“Ouhamba Wove Uye”

1, 2. Onondaka patyi Jeova apopilile ono apostolu vetatu va Jesus? Oityi valingile?

INKHA Jeova Huku upopia nove, ekutumu okulinga otyipuka tyimwe, ove ñgeno walinga ñgeni? Okuti ñgeno kuakalele nombili yokutavela atyiho ekutuma? Tyotyili ñgeno wetavela!

² Etyi Opasikwa yenima 32 P.K. yalamba, Jeova wapopile no noapostolu ononthatu mba Jesus, Petulu, na Tiago, na João. (Tanga Mateus 17:1-5.) Puetyi ankho vekahi na Tatekulu yavo “komphunda,” vamona emonekelo lilekesa okuti Jesus Ohamba yankhimana keulu. Emonekelo olio, kuvo ankho ngoti otyili umwe, Petulu nae apopipo. Puetyi Petulu ankho apopia, pomitwe viavo apatumbu ekaka. Konyima Petulu navakuavo, aveivi ondaka ya Jeova, elao limwe liakalele novanthu vehehi. Etyi Jeova apopia okuti Jesus Omona wange, ayawisako okuti: “Mutehelelei.” Ono apostolu avetavela etyi vapopilwa na Huku. Vatehelela etyi Jesus alongesa, iya avalondola vakuavo opo navo vemutehelele.—Atos 3:19-23; 4:18-20.

 3. Omokonda yatyi Jeova ahandela tutehelele Omona wae? Oityi tuesukisa okulilongesa vali nawa?

³ Onondaka ombo mbokuti, “mutehelelei,” mbahonekwa Mombimbiliya opo mbutukuateseko. (Rom. 15:4) Omokonda yatyi? Omokonda Jesus omutumwa-ndaka wa Jeova. Ovikando aviho Jesus alongesa, ankho upopia ovipuka Tate yae ahanda tunoñgonoke. (João 1:1, 14) Jesus wapopia vali unene konthele Youhamba wa Huku, outumini wa Mesiya keulu, utuminwa na Kristu Jesus no 144.000, tyipona ovipuka ovikuavo. Ngotyo, otyiwa tulilongese nawa konthele Youhamba oo. (Apo. 5: 9, 10; 14: 1-3; 20:6) Mahi tete, tutalei omokonda yatyi Jesus apopila unene Ouhamba wa Huku.

 4. Oñgeni Jesus alekesa okuti wasuka unene Nouhamba wa Huku?

⁴ Jesus wasuka unene Nouhamba wa Huku. Omokonda yatyi tupopila ngotyo? Omokonda onondaka mbulekesa etyi tyikahi momutima. Onondaka mbetu mbulekesa etyi tyakolela vali kuonthue. Jesus wati: “Omulungu upopia etyi tyeyula momutima.” (Mat. 12:34) Jesus ankho upopia konthele Youhamba wa Huku mo nomphitilo ambuho. Ouhamba wa Huku wapopiua ovikando vilamba po 100 mo no Evandyeliu ononkhuana, ovikando ovinyingi o Jesus weupopia. Ouhamba wa Huku ankho osapi yovilinga viae viokuivisa. Oe wati: “Ndyina okukaivisa onondaka onongwa Mbouhamba wa Huku komapundaumbo omakuavo, mokonda etyi, otyo natuminwa.” (Luc. 4:43) Alo etyi atutiliswa, Jesus watuaileko okupopila ovalongwa vae Ouhamba wa Huku. (Atos 1:3) Tyotyili omutima wa Jesus ankho weyula ombili Nouhamba wa Huku, aimulundu okupopia konthele yao.

5-7. (a) Oñgeni tutyii okuti Jeova wasuka unene Nouhamba wae? Ava ongeleka. (b) Oñgeni matulekesa okuti tuesuka unene Nouhamba wa Huku?

⁵ Jeova nae wasuka unene Nouhamba wae. Oñgeni tutyii? Hinangela okuti Jeova watumine Omona wae wongunga pano pohi. Jeova oe ondyivi-ndyivi yovipuka aviho Omona wae alongesa nevi apopia. (João 7:16; 12:49, 50) Tupu Jeova oe ondyivi-ndyivi yonondaka ambuho mbahonekwa mono Evandyeliu ononkhuana, mbupopia omuenyo novilinga via Jesus viokuivisa. Pahe, soka vala oityi otyo tyilekesa.

⁶ Soka ñgeno ukahi nokumaneka opo ulinge oungendi. Ove una ovikutu ovinyingi opo uholovone-po. Mahi, osako yove ityinda ovikutu ovinyingi. Oityi molingi? Ove uholovona evi mopake-mo. Ono Evandyeliu mbukahi ngo sako yeyula ovipuka ovinyingi, vipopia konthele ya Jesus. Jeova katumine ovahoneki vono Evandyeliu vahoneke ovipuka aviho Jesus apopia nevi alinga pano pohi. (João 20:30; 21:25) Mahi, ononkhono mba Jeova mbevehongolela okuhoneka onondaka novipuka alinga, vitukuatesako okunoñgonoka etyi Jesus aivisila, netyi tyakolela vali ku Jeova. (2 Tim. 3:16, 17; 2 Ped. 1:21) Mokonda ono Evandyeliu mbeyula omalongeso a Jesus konthele Yohamba wa Huku, tupondola okupopia okuti Jeova wesuka unene Nouhamba wae. Pahe soka, Jeova uhanda tunoñgonoke atyiho konthele Youhamba wae!

⁷ Kese umwe puonthue otyiwa elipule okuti: ‘Nasuka umwe Nouhamba wa Huku?’ Inkha tyili-tyili tuasuka, matukala nombili yokutehelela etyi Jesus apopia netyi alongesa konthele Youhamba wa Huku, nesilivilo liao, onalupi mauya, no ñgeni mauya.

 8. Oñgeni Jesus alekesa esilivilo Liouhamba wa Huku?

⁸ Tala elikuambelo Jesus alongesa. No nondaka mbapepuka, Jesus walekesa esilivilo Liouhamba wa Huku, mokulekesa oityi maukalinga. Elikuambelo olio, liita ovipuka epandu-vali. Vitatu vio tete vielikuata nehando lia Jeova, liokusukukisa enyina liae, nokuya Kuouhamba wae, nokulinga ehando liae kombanda yohi ngetyi lilingwa keulu. (Tanga Mateus 6:9, 10.) Ovipuka ovio vitatu vielikuata kumwe. Ouhamba wa Mesiya, otyiti Jeova maundapesa opo asukukise enyina liae nokulinga ehando liae.

9, 10. (a) Oñgeni Ouhamba wa Huku mauya? (b) Omulao patyi Wombimbiliya ove uhanda ufuisuepo?

⁹ Oñgeni Ouhamba wa Huku mauya? Tyina tulikuambela okuti “Ouhamba wove uye,” tukahi nokuita opo Ouhamba oo uye okupilulula ovipuka. Tyina Ouhamba wa Huku wameya, mautumina kombanda yohi aiho. Mauya okunyimako ouye uno wovivi, nomautumini ovanthu, nokueta ouye omupe wouviuki. (Dan. 2:44; 2 Ped. 3:13) Konyima, moutumini Wouhamba oo, ohi aiho maikala omphangu yombembwa. (Luc. 23:43) Vokuankhia vekahi momutima wa Huku, mavakondolwa komuenyo avelivasi no nombunga mbavo. (João 5:28, 29) Ovanthu vokutavela mavakala nolutu luhena nkhali nomuenyo wahapu. (Apo. 21:3-5) Okuhulililako, onkhalelo pano pohi maikala ongwa unene ngei ikahi keulu, aveho mavakalinga ehando lia Jeova Huku! Ove kuhande okutala tyina omilao ovio Viombimbiliya vifuisuapo? Hinangela okuti apeho tyina ulikuambela okuita Ouhamba wa Huku uye, ukahi nokulikuambela opo omilao ovio omiwa vifuisuepo.

¹⁰ Tyimoneka nawa okuti Ouhamba wa Huku nkhele “kauneye” okufuisapo elikuambelo Jesus alongesa. Nkhele omautumini ovanthu ekahi nokutumina, iya ouye omupe wouviuki nkhele kauneye. Mahi, kuna onondaka onongwa. Ouhamba wa Huku wavialekuale, ngetyi matukelilongesa mokapitulu makalandulako. Pahe tutalei onalupi Ouhamba wa Huku wavialekwa, no nalupi mauya ngetyi Jesus apopia.

11. Oityi Jesus alekesa konthele yokuvialekwa Kuouhamba wa Huku?

¹¹ Jesus walekesa okuti Ouhamba wa Huku kamauvialekwa pomuvo wono apostolu, namphila ankho hatyoko ovalongwa vae vamwe vakevelela. (Atos 1:6) Tala etyi Jesus apopia mononthengele-popia onombali mbelikalela.

12. Oñgeni onthengele-popia yotiliku nevu yalekesa okuti Ouhamba kawavialekelue Pomuvo wono apostolu?

¹² Onthengele-popia yotiliku nevu. (Tanga Mateus 13:24-30.) Etyi Jesus amana okupopia onthengele-popia oyo konthyimbi yenima 31 P.K., eihangununina ovalongwa vae. (Mat. 13:36-43) Tala etyi onthengele-popia oyo ipopia netyi ihangununa: Konyima yononkhia mbono apostolu, Eliapu ankho malikunu evu (Ovakristau vokuhetekela) pokati kotiliku (“ovana Vouhamba,” ine Ovakristau ovalembulwa.) Otiliku nevu aviyekwa vitualeko okukulila kumwe alo pomuvo wokuteya, “onthyulilo youye uno.” Tyina ovilinga viokuteya viamahimbika, otiliku nevu mavipungwa iya aviongiyua. Ngotyo, onthengele-popia ilekesa okuti Ouhamba wa Huku, ankho kamauvialekwa pononthiki mbono apostolu, mahi o konthyulilo yomuvo wokukula. Ngetyi tyimoneka, omuvo wokukula wapua, iya omuvo wokuteya wahimbika mo 1914.

13. Oñgeni Jesus alekesa okuti ankho kamavialekwa liwa-liwa Kouhamba wa Mesiya tyina amakondaka keulu?

¹³ Onthengele-popia yonomina. (Tanga Lucas 19:11-13.) Jesus wapopia onthengele-popia oyo, mo 33 P.K. puetyi ankho aya no ko Jelusalei otyikando tyahulililako. Vamwe povateheleli vae ankho vasoka okuti mavialeka Ouhamba wae tyina vamehiki mo Jelusalei. Opo apilulule olusoke olo, nokulekesa okuti omuvo wokuviala Kuouhamba wa Huku ukahi kokule, Jesus welielekele “nomulume umwe omona wohamba,” ankho una okuenda “kotyilongo tyokokule opo akapewe epondolo liokutumina.”a Konthele ya Jesus, “otyilongo tyokokule” o keulu, kuna ankho makapewa na Tate yae epondolo liokukala Ohamba. Mahi, Jesus ankho utyii okuti kamakala liwa-liwa Ohamba Mesiya tyina amakondoka keulu. Ankho mapumphama kokulio kwa Huku, akevelela alo omuvo uhikapo. Okukevelela oko kuapwa etyi palamba omanima omanyingi.—Sal. 110:1, 2; Mat. 22:43, 44; Heb. 10:12, 13.

14. (a) Oñgeni Jesus akumbulula epulo alingwa nono apostolu mbae ononkhuana? (b) Okufuisuapo kueulo lia Jesus kutulongesa tyi konthele yokuhika kwae no Youhamba?

¹⁴ Etyi kuakamba ononthiki mbehehi opo Jesus aipawe, ono apostolu mbae ononkhuana vemupula okuti: “Olipi enyingilikilo malilekesa okuti ove wehikale, no lionthyulilo youye?” (Mat. 24:3; Mar. 13:4) Etyi evekumbulula, Jesus wapopile eulo liakutikinya ovipuka ovinyingi, likahi mu Mateusi ovikapitulu 24 no 25. Jesus wapopia ovipuka ovinyingi mavikapita mouye, mavikala enyingilikilo liokuimbuka okuti oe “wehika.” Onthyimbi yokuhika kwae, yelikuata nokuvialekwa Kuouhamba wa Huku. Iya onthyulilo yokuhika kwae yelikuata kumwe nokuya Kuouhamba. Tuna omalekeso omanyingi okuti eulo lia Jesus likahi nokufuiswapo tunde mo 1914.b Ngotyo, menima olio, oyo onthyimbi yokuhika kwae, no yokuvialekwa Kuouhamba wa Huku.

15, 16. Onondaka “ombuto yovanthu ava” mbupopia valie?

¹⁵ Onalupi Ouhamba wa Huku tyilityili mauya? Jesus kapopile nawa onalupi mauya. (Mat. 24:36) Mahi, wapopia otyipuka tyimwe matyitulekesa okuti onthyulilo ikahi unene popepi. Jesus walekesa okuti Ouhamba mauya tyina “ombuto yovanthu ava” vamamono okufuisuapo kuenyingilikilo lieulo. (Tanga Mateus 24:32-34.) Onondaka “ombuto yovanthu ava,” ipopia valie? Tutalei nawa onondaka mba Jesus.

¹⁶ “Ombuto yovanthu ava.” Okuti Jesus ankho upopia ovanthu vahaumbila Huku? Au. Soka kovanthu ankho apopila. Jesus wapopila eulo olio, ono apostolu mbehehi ankho “veya ponthele yae aveke.” (Mat. 24:3) Ankho kuakamba katutu opo ono apostolu valembulwe nospilitu sandu. Tala onondaka mbulilandula nambo. Etyi ehenepopie konthele “yombuto yovanthu ava,” Jesus wati: “Lilongesilei komukuyu okuti, tyina ovimpha viao vihimbika okuyova, nokukala nomafo, mutyii okuti ondyovo ikahi popepi. Tupu, tyina muamamono ovipuka evi aviho, noñgonokei okuti oe ukahi popepi pomapito.” Ankho ava mavamono ovipuka aula, nokupunga nawa okuti Jesus “ukahi popepi pomapito,” ovalanduli vae ovalembulwa, ha-vokuhetavela. Ngotyo, etyi Jesus ati “ombuto yovanthu ava,” ankho upopia ovalanduli vae ovalembulwa.

17. Oityi tyihangununa onondaka “ombuto yovanthu ava” no mbokuati “ovipuka evi aviho”?

¹⁷ “Kamaipupo alo ovipuka evi aviho vimoneka.” Oñgeni onondaka ombo mambufuiswapo? Opo tuvase ekumbululo, tuesukisa okunoñgonoka ovipuka vivali: oityi tyihangununa “ombuto yovanthu ava,” “novipuka evi aviho.” Onondaka “ombuto yovanthu,” apeho ipopia ovanthu vomati elikalaila, mahi vakalako momuvo wike. Ombuto yovanthu, kaikalako omuvo omunyingi unene, ina onthyulilo. (Êxo. 1:6) Onondaka “ovipuka evi aviho,” muakutikinya ovipuka aviho viaulwa, mavimoneka mokueenda kuomuvo Jesus ehika, wahimbikila mo 1914 maukapuila “mononkhumbi onene.”—Mat. 24:21.

18, 19. Oñgeni matunoñgonoka onondaka mba Jesus konthele “yombuto yovanthu ava?” Oityi tyetulongesa?

¹⁸ Mahi, oñgeni matunoñgonoka onondaka mba Jesus konthele “yombuto yovanthu ava”? Tyimoneka nawa okuti, ombuto yovanthu, ipopia ovikundyi vivali vio valembulwa vakalako momuvo wike. Tete, ovalembulwa vana vamona onthyimbi yokufuiswapo kuenyingilikilo mo 1914, vali, ovalembulwa vana vakaleleko katutu notyikundyi tyotete. Iya vamwe votyikundyi tyavali mavakamona onthyimbi yononkhumbi ononene. Ovikundyi ovio vivali, ombuto ike yovanthu, mokonda Ovakristau valembulwa, vakala momuvo wike.c

¹⁹ Oityi tyetulongesa? Onthue tutyii okuti enyingilikilo liokuya kwa Jesus Mouhamba, limoneka nawa mouye auho. Tupu tupondola okutala okuti ovalembulwa nkhele vokuna omuenyo, “pombuto yovanthu ava,” vekahi nokukulupa, mahi kamavankhi aveho tyina ononkhumbi ononene mbuhenehike. Ngotyo, tupondola okupopia okuti apa katutu Ouhamba wa Huku mauya opo utumine pano pohi! Matyituhambukiswa ngatyi okutala etyi elikuambelo Jesus etulongesa lifuisuapo, liokuati: “Ouhamba wove uye”!

20. Ovipuka patyi vimwe viakolela matulilongesa momukanda ou? Oityi matulilongesa mokapitulu makalandulako?

²⁰ Tuhalimbuei onondaka Jeova apopia konthele Yomona wae okuti: “Mutehelelei.” Mokonda Tuvakristau votyotyili tuhanda unene okulandula ehongolelo lia Huku. Onthue tuasuka unene novipuka aviho Jesus apopia nevi alongesa konthele Youhamba wa Huku. Etyi Ouhamba wa Huku ukahi nokulinga netyi maukalinga komutwe, ovipuka vimwe viakolela matulilongesa momukanda ou. Okapitulu makalandulako makapopi ovipuka vihambukiswa viaendako pokutyitwa Kuouhamba wa Huku keulu.