Onkhalelo Yomulume Omuhona no Ya Lasalu Ipiluluka

Sesusi waavela ovalongwa vae onondonga onongwa konthele yokuundapesa omalumono. Mahi ha ovalongwa vae vala ankho vekahi nokumutehelela. Nova Faliseu ankho opo vekahi iya ankho ñgeno vapaka momutima wavo onondonga mba Sesusi. Omokonda yatyi? Omokonda ankho ‘vehole unene onombongo.’ Etyi veiva onondaka mba Sesusi, “avahimbika nokumulinga omukuele.” — Luka 15:2; 16:13, 14.

Mahi, Sesusi ehevetili owoma mokonda yotyo. Evepopila okuti: “Onwe, onwe vokulilekesa kovanthu ngatyina muvaviuki, mahi Huku wii nawa omitima vienyi. Mokonda otyipuka tyina esilivilo kovanthu, ku Huku tyitupu esilivilo.” — Luka 16:15.

Ova Faliseu ankho ‘vankhimanekwa novanthu’ mokueenda kuomuvo omunyingi, mahi pahe onkhalelo yavo ankho maipiluluka unene. Vana ankho vankhimana unene, vokuna omalumono omanyingi, nomunkhima mopulitika no monongeleya ankho mavapakwa pombuelo. Iya ovanthu vokuhena omunkhima, vaimbuka okuti vesukisa okukala noupanga omuwa na Huku, avapakwa kounene. Sesusi wetyilekesa nawa okuti ankho makukala epiluluko enene.

Wati: “Ovitumino, no nondaka Mbovauli, viali-ko alo pomuvo wa Suau. Okutunda opo, onondaka onongwa Mbouhamba wa Huku mbukahi nokuiviswa iya ovanthu vatyo aveho vekahi nokuovola nombili Ouhamba oo. Mahi tyapepuka vali eulu nohi okulamba tyipona oletela ike Yovitumino viapelwe Moisesi okuhafuiswapo.” (Luka 3:18; 16:16, 17) Oñgeni onondaka mba Sesusi mbalekesa okuti ankho kukahi nokueenda epiluluko?

Ononkhalamutwe mbonongeleya yova Sundeu ankho velimphanda, vapopia okuti valandula Ovitumino Viapelwe Moisesi. Pu etyi Sesusi avelula omulume omumphoki mo Selusalei, ova Faliseu vapopile nomalityindailo okuti: “Onthue tuvalongwa va Moisesi. Onthue tutyii okuti Huku wapopile na Moisesi.” (Suau 9:13, 28, 29) Otyipuka tyimwe ankho vesukisila okupewa Ovitumino vya Moisesi, ankho okuhongolela ovanthu vomutima weliola ku Mesiya, Sesusi. Suau Batisita wapopile okuti Sesusi Ondyona ya Huku. (Suau 1:29-34) Okuhimbikila pomuvo wovilinga vya Suau, ova Sundeu veliola omutima, haunene ovahepi, ankho vekahi nokutehelela onondaka “Mbouhamba wa Huku.” Ankho kuna “onondaka onongwa” pala aveho vana vahanda okutuminwa Nouhamba wa Huku, nokuyambwa nao.

Ovitumino Viapelwe Moisesi ankho vikahi nokufuisuapo, etyi viahongolela ovanthu ku Mesiya. Mahi, okuvilandula ankho tyikahi nokupwa. Mongeleka, Ovitumino ankho viyeka ovanthu velihenge mokonda yovipuka ovinyingi, mahi Sesusi apopi okuti: “Una uhenga omukai wae anepe omukuavo ulinga oumbalehi iya una unepa omukai wahengwa nomulume wae, nae ulinga oumbalehi.” (Luka 16:18) Onondaka ombo ambunumanesa ova Faliseu, vokuhole okuhinda ovitumino pala ovipuka aviho.

Sesusi pahe apopi ongeleka imwe itoneka vali epiluluko enene ankho maliende-ko. Ongeleka oyo yapopia konthele yovalume vevali, netyi onkhalelo yavo yapiluluka unene. Putyina ulilongesa ongeleka oyo, hinangela okuti pu vana ankho vekahi nokuitehelela ankho pena ova Faliseu vehole unene onombongo, nokunkhimanekwa novanthu.

Sesusi ati: “Kuali omulume umwe omuhona, uhole okuvala ovikutu oviwa ovinkhuhu no viomusinya, ankho ulia nawa ononthiki ambuho. Iya kombundi yeumbo liae ankho kueetwa omulume umwe weyula ovipute, ankho wiita osimola, utiwa o Lasalu. Iya ankho uhanda okulia ovinyanya vitoka komesa yomuhona. Alo umwe ovimbwa ankho viya okulasa povipute viae.” —Luka 16:19-21.

Inkha ova Faliseu ankho vehole unene onombongo, okuti tyipuiya okunoñgonoka olie ‘omulume omuhona’ Sesusi apopia mongeleka ei? Ononkhalamutwe ombo mbova Sundeu tupu ankho vehole unene okuvala ovikutu viomunkhima vilanda onombongo ononyingi. Iya tyihe-malumono vala, tupu tyimoneka okuti ankho vena ovilinga viankhimana no nomphitilo onongwa mbokuundapela Huku. Ngotyo, ongeleka yomulume wavala ovikutu ovinkhuhu, ilekesa okuti ovo tete vena omphitilo iya ovikutu ovingonga violinyu vilekesa okuti velipaka kouviuki. — Daniel 5:7.

Oñgeni ovanthu ovo vokuamona, tupu velipaka-ko ankho vatala ovahepi, ovanthu vahankhimanene? Ankho vevetala nomutomba, aveveluku okuti ‛am ha·’aʹrets, ine ovanthu veheke (lyo pohi), vehei Ovitumino, tupu vahatokalele okuvilongeswa. (Suau 7:49) Otyo ankho tyilekesa onkhalelo yomulume “wiita osimola utiwa o Lasalu,” waliwa unene nondyala uhanda alo umwe okulia “ovinyanya vitoka komesa yomuhona.” Lasalu ankho utoyesa mokonda yovipute. Tyelifwa notyo, vana vahankhimanene ankho vatombwa, vatalwa ngatyina vahapandelwe na Huku.

Ankho vekahi monkhalelo oyo omuvo omunyingi, mahi Sesusi ankho utyii okuti omuvo wehika-po wepiluluko enene lionkhalelo yomuenyo wa vana vekahi ngomulume omuhona, no lya vana vekahi nga Lasalu.

Sesusi atualako okupopia konthele yepiluluko enene mononkhalelo mbovanthu ovo. Ati: “Mahi mokueenda kuomuvo, omulume oo wokuita osimola anyimi iya onoandyu ambumutyindi-po ambumutuala ponthele ya Ambalaiau. Omulume omuhona nae anyimi iya apakwa. Melangalo pu etyi ekahi nokumona ononkhumbi, ayelula omaiho amonena Ambalaiau kokule, iya Lasalu ukahi ponthele yae.” — Luka 16:22, 23.

Vana ankho Sesusi apopila, vetyii okuti Ambalaiau ankho uli Melangalo, wankhia-le kohale. Ovihonekwa viyandyulula nawa okuti ovanthu vekahi Melangalo ine Kondyembo kavatale ine kavapopi, na Ambalaiau ankho kapondola okutyilinga. (Eclesiastes 9:5, 10) Oityi ononkhalamutwe mbonongeleya ankho vanoñgonoka mongeleka ya Sesusi? Oityi ankho alekesa konthele ya vana vahankhimanene, no nonkhalamutwe mbonongeleya vokuhole unene onombongo?

Sesusi ankho ukahi vala nokupopia epiluluko olio etyi ati: ‘Ovitumino, no nondaka Mbovauli, viali-ko alo pomuvo wa Suau Batisita, mahi okutunda opo, onondaka onongwa Mbouhamba wa Huku mbukahi nokuiviswa.’ Ngotyo, mokonda yovilinga vya Suau viokuivisa no vya Sesusi Kilisitu, Lasalu nomulume omuhona vankhia monkhalelo yavo yomuenyo wo kohale, avakala nonkhalelo omphe komaiho a Huku.

Haunene vana veliola omutima ine vahepa vakala ehimbwe tyihena oupanga omuwa na Huku. Mahi pahe ankho vekahi nokukuateswako, iya vekahi nokutavela onondaka Mbouhamba, mbaiviswa tete na Suau Batisita iya konyima ambuiviswa na Sesusi. Kohale ankho vekahi ngatyina valia ovinyanya, ‘oupuka oututu utoka komesa’ yomalongeso ononkhalamutwe mbonongeleya. Pahe ankho vekahi nokupopilwa otyili tyakolela Tyovihonekwa, haunene ovipuka oviwa Sesusi evehangununina. Ankho pahe ongatyina vekahi monkhalelo yapandwa na Siovaa Huku.

Tyelikalela notyo, ononkhalamutwe mbonongeleya ankho ovahona, vena omunkhima, kavetavelele onondaka Mbouhamba mbaiviswa na Suau, pahe ankho mbukahi nokuiviswa na Sesusi motyilongo atyiho. (Mateusi 3:1, 2; 4:17) Ankho vahulilwa, ine veihamenwa nonondaka ombo, ankho mbupopia ekoyeso lya Huku lialema unene. (Mateusi 3:7-12) Inkha Sesusi novalongwa vae vayekele-po okuivisa ondaka ya Huku, ononkhalamutwe mbonongeleya vokuhole onombongo ñgeno vahambukilwe. Ankho vekahi ngomulume omuhona, wapopia okuti: “Tate Ambalaiau, ndinge-vo onkhenda, tuma Lasalu ayave omunwe wae momaande na anthendeleke vala kelaka, mokonda neihamenwa unene motupia muno ndyikahi muatokota.” — Luka 16:24.

Mahi otyo ankho kamatyilingwa. Ononkhalamutwe ononyingi mbonongeleya ankho kamavapiluluka. Ankho vaanya ‘okutehelela ku Moisesi no Kovauli,’ vahonekele ovipuka ñgeno vievehongolela vetavele okuti Sesusi Ohamba, Mesiya ya Huku. (Luka 16:29, 31; Ova Galata 3:24) Tupu etyi vamona vokueliola omutima vetavela Sesusi, avapandwa na Huku, ñgeno navo ankho veliola omutima, avetavela. Ovalongwa va Sesusi ankho kavapondola okupilulula otyili ine okutyitepulula opo vahambukiswe ononkhalamutwe mbonongeleya, na velitehelele nawa. Mongeleka yae, Sesusi walekesa nawa otyili otyo nonondaka “Tate Ambalaiau” apopilile omuhona.

Wati: “Mona wange, hinangela okuti ove etyi ankho una omuenyo ankho unale ovipuka aviho oviwa, Lasalu ankho una vala ovipuka ovivi. Pahe ukahi pano nokukengelelwa, mahi ove ukahi mononkhumbi. Iya tyihe-vipuka ovio vala aviho, pena evoyo limwe enene likahi pokati ketu no ove, vana vahanda okutunda kuno okuya no oko kavetyivili okutauluka, no vokuhanda okutunda oko okuya no ku onthue kavetyivili.” — Luka 16:25, 26.

Epiluluko olio lihuvisa, ankho liaviuka ngatyi! Ankho tyilekesa epiluluko lionkhalelo yononkhalamutwe mbonongeleya vokulipaka-ko, no yovanthu veliola omutima vetavela okanga ya Sesusi iya pahe vapamekwa iya avakuateswako okukala noupanga omuwa na Huku. (Mateusi 11:28-30) Epiluluko olio ankho malimoneka vali onohanyi mbehehi komutwe, tyina ankho omphango Yovitumino maipingwa nomphango omphe. (Jeremias 31:31-33; Ova Kolosu 2:14; Ova Hebeleu 8:7-13) Mo Pendekosite yo 33 P.K., tyina Huku ankho amaave ononkhono mbae mbasukuka, matyimoneka nawa okuti ovalongwa va Sesusi ovo vapandwa na Huku, ha va Faliseu-ko.