“Kalei Tyalunguka Mokulinga Omalikuambelo”

1, 2. (a) “Okukala tyalunguka mokulinga omalikuambelo” tyakolela mokonda yatyi? (b) Omapulo patyi tuesukisa okulilinga konthele yelikuambelo?

OMULUME umwe ankho uundapa kounthiki wati: “Omuvo upuilisa vali unene okukala tyipahi, okombimba.” Tupu, ovanthu ovakuavo vaundapa otyinthiki atyiho vapondola okutavela okuti etyi tyapopia omulume oo otyili. Tupondola okueleka omuvo oo, nononthiki mbuno tukahi, mokonda onthyulilo youye wa Satanasi ikahi unene popepi. Ononthiki mbuno mbelifua nomuvo wokombimba, iya Ovakristau vesukisa okulinga ononkhono opo vakale tyipahi. (Romanos 13:12) Hatyiwako okulala momuvo uno wokombimba! Tyesukisa okukala “ovana-ndunge” nokutualako “okukala tyalunguka mokulinga omalikuambelo.”​—1 Pedro 4:7.

² Mokonda tukahi nokuhika konthyulilo youye wa Satanasi, otyiwa okulipula okuti: ‘Ndyikahi umwe nokutala nawa oñgeni ndyilikuambela? Okuti ndyikahi nokulikuambela mononkhalelo ambuho, nokulikuambela apeho? Okuti ndyiitilako vakuetu, ine ndyiita vala ovipuka nesuka navio ine ndyihanda? Okuti elikuambelo liakolela umwe pala eyovo liange?’

 3. Ombupi ononkhalelo mbumwe mbokulikuambela?

³ Etyi apostolu Paulu ahonekelele ova Efesu, wapopile “ononkhalelo ambuho mbokulikuambela.” (Efésios 6:18) Tyina tulikuambela ku Jeova, apeho tumuita etuavele etyi tuesukisa nokutukuatesako okutetulula ovitateka vietu. “Omuteheleli womalikuambelo” utehelela noluembia tyina tumuita etukuateseko. (Salmo 65:2) Mahi tyina tulikuambela, tuahaitei vala etyi tuesuka natyo. Tupu tuesukisa okuhivilika Jeova, nokumupandula, nokumuita unene.

 4. Omokonda yatyi tuesukisila apeho okuhivilika Jeova momalikuambelo etu?

⁴ Kuna omahunga omanyingi alekesa omokonda yatyi tuesukisila okuhivilika Jeova momalikuambelo etu. Mongeleka, tukala nehando liokumuhivilika tyina tusoka “kovilinga viae ovinene” no “kounene wae wavilapo.” (Tanga Salmo 150:1-6.) Otyo onoversikulu epandu mbo Salmu 150 mbupopila okuhivilika Jeova ovikando 13. Omuhoneki omukuavo wono Salmu walekesile okuti uhole unene Huku etyi aimba okuti: “Ame ndyihole okukuhivilika ovikando epanduvali monthiki mokonda yomatokolo ove aviuka.” (Salmo 119:164) Tyotyili, Jeova watokala okuhivilikwa. Moluotyo, tuesukisa okumuhivilika momalikuambelo etu “ovikando epanduvali monthiki,” tyilekesa okuti apeho.

 5. Oñgeni okupandula momalikuambelo etu tyiyakulila?

⁵ Okupandula onkhalelo onkhuavo yakolela yokulikuambela. Paulu walondolele Ovakristau mepundaumbo lio Filipu okuti: “Muhakalei notyiho notyipuka natyike, mahi, muaviho, itei unene ku Huku nomalikuambelo kumwe nolupandu.” (Filipenses 4:6) Mokonda tukahi konthyulilo youye wa Satanasi, iya tuli pokati kovanthu “vahapandula,” tyakolela okupandula Jeova nomutima auho mokonda yononkhano mbae onongwa opo tuahakale ngovanthu vomouye. (2 Timóteo 3:1, 2) Ouye una otyituwa tyokuhapandula. Inkha katulunguka, tupondola okukala notyituwa otyo. Mahi inkha tupandula tyina tulikuambela, matukala nehambu atuheliyave konthele yonkhalelo yomuenyo wetu. (Judas 16) Tyina onkhalamutwe yombunga ilikuambela nombunga akutikinyamo olupandu, otyo matyavela ondundo omukai wae novana vae okukala notyituwa tyokupandula.

6, 7. Okuita unene oityi? Oityi tupondola okuita unene ku Jeova?

⁶ Okuita unene okulikuambela nomutima auho, okuita nokulila. Oityi tupondola okuita unene ku Jeova? Tupondola okuita Jeova etukuateseko tyina tumoneswa emone ine tyina tuna ouvela upondola okutuipaa. Pomivo ngovio, tyitavela okuita unene ku Huku opo etukuateseko. Mahi okuti tuesukisa vala okuita unene ku Jeova tyina tuavela ine tumoneswa emone?

⁷ Tala elikuambelo Jesus alongesile ovalongwa vae, netyi apopile konthele yenyina lia Huku, Nouhamba Wae, nehando Liae. (Tanga Mateus 6:9, 10.) Ouye uno weyula unene ovivi, iya ovatumini kavetyivili okuavela ovanthu ovipuka vesukisa. Otyo tyituavela ehunga ewa liokulikuambela opo enyina lia Huku lisukukiswe, nokuita Ouhamba wae umaneko outumini wa Satanasi pano pohi. Tupu, omuvo wokuita unene ku Jeova opo ehando liae lilingwe pano pohi ngetyi likahi nokulingwa keulu. Moluotyo, tuesukisa okukala tyalunguka, nokulikuambela mononkhalelo ambuho.

8, 9. Omokonda yatyi tuahapondolela okukoyesa Petulu nono apostolu ononkhuavo etyi valalele motyikunino tyo Getsemani?

⁸ Apostolu Petulu wahonekelele Ovakristau opo “vakale tyalunguka mokulinga omalikuambelo,” mahi pena omuvo umwe, ehetyilingile. Ankho nae oumwe povalongwa valalele etyi ankho Jesus elikuambela motyikunino tyo Getsemani. Namphila Jesus evepopilile okuti “kalei tyalunguka mokutualako okulikuambela,” valalele.​—Tanga Mateus 26:40-45.

⁹ Tuahakoyesei vala Petulu nono apostolu ononkhuavo mokonda valalele, mahi tuna okuhinangela okuti ankho vaponwa mokonda yovipuka ovinyingi valingile monthiki oyo. Ankho vapongiyile, nokulia Opasikwa motyinthiki otyo. Iya Jesus waavele onondonga konthele Yondalelo ya Tatekulu opo ovalongwa vae vanoñgonoke oñgeni vena Okuhinangela ononkhia mbae. (1 Coríntios 11:23-25) Ombimbiliya ipopia okuti “etyi vamana okuimba, valupuka avaende Komphunda Yomindyambi.” Opo vehikeko, vaendele ehimbwe momatapalo omo Jelusalei. (Mateus 26:30, 36) Tyafuile ankho okombimba. Inkha ñgeno ankho tukahi motyikunino tyo Getsemani motyinthiki otyo, ñgeno nonthue tualalele. Jesus kayayesile ono apostolu mbae, mahi waimbukile okuti “ospilitu ina ombili mahi olutu luaponwa.”

10, 11. (a) Oityi Petulu elilongesilile kuetyi tyamonekele motyikunino tyo Getsemani? (b) Oityi ulilongesila kuetyi tyamonekelele Petulu?

¹⁰ Petulu welilongesilile unene kuetyi tyamonekele motyikunino tyo Getsemani. Potete Jesus wapopile okuti: “Otyinthiki etyi, amuho mamukelipunduka mokonda yange.” Mahi Petulu akumbulula okuti: “Namphila vakuetu velipunduka mokonda yove, ame himelipunduka!” Jesus apopila Petulu okuti memuanye ovikando vitatu. Mahi Petulu ehemutavela, iya ati: “Namphila ndyina okunkhia noove, himekuanye.” (Mateus 26:31-35) Ngetyi Jesus apopile, Petulu watile umwe kemwii. Mahi, etyi Petulu aimbuka etyi alingile, elitehelela omapita “alili unene.”​—Lucas 22:60-62.

¹¹ Otyo tyamonekelele Petulu, tyemulongesile okuheliyumbu unene onthumbi. Elikuambelo liemukuatesileko konthele oyo. Oñgeni tutyii? Tutyii mokonda o Petulu wahonekele okuti tuesukisa “okukala tyalunguka mokulinga omalikuambelo.” Okuti tukahi nokulandula elondolo olio Liombimbiliya? Okuti tutualako okulikuambela, okulekesa okuti tutei ku Jeova? (Salmo 85:8) Tupu tuesukisa okueendela melondolo lia Paulu liokuati: “Una usoka okuti utai, alunguke opo ahatoke.”​—1 Coríntios 10:12.

12. Omokonda yatyi Neemia ongeleka ongwa pala onthue?

¹² Ongeleka onkhuavo ongwa oya Neemia, ankho uundapela Ohamba yoko Persia Artaxerxe motyita tyatano P.K.E. Neemia waava ongeleka ongwa yokulikuambela ku Jeova nomutima auho. Ombimbiliya ipopia okuti wakalele tyahali iya elikuambela ononthiki mbumwe mokonda yotyitateka tyova Judeu mo Jelusalei. (Neemias 1:4) Etyi Artaxerxe emupula omokonda yatyi anumanena, Neemia “elikuambela liwa-liwa ku Huku yo keulu.” (Neemias 2:2-4) Oityi tyatundililako? Jeova wakumbululile omalikuambelo ae monkhalelo imwe yakuatesileko ovanthu Vae. (Neemias 2:5, 6) Otyo tyapamekele unene ekolelo lia Neemia!

13, 14. Oityi tuesukisa okulinga opo tukale nekolelo liapama atuahayeke Satanasi etusoyese?

¹³ Inkha tutualako okulikuambela ngetyi Neemia alingile, matyitukuatesako okukala nekolelo liapama. Satanasi utupu okankhenda, iya apeho wovola okutulola tyina tuasoya. Mongeleka, inkha tuavela unene ine tuasoya, tupondola okuhimbika okusoka okuti Huku kesuku nomuvo tuundapa movilinga viokuivisa kese hanyi. Vamwe puonthue tupondola okusoya mokonda yokusoka unene kotyipuka tyimwe otyivi tualingile kohale. Satanasi uhanda tusoke okuti katusilivila. Wovola okuundapesa omalusoke oo omavi opo asoyese ekolelo lietu. Mahi inkha “tukala tyalunguka mokulinga omalikuambelo,” matukala nekolelo liapama. Tyotyili, ‘ondyakulilo onene yekolelo, maitukuatesako okuyakula omihongo aviho viatokota viondingavivi.’​—Efésios 6:16.

¹⁴ Inkha “tukala tyalunguka mokulinga omalikuambelo,” kamatutumphuluka tyina tulolwa atukala tyehena ekolelo mu Jeova. Tyina tukahi nokulolwa, tuesukisa okuhinangela ongeleka ya Neemia, atulikuambela liwa-liwa ku Huku. O Jeova vala metukuatesako okukoleleya omahongiliyo, nokupameka ekolelo lietu.

15. Oityi tuesukisa okulipula konthele yokuitilako vakuetu momalikuambelo?

¹⁵ Jesus welikuambelele unene okuitilako Petulu opo atualeko nekolelo liapama. (Lucas 22:32) Omukristau ankho utiwa Epafra waliko pomuvo Wovakristau votete, wahetekelele ongeleka ya Jesus. Epafra walingile ononkhono mbokuitilako ovakuatate vae mo Kolosu. Paulu wevehonekelele okuti: “Apeho momalikuambelo ae umuitilako, opo mukale tyapama nokuafwapo pala okulinga atyiho Huku ahanda.” (Colossenses 4:12, Bíblia Do Peregrino) Tuesukisa okulipula okuti: ‘Momalikuambelo ange, ndyilinga ononkhono mbokuitilako ovakuatate vange mouye auho? Tuñgapi ndyiitilako ovakuatate vange nonomphange vamona ononkhumbi mokonda yovinimawe, novitateka ovikuavo vali? Onalupi nalingile ononkhono mbokuitilako vana vena otyilinga otyinene meongano lia Jeova? Okuti mononthiki omu naitilako umwe meuaneno una ovitateka?’

16. Okuti okuitilako vakuetu tyakolela umwe? Hangununa.

¹⁶ Okuitilako vakuetu ku Jeova Huku, tyotyili tyipondola okuvekuatesako. (Tanga 2 Coríntios 1:11.) Jeova kalingi vala otyipuka mokonda ovaumbili vae ovanyingi vekahi nokulikuambela ovikando ovinyingi konthele yotyipuka otyo. Mahi putyina akumbulula omalikuambelo avo uhambukwa okutala okuti tyilityili vesuka navakuavo. Moluotyo, tuesukisa okupanda elao tuna liokuitilako vakuetu. Tuesukisa okuhetekela Epafra nokulekesa okuti tuna ohole novakuatate vetu Ovakristau nonomphange mokulinga ononkhono mbokuveitilako. Inkha tulinga ngotyo, matukala nehambu enene mokonda “okuava tyihambukiswa vali tyipona okupewa.”—Atos 20:35.

17, 18. Oñgeni “okukala tyalunguka mokulinga omalikuambelo” matyitukuatesako?

¹⁷ Puetyi Paulu ehenepopie okuti “otyinthiki tyikahi nokuenda nokomutue, kukahiale nokutya,” wahoneka okuti: “Omuvo muwii. Mutyii nawa okuti o ola yehikapo yokupahuka kolumphoki, mokonda pahe eyovo lietu likahi vali popepi tyipona pomuvo tuetavela.” (Romanos 13:11, 12) Ouye omupe wa Huku ukahi popepi, iya eyovo lietu likahi vali unene popepi tyipona etyi tusoka. Ou hamuvo wokulala mopaspilitu. Ngotyo, tuhayekei ouye uno ututalule, atuahakala nomuvo wokulikuambela ku Jeova. Mahi, tuesukisa “okukala tyalunguka mokulinga omalikuambelo.” Okulinga ngotyo, matyitukuatesako okukala “novituwa viasukuka novilinga vilekesa onthilo na Huku” putyina tukevelela onthiki ya Jeova. (2 Pedro 3:11, 12) Onkhalelo tutyinda omuenyo wetu mailekesa inkha tupahi mopaspilitu, nokutavela okuti tyilityili onthyulilo youye uno ikahi popepi. Moluotyo “tulikuambelei apeho.” (1 Tessalonicenses 5:17) Tupu tuhetekelei Jesus mokuovola omphangu tupondola okukala atuike opo tulikuambele ku Jeova. Inkha tuovola omuvo wokulikuambela ku Jeova, matufuene vali kwe. (Tiago 4:7, 8) Otyo matyikakala ononkhano onongwa ngatyi!

¹⁸ Ombimbiliya yati: “Kristu, kononthiki mbae pano pohi, ankho ulikuambela, nokuita ku Una ankho upondola okumuyovola kononkhia. Ankho uliyavela nokulila, iya Huku emutehelela mokonda yonthilo yae.” (Hebreus 5:7) Jesus waitile unene ku Jeova, iya watuaileko nekolelo mu Huku alo konthyulilo yomuenyo wae pano pohi. Mokonda yotyo, Jeova watutilisa Omona wae, emuavela ondyambi yomuenyo wahankhi keulu. Nonthue tupondola okukala nekolelo mu Tate yetu keulu, katyisukisa ovitateka patyi matukakala navio komutwe. Inkha “tukala tyalunguka mokulinga omalikuambelo,” matukayambwa nomuenyo wahapu.