Tala! Omuumbili Wapandua na Jeova

“Tala! Omuumbili wange, . . . ame napanda!”—ISAÍAS 42:1.

 1. Ovanthu va Jeova vaavelwa ondundo yokulinga tyi haunene tyina Ehinangelo Liononkhia mba Tatekulu likahi popepi? Omokonda yatyi?

PUTYINA omuvo wokuhinangela ononkhia mba Jesus uhikapo, ovanthu va Huku valandula elondolo lia apostolu Paulu “liokutala nawa Konkhalamutue Yavilapo Nomuoyesi wekolelo lietu, Jesus.” Paulu wayauisako okuti: “Talelei popepi una wakoleleya mononkhumbi ankho ekahi nokumoneswa no vakuankhali, mokonda yomasuko avo muene, opo muhaponue, nokusoya.” (Hebreus 12:2, 3) Okutala nawa ondyila yekolelo ya Kristu yemutuala kokulinga otyilikutila, matyikuatesako Ovakristau ovanakwa, no nongi ononkhuavo okutualako okuumbila Jeova nekolelo, nokulityilika opo ‘vahaponue, nokusoya.’—Tyieleka na Gálatas 6:9.

 2. Oityi tulilongesila komaulo a Isaia apopia konthele Yomona wa Huku?

² Jeova waundapesile omuuli Isaia, pala okupopia omaulo konthele Yomona wae. Omaulo oo, maetukuatesako “okutala nawa Konkhalamutue Yavilapo Nomuoyesi wekolelo lietu,” Kristu Jesus.a Omaulo oo, apopia konthele yovituwa viae, nononkhumbi amuene, nokuavialekwa ngo Hamba yetu, Nomuyovoli. Otyo matyiyawisa enoñgonoko lietu konthele Yehinangelo Liononkhia mba Tatekulu, malilingwa enima lino Mukuana 9 ya Tyikukutu, tyina ekumbi liamanyingila.

Okuimbuka Omuumbili

3, 4. (a) Momukanda wa Isaia, ondaka “omuumbili” ilekesa tyi? (b)Oñgeni Ombimbiliya ilekesa omuumbili wapopiua mu Isaia mo vikapitulu 42, 49,50, 52, no 53?

³ Ondaka “omuumbili” imoneka ovikando ovinyingi momukanda wa Isaia. Ovikando vimue ipopia omuuli Isaías. (Isaías 20:3; 44:26) Pamue yundapeswa pala okupopia konthele yelongo lio Isilayeli ine o Jako. (Isaías 41:8, 9; 44:1, 2, 21) Iya omaulo apopia konthele Yomuumbili avahiwa mu Isaías mo vikapitulu 42, 49, 50, 52, no 53? Ovihonekwa vio Gregu vio Vakristau, vitulekesa nokuayandyuluka nawa olie omuumbili wa Jeova wapopiua mo vikapitulu ovio. Omulume umue woko Etiopia wapopiua momukanda wa Atos ankho ukahi nokutanga eulo limue, etyi Filipe omuivisi ahongolelwa nospilitu sandu opo emuvase. Etyi omulume oo amana okutanga onondaka tuvasa mu Isaías 53:7, 8 wapula Filipe okuti: “Mphopile, omuuli ankho ukahi nokupopia Konthele yalie? Konthele yae muene ine okonthele yomunthu omukuavo?” Filipe emukumbulala liwa-liwa okuti Isaías ankho ukahi nokupopia konthele ya Mesiya Jesus.—Atos 8:26-35.

⁴ Puetyi Jesus olukembe, Simau omulume omuviuki, nombatelo yospilitu Sandu wapopile okuti, “Otyimimi pala okupola enthiki momalongo,” ngetyi tyapopilwe mu Isaías 42:6 no 49:6. (Lucas 2:25-32) Tupu, ononkhumbi Jesus amuene monthiki alolwa, mbapopilwe mu Isaías 50:6-9. (Mateus 26:67; Lucas 22:63) Konyima yo Pendekoste yo 33 Pomuwo wa Kristu, apostolu Petulu wapopile nokuayandyuluka nawa okuti, Jesus “Omuumbili” wa Jeova. (Isaías 52:13; 53:11; Tanga Atos 3:13, 26.) Oityi tulilongesila komaulo a Isaia apopia konthele ya Mesiya?

Jeova Ulongesa Omuumbili Wae

 5. Elongeso patyi Omuumbili apewa?

⁵ Pomaulo a Isaia konthele Yomuumbili wa Huku, like lilekesa oupanga omuwa ankho ukahi pokati ka Jeova Nomona wae wotyiveli etyi eheneye pano pohi. (Tanga Isaías 50:4-9.) Omuumbili oo muene, Jesus, walekesa okuti Jeova watuaileko nokumulongesa, ati: “Hitulula omatwi ange opo ndyitehelele nga vana valongeswa [“ovalongwa”, tala pokatoi.]” (Isaías 50:4) Mokueenda kuomuvo auho, Omuumbili wa Jeova watehelela Tate yae, nokulilongesila kwe, nokumutavela. Tyotyili, elao limue enene okulongeswa Nomutungi wouye auho!

 6. Oñgeni Omuumbili alekesa okuti ankho utavela nawa ku Tate yae?

⁶ Meulo eli, Omuumbili wapopia konthele ya Tate yae ngo “Hamba Tatekulu Jeova.” Otyo tyilekesa okuti Omuumbili ankho wanoñgonoka okuti Jeova Ohamba youye auho. Pala okulekesa okuti ankho utavela ku Tate yae, wapopile okuti: “Ohamba Tatekulu Jeova, wahitulula omatwi ange, iya ame halingile oumphuki. Hemutyindamenene.” (Isaías 50:5) Oe “weya okukala ponthele ya [Jeova] ngomesene yovilinga” etyi atunga ouye, novanthu. “Omesene oyo yovilinga” wahambukilue [Jeova] omuvo auho, nokuhambukilwa oohi yae, iya ovipuka, [Omona wa Huku] ankho ehole vikahi novana vovanthu.”—Provérbios 8:22-31.

 7. Oityi tyilekesa okuti Omuumbili ankho una onthumbi yokuti Tate yae memukuatesako okuluisa ovitateka?

⁷ Elongeso olio omuumbili apewa, nohole ankho ena novanthu, viemufwisapo pala okuya pano pohi, nokupita mononkhumbi ononene. Oe watualako okulinga ehando lia Tate yae, natyina amoneswa ononkhumbi. (Salmo 40:8; Mateus 26:42; João 6:38) Mokueenda kuovitateka viae pano pohi, Jesus wakalele nonthumbi yokuti Tate yae memupande, nokumukuatesako. Ngetyi tyapopilwe meulo lia Isaia, Jesus wakalele tyafuapo pala okupopia okuti: “Una upopia okuti ndyimuviuki, ukahi popepi. Olie upondola okulinga onkhango naame? . . . Tala! Ohamba Tatekulu Jeova, oe mankhuatesako.” (Isaías 50:8, 9) Tyotyili, Jeova wakuatesileko Omuumbili wae wekolelo movilinga viae viokuivisa pano pohi, ngetyi tyapopia eulo ekuavo likahi mu Isaia.

Ovilinga Vio Muumbili Kombanda Yoohi

 8. Oityi tyilekesa okuti Jesus ankho “omuholovonwa,” wa Jeova, ngetyi tyapopilwe mu Isaías 42:1?

⁸ Ombimbiliya itupopila etyi tyamonekele etyi Jesus ambatisalwa mo 29 Pomuvo wa Kristu: “Ospilitu Sandu . . . yemulaukila, iya keulu akutundu ondaka imue yati: ‘Ove umona wange, onthyolwa; ove napanda.’” (Lucas 3:21, 22) Jeova walekesa nokuayandyuluka nawa “omuholovonwa” wae, wapopiua meulo lia Isaia. (Tanga Isaías 42:1-7.) Mokueenda kuovilinga viae pano pohi Jesus wafuisilepo eulo olio, monkhalelo imue yavilapo. Mateusi mo Evandyeliu yae, wakutikinyamo onondaka mbukahi mu Isaías 42:1-4 embuundapesa mu Jesus.—Mateus 12:15-21.

9, 10. (a) Oñgeni Jesus afuisapo Isaías 42:3 mokueenda kuovilinga viae viokuivisa? (b) Oñgeni Kristu “aeta ouviuki” etyi ankho ekahi pano pohi? Onalupi makaeta “ouviuki kombanda yoohi”?

⁹ Ovanthu vekahi pokati kova Judeu ankho vapenyua no nonkhalamutue mbonongeleya mbo va Judeu. (João 7:47-49) Ovanthu ankho valingwa onya, alo umue ankho vaelekua nolumbungu ‘luatyopwa-tyopwa’ ine ‘okanyanga katuima’. Mahi, Jesus walekesile okankhenda kovahepi, navana ankho vamoneswa emone. (Mateus 9:35, 36) Oe wevekonga noluembia okuti: “Endyuei kuame amuho mukahi nokuundapa komafa, nokualemenwa, ame mandyimupameka.” (Mateus 11:28) Jesus ‘waeta ouviuki,’ mokulongesa ovitumino via Jeova konthele yetyi tyaviuka netyi tyapenga. (Isaías 42:3) Tupu, walekesa okuti ovitumino via Huku viesukisa okuundapeswa monkhalelo yapepuka, nokankhenda. (Mateus 23:23) Tupu, Jesus walekesile ouviuki mokuivisa kovahona, novahepi tyihena okapungulula.—Mateus 11:5; Lucas 18:18-23.

¹⁰ Omaulo a Isaia tupu apopile okuti, “omuholovonwa” wa Jeova “waeta ouviuki kombanda yoohi.” (Isaías 42:4) Otyo makalinga tyina makakala Ohamba Youhamba wa Mesiya, oe makahanyauna ovatumini aveho vopulitika akapingiyapo outumini wae wouviuki. Jesus makaetako ouye omupe muna “mamukakala ouviuki.”—2 Pedro 3:13; Daniel 2:44.

“Otyitei no Mphango”

11. Omonkhalelo patyi Jesus ali “otyitei tyomalongo” kotyita tyotete? Oñgeni etyilinga hono?

¹¹ Okufuisapo Isaías 42:6, Jesus tyotyili walekesile okuti “otyitei tyomalongo.” Mokueenda kuovilinga viae pano pohi, tete waetela ova Judeu otyitei tyo paspilitu. (Mateus 15:24; Atos 3:26) Mahi, Jesus wati: “Ame tyitei tyouye.” (João 8:12) Jesus kakalele vala otyitei tyo va Judeu, nomalongo, mokuveetela otyimimi tyo paspilitu, mahi, tupu mokonda waava omuenyo wae uhena nkhali ngofeto yeyovo pala ovanthu aveho. (Mateus 20:28) Etyi atutila, watuma ovalongwa vae vaave Oumbangi konthele yae “alo kononthele ambuho mbo ohi.” (Atos 1:8) Mokueenda kuovilinga via Paulu na Mbarnabe viokuivisa, vapopile onondaka “otyitei tyomalongo” iya avati tyilekesa ovilinga viokuivisa pokati kavana ankho veheva Judeu. (Atos 13:46-48; Tyieleka na Isaia 49:6) Ovilinga ovio nkhele vikahi nokulingwa novakuatate va Jesus ovanakwa kombanda yoohi, novanthu ovakuavo vali, okuivisa onondaka onongwa, nokukuatesako ovanthu opo vakale nekolelo mu Jesus, “otyitei tyomalongo.”

12. Oñgeni Jeova aavela Omuumbili wae “ngomphango pala ovanthu”?

¹² Tupu, meulo olio, Jeova wapopila Omuumbili wae okuti: “Ame mandyikuamena, nokukuava ngompango pala ovanthu.” (Isaías 42:6) Satanasi walingile ononkhono ononene pala okuhanyauna Jesus, nokumutyilika okufuisapo otyilinga tyae pano pohi. Mahi, Jeova wemuamena alo omuvo wae wokunkhia wehikapo. (Mateus 2:13; João 7:30) Jeova watutilisa Jesus, nokumuava “ngomphango” ine otyinkhwatele pala ovanthu kombanda yoohi. Omulao oo wokuakolela waava onthumbi yokuti Omuumbili wa Huku Wekolelo, matualako “ngotyitei tyomalongo,” pala okuyovola aveho vekahi menthiki liopaspilitu.—Tanga Isaías 49:8, 9.b

13. Omonkhalelo patyi Jesus ayovola “vana vekahi menthiki,” mokueenda kuovilinga viae viokuivisa? Oñgeni hono ekahi nokutualako okutyilinga?

¹³ Ngo tyinkhwatele, Omuumbili waholovonwa na Jeova, “wapatula omaiho ovamphoki,” “pala okueta kondye vana vekahi mokaleya,” nokuyovola “vana vekahi menthiki.” (Isaías 42:7) Mokueenda kuovilinga viae viokuivisa pano pohi, Jesus wetyilinga mokuhololola ounkhembi wonongeleya mbomatutu, nokuivisa onondaka onongwa Mbouhamba. (Mateus 15:3; Lucas 8:1) Jesus wayovola ova Judeu monongeleya mbomatutu, opo vakale ovalongwa vae. (João 8:31, 32) Tupu, Jesus ukahi nokukuatesako ovanthu ovanyingi veheva Judeu okulilongesa otyili. Oe watuma ovalongwa vae okuti “endei . . . kalongesei ovanthu vovilongo aviho opo vakale ovalongwa vange,” nokulaa okuti oe makala novalongwa vae “alo konthyulilo youye uno.” (Mateus 28:19, 20) Kristu Jesus ukahi keulu, mahi ukahi nokuhongolela ovilinga viokuivisa ouye auho pano pohi.

“Omuumbili” wa Jeova Wavilapo

14, 15. Omokonda yatyi Jeova ankhimaneka Omuumbili wae? Iya wemunkhimaneka ñgeni?

¹⁴ Meulo ekuavo konthele Yomuumbili wae Mesiya, Jeova wapopia okuti: “Tala! Omuumbili wange maundapa nonondunge. Oe makala pomphangu yaya peulu, tyotyili oe mankhimana unene.” (Isaías 52:13) Jeova wankhimaneka omona wae, mokonda oe wamena outumini Wae, nokutualako nekolelo namphila ankho amoneswa ononkhumbi ononene.

¹⁵ Apostolu Petulu wahoneka konthele ya Jesus okuti: “Oe ukahi kokulio kua Huku, mokonda wapita keulu, iya onoandyu, noutumini, nepondolo, vitavela kwe.” (1 Pedro 3:22) Tupu, Apostolu Paulu wahokele okuti: “Weliola, akala omutaveli alo pononkhia, okunkhila momuti wemone. Moluotyo, tupu Huku wemunkhimaneka, nokumuavela enyina liankhimana komanyina atyo aeho, opo ovanthu aveho keulu, nokombanda yoohi, navina vikahi mombuelo yoohi, vaikile konongolo menyina lia Jesus. Opo omalaka aeho anoñgonoke nawa okuti Jesus Kristu o Tatekulu, pala enkhimano lia Huku, Tate.”—Filipenses 2:8-11.

16. Oñgeni Jesus “ankhimanekwa unene” menima lio 1914? Iya oityi ekahi nokulinga tunde opo?

¹⁶ Tupu, Jeova wankhimaneka Jesus menima lio 1914. Jesus “wankhimanekua unene,” etyi Jeova emuvialeka ngo Hamba Youhamba wa Mesiya. (Salmo 2:6; Daniel 7:13, 14) Tunde opo, Jesus ukahi “nokutumina pokati konondyale [mbae].” (Salmo 110:2) Otyilinga Jesus alinga tete, okutahela Satanasi, novilulu viae pano pohi. (Revelação 12:7-12) Konyima, Kristu waundapa nga Siru Omunene, ayovola ovakuatate vae ovanakwa pano pohi ankho vekahi moupika wo Mbambilonia Onene. (Revelação 18:2; Isaías 44:28, 34) Jesus ukahi nokuhongolela ovilinga viokuivisa ouye auho, vikahi nokuongiya “otyihupe tyovanakwa”, ovakuatate vae vopaspilitu, notyinyingi “tyonongi ononkhuavo,” omapanga ekolelo “otyunda otyitutu.”—Revelação 12:17; João 10:16; Lucas 12:32.

17. Oityi tuelilongesa meulo lia Isaias konthele “Yomuumbili”?

¹⁷ Okulilongesa omaulo aa akolela momukanda wa Isaia, tyotyili tyayawisa ehando lietu liokupanda o Hamba yetu, Nomuyovoli, Kristu Jesus. Okukala omutaveli mokueenda kuovilinga viae viokuivisa pano pohi, tyalekesa nawa elongeso apewa na Tate yae, etyi nkhele eheneye pano pohi. Novilinga viae viokuivisa, nokulongesa, Jesus walekesa okuti, “otyitei tyomalongo,” iya ukahi nokuhongolela ovilinga ovio hono. Ngetyi matukelilongesa komutue, eulo ekuavo konthele Yomuumbili Mesiya, lilekesa okuti oe ankho una okumona ononkhumbi, nokuava omuenyo wae pala ouwa wetu, ovipuka ovio tuesukisa “okutalela popepi” putyina Ehinangelo Liononkhia mbae likahi popepi.—Hebreus 12:2, 3.

[Onondaka Poutoi]

Omapulo okupitulula

• Olie “Omuumbili” wapopiua meulo lia Isaia, iya oñgeni tuetyinoñgonoka?

• Elongeso patyi Omuumbili apelwe na Jeova?

• Oñgeni Jesus oe “otyitei tyomalongo”?

• Oñgeni Omuumbili ankhimanekelwe?

[Olutalatu pefo 21]

Filipe waimbukile nokuayandyuluka nawa okuti “Omuumbili” wapopiua na Isaia, o Jesus, Mesiya

[Olutalatu pefo 23]

Jesus muumbili waholovonua na Jeova, walekesa okankhenda kovahepi navana ankho vamoneswa ononkhumbi

[Olutalatu pefo 24]

Jesus wankhimanekua na Tate yae nokuvialekwa Ngohamba Youhamba wa Mesiya

[Ehangununo liolutalatu pefo 24]