Oñgeni Matuvale Omunthu Omupe Nokutualako Tyavala Omunthu Oo

1, 2. (a) Oñgeni tutyii okuti tyitavela okulivaleka omunthu omupe? (b) Ovituwa patyi viokulivaleka omunthu omupe tuvasa mu Colossenses 3:10-14?

MO Tradução do Novo Mundo das Escrituras Sagradas, tuvasa-mo ondaka “omunthu omupe” ovikando vivali. (Efésios 4:24; Colossenses 3:10) Otyo tyilekesa okuti omunthu “watungua ngetyi Huku ahanda.” Okuti tyitavela tulivaleke omunthu omupe? Yoo, tyitavela. Jeova watunga ovanthu otyifuika tyae, moluotyo tyitavela okuhetekela ovituwa viae oviwa.​—Gênesis 1:26, 27; Efésios 5:1.

² Tyotyili, mokonda tuapiñgana onkhali, pamwe tukala nomahando omavi. Tupu tupondola okuhongiliyua novituwa viovanthu vakala po tyilongo tyetu. Mahi, nekuateso lia Jeova, tupondola okukala ngetyi ahanda tukale. Opo tyitukuateseko okulinga ngotyo, matulilongesa ovituwa vimwe vilinga onthele yomunthu omupe. (Tanga Colossenses 3:10-14.) Konyima, matutale oñgeni tupondola okulekesa ovituwa ovio movilinga viokuivisa.

 3. Otyipi otyituwa tyimwe tyokulivaleka omunthu omupe?

³ Paulu wapopia okuti okuhalingi okapungulula, otyituwa tyimwe tyakolela tyilinga onthele yokulivaleka omunthu omupe. Tupu wati: “Omu Gregu no Sundeu, na una walupuka ekuendye na una uhalupukile, nomupika na una uhemupika, nongendi Nomutwa, aveho otyipuka tyike vala.”a (Tala okatoi.) Mewaneno, nawike upondola okulitehelela okuti omunene vali ku vakuavo mokonda yotyivala tyae ine eanda ine mokonda yokuankhimana potyilongo. Omokonda yatyi? Mokonda ngo valanduli va Kristu, onthue “atuho tuwike vala.”​—Colossenses 3:11; Gálatas 3:28.

 4. (a) Oñgeni ovaumbili va Jeova vena okutala vakuavo? (b) Otyitateka patyi ovakuatate mo Africa do Sul ankho vekahi nokulambela?

⁴ Tyina tulivaleka omunthu omupe, tukala nonthilo novanthu aveho, nokuvehumba tyihatale kotyivala tyavo ine otyilongo. (Romanos 2:11) Kononthele mbumwe mbouye, otyo tyipondola okupuiya unene. Mongeleka, kohale mo Africa do Sul ovatumini ankho vayapula ovanthu okutalela kovivala, ovindele ankho kavipondola okuhonya novanthikovei. Ovanthu ovanyingi movilongo, okukutikinya-mo Onombangi mba Jeova, alo hono vakala ponomphangu tyeliyapuka. Moluotyo, Ononkhalamutwe mbo Nombangi mba Jeova avatokola okukuatesako ovakuatate opo “vakale kumwe.” Mu Kulindi yo 2013, valinga epongiyo limwe opo likuateseko ovakuatate vovivala vielikalela, opo velinoñgonoke kese umwe na vakuavo.​—2 Coríntios 6:13, okatoi.

5, 6. (a) Epongiyo patyi lialingwa kotyilongo tyimwe opo tyikuateseko ovanthu va Huku okulikuata vali okapandi? (Tala olutalatu pefo pahimbikila onthele.) (b) Ouwa patyi watundilila-ko?

⁵ Ovakuatate valinga epongiyo limwe opo mo vi Tyalumingu omawaneno evali omalaka novivala vielikalaila vakale omuvo kumwe. Ovakuatate no nomphange vo mawaneno oo, vaundapa aveho movilinga viokuivisa, venda komaliongiyo aveho nokukapila-po omaumbo amwe. Omawaneno omanyingi aeliwaneka mepongiyo olio iya ombetele aivi ouwa omunene ukahi nokutundilila-ko. Otyo atyihuvisa unene ovanthu vamwe ankho vehe Nombangi mba Jeova. Mongeleka, onkhalamutwe imwe yongeleya yati: “Ame Himbangi, mahi namona okuti Onombangi mba Jeova vaonganeka nawa ovilinga viokuivisa iya vetupu okapungulula.” Oñgeni ovakuatate no nomphange velitehelela konthele yepongiyo olio?

⁶ Tete, omphange umwe upopia elaka lio Xhosa utiwa o Noma ankho una owoma wokukonga ovakuatate vewaneno lio Ingelesi opo vaye meumbo liae. Mahi konyima aende movilinga viokuivisa novakuatate vamwe ovindele, aende keumbo liavo iya atyimupameka. Wati: “Muaina, ovanthu vala vekahi ngonthue!” Moluotyo etyi ovakuatate no nomphange vewaneno lio Ingelesi vakaivisa newaneno lipopia elaka lio Xhosa, Noma akongo ovakuatate vamwe ovindele opo vakalie keumbo liae. Akala tyahuva etyi umwe puvo omukulu weuaneno, apumphama kotyikasa. Epongiyo olio valinga, likahi nokukuatesako ovakuatate ovanyingi no nomphange okulinga oupanga novanthu vovivala ine omalaka elikalaila.

 7. Omokonda yatyi tuesukisila okulekesa apeho okankhenda?

⁷ Putyina ouye wa Satanasi uhungi konthyulilo, ovanthu va Jeova mavatualako okumona ononkhumbi. Okuhavasi ovilinga, nomauvela omanene, novinimawe, noluhepo mokonda yokuvakwa, ine ovitateka ovikuavo vipondola okumonekela ovanthu aveho. Opo tulikuateseko movitateka ovio, tuesukisa okukala nokankhenda. Okankhenda maketulundu okutekula vakuetu noluembia. (Efésios 4:32) Ovituwa ovio vilinga onthele yomunthu omupe. Tupu, mavitukuatesako okuhetekela Huku iya nokupameka vakuetu.​—2 Coríntios 1:3, 4.

 8. Ouwa patyi utundililako tyina tulekesa okankhenda nohole novanthu aveho mewaneno? Ava ongeleka.

⁸ Oñgeni tupondola okulekesa okankhenda kovakuatate vetu vatunda kotyilongo otyikuavo ine vana vahepa? Tuna okuvetambula nawa, nokukala omapanga avo, nokuvekuatesako opo vaimbuke okuti onthue tuesuka navo mewaneno. (1 Coríntios 12:22, 25) Tanga ongeleka ya Dannykarl watunda ko Filipina ailukila ko Japau. Mokonda ankho ongendi, vana aundapa navo ankho kavemulingi nawa. Konyima, aende keliongiyo lio Nombangi mba Jeova. Dannykarl wati: “Ovanyingi puvo ankho ovo ko Japau iya avanthambula nawa ngatyina ankho tuelinoñgonokale kohale.” Okankhenda kovakuatate kemukuatesako okukala epanga lia Jeova. Mokueenda kwo muvo, Dannykarl ambatisalwa, hono omukulu weuaneno. Ovakulu weuaneno vahambukwa na Dannykarl no mukai wae Jennifer mokonda vakuatesako unene ewaneno iya vati: “Vatyinda omuenyo wapepuka iya ovakokoli-ndyila. Tupu vaava ongeleka ongwa yokupaka tete momuenyo wavo Ouhamba.”​—Lucas 12:31.

9, 10. Popia onongeleka mbulekesa ouwa utundilila kokulekesa okankhenda movilinga viokuivisa.

⁹ Onthue tuna omphitilo yokulinga “ovipuka oviwa pala ovanthu aveho” tyina tuivisa onondaka onongwa mbo Uhamba. (Gálatas 6:10) Onombangi ononyingi vena okankhenda no nongendi iya velilongesa elaka liavo. (1 Coríntios 9:23) Ononkhono vekahi nokulinga mbukahi nokueta ouwa. Mongeleka, omphange umwe omukokoli-ndyila wo ko Australia utiwa Tiffany welilongesa elaka lio Swahili opo akuateseko ewaneno lipopia elaka Swahili mepunda-umbo lio Brisbane. Ankho ulinga ononkhono ononene opo elilongese elaka olio iya omuenyo wae aukala vali nesilivilo. Tiffany wati: “Inkha uhanda okukala vali nehambu movilinga viokuivisa, otyiwa okuenda mewaneno lipopia ekaka ekuavo. Ongatyina walinga oungendi mahi otyo uhatundile motyilongo tyove. Ove motale ovakuatate vouye auho okuti velikuata okapandi.”

¹⁰ Ombunga imwe mo Japau tupu yalinga otyipuka tyelifwa notyo. Omona wavo, utiwa Sakiko, wati: “Ovikando ovinyingi tulivasa no nongendi vo ko Brazil tyina tukahi movilinga viokuivisa. Ankho tuvelekesa onotestu Mombimbiliya yavo Yoputu, ngo Apocalipse 21:​3, 4 ine o Salmo 37:​10, 11, 29, vatehelela nawa iya ovikando vimwe ankho valila.” Ombunga aikala nokankhenda no nongendi ombo iya ankho vahanda okuvekuatesako okulilongesa otyili, avahimbika okulilongesa Oputu. Konyima, ombunga aikuatesako okuonganeka ewaneno Lioputu. Mokueenda kuomanima, vakuatesako onongendi ononyingi okukala ovaumbili va Jeova. Sakiko wati: “Tyepuilisile unene okulilongesa Oputu, mahi okulinga ononkhono tyieta ouwa omunene. Onthue tupandula unene Jeova.”​—Tanga Atos 10:34, 35.

11, 12. (a) Omokonda yatyi tuesukisila okukala nolusoke luaviuka luokulivaleka omunthu omupe? (b) Oityi matyitukuatesako okuliola omutima?

¹¹ Onthue tulivaleka omunthu omupe opo tuavele omunkhima Jeova, hapala tunkhimanekwe na vakuetu. Hinangela okuti alo umwe oandyu ihena nkhali, yakala nomalityindailo ailingi onkhali. (Tyieleka na Ezequiel 28:17.) Mahi mokonda tuvakuankhali, tyipondola okupuiya okulityilika omalityindailo. Moluotyo, tuna okulivaleka omutima weliola. Oityi matyitukuatesako okutyilinga?

¹² Otyipuka tyimwe matyitukuatesako okuliola omutima, okutanga Ondaka ya Huku apeho nokusokolola kuetyi tuatanga. (Deuteronômio 17:18-20) Haunene, onthue tuesukisa okusokolola kuetyi Jesus etulongesa no kongeleka yae ihuvisa yokuliola omutima. (Mateus 20:28) Jesus ankho weliola unene omutima etyi akoha onomphai mbo no apostolu mbae. (João 13:12-17) Otyipuka otyikuavo tupondola okulinga okulikuambela ku Jeova okuita ospilitu yae. Ospilitu yae ipondola okutukuatesako okuluisa otyituwa tyokulitala okuti tuakolela vali ku vakuetu.​—Gálatas 6:3, 4; Filipenses 2:3.

13. Ouwa patyi utundilila kokuliola omutima?

¹³ Tanga Provérbios 22:⁠4. Jeova uhanda tuliole omutima. Okuliola omutima tyieta ouwa omunene. Tyina tuliola omutima, ewaneno malikala vali nombembwa nokulikuata okapandi. Tupu, Jeova metuavela okankhenda kae okanene. Apostolu Petulu wati: “Onwe amuho, kalei nomutima weliola kese umwe na mukuavo, mokonda Huku uyele vokulipaka-ko, mahi una okankhenda na vana veliola omutima.”​—1 Pedro 5:5.

14. Olie ongeleka yavilapo yomapole noumphua-lundo?

¹⁴ Hono mouye, inkha omunthu wapola pokati nokuapwa elundo, vakuavo vasoka okuti watopa. Mahi otyo hatyiliko. Ovituwa ovio oviwa vitunda ku Jeova, Omunthu wepondolo aliho mouye auho. Oe ongeleka yavilapo yomapole noumphua-lundo. (2 Pedro 3:9) Mongeleka, soka oñgeni Jeova akala noumphua-lundo etyi akumbulula Abraiau na Lote pokati ko noandyu Mbae. (Gênesis 18:22-33; 19:18-21) Iya soka oñgeni Jeova akala noumphua-lundo etyi elongo lio Isilayeli liemutyitukila-po omanima alamba po 1.500.​—Ezequiel 33:11.

15. Oñgeni Jesus alekesa omapole noumphua-lundo?

¹⁵ Jesus ankho “wapoleya.” (Mateus 11:29) Ankho wapua unene elundo noviponyo vio valongwa vae. Mokueenda kuovilinga viae viokuivisa pano pohi, ovikando ovinyingi Jesus wamonesilue ononkhumbi nokutendeleyua. Mahi ankho wapoleya nokuapwa elundo alo kononkhia mbae. Etyi Jesus aihamenwa unene momuti wemone, waitile ku Tate yae opo aevele ovalume ankho vekahi nokumuipaa. Wati: “Etyi vekahi nokulinga kavetyii.” (Lucas 23:34) Namphila Jesus ankho anumana ine aihamenwa, mahi watuaileko nomapole noumphua-lundo.​—Tanga 1 Pedro 2:21-23.

16. Oñgeni tupondola okulekesa omapole noumphua-lundo?

¹⁶ Paulu wapopia onkhalelo imwe onthue tupondola okulekesa omapole noumphua-lundo etyi ahoneka okuti: “Tualeiko okukoleleya ovipuka vakuenyi vemulinga nokulievela nomutima auho alo umwe ankho pena ou wemulinga otyipuka tyinumanesa. Ngetyi Jeova emuevela nomutima auho nonwe otyo muna okulinga.” (Colossenses 3:13) Opo tuevele vakuetu, tuesukisa okukala nomapole noumphua-lundo. Otyo matyieta ewaneko mewaneno.

17. Omokonda yatyi omapole noumphua-lundo viakolela?

¹⁷ Jeova uhanda tukale nomapole noumphua-lundo na vakuetu. Ovituwa ovio viakolela unene inkha tuhanda okukakala mouye omupe. (Mateus 5:5; Tiago 1:21) Tyina tuna omapole noumphua-lundo, tunkhimaneka Jeova iya tukuatesako vakuetu navo vetyilinge.​—Gálatas 6:1; 2 Timóteo 2:24, 25.

18. Oñgeni ohole nokuhalingi okapungulula vielikuata kumwe?

¹⁸ Ovituwa tuelilongesa aviho vielikuata nohole. Mongeleka, omulongwa Tiago waviyulile ovakuatate vae mokonda ankho vatekula vali nawa vokuamona tyipona vana vokuahepa. Wapopia okuti otyo katyelikuatele notyitumino tya Huku tyokukala “nohole na mukuenyi ngetyi ulihole ove muene.” Konyima ayawisako okuti: “Inkha mutualako okukala nokapungulula, mukahi nokukuata onkhali.” (Tiago 2:8, 9) Inkha tuna ohole novanthu, kamatulingi okapungulula nomunthu nawike mokonda yokuhatangele unene, ine otyivala tyae ine omokonda yomunkhima. Katupondola vala okuhalingi okapungulula. Mahi okuhalingi okapungulula tyina okukala otyituwa tyetu.

19. Omokonda yatyi tyakolela tulivaleke ohole?

¹⁹ Tupu ohole “ipwa elundo nokankhenda” tupu “kailipake-ko.” (1 Coríntios 13:4) Tuesukisa okukala noumphua-lundo, nokankhenda, nomutima weliola opo tutualeko okupopila ovo munthele yetu onondaka onongwa. (Mateus 28:19) Ovituwa ovio, tupu vitukuatesako okulitekula nawa novakuatate aveho no nomphange mewaneno. Tyina atuho tulekesa ohole kese wike, omawaneno etu maelikuate okapandi iya atyinkhimaneka Jeova. Ovanthu mavaimbuka okuti tuelikuata okapandi iya matyivelundo okulilongesa otyili. Tyayandyuluka nawa okuti, Ombimbiliya ipopia konthele yomunthu omupe okuti: “Haunene kalei noluembia, mokonda luwaneka nawa ovanthu.”​—Colossenses 3:14.

20. (a) Omapulo patyi tuesukisa okulipula? Omokonda yatyi? (b) Ouwa patyi tukevelela komutwe wandyila?

²⁰ Tupondola okulipula okuti: ‘Omapiluluko patyi nesukisa okulinga opo ndyililule nokutualako okulilula omunthu wokohale?’ Tuna okulikuambela ku Jeova okuita opo etukuateseko. Tuesukisa okuundapa unene opo tupilulule omalusoke omavi novipuka ovivi tulinga opo “tukapiñgane Ouhamba wa Huku.” (Gálatas 5:19-21) Tupu tuesukisa okulipula okuti: ‘Ndyitualako okupilulula onkhalelo yange yokusoka opo ndyipandwe na Jeova?’ (Efésios 4:23, 24) Mokonda tuvakuankhali, tuesukisa okulinga ononkhono ononene opo tulivaleke nokutualako okuvala omunthu omupe. Otyo, otyipuka tuna okulinga apeho. Matukala nomuenyo umwe omuwa tyina ovanthu aveho vamelivaleka omunthu omupe iya avahetekela nawa-nawa ovituwa oviwa via Jeova!