Lunguka—Satanasi Uhanda Okukulia!

 1. Hangununa oñgeni oandyu imwe yakala Satanasi.

KOHALE wali noupanga omuwa na Jeova. Mahi konyima, oandyu oyo aihande okufendwa novanthu. Ayahatyilika liwa ehando olio liapenga, eliyeke likule alo yalinga onkhali. (Tiago 1:14, 15) Onthue katutyii oñgeni ankho iihanwa, mahi pahe tutyii okuti itiwa o Satanasi. “Katuaileko okukala motyili.” Atyitukilapo Jeova iya akala “he younkhembi.”—João 8:44.

2, 3. Oityi onondaka “Satanasi”, “Eliapu”, “onyoka” “nongandu” mbulekesa konthele yondyale onene ya Jeova?

² Etyi atyitukilapo Jeova, Satanasi akala ondyale imwe onene ya Jeova no yovanthu aveho. Tupondola okutala oñgeni Satanasi omukalavi tyina tutala oñgeni Ombimbiliya ipopia konthele yae. Enyina Satanasi lihangununa okuti “Ondyale,” otyo tyilekesa okuti oandyu oyo ondingavivi iyele outumini wa Huku iya ilwisa outumini oo nepondolo liayo aliho. Satanasi tyili-tyili uhanda outumini wa Jeova wahakaleko vali.

³ Mu Revelação 12:9, Satanasi wihanua okuti Eliapu, tyihangununa okuti “Omutendeleyi.” Satanasi walekesa okuti watomba Huku etyi emuihana okuti onkhembi. Onondaka “onyoka yokonthuko” mbutuhinangelesa oñgeni Satanasi aundapesa onyoka opo ayondye Eva. Onondaka “ongandu enene” tupu mbaviuka pala okupopia Satanasi. Omuipai, omukalavi, ondingavivi. Uhanda okutalameka ehando lia Jeova likahi nokuenda nokomutwe nokuhanyako ovanthu va Huku.

 4. Oityi matulilongesa monthele ei?

⁴ Tyayandyuluka nawa okuti, Satanasi otyiponga otyinene kekolelo lietu. Otyo Ombimbiliya itulondolela okuti: “Lungukei! Mokonda ondyale yenyi Eliapu, likahi nokuenda-enda ngonkheyama ikoma yovola ou maili.” (1 Pedro 5:8) Moluotyo, monthele ei matulilongesa omaliva etatu a Satanasi alekesa omokonda yatyi tuesukisila okuliyakulila kondyale oyo ondingavivi ya Jeova no yovanthu Vae.

5, 6. (a) Popia onongeleka mbulekesa okuti onoandyu mbuna “epondolo enene.” (b) Omonkhalelo patyi Satanasi “aetako ononkhia”?

⁵ Onoandyu mbuna “epondolo enene.” (Salmo 103:20) Mbuna ounongo no nonkhono tyipona ovanthu. Tyotyili, onoandyu mbekolelo mbuundapesa nawa epondolo liambo. Mongeleka, oandyu ike ya Jeova yaipaele omafualali o Asiria 185.000. Omunthu wike ketyivili okulinga ngotyo namphila ena omatolopa omanyingi. (2 Reis 19:35) Otyikando otyikuavo, oandyu imwe yaundapesile ounongo nepondolo opo iyovole ovalongwa va Jesus mokaleya. Namphila omuyungi ankho ekahi popepi, ehetyimono etyi oandyu yaikula omapito aipolomo ono apostolu, konyima aiikipo vali!—Atos 5:18-23.

⁶ Onoandyu mbekolelo mbuundapesa nawa epondolo liambo, mahi Satanasi uundapesa omapita epondolo liae. Iya tyotyili Satanasi una epondolo enene nokutyivila okuhongiliya. Ombimbiliya ipopia Satanasi okuti “omutumini wouye uno” tupu o “huku youye uno.” (João 12:31; 2 Coríntios 4:4) Satanasi alo umwe “weeta ononkhia.” (Hebreus 2:14) Mahi otyo katyihangununa okuti wiipaa ovanthu aveho. Ngotyo, oityi tyihangununa? Tete, mouye mueyula oundyale wa Satanasi nokulipaa. Vali, mokonda Eva wetavelele komatutu a Satanasi iya Andau ehetavela ku Huku, otyo atyietela ovanthu aveho onkhali nononkhia. (Romanos 5:12) Jesus waihana Satanasi okuti “omuipai.” (João 8:44) Tyotyili Satanasi ondyale ina epondolo enene.

 7. Oñgeni ovilulu vilekesa okuti vina epondolo?

⁷ Tyina tuyala Satanasi, tupu tuyala aveho vemukuatesako navana vatyitukilapo outumini wa Huku. Muakutikinya onoandyu ononyingi, mbuihanwa okuti ovilulu. (Revelação 12:3, 4) Mokueenda kuomuwo omunyingi ovilulu vialekesa okuti vina vali ononkhono tyipona ovanthu, mokuetela ononkhumbi ononyingi ovanthu. (Mateus 8:28-32; Marcos 5:1-5) Wahalimbueko okuti Satanasi novilulu vena epondolo enene. (Mateus 9:34) Inkha Jeova ketukuatesako kamatutyivili okutilisa Satanasi kononkhono mbetu muene.

 8. (a) Olipi ehando lia Satanasi? (Tala olutalatu pefo pahimbikila onthele.) (b) Mokutala kuove, oñgeni ouye ou ulekesa okuti omukalavi nga Satanasi?

⁸ Apostolu Petulu waeleka Satanasi “nonkheyama ikoma.” Omukanda umwe wahangununa okuti ondaka yo Gregu yapitiyua “okukoma” ihangununa “okuliyavela kuotyinyama tyaliwa nondyala.” Ondaka oyo ilekesa nawa oukalavi wa Satanasi notyituwa tyae tyokulinga ovivi! Wafuapo opo ayunge ouye, namphila ehetyilingi monkhalelo yaoya. Satanasi ukahi ngonkhulika yaliwa nondyala ihanda okulia ovinyama. (1 João 5:19) Uhanda okulia otyihupe tyovalembulwa vekahi pano pohi, veliwaneka “nonongi ononkhuavo.” (João 10:16; Revelação 12:17) Ehando lia Satanasi okuhanyauna ovanthu va Jeova. Ononkhumbi Ovakristau votete vamonesilwe nombu mbumoneka hono mbulekesa nawa okuti Satanasi omukalavi.

9, 10. (a) Oñgeni Satanasi aluisile elongo lio Isilayeli? (Popia onongeleka.) (b) Omokonda yatyi Satanasi ankho ena ehunga liokumonesa ononkhumbi ova Isilayeli? (c) Mokusoka kuove oñgeni hono Satanasi akala tyina umwe povaumbili va Jeova amalingi onkhali onene?

⁹ Satanasi ulekesa okuti omukalavi monkhalelo onkhuavo. Onkheyama yankhia ondyala kayeevela otyinyama ihanda okukuata. Itupu okankhenda tyina eheneipae otyinyama, tupu kaihamenwa tyina yamaipaa. Tyelifwa notyo, Satanasi utupu okankhenda nomunthu ahanda okukuata. Mongeleka, mokusoka kuove oñgeni Satanasi akalele movikando aviho ova Isilayeli vakala nelungavi nokulinga oundalelapo? Okuti kusoko Satanasi wahambukwa mokonda yononkhia mbatundilila koundalelapo wa Zinri nelungavi lia Geazi?—Números 25:6-8, 14, 15; 2 Reis 5:20-27.

¹⁰ Satanasi ankho una ehunga liokumonesa ononkhumbi ova Isilayeli. Hinangela okuti Mesiya watundilila melongo olio, iya makamiagula Satanasi mokulekesa okuti Jeova oe vala una yokutumina. (Gênesis 3:15) Satanasi ankho kahande ova Isilayeli vapandwe na Huku, ngotyo alingi atyiho evila opo evehindile okulinga onkhali. Katupondola okusoka Satanasi wanumana etyi David alinga oumbalehi. Tupu katupondola okusoka Satanasi wakala nokankhenda na Moisesi etyi apumbwa elao liokunyingila Motyilongo Valaelwe. Satanasi hono uhambukwa unene tyina atala ovanthu va Huku valinga ononkhali ononene. Ngotyo, Eliapu liundapesa ononkhali ombo opo likuele Jeova.—Provérbios 27:11.

11. Omokonda yatyi Satanasi tyafuile apakela Sara motyitateka?

¹¹ Satanasi haunene ankho uyele ombunga omu muatuka Mesiya. Mongeleka, soka kuetyi tyaendapo etyi Jeova apopila Abraiau okuti mwe mamutundu “elongo enene.” (Gênesis 12:1-3) Etyi Abraiau na Sara vapita ko Egitu, Farao atuala Sara keumbo liae, mokonda ankho uhanda akale omukai wae. Mahi, Jeova waamena Sara nokumupola motyitateka otyo tyepuiya. (Tanga Gênesis 12:14-20.) Otyitateka ngotyo tyamonekele mepundaumbo lio Gerar etyi Isake ehenetyitwe. (Gênesis 20:1-7) Okuti hamwe Satanasi oe waeteleko ovitateka ovio? Hinangela okuti Sara watunda mepundaumbo lio Ur lina olumono akakala momakaka. Ngotyo, okuti Satanasi ankho uhanda okumulola nomalumono ekahi meumbo lia Farao na Abimeleke? Okuti Satanasi ankho usoka okuti Sara manepwa na imwe po nohamba ombo, alavisa omulume wae na Jeova? Ombimbiliya kaityipopi, mahi Eliapu ñgeno liahambukwa unene inkha Sara wapumbilwe elao liokukala mombunga mamutundu Mesiya. Satanasi ñgeno kelitehelele omapita inkha wanyonene otyinepo otyiwa, nenyina ewa, noupanga ankho Sara ena na Jeova. Otyo otyilekeso tyokuti Satanasi omukalavi iya ondingavivi!

12, 13. (a) Oñgeni Satanasi alekesa okuti omukalavi etyi Jesus atyitwa? (b) Kuove oñgeni hono Satanasi akala tyina atala ovakuendye vehole Jeova nokumufenda?

¹² Jesus watyitua etyi papita omanima omanyingi konyima ya Abraiau. Katyitavela okusoka oñgeni Satanasi akala etyi amona olukembe olo oluwa. Satanasi ankho utyii okuti tyina omona oo amekulu makala Mesiya walaelwe. Jesus oe ombuto ya Abraiau iya komutwe wandyila meya “okuhanyaunako ovilinga vie Liapu.” (1 João 3:8) Okuti Satanasi ankho upondola okusoka okuti okuipaa omona tyapenga? Au. Ankho kesukile netyi tyapenga netyi tyaviuka. Liwa-liwa alingi atyiho evila opo aipae omona Jesus. Oñgeni alinga?

¹³ Etyi Ohamba Herode eiva kovanthu vokulilongesa ononthungululu okuti “ohamba yova Judeu” yatyitwa, ainumana unene aihande okuipaa olukembe. (Mateus 2:1-3, 13) Ngotyo, atumu okuipaa ovana aveho ovakuendye vomanima evali nomalukembe omo Mbelei novilongo ovikuavo vikahi popepi. (Tanga Mateus 2:13-18.) Jesus ahupu movitateka ovio, mahi oityi otyo tyitulekesa konthele yondyale yetu Satanasi? Eliapu kaliesukile nomuenyo wovanthu. Tupu kaliesukile novana. Satanasi tyili-tyili “ukahi ngonkheyama ikoma.” Wahalimbueko okuti Satanasi omukalavi!

14, 15. Oñgeni Satanasi ekahi “nokutuikisa omitima via vana vehetavela”?

¹⁴ Onkhalelo imwe Satanasi apondola okupola ovanthu ku Huku yetu yoluembia, Jeova, opokuveyondya. (1 João 4:8) Satanasi uyondya ovanthu opo vahaimbuke okuti “vesukisa okulongeswa na Huku” ine okukala noupanga na Huku. (Mateus 5:3) Eliapu likahi “nokutuikisa omitima via vana vehetavela” opo vehetyivile okutala otyili konthele ya Jeova.—2 Coríntios 4:4.

¹⁵ Onkhalelo imwe onene Satanasi ayondya ovanthu ono nongeleya mbomatutu. Utyii okuti Jeova “uhanda okufendwa vala aike.” (Êxodo 20:5) Nkhele soka oñgeni Satanasi elitehelela tyina ovanthu vafenda vokuankhia ine ovinyama ine otyipuka otyikuavo tyipona okufenda Jeova. Tyotyili, ovanthu ovanyingi vasoka okuti efendelo liavo litavelwa na Huku mahi vekahi monongeleya mbomatutu nomoviso. Ova Isilayeli pononthiki mba Isaia ankho vekahi monkhalelo ngoyo. Jeova evepulu okuti: “Omokonda yatyi mutuailako okulanda ovipuka vihembolo iya omokonda yatyi mupeselela ononkhono mbenyi movipuka viehemukuatesako? Nthehelelei iya liei etyi tyapepa iya omuenyo wenyi auhambukilwa ovilenga.”—Isaías 55:2.

16, 17. (a) Omokonda yatyi Jesus apopila Petulu okuti: “Kala konyima yange Satanasi”? (b) Oñgeni Satanasi apondola okutuyondya atuyekepo okukala tyalunguka?

¹⁶ Satanasi upondola okuyondya alo umwe ovaumbili va Jeova vena ombili. Mongeleka, soka kuetyi tyamonekelepo etyi Jesus apopila ovalongwa vae okuti kuakamba katutu opo aipawe. Apostolu Petulu, ankho uhole Jesus, apopi okuti: “Tatekulu lilingila okankhenda, otyo kamatyipiti nove.” Jesus apopila Petulu, okuti: “Kala konyima yange Satanasi!” (Mateus 16:22, 23) Omokonda yatyi Jesus aihanena Petulu okuti “Satanasi”? Omokonda Jesus ankho utyii etyi matyimonekapo. Pakala vala katutu, Jesus aipawa ngotyilikutila tyofeto yeyovo iya alekesa okuti Eliapu onkhembi. Pomuvo una ankho wepuiya, ankho hamuwo Jesus apondola “okulilingila okankhenda.” Satanasi ñgeno wahambukilwe inkha Jesus wayekelepo okukala tyalunguka.

¹⁷ Onthyulilo youye uno wovivi ikahi popepi, ngotyo nonthue tukahi momuvo wepuiya. Satanasi uhanda “tulilingile okankhenda” atusuku vali novipuka tupondola okulinga mouye muno. Satanasi uhanda tulimbueko okuti tukahi kononthiki mbonthyulilo atuyekeko okukala tyalunguka. Wahayeke otyo tyimoneke nove! Ngotyo, “tualako tyalunguka.” (Mateus 24:42) Wehetavele komatutu a Satanasi okuti onthyulilo ikahi kokule ine kamaiya.

18, 19. (a) Oñgeni Satanasi aovola okutuyondya opo tusoke okuti Jeova utuyele? (b) Oñgeni Jeova etukuatesako opo tutualeko tyalunguka?

¹⁸ Satanasi utuyondya monkhalelo onkhuavo. Uhanda tutavele okuti katuesukisile okuhumbwa na Jeova nokuti Huku kametuevela ononkhali mbetu. Omatutu oo atuka ku Satanasi. Soka kuetyi, olie tyili-tyili Jeova ena okuyala? O Satanasi. Olie wahamaevelua na Huku? O Satanasi. Mahi onthue, Ombimbiliya itupopila okuti: “Huku utupu onya, pala okulimbwa ovilinga vienyi nohole mualekesa menyina liae.” (Hebreus 6:10) Jeova upanda ovipuka aviho tumulingila, iya ovilinga tumulingila apeho vina esilivilo. (Tanga 1 Coríntios 15:58.) Uhayondyue nomatutu a Satanasi.

¹⁹ Ngetyi tuelilongesa, Satanasi una epondolo, omukalavi, utyivila okuyondya. Oñgeni tupondola okulwa nondyale ngoyo? Jeova utukuatesako. Ondaka yae itulongesa konthele yomaliva a Satanasi iya “onthue omatutu ae tuei nawa.” (2 Coríntios 2:11) Tyina tunoñgonoka ononkhalelo mbelikalela Satanasi etuyondya, otyo matyitupepukila vali okutualako tyalunguka. Mahi okunoñgonoka vala omaliva a Satanasi katyituuka. Ombimbiliya yati: “Yalei Eliapu, opo limutile.” (Tiago 4:7) Monthele mailandulako, matulilongesa ononkhalelo ononthatu tupondola okulwa na Satanasi atumutilisa.