Ovilinga Vya Sesusi Viliyawisa Vya Suau Vitepuluka

Etyi otyipito tyo Pasikwa pomuvo wondyovo menima 30 P.K., tyalamba, Sesusi novalongwa vae avatundu ko Selusalei. Mahi, kavakondokele komaumbo avo mo Ngalileya. Vaile no kotyilongo tyo Sundeya iya avambatisala-ko ovanthu ovanyingi. Suau Batisita ankho ukahi-ale nokulinga ovilinga ovio enima iya vamwe povalongwa vae tyafuile nkhele ankho vekahi nae mevota Liondongi Solondau.

Sesusi ankho kekahi nokumbatisala omunthu nawike, mahi utuma ovalongwa vae vambatisale. Alo pomuvo opo movilinga vya Sesusi viokuivisa, Sesusi na Suau ankho valongesa ova Sundeu velivela ononkhali valinga mbokuhetavelele Ovitumino viomphango ya Huku. — Ovilinga 19:4.

Mahi ovalongwa va Suau avakala nonkhi, avemupopila konthele ya Sesusi okuti: “Omulume [Sesusi] una ankho muna-e . . . ukahi nokumbatisala iya ovanthu aveho vekahi nokuenda no kwe.” (Suau 3:26) Mahi Suau ankho utupu onkhi. Ankho wahambukwa mokonda ovilinga vya Sesusi vikahi nokueenda nawa iya uhanda ovalongwa vae navo vahambukwe. Suau evehinangelesa okuti: “Onwe muene munombangi mbetyi napopia, etyi nati: ‘Ame hame-ko Kilisitu, mahi natumwa komutwe wae.’” Apopi onongeleka konthele yotyo opo aveho vetyinoñgonoke, ati: “Ou una omphunga oe omphunga. Mahi epanga liomulume omphunga, tyina likatuka iya aliivi ondaka yomphunga, likala nehambu enene. Ngotyo, ehambu liange liafuapo.” — Suau 3:28, 29.

Suau ukahi ngepanga liomphunga, wahambukilue onohanyi mbokualamba etyi alekesa Sesusi kovalongwa vae. Vamwe puvo avalandula Sesusi iya mokueenda kuomuvo oo, ankho mavalembulwa nononkhono mba Huku. Suau tupu ankho uhanda ovalongwa vae vahupapo, valandule Sesusi. Tyotyili, etyi Suau ankho ahanda, okupongiya ondyila yovilinga vya Kilisitu. Suau wapopia okuti: “Omunthu oo, ovilinga viae vina okutualako okuliyawisa, mahi viange vina okutepuluka.” — Suau 3:30.

Suau omukuavo, una wakala umwe povalongwa vo tete va Sesusi, konyima wahoneka konthele yoku kuatuka Sesusi, notyilinga tyae opo ayovole ovanthu, wati: “Una utunda keulu, omunene vali tyipona vakuavo aveho. . . . He uhole Omona, moluotyo ovipuka aviho wevipakula pomavoko ae. Omunthu ukala nekolelo Momona, una omuenyo uhapu. Omunthu uhetavela Komona kamakamona omuenyo, mahi onyengo ya Huku maikala apeho kombanda yae.” (Suau 3:31, 35, 36) Otyo otyili tyakolela unene ovanthu vesukisa okunoñgonoka!

Pakala vala katutu tunde etyi Suau Batisita apopia okuti ovilinga viae vina okutepuluka, Ohamba Helode aimupake mokaleya. Helode ankho wapola omukai wa umwe velikuai nae, emunepe. Etyi Suau emupopila pokati kovanthu okuti ukahi nokulinga oumbalehi, Helode emupake mokaleya. Etyi Sesusi eiva okuti Suau wapakwa mokaleya, atundu mo Sundeya novalongwa vae, ‘aende ko Ngalileya.’ — Mateusi 4:12; Maluku 1:14.