ELONGESO 59
Motyivili Okukoleleya Ononkhumbi
Ovanthu vamwe kavahande Onombangi mba Siovaa. Tupondola umwe okukati-ko ñgaa, nthiki imwe vetulwisa otyo vetumonesa ononkhumbi tuyekepo okulingila Siovaa. Okuti pahe otyipuka otyo matyitutilisa owoma?
1. Omokonda yatyi tyahandela vala okukala tyityii okuti nthiki imwe matumoneswa ononkhumbi?
Ombimbiliya yati: “Aveho vahanda okufenda Huku kumwe na Kilisitu Sesusi tupu navo mavakahataikiswa.” (2 Timotiu 3:12) Sesusi ovanthu ankho vemuyele mokonda kalingi ovipuka ovanthu vo mouye wa Satanasi valinga. Ovatumini vamwe novanthu vonongeleya mbumwe, kavetuhande mokonda no onthwe tulinga umwe nga Sesusi. Katulipake movipuka viouye uno wa Satanasi. — Suau 15:18, 19.
2. Oityi tuna okulinga pahetyino opo ha tuahasoye tyina tuamamoneswa ononkhumbi?
Tuna okupameka onthumbi yetu mu Siovaa pehepano. Mahi pahe matutyilingi ñgeni? Tuna okutanga Ombimbiliya ononthiki ambuho, nokulikuambela, nokuenda komaliongiyo aeho. Pamwe vetumonesa ononkhumbi, vahahande tulingile Siovaa, ombunga yetu muene. Mahi ine apeho tulinga umwe vala ovipuka ovio vitatu, nii kamatutili owoma. Omu apositolu Paulu wamonesilwe unene ononkhumbi novanthu ankho veyele Ovakilisitau. Mahi tala onondaka ombu ahoneka, wati: “Siovaa omukuatesiko wange; ame himakala nowoma.” — Ova Hebeleu 13:6.
Otyipuka otyikwavo tupondola okulinga pehepano opo ha tuahatile owoma, okulongesa vakuetu Ombimbiliya. Ovilinga ovio vitulongesa okuyumba onthumbi mu Siovaa, atuahatili owoma ovanthu. (Provérbios 29:25) Ine pahetyino tulikuatehila tulongese vakuetu Ondaka ya Huku, ovatumini nga vetuilika vala okufenda Siovaa, kamatutili owoma, atuyekepo okulongesa vakuetu Ombimbiliya. — 1 Ova Tesalonika 2:2.
3. Tyina tumonesiwa emone atukoleleya, tupolapo-tyi?
Petupu ou utyihole tyokumonesiwa emone. Mahi tyina tumonesiwa emone, atukoleleya, atuahayekepo Siovaa, opo oupanga wetu nae upama vali, atumuyumbu vali onthumbi. Ñgeni ngotyo? Tyina tuehena vali ononkhono, Siovaa utukuatesako, no onthwe atutyimono umwe okuti hanthue-ko vala tuetyivila kononkhono mbetu. (Tanga Tiaku 1:2-4.) Ombimbiliya yati: ‘Ine mukoleleya ononkhumbi mokonda mukahi nokulinga otyiwa, otyo tyihambukiswa Huku.’ Tyina tumoneswa ononkhumbi, Siovaa nae tyimuihama. Mahi uhambukwa unene tyina etutala tuli nokukoleleya. (1 Petulu 2:20) Naina ine tukoleleya, Siovaa meketuavela omwenyo wahapu mouye omupe, muahamakakala vali ovanthu veyele ava vemuhole. — Mateusi 24:13.
KUHANDE OKUNOÑGONOKA VALI?
Momono okuti tyitavela okukakatela mu Siovaa na tyina umwe tumonesiwa ononkhumbi. Tupu molilongesa okuti tyina tukoleleya, atuahayekepo Siovaa Huku, tupolako ouwa.
4. Ine vombunga yove vekumonesa emone, koleleya vala
Sesusi wapopile umwe nawa okuti pamwe ombunga yetu kamavahande tulingile Siovaa. Tangei Mateusi 10:34-36, amutomphola epulo eli:
Tyina tuamapopila vetu okuti tuna nokulilongesa Ombimbiliya, tuahanda okulingila Siovaa, vapondola okutulinga-tyi?
Talei OVIDIU, mutale ovanthu vamwe valingilwe umwe etyi Sesusi apopile. Tyina muamatale ovidiu, amutomphola epulo eli:
Oityi molingi ine omapanga ove, hamwe ombunga yove, vekukuluminya uyekepo okufenda Siovaa?
Tangei Salmo 27:10 na Maluku 10:29, 30. Tyina muamatange otesitu ike, amutomphola epulo eli:
Oñgeni okuhinangela onondaka mbo tesitu ei, matyikupe ononkhono wahaponwe tyina hamwe ombunga yove nomapanga ove vahahande ufende Siovaa?
5. Wahayekeko okulingila Siovaa na tyina umwe umonesiwa ononkhumbi
Pamwe ovanthu mavalingi ovipuka vimwe vetusoyese tuyekepo okulingila Huku yetu Siovaa. Ponohika ngo opo, tyesukisa umwe okukola omutima, atuahatili owoma Talei OVIDIU, amutomphola epulo eli:
Okuti hamwe ovanthu ava tuamona movidiu, vekupameka omutima?
Tangei Ovilinga 5:27-29 nomukanda Ova Hebeleu 10:24, 25. Tyina muamatange otesitu ike, amutomphola epulo eli:
Omokonda yatyi tuesukisila okuahayekeko okulongesa vakuetu Ombimbiliya, nokuenda komaliongiyo, naapa umwe ovatumini vetuilika-tyo?
6. Siovaa mekukuatesako otyivili okukoleleya
Mouye auho, Onombangi mba Siovaa, tyati umwe novakuendye novakulu, vamonaiswa-monaiswa-le ononkhumbi, mahi avahayekepo Huku yavo Siovaa. Oityi tyihole okuvekuatesako? Talei OVIDIU, amutomphola epulo eli:
Oityi tyakuatesako ovanthu ava tuamona movidiu, avakoleleya umwe, avahayekepo Siovaa?
Tangei Ova Loma 8:35, 37-39 nomukanda Ova Filipu 4:13. Tyina muamatange otesitu ike, amutomphola epulo eli:
Oñgeni etyi tyapopia otesitu ei tyilekesa okuti ove upondola okukoleleya naapa umwe ovipuka viatokota, ohayekepo okulingila Siovaa?
Tangei Mateusi 5:10-12, amutomphola omapulo aa:
Okuti ñgaa tyitavela umwe okuhambukwa tyina tuli nokumoneswa emone? Oityi wapopila ngotyo?
Ovanthu ovanyingi Onombangi, kavayekelepo Siovaa naapa umwe ovipuka ankho vialema. No ove utyivila!
OVANTHU VAMWE VATI: “Ame ine vetumonesa ononkhumbi, himetyivili-ale okulikuatehila, mandyiyekeko vala!”
Ono tesitu patyi mbupondola okupameka omunthu ngo oo?
ETYI WELILONGESA
Wamona okuti tyina ovanthu vetumonesa emone, mahi atulikuatehila, Siovaa uhambukwa. Tupu wamona okuti Siovaa utukuatesako opo tukoleleye tyina tumonesiwa emone.
Okupitulula
Oityi tuahatumphulukila tyina ovanthu vetumonesa emone?
Oityi una okulinga pahetyino opo ha wahasoye tyina wamamoneswa ononkhumbi?
Oityi una okuhinangela apeho opo uyumbe-ko onthumbi okuti Siovaa una ove, mekukuatesako?
KUHANDE OKUOVOLA VALI?
Omukuendye umwe wapopia oñgeni Siovaa emukuatesileko etyi apakwa mokaleya mokonda yokuehetavela okukala etolopa.
Ovakulu ava, kotyilongo tyavo, tundee kohale ovanthu kavahande Onombangi mba Siovaa. Oityi tyevekuatesako okukoleleya, avahayekepo otyili?
Onthele ei ipopia etyi tuna okulinga tuahatile owoma tyina ovatumini vametuilika okufenda Siovaa.
“Lipongiya Pahetyino Opo Ukoleleye Tyina Tumoneswa Ononkhumbi” (Omutala Womulavi wa Julho yo 2019)
Oityi tuna okulinga tulivile na vakuetu meumbo na tyina umwe vetumonesa emone mokonda yokufenda Siovaa? Ouwa patyi tupola-ko tyina tulikuatehila atuahasoyo?
Otyili “Katyieta Ombembwa, Mahi Tyieta Omutunga” (Omutala Womulavi wa Outubro yo 2017)