Ohole Otyituwa Tyimwe Tyakolela

JEOVA watuma apostolu Paulu okuhoneka konthele yovituwa etyive vilinga onthele yospilitu sandu. (Gálatas 5:​22, 23) Ovituwa ovio aviho oviwa, viihanwa okuti “ovinyango viospilitu.”a (Tala okatoi.) Ovinyango ovio, tupu vilinga onthele “yomunthu omupe” Ovakristau vena okulivaleka. (Colossenses 3:10) Ngetyi omuti wesukisa omande opo waave ovinyango oviwa, nonthue tuesukisa ospilitu sandu opo tukale novituwa viovinyango viospilitu.​—Salmo 1:1-3.

Otyituwa tyotete apostolu Paulu ahoneka ohole. Oñgeni otyituwa otyo tyakolela? Paulu wapopia okuti ankho utupu ohole opo “kesilivila.” (1 Coríntios 13:2) Ohole oityi iya oñgeni tupondola okukala nalo, nokululekesa kese nthiki?

Namphila tyipuilisa okuhangununa nawa-nawa oityi ohole, mahi Ombimbiliya ipopia oityi omunthu una oluembia alinga netyi asoka. Mongeleka, omunthu una ohole “wapua-elundo no kuna omutima omuwa” tupu “uhambukilwa otyili.” Tyina omunthu ena ohole “ulikuatesila movipuka aviho, utavela ovipuka aviho, ukevelela ovipuka aviho, ukoleleya movipuka aviho.” Utualako okukala nohole na vakuavo iya usuka navo nokukala epanga liotyotyili. Mahi tyina omunthu ehena ohole, ukala nelulu, nomalityindailo, nokuvala omuvalo wapenga, nelungavi ine okuhaevela. Katuhande okulekesa ovituwa evi ovivi, mahi onthue tuhanda okulekesa ohole yotyotyili ku vakuetu, ohole “kaiovola okulinga omahando ayo muene.”​—1 Coríntios 13:4-8.

“Huku ohole.” (1 João 4:8) Ovilinga viae aviho novituwa viae, vityilekesa. Walekesa ohole onene etyi atuma omona wae Jesus pano pohi opo aave omuenyo wae. Apostolu João wapopia okuti: “Moluotyo, Huku walekesa ohole onene nonthue. Mokonda Huku watuma Omona wae wongunga pano pohi, opo tukamone omuenyo menyina liae. Ohole monkhalelo ei, hakuti onthue tuakala nohole na Huku, mahi oe wakala nohole nonthue iya atumu Omona wae opo alinge otyilikutila tyo nonkhali mbetu.” (1 João 4:9, 10) Mokonda yohole ya Huku, ononkhali mbetu mbupondola okuevelwa iya atukala nekevelelo liomuenyo uhapu.

Jesus walekesa ohole kovanthu etyi aava omuenyo wae opo alinge ehando lia Huku. Apostolu Paulu utupopila okuti: “Mokonda ‘yehando’ olio, otyo tuakalela onosandu menyina lio tyilikutila tyolutu lwa Jesus Kristu, tyalingwa like nesilivilo lihapu.” (Hebreus 10:9, 10) Petupu omunthu nawike upondola okulekesa ohole onene ngoyo. Jesus wati: “Nawike una ohole ipona ya una waava omuenyo mokonda yomapanga ae.” (João 15:13) Okuti ovakuankhali tyitavela okuhetekela ohole Jeova na Jesus valekesa? Eenga tyitavela! Matutale oñgeni tupondola okutyilinga.

Paulu wetupameka okuti: “Kalei ovahetekeli va Huku, ngovana ononthyolwe, tualeiko okuendela mohole, ngetyi Kristu akala nohole nonwe.” (Efésios 5:1, 2) Oityi tyihangununa “okuendela mohole”? Otyo tyihangununa okulekesa ohole omuvo auho. Onthue katupondola vala okupopia okuti tuhole vakuetu. Mahi tuesukisa okutyilekesa muetyi tulinga. João wahoneka okuti: “Vana vange, tukalei nohole, hamonondaka vala ine omokupopia, mahi omuevi tulinga iya notyili.” (1 João 3:18) Mongeleka, tuivisa “onondaka onongwa Mbouhamba” mokonda tuhole Jeova iya nomunthele yetu. (Mateus 24:14; Lucas 10:27) Tupu “tuendela mohole” tyina tuapua-elundo, nokuna ohole iya nokuevela. Onthue tulandula elondolo lio Mbimbiliya liati: “Ngetyi Jeova emuevela, nonwe evelei vakuenyi.”​—Colossenses 3:13.

Inkha tuviyula vakuetu, otyo katyilekesa okuti tutupu ohole. Mongeleka, ovohe vamwe opo vakengelele omona ukahi nokulila vemuavela atyiho aita. Mahi he una ohole yotyotyili nomona wae umuavela vala tyina tyesukisa. Tyelifwa notyo, Huku ohole, “mahi Jeova uviyula una ehole.” (Hebreus 12:6) Tupu ohole okuviyula tyina tyesukisa. (Provérbios 3:11, 12) Mahi hinangela okuti, onthue atuho tuvakuankhali iya pamwe tupondola okuhalekesa ohole. Tupu onthue atuho tupondola okulinga ononkhono opo tulekese ohole. Oñgeni tupondola okutyilinga? Matutale ononkhalelo ononthatu.

Tete, ita ku Huku ekuavele ospilitu sandu opo ukale nohole. Jesus wati Jeova waavela “ospilitu sandu vana vemuita.” (Lucas 11:13) Tupu tupondola okukala nonthumbi yokuti inkha tuita ospilitu sandu iya atulingi ngetyi tuaita, matukala nohole onene. (Gálatas 5:16) Mongeleka inkha ove umukulu weuaneno upondola okuita ospilitu sandu opo ikukuateseko okukala nohole tyina uviyula vakuenyi Nombimbiliya. Tupu inkha uhe, upondola okuita ospilitu sandu opo ulongese nawa ovana vove nohole.

Vali, soka oñgeni Jesus alekesile ohole tyina ankho ovanthu vemumonesa ononkhumbi. (1 Pedro 2:21, 23) Tyina umwe ekuleva ine ukupopia omapita, lipula ove muene okuti, ‘inkha o Jesus ñgeno walinga ñgeni?’ Omphange utiwa Leigh uhole okulipula ngotyo iya otyo tyemukuatesako okusoka tyina nkhele ehenekumbulule. Wati: “Onthiki imwe omunthu tuundapa nae, ahonekela omesase vakuetu okumphopia omapita, nokupopia omapita ovilinga viange. Otyipuka otyo atyindumanesa unene. Mahi konyima andyilipulu okuti: ‘Oñgeni ndyipondola okuhetekela Jesus konthele yetyi tyalinga omunthu ou?’ Konyima andyisoko okuti inkha o Jesus ñgeno walinga ñgeni, andyitokola okuhetyisoko vali, anehesuku vali natyo. Konyima, andyiimbuka okuti omunthu oo ankho tuundapa nae una ovitateka ovinene viekongoko iya vimupa vala okunumana. Naimbuka okuti etyi ahoneka tyafuile ankho hatyoko ahandele okupopia. Okusokolola kongeleka ya Jesus yokulekesa ohole tyina tulewa, tyankhuatesako okulekesa ohole ngoyo komunthu oo.” Inkha tuhetekela Jesus, matulekesa ohole ku vakuetu mononkhalelo mbatyo ambuho.

Tatu, lilongesa okulekesa ohole yotyotyili. Ohole oyo, oyo iimbukisa ovalanduli votyotyili va Jesus. (João 13:34, 35) Jesus walekesile ohole iya oe ongeleka yetu yavilapo. Ñgeni ngotyo? Etyi atunda keulu “elilulu omuenyo wokeulu” mokonda yonthue “alo ankhia.” (Filipenses 2:5-8) Tyina tuhetekela Jesus okukala nohole yotyotyili momalusoke etu, matukala nga Jesus iya matupake omasuka-suka avakuetu komutwe.

Okulekesa ohole kuna ouwa omunene. Tutalei onongeleka onombali:

• OVAKUATATE VETU OUYE AUHO: Mokonda yohole tuna kese umwe na mukuetu, tutyii okuti ovakuatate no nomphange mu kese ewaneno tuenda mouye auho mavetutambula nawa. Ouwa omunene okunoñgonoka okuti “ovakuatate vove mouye auho” vena ohole nove! (1 Pedro 5:9) Onthue tupondola okuvasa oluembia olo pokati kovanthu va Huku.

• OMBEMBWA: “Okulikoleleya kese umwe na mukuavo” tyituavela “ehonyeko nombembwa.” (Efésios 4:2, 3) Onthue tukala nombembwa ngoyo momaliongiyo etu no movionge. Ove kutavela okuti ombembwa ei, oyo iwaneka ovanthu mouye uno wepuiya? (Salmo 119:165; Isaías 54:13) Tyina tulekesa ombembwa ku vakuetu, onthue tulekesa ohole yotyotyili kuvo iya otyo tyihambukiswa Tate yetu keulu.​—Salmo 133:1-3; Mateus 5:9.

Paulu wahoneka okuti: “Ohole ipameka.” (1 Coríntios 8:⁠1) Otyo tyilekesa tyi? Mu 1 Coríntios kapitulu 13, vamwe veiihana okuti o “Salmu Yohole,” wahangununa oñgeni ohole ipameka. Ohole itala komasuka-suka avakuavo. Ohole isuka nomasuka-suka avakuetu. (1 Coríntios 10:24; 13:5) Mokonda tutyii okuti okukala noumphua-lundo, nokuliola omutima, otyo matyipameka ohole mombunga iya newaneko mewaneno.​—Colossenses 3:14.

Pena ononkhalelo ononyingi mbokulekesa ohole ku vakuetu, mahi ohole tuna na Huku yakolela vali iya oyo ipameka ei tuna na vakuetu. Omokonda yatyi? Mokonda ohole tuna na Huku ituwaneka kumwe. Ovanthu vovilongo aviho novivala aviho, nomalaka aeho vafenda kumwe Jeova, “nokumuumbila aveho kumwe.” (Sofonias 3:9) Tutokolei okulekesa otyituwa otyo tyakolela tyo vinyango viospilitu sandu ya Huku kese nthiki.