS 4:17; JOÃO 18:36.

▪ Ouhamba mausukukisa enyina lia Huku no kufuisapo ehando lia Huku, opo lilingwe pano pohi ngetyi likahi nokulingwa keulu.—MATEUS 6:9, 10.

▪ Metumino Liouhamba wa Huku, oohi aiho maikakala omphangu yombembwa.—LUCAS 23:42, 43.

▪ Ouhamba wa Huku apa katutu mauya okufuisapo ehando lia Huku konthele yoohi.a—MATEUS 24:3, 7-12.

▪ Walinga omahuviso omanene Jesus ankho wiiwe vali unene okuti “Omulongesi.” (João 13:13) Anthi, mokueenda kuomanima etatu no nohanyi epandu mbovilinga vae viokuivisa, Jesus walingile omahuviso omanene. Ovilinga ovio, wevilingile mokonda yovipuka vivali. Tete, viakuatesako okulekesa okuti oe tyotyili watumua na Huku. (Mateus 11:2-6) Vali, vialekesa etyi oe Ohamba Youhamba wa Huku makalinga vali unene komutwe. Tala omahuviso amwe alingile.

▪ Oe watulisile omapukupuku elunga nomphepo ononene.—MARCOS 4:39-41.

▪ Oe wavelulile ovavei, novamphoki, novimpholo, novilema.—LUCAS 7:21, 22.

▪ Oe walingile omahuviso ovikulia iya ovanthu ovanyingi ankho vankhia ondyala, avali avekutu.—MATEUS 14:17-21; 15:34-38.

▪ Ovikando vitatu Jesus wapindulile ovanthu vokuankhia.—LUCAS 7:11-15; 8:41-55; JOÃO 11:38-44.

Soka oñgeni omuenyo maukakala kombanda yoohi moutumini wo Hamba oyo yepondolo!

▪ Walekesa oñgeni Jeova Huku atuwa Kutupu vali omunthu omukuavo wafuapo pala okulongesa vakuavo konthele ya Jeova, tyipona Omona wa Huku, waihanua okuti o Jesus Kristu pano pohi. Mokonda oe “watetekela kovipuka aviho,” Jesus wakala ponthele ya Jeova keulu—omanima omanyingi tyipona onoandyu ononkhuavo. (Colossenses 1:15) Jesus welilongesa nawa onkhalelo ya He yokusoka, nehando liae, novitumino viae, nonondyila mbae.

Otyo Jesus apopila okuti: “Nawike wii olie Omona, o He vala umwii, tupu nawike wii olie He, Omona vala umwii, na una Omona ahanda okumuholololelae.” (Lucas 10:22) Etyi eya pano pohi, Jesus wakalele nombili onene yokulekesa oñgeni Tate yae atuwa. Jesus wapopile nokulongesa nolusoke lwike. Oe wahinangela evi elilongesa keulu ponthele ya Huku Omukulami.—João 8:28.

Etyi Jesus akala pano pohi, walongesa etyi elilongesa keulu konthele ya Tate yae, monkhalelo yapepuka okunoñgonokwa novanthu pano pohi nokuendelamo.

Tala mononkhalelo onombali mbakolela Jesus alekesa oñgeni Tate yae atuwa.

▪ Jesus walongesa ovanthu opo vanoñgonoke otyili konthele ya Jeova—nenyina Liae, nelivangelo liae, nonondyila mbae.—JOÃO 3:16; 17:6, 26.

▪ Muevi alinga, Jesus walekesa ovipuka ovinyingi oviwa vilekesa oñgeni Jeova atuwa. Jesus walekesa nawa-nawa oñgeni Tate yae atuwa, moluotyo oe ankho upondola okuti: ‘Inkha uhanda okunoñgonoka oñgeni Tate yange atuwa, talela vala kuame.’—JOÃO 5:19; 14:9.

Onkhalelo Jesus atyindile omuenyo wae, ituhuvisa unene. Inkha tulilongesa oityi Jesus ankhila, iya atuendela muetyi tuelilongesa matyituetela ouwa omunene.

[Onondaka Poutoi]