Ovanthu vamwe okupopia otyinepo tyopoula tyivekala omapita. Mahi Ombimbiliya ityipopia umwe nawa-nawa, otyo ngwe kaitukana ovanthu. Otyipuka Ombimbiliya ipopia otyinepo tyopoula, okutyisoka umwe nawa, tyaviuka. Mahi omo umwe, tyina umwe okuviuka mokonda Ombimbiliya o Yomutungi wetu Siovaa. Atyiho Siovaa apopia, opala ouwa wetu muene! Utupopila etyi tuna okulinga tumuhambukiswe opo ha tukakaleko apeho.

1. Oñgeni Siovaa Huku atala otyinepo tyopoula?

Otyinepo tyopoula otyipuka tyimwe otyiwa Siovaa aavela ovanthu! Mahi wapopia okuti tyina vala okulingwa novanthu vevali velinepa. Oityi apopila ngotyo? Omokonda tyina vokuelinepa valinga otyinepo tyopoula, oupanga wavo upama vali, tupu vetyivila okukala novana. Ombimbiliya yapopia okuti: “Hambukilwa omuhikuena muelinepa nae puetyi ankho umukuendye.” (Provérbios 5:18, 19) Siovaa uhanda ovanthu vokuelinepa velikuate-po atee-tee, apahamono nawike uyapuka oula. — Tanga Ova Hebeleu 13:4.

2. Oityi Siovaa ahahande tyilingwe?

Ombimbiliya yati: ‘Vana valinga ovipengi kavakanyingila Mouhamba wa Huku.’ (1 Ova Kolindu 6:9, 10) Ondaka oyo yokuatiwa ovipengi, melaka lyo Ngeleku, ondaka porneia. Mo Mbimbiliya, ondaka oyo porneia,a ipopia (1) ovanthu valala kumwe mahi otyo vehelinepele, (2) ovahikuena valala novahikuena vakuavo, novakuendye valala novakuendye vakuavo, (3) ovanthu valala novinyama. Tyina tuahalingi ovipuka ovio viasila, tuhambukiswa Siovaa, no onthwe vala muene tukala nawa. — 1 Ova Tesalonika 4:3.

KUHANDE OKUNOÑGONOKA VALI?

3. Enda-nkholo ovinepo viasila

Kwali omukuendye umwe ankho uhole Huku utiwa o Susee. Nthiki imwe, omuhikuena umwe aende ku Susee, emukengelela alale nae. Susee ehetavela, akahateka. Tangei Gênesis 39:1-12, amutomphola omapulo aa:

• Omokonda yatyi Susee aila-nkholo? — Tala povelesikulu 9.

• Ku ove, Susee walinga wakahateka? Oityi wapopila ngotyo?

OVIDIU: Enda-nkholo Ouhayo Wotyihola (5:06)

Siovaa kahande tulinge ovinepo viasila. Tangei 1 Ova Kolindu 6:18, amutomphola omapulo aa:

• Oityi tyipondola okulingisisa omunthu, akalinga umwe otyipuka tyasila, Huku eyele?

• Tyina utala ñgaa, ovipuka patyi upondola okulinga wehelipake movinepo viasila?

4. Wehetavele tyina uhongiliyua

OVIDIU: Tanga Ombimbiliya Ononthiki Ambuho Opo Wehetavele Okuhongiliyua (3:02)

• Etyi omukuendye walekeswa movidiu etyimona okuti ngoti ankho uli nokuhanda omuhikuena omukuavo, oityi alinga?

Novanthu umwe omapanga omanene a Siovaa, pamwe vapondola okusoka kovipuka viasila. Mahi pahe oityi ove una okulinga wahasoke unene kovipuka ovio? Tangei Ova Filipu 4:8, amutomphola omapulo aa:

• O kovipuka patyi tuna okusoka?

• Oñgeni okutanga Ombimbiliya, nokuundapa unene movilinga vya Siovaa tyitukuatesako atuehetavela tyina tuhongiliyua okulinga ovinepo viasila?

5. Etyi Siovaa etupopila, opala ouwa wetu muene

OVIDIU: Omunthu Uhena Onondunge (9:31)

• Oñgeni omukuendye oo ekelipaka motyitateka? — Tala Provérbios 7:8, 9.

• Omukanda wa Provérbios 7:23, 26, upopia umwe nawa okuti omunthu wokulinga ovinepo viasila ulietela vala. Ovitateka patyi tulityilika tyina tutavela etyi Siovaa apopia, atuahalingi ovinepo viasila?

• Oviwa patyi matukamona komutwe wandyila ine tulikuatehila atuahalingi ovipuka viasila?

Ombimbiliya iilika ovalume okulala poyavo, novahikuena okulala poyavo. Ovanthu vamwe vehole okupopia okuti, ‘opo Huku kapopile nii.’ Mahi Siovaa Huku uhole unene ovanthu; uhanda aveho vakakale-ko apeho. Opo tukakale-ko apeho, atuhambukwa vala ononthiki ambuho, tuna okutavela atyiho Ngwe apopia. Tangei 1 Ova Kolindu 6:9-11, amutomphola epulo eli:

• Okuti Huku wailika umwe vala ovalume okulala poyavo, novahikuena okulala poyavo, ine wailika novipuka ovikwavo vali?

Opo tuhambukiswe Huku, atuho tuna ovipuka vimwe tuna okuyekapo. Tangei Salmo 19:8, 11, amutomphola omapulo aa:

• Okuti ovipuka Siovaa etutuma tuvilinge, onthwe tuvivila umwe okuvilinga? Oityi wakumbululila ngotyo?

ETYI WELILONGESA

Siovaa wapopia okuti otyinepo tyopoula tyilingwa umwe vala na ava velinepa.

Okupitulula

• Ovipuka patyi viasila viayemba kotyinepo tyopoula, Siovaa atuma tulityilike-vyo?

• Oityi tuna okulinga tuehelipake movinepo viasila?

• Ouwa patyi tupola-ko tyina tulinga etyi Siovaa etutuma?

KUHANDE OKUOVOLA VALI?

Tala oityi Huku ahandela ovalinepi velihonekese kombonge.

“Okuti Ombimbiliya Itavela Ovanthu Vehelihonekesile Kombonge Vakale Kumwe?” (Mo jw.org)

Ombimbiliya ipopia okuti omuhikuena kapondola okulala na muhikuena mukuavo, omukuendye kapondola okulala na mukuendye mukuavo, tyapenga. Okuti pahe ovanthu vokulinga ovipuka ovio vena umwe vala okulingwa onya?

“Okuti Tyapenga Omukuendye Okulala na Mukuendye Mukuavo?” (Mo jw.org)

Etyi Huku apopia tyayemba kotyinepo tyopoula opala ouwa wetu vala.

“Okuti Okukwata Olutu Lwove Olupake Komulungu wa Mukwenyi Tyitupu Etyi Tyilinga?” (Mo jw.org)

Omukulu ou puetyi ankho omukuendye ankho ulala na vakuendye vakuavo. Mahi oityi apilulukila akala omunthu uhambukiswa Huku. Tanga onthele yati: “Kavandingile Omukuele.”

“Ombimbiliya Ipilulula Omuenyo Wovanthu” (onthele Yomutala Womulavi)

Kovilongo vimwe, vati opo omunthu akale umwe nawa, una okunepa. Mahi kuna ovanthu vamwe vanepa, otyo vehena ehambu. Tupu otyo kuna vamwe vahanepele mahi vekahi vala nawa, vena ehambu. Ombimbiliya ipopia okuti tyilinge okunepa, tyilinge okuahanepe, atyiho tyikahi nawa.

1. Pamwe omokonda yatyi otyiwa okuahanepe?

Ombimbiliya yati: ‘Una wanepa walinga nawa, mahi una wahanepele walinga vali nawa.’ (Tanga 1 Ova Kolindu 7:32, 33, 38.) Oityi Ombimbiliya yapopila okuti omunthu wahanepele walinga vali nawa? Omokonda vokuahanepele, no vokuahanepelwe, vena vali omuvo wokulinga ovipuka ovikwavo. Vapondola okuenda kovilongo ovikwavo vakalongese ovanthu Ombimbiliya, vetupu etyi tyivetyika. Vena vali omuvo wokulilongesa nawa Ombimbiliya vapameke oupanga wavo na Siovaa.

2. Omokonda yatyi vana vokuhanda okulinepa vesukisila okulihonekesa?

Okuahanepe tyikahi nawa, mahi tupu motyinepo muna oviwa. Ombimbiliya yapopia okuti “hahe vevali tyipona wike.” (Eclesiastes 4:9) Tyina vokuelinepa valinga etyi tyili mo Mbimbiliya, vakala notyinepo tyina ehambu. Mahi omokonda yatyi vokuelinepa vesukisila okulihonekesa? Omokonda ovanthu tyina vati pokulihonekesa, velipopila okuti mavelihumbu, avakala kumwe atee-tee. Ovanthu vokulihonekesa, vakala umwe nawa. Omitima viavo vikala pomphangu mokonda vetyii okuti mukuavo kamemuyekela-po tyawina. Novana vakala nawa mokonda vetyii okuti ovohe kamaveliyeke vala ngotyo. Mahi vokuehelihonekesile, hatyo-ko vakala ngotyo.

3. Oñgeni Siovaa atala otyinepo?

Etyi Siovaa anepesa ovo Andau na Eva, evepopila onondaka ombu mbati: “Omulume akasepo he na ina, akakuata-po omukai wae.” (Gênesis 2:24) Siovaa wati ovalinepi vena okulihumba, avakala kumwe atee-tee. Tyiveyapula umwe vala, ononkhia. Pahe ine umwe weenda mukuavo konyima? Opo Siovaa wapopia okuti mukuavo, oe muene utyii ankho mavelihenge ine kamavelihenge. Muaina, Siovaa uyeka vala ovanthu velihenge ankho umwe walala nou vehelinepe nae.a (Mateusi 19:9) Omunthu wa Huku kapondola okunepa oluvale. — 1 Timotiu 3:2.

KUHANDE OKUNOÑGONOKA VALI?

4. Ovipuka vimwe vana vahanepele no vokuahanepelwe vapondola okulinga

Ku Sesusi, okuahanepe natyo ankho tyikahi nawa. (Mateusi 19:11, 12) Tangei Mateusi 4:23, amutomphola epulo eli:

• Ovipuka patyi Sesusi alingile, mahi mokutala wetyivilile umwe vala okuvilinga aviho mokonda ankho kanepele?

Vokuahanepele no vokuahanepelwe, navo vapondola okulingila Siovaa ovipuka ovinyingi nga Sesusi. Ine otyo valinga ngotyo, mavakala nawa, avahambukwa. Talei OVIDIU, amutomphola epulo eli.

OVIDIU: Vetupu Omapata Mahi Vehole Unene Huku (3:11)

• Ovipuka patyi vokuahanepele no vokuahanepelwe, vapondola okulinga movilinga vya Huku?

Okuti ankho utyii-ale

Ombimbiliya kaipopi omanima eñgapi omunthu ena okunepa nao. Mahi ipopia okuti hahe okunepa, tyina pahe omunthu ahasoko vali unene okulinga otyinepo tyopoula. Omokonda yatyi? Omokonda pahe opo omunthu masoko umwe nawa, akoyo umwe nawa; kamanepe vala opo alinge otyinepo tyopoula. — 1 Ova Kolindu 7:36.

5. Holovona nawa omunthu mamulinepe nae

Pokukoya omunthu matulinepe nae, tuna umwe okusoka nawa mokonda otyinepo hatyipuka tyokunyana. Tangei Mateusi 19:4-6, 9, amutomphola epulo eli:

• Oityi tyahandela umwe okusoka nawa tyina tuya pokunepa, atuahatumphuluka vala natyo?

Ombimbiliya ipopia ovipuka vimwe tuna okuovola komunthu tuahanda ñgeno oe tulinepa nae. Mahi tete tuna okuovola omunthu uhole Siovaa.b Tangei 1 Ova Kolindu 7:39 na 2 Ova Kolindu 6:14, amutomphola omapulo aa:

• Oityi tyahandela okulinepa vala nomunthu ufenda Siovaa?

• Tyina usoka, oñgeni Siovaa makala ine tulinepa nomunthu wehemuhole?

6. Otyinepo tyikola

Kohale, ova Isilayeli vamwe, ankho vahengela tyawina ovakai vavo. Tangei Malaquias 2:13, 14, 16, amutomphola epulo eli:

• Omokonda yatyi Siovaa anumanena tyina ovanthu velihenga, apehena ou waenda mukuavo konyima?

Talei OVIDIU, amutomphola epulo eli:

OVIDIU: Otyinepo — Ewaneko Lihapu (4:30)

• Ine omunthu muelinepa nae kafende Siovaa, oityi upondola okulinga mukale nombembwa meumbo, amukala nehambu?

7. Linga atyiho Siovaa apopia tyayemba kotyinepo

OVIDIU: No Ove Motyivili Okulinga Atyiho Siovaa Apopia Tyayemba Kotyinepo (4:14)

Tangei Ova Hebeleu 13:4, amutomphola omapulo aa:

• Ku ove, etyi Siovaa apopia okuti vokuelinepa kavapondola okuyapula omaula, tyaviuka? Tyivilwa umwe okutyilinga? Oityi wakumbululila ngotyo?

Siovaa uhanda ñgeno ovanthu aveho vahanda okulinepa, velihonekesa kukaputu. No putyina ovanthu va Huku vahanda okulihenga, vena okulinga omikanda viokulihenga. Tangei Titu 3:1, amutomphola epulo eli:

• Ine muelinepa, okuti otyinepo tyenyi tyiiwe kombonge?

ETYI WELILONGESA

Welilongesa okuti tyilinge ava vanepa, tyilinge ava vahanepele, aveho vapondola okukala nawa, avahambukwa. Vena umwe vala okulinga atyiho Siovaa atuma.

Okupitulula

• Ovipuka patyi vokuahanepele no vokuahanepelwe vapondola okulinga movilinga vya Huku?

• Oityi Siovaa ahandela tulinepe umwe vala nomunthu umufenda?

• Oityi Ombimbiliya yapopia okuti otyo umwe vala tyipondola okulihengesa?

KUHANDE OKUOVOLA VALI?

Onondaka mbokuati tuna ‘okulinepa vala mu Tatekulu,’ mbahanda okutiwi?

“Omapulo Ovatangi” (Omutala Womulavi 1 ya Julho yo 2004)

Ovidiu ei, ipopia ovipuka vimwe vokuhanda okunepa vapondola okulinga.

Oñgeni Molifuika Pala Okunepa? (11:53)

Omukuendye ou wapopia okuti ovipuka Siovaa emuavela ena-vyo pehepano, vili vali nawa tyipona evi asapo.

Ankho Ndyisoka Okuti Nae Metavela Okulilongesa Ombimbiliya (1:56)

Oityi omunthu ena okusoka tete, tyina vehenelihenge na tyina vehenelinyunguluke?

Humba “Etyi Huku Apaka Kokanga Ike” (Omutala Womulavi wa Dezembro yo 2018)