“Eyovo Liove Likahi Popepi”!

 1. Ovipuka patyi viaendeleko menima lio 66? (Tala olutalatu pefo pahimbikila onthele.)

SOKA ñgeno Umukristau wakalele mo Jerusalem menima 66. Kuandele ovipuka ovinyingi. Omutumini wo Roma Floro wavaka olumono mondyuo ya Huku, (17 talento). Ova Judeu liwa-liwa avanumana. Avaipaa omafualali omanyingi o Roma, avatyitukilapo outumini wo Roma. Ova Roma liwa-liwa avahindi ovilwa. Mo nohanyi ononthatu, omafualali ena 30.000 ekahi nokuhongolelwa na Céstio Galo aelisete no Jelusalei. Ova Judeu vokuehetavelele ankho veli mokati kovimato viondyuo ya Huku, mahi omafualali o Roma ankho eli kondye iya ahanda okuviteyapo. Aveho ankho veli mo Jelusalei avatili owoma. Oñgeni ove ñgeno welitehelela inkha wamuene ovipuka ovio aviho?

 2. Oityi Ovakristau ankho vesukisa okulinga etyi omafualali o Roma eliseta nepundaumbo, iya okuti ankho tyitavela okutyilinga?

² Omanima okualamba Jesus walondolele ovalongwa vae konthele yotyo, evelongesa okuti: “Tyina muamamono omafualali eliseta no Jelusalei, noñgonokei okuti ehanyauno liayo likahi popepi. Iya vana vekahi mo Judeia vahimbike okuenda no konomphunda, vana vekahi mokati ko Jelusalei, vatundemo, iya vana vekahi komapia vahanyingilemo vali.” (Lucas 21:20, 21) Oñgeni ankho matyitavela okulandula elondolo lia Jesus liokutunda mo Jelusalei, tyina omafualali o Roma ankho eliseta nepundaumbo olio? Apamoneka otyipuka tyimwe tyihuvisa. Omafualali o Roma liwa-liwa asipo o Jelusalei. Ngetyi Jesus apopile, ovilwa ovio ‘avitepululwa.’ (Mateus 24:22) Puetyi omafualali o Roma asapo epundaumbo olio, ankho omphitilo opo Ovakristau aveho vekolelo vetavele elondolo lia Jesus liokutilila konomphunda.a (Tala pokatoi.) Konyima, menima 70, omafualali o Roma akondoka vali ko Jelusalei. Menima olio, ahanyepo epundaumbo lio Jelusalei. Mahi aveho vetavelele elondolo lia Jesus, vahupile.

 3. Otyipuka patyi matyikamonekela Ovakristau apa katutu, iya oityi matulilongesa monthele ei?

³ Elondolo lia Jesus, nonondonga mbae tupu mbakolela hono. Apa katutu, matukala motyitateka ngotyo. Jesus wapopia ovipuka viamonekele potyita tyotete opo ahangunune etyi matyikamoneka “mononkhumbi onene” mambuhimbika apa katutu. (Mateus 24:3, 21, 29) Ngetyi Ovakristau vekolelo vahupile kehanyauno lio Jelusalei, tupu “otyinyingi tyovanthu” matyikahupa kotyiponga matyiya mouye auho. (Tanga Revelação 7:9, 13, 14.) Tyakolela unene tunoñgonoke etyi Ombimbiliya ipopia konthele yovipuka maviya komutwe. Omokonda yatyi? Omokonda omuenyo wetu utei kenoñgonoko olio. Matulilongesa oñgeni ovipuka ovio maviketukalesa.

 4. Oñgeni ononkhumbi ononene mabuhimbika?

⁴ Oñgeni ononkhumbi ononene mabuhimbika? Mambuhimbika nehanyauno lionongeleya mbomatutu. Mombimbiliya, onongeleya mbomatutu mbuihanwa okuti “Ombambilonia Onene, ina yomakunga.” (Revelação 17:5-7) Omokonda yatyi onongeleya mbomatutu mbuihanenwa okuti ekunga? Omokonda ononkhalamutwe mbatyo mbutupu ekolelo mu Huku. Kavakuatesako Jesus Nouhamba wae, mahi vakuatesako ovatumini iya vaanya ondongeso Yombimbiliya opo vakale vali nomunkhima. Efendelo liavo kalikahi ngefendelo liasukuka liovalembulwa. (2 Coríntios 11:2; Tiago 1:27; Revelação 14:4) Mahi olie makahanyako Ombambilonia Onene? Jeova makaundapesa “onombinga ekwi” mbo “tyinyama tyikuhuka” opo “akafuisepo olusoke lwavo.” “Otyinyama tyikuhuka” tyilekesa o Nações Unidas iya onombinga ekwi mbulekesa ovatumini aveho vopulitika vevekuatesako.​—Tanga Revelação 17:3, 16-18.

5, 6. Omokonda yatyi tupopila okuti ehanyauno lio Mbambilonia Onene katyihangununa okuti aveho velimo mavahanyuako?

⁵ Okuti aveho veli monongeleya mbomatutu mavankhi tyina Ombambilonia Onene ihanyuako? Au. Jeova watumine omuuli Zakaria ahoneke etyi matyikamoneka. Pomuwo opo, omunthu umwe ankho uli mongeleya makapoia okuti: “‘Ame himuuli. Ame ndyimulimi mokonda natekulwa nomulumi tunde etyi ndyimututu.’ Iya inkha umwe umupula okuti, ovipute patyi evi unavio kolutu luove? Iya makumbulula okuti, ‘Ovipute napola keumbo liomapanga ange.’” (Zacarias 13:4-6) Ngotyo ononkhalamutwe mbonongeleya mavakaanya okuti valinga onthele yonongeleya mbomatutu.

⁶ Oityi matyikamoneka novanthu va Huku mokueenda kuomuvo oo? Jesus wahangununa okuti: “Tyotyili, inkha ononthiki ombo kambatepululilwe, ñgeno petupu omunthu nawike wayovoka. Mahi, mokonda yovokuaholovonwa, ononthiki ombo mambukatepululwa.” (Mateus 24:22) Potyita tyotete, ononkhumbi mo Jelusalei “mbatepululiwe.” Otyo atyaavela omphitilo “vokuaholovonwa,” Ovakristau ovalembulwa, opo vatundemo. Tyelifwa notyo, tyina ononokhumbi onene mbuhimbika “mambutepululwa” mokonda “yovokuaholovonwa.” Ovatumini vopulitika, “onombinga ekwi,” kamavayekwa okuhanyako ovanthu va Huku. Ngotyo, tyina ovanthu va Huku vamautukilwa otyikando tyotete, konyima mapakala okamuvo kehehi kombembwa.

7, 8. Omphitilo patyi matukakala nayo tyina onongeleya mbomatutu mbamahanyuako? Iya oñgeni ovanthu va Huku mavekelikalela novanthu aveho?

⁷ Oityi matyikamoneka tyina onongeleya mbamahanyuako? Oo, omuwo wokulekesa oityi tyilityili tyikahi momutima wetu. Pomuwo opo, ovanthu ovanyingi mavakaovola ondyakulilo momaongano ovanthu, aelekwa “nomaleva onomphunda.” (Revelação 6:15-17) Mahi ovanthu va Jeova mavayumbu onthumbi mondyakulilo yae. Etyi ovilwa “viatepululwa” potyita tyotete, ankho petupu vali omuvo opo ova Judeu aveho onomphuki vakale Ovakristau. Mahi, ankho omuvo opo Ovakristau vatunde mo Jelusalei ngetyi Jesus apopile. Tyelifwa notyo, komutwe wandyila tyina ovilwa vio Mbambilonia Onene “viamatepululwa” katupondola okukevelela ovanthu ovanyingi vakale Ovakristau. Mahi, oyo omphitilo opo ovafendi aveho votyotyili valekese oluembia vena na Jeova, nokukuatesako ovalembulwa.—Mateus 25:34-40.

⁸ Katutyii nawa-nawa etyi matyikamoneka mokueenda kuomuvo wokulolwa. Mahi, katupondola okukevelela okuti omuenyo maukapepuka, matukesukisa okulikuatesila unene. Potyita tyotete, Ovakristau vatundile momaumbo avo iya avakoleleya movitateka opo vahupe. (Marcos 13:15-18) Tuesukisa okulipula okuti: ‘Nafuapo pala okuyekapo omalumono? Nafuapo pala okulinga atyiho ndyivila opo ndyitualeko okukala omukuatyili ku Jeova?’ Pomuvo opo namphila matukakala novitateka, matukafenda vala Huku yetu ngetyi tyalingile Daniele.​—Daniel 6:10, 11.

9, 10. (a) Onondaka patyi ovanthu va Huku mavakapopia mokueenda kuononkhumbi ononene? (b) Oityi onondyale mbovanthu va Huku mambukalinga?

⁹ Mononkhumbi onene hamuvo vali wokuivisa “onondaka onongwa Mbouhamba.” Omuvo wokuivisa opo walambale. Opo pahe omuvo “wonthyulilo” wehikapo! (Mateus 24:14) Ovanthu va Huku mavakapopia onondaka mbekoyeso mambukatilisa owoma ovanthu aveho. Hamwe onondaka mbokuti ouye wa Satanasi mauhanyuako auho. Ombimbiliya yeeleka onondaka ombo nongandavila, etyi yati: “Kuawa ongandavila imwe onene keulu, kese manya lina ono kilu 20,4 aawila kombanda yovanthu. Ovanthu avahimbika okuhingana Huku mokonda yongandavila oyo, mokonda ankho onene unene.”​—Revelação 16:21.

¹⁰ Onondyale mbetu mambukeiva onondaka ombo mbakola. Jeova watumine omuuli Ezekiele opo ahangunune oñgeni otyikundyi tyomalongo matyikalinga, tyiihanwa Mombimbiliya okuti Goge ya Magoge: “Otyo tyapopia tatekulu Jeova okuti: ‘Iya monthiki oyo omalusoko maeya komutima wove, iya olingi omphango imwe ombi. Iya mopopi okuti: “Mandyiinduka kotyilongo tyihena ovimato. Mandyikehika kovanthu vokuna etuliyo nokuapama. Aveho vakala momaumbo ehena ovimato, nokuhena omapito nomakumba.” Mamupolwa nokupundwa omalumono omanyingi, opo vitualwe kovilongo pahe kuailukila ovanthu oku ovanthu vomalongo vekahi nokulipakela omalumono, vakala pokati kohi.’” (Ezequiel 38:10-12) Ovanthu va Huku mavelikalela novanthu aveho, ngatyina vakala “pokati kotyilongo.” Omalongo kamakahambukwa. Mavahande okuutukila ovalembulwa va Jeova na vana vevekuatesako.

11. (a) Oityi tuesukisa okuhingangela konthele yovipuka mavikamoneka mokueenda kuononkhumbi ononene? (b) Oñgeni ovanthu mavakakala tyina vamamono omanyingilikilo?

¹¹ Oityi matyimoneka konyima? Ombimbiliya kaitupopila tyo, mahi ovipuka vimwe mavikamonekela kumwe. Meulo liae konthele yonthyulilo youye, Jesus wati: “Makukakala omanyingilikilo pekumbi, no pohanyi no pononthungululu. Iya kononthungululu, no kombanda yo ohi makukakala emone liomalongo, ehetyii oityi mavalingi, mokonda yokukoma kuelunga nokuahangayala kualio. Ovanthu mavakaambuka nowoma, mokonda yovipuka mavikeya kombanda yo ohi, tyetyi ononkhono mbokeulu mambukayekwa. Iya mamumono Omona womulume uya mekaka, nepondolo nenkhimano enene.” (Lucas 21:25-27; tanga Marcos 13:24-26.) Okuti okufuisuapo kueulo olio muakutikinya omanyingilikilo atilisa owoma novipuka ovikuavo mavimoneka keulu? Tuesukisa okukevela opo tutale. Mahi, onthue tutyii okuti tyina onondyale mba Huku vamamono omanyingilikilo oo, mavatili owoma nokuhangayala.

12, 13. (a) Oityi matyikamoneka tyina Jesus ameya “nepondolo nenkhimano enene”? (b) Oityi ovaumbili va Huku mavakalinga pomuvo opo?

¹² Oityi matyikamoneka tyina Jesus ameya “nepondolo nenkhimano enene”? Makaamena vana vena ekolelo mwe mahi makahanyako vana vehena ekolelo. (Mateus 24:46, 47, 50, 51; 25:19, 28-30) Jesus waundapesa onthengele popia opo etyihangunune nawa. Wati: “Tyina Omona womulume amehiki menkhimano liae, no noandyu ambuho kumwe nae, mapumphama kotyipundi tyomunkhima wae woutumini. Iya omalongo aeho maakaongiwa kolupala lwae, iya akapungulula ovanthu, ngetyi omunthita apungulula onongi novinkhombo. Iya makapaka onongi kokulio kwae, mahi ovinkhombo ekevipaka kokumbili kwae.” (Mateus 25:31-33) Oityi matyikamoneka nonongi novinkhombo? Ovo mavakakoyeswa. Ovinkhombo ine vana vehena ekolelo “mavakahanyuako pala apeho.” Mahi onongi, ine vana vena ekolelo mavakapewa omuenyo wahapu.​—Mateus 25:46.

¹³ Oñgeni ovinkhombo mavakakala tyina vamaimbuka okuti mavahanyuako? “Mavekeliveta nokuliyavela.” (Mateus 24:30) Oityi matyikalinga ovalembulwa na vana vevekuatesako? Mavakalinga etyi Jesus apopile okuti: “Mahi, tyina ovipuka ovio viamahimbika okumoneka, katukei nokukatula omitwe vienyi, mokonda eyovo lienyi likahi popepi.”​—Lucas 21:28.

14, 15. Ovilinga patyi viokuongiya mavikalingwa tyina Goge ya Magoge amautukila ovanthu va Huku? Iya oñgeni otyo matyikamoneka?

¹⁴ Oityi matyikamoneka tyina Goge ya Magoge amautukila ovanthu va Huku? Ombimbiliya ipopia okuti Omona womulume “makatuma onoandyu nokuongiya ovaholovonwa vae okuhimbikila ko nomphepo ononkhuana, alo oku kuaoyela ohi noku kuaoyela eulu.” (Marcos 13:27; Mateus 24:31) Ovilinga ovio viokuongiya kavilekesa omuvo Ovakristau vahimbika okuholovonwa. Tupu kavilekesa enyingilikilo liahulililako liovalembulwa veli pano pohi. (Mateus 13:37, 38) Enyingilikilo olio malimoneka tyina ononkhumbi ononene mbehenehimbike. (Revelação 7:1-4) Ngotyo, otyilinga tyokuongiya oityi? Omuvo ovalembulwa veli pano pohi mavatambula ondyambi yavo iya avaende keulu. (1 Tessalonicenses 4:15-17; Revelação 14:1) Otyo matyikamoneka tyina Goge ya Magoge amaluisa ovanthu va Huku. (Ezequiel 38:11) Ngetyi Jesus apopile, “ovaviuki mavakaliaima ngekumbi, Mouhamba wa Tate yavo.”—Mateus 13:43.b (Tala pokatoi.)

¹⁵ Okuti otyo tyihangununa okuti ovalembulwa “mavahumphulwa-po okutualwa nokeulu?” Ovanthu ovanyingi vekahi monongeleya Mbovakristau vomouye vetavela okuti Ovakristau aveho mavatualwa keulu nomalutu avo. Tupu vasoka okuti mavakamona Jesus tyina akondoka opo atumine ohi. Mahi, Ombimbiliya ipopia nokuayandyuluka okuti Jesus makondoka monkhalelo yahamoneka etyi yati: “Enyingilikilo Liomona womulume malikamoneka meulu,” iya Jesus meya “nomakaka o keulu.” (Mateus 24:30) Tupu Ombimbiliya yapopia okuti “ohitu nohonde kavikapiñgana Ouhamba wa Huku.” Ngotyo, vana mavatualwa keulu tete vena “okupilululwa mokamuvo kehehi, mokupanyina kueiho, mokueenda kuombendo yahulilila.”c (Tala onondaka pokatoi.) (Tanga 1 Coríntios 15:50-53.) Katuundapesa onondaka “okuhumphulwa-po okutualwa nokeulu” opo tupopia etyi matyilingwa novalembulwa, mokonda matyilifu nomalongeso onongeleya mbomatutu. Mahi, ovalembulwa vekolelo nkhele vekahi pano pohi mavakaongiyua aveho liwa-liwa.

16, 17. Oityi matyimonekapo tyina otyinepo tyo Ndyona tyehenehimbike?

¹⁶ Tyina ovalembulwa aveho 144.000 vamaende keulu, pahe opo otyinepo Tyondyona matyihimbika okupongiyua. (Revelação 19:9) Mahi pena otyipuka matyimoneka tyina otyinepo Tyondyona tyehenehimbike. Hinangela okuti Goge mautukila ovanthu va Huku tyina nkhele ovalembulwa vamwe veli pano pohi. (Ezequiel 38:16) Oñgeni ovanthu va Huku mavalingi? Maveketavela ehongolelo liati: “Kamamukesukisa okulwa. Kalei tyitai, iya amutale eyovo litunda ku Jeova. . . . Muhakalei nowoma ine okuteketa.” (2 Crônicas 20:17) Tyina pamalambe okamuvo kehehi tyina Goge amautukila ovanthu va Huku, ovalembulwa aveho veli pano pohi mavaende keulu. Omukanda wa Revelação 17:14 utupopila etyi matyikamoneka keulu mokueenda kuovilwa via Goge. Onondyale mbovanthu va Huku “mavakalwa Nondyona, mahi mokonda o Tatekulu yo tatekulu iya Ohamba yono hamba, Ondyona maikevetilisa. Tupu, na vana vaihanwa nokuaholovonwa mavakakuatesako ohamba.” Ngotyo, Jesus novalembulwa 144.000 onohamba keulu, mavakayovola ovanthu va Huku pano pohi.

¹⁷ Eyovo olio malieta ovilwa vio Armagedom, avikankhimaneka enyina esukuki lia Jeova. (Revelação 16:16) Aveho vana mavakoyeswa ngatyina ovinkhombo, ine vehena ekolelo, mavakahanyuako. Kamakukakala vali onondingavivi kombanda yohi, iya “otyinyingi tyovanthu” mavakahupa ko Armagedom. Okuhulilako, onthyulilo imwe ihambukiswa yapopiwa momukanda wa Revelação, maihimbika notyinepo Tyondyona! (Revelação 21:1-4)d (Tala onondaka pokatoi.) Aveho mavakahupa pano pohi mavakahambukwa unene mokonda yotyali noluembia olunene lwa Huku. Tukevelela nehambu omuvo oo. Otyipito otyo tyotyinepo matyikahambukiswa unene!​—Tanga 2 Pedro 3:13.

18. Mokonda apa katutu makuya ovipuka vihuvisa, oityi tuatokola okulinga?

¹⁸ Mokonda apa katutu makuya ovipuka vihuvisa, oityi kese umwe ponthue ena okulinga pahetyino? Jeova watumine apostolu Petulu ahoneke okuti: “Mokonda ovipuka ovio aviho mavikasengululwa ngotyo, muna okukala ovanthu patyi. Muesukisa okukala novituwa viasukuka novilinga vilekesa onthilo na Huku, putyina mukevelela nokuanoñgonoka nawa okuya kuonthiki ya Jeova . . . Moluotyo, nonthyolwe, mokonda mukevelela ovipuka ovio, lingei ononkhono opo emuvase muasukuka tyihena esilo na limwe, nokuna ombembwa.” (2 Pedro 3:11, 12, 14) Tutokolei okuanya efendelo liomatutu, atutualako okusukukisa efendelo lietu, nokukuatesako Ohamba Yombembwa, Jesus Kristu.