Mateyu Edwɛkpa

23 Akee Gyisɛse zele menli dɔɔnwo ne nee ye ɛdoavolɛma ne kɛ: 2 “Mɛla kilehilevolɛma nee Falasiima ɛdɛnla Mosisi ebia ne azo. 3 Yemɔti, debie biala mɔɔ bɛkɛha bɛkɛhile bɛ la, bɛli zo na bɛyɛ, noko bɛmmayɛ bɛ nyɛleɛ ne bie, ɔluakɛ bɛka noko bɛnyɛ mɔɔ bɛka la.+ 4 Bɛkyekye adesoa ɛlomboɛ bɛfa bɛto menli kɔme zo,+ noko bɛdabɛ mumua ne bɛnva bɛ sa ɛrɛlɛsɛka ko bɔbɔ bɛnzɔ nu.+ 5 Gyima kɔsɔɔti mɔɔ bɛyɛ la, bɛyɛ amaa menli anwu ye,+ ɔluakɛ bɛyɛ ngɛlɛlera ahodoku mɔɔ bɛfa bɛbɔ bɛ nwo bane la tɛtɛlɛ+ na bɛyɛ bɛ adɛladeɛ nloa mgbole.+ 6 Bɛkulo ɛleka mɔɔ menli titili tɛnla la wɔ nɔsolɛ ɛkponledolɛ bo nee nyianu azua nu mbia mɔɔ wɔ ɔ nyunlu la* azo ɛdɛnlanlɛ+ 7 nee gua zo ahyebizalɛ yɛɛ menli mɔɔ fɛlɛ bɛ Relabae* la. 8 Noko bɛmɛ, bɛmmamaa bɛfɛlɛ bɛ Relabae, ɔluakɛ bɛ kilehilevolɛ kokye,+ yɛɛ bɛ muala bɛle mediema. 9 Bieko, bɛmmafɛlɛ awie biala bɛ papa wɔ azɛlɛ ye azo, ɔluakɛ bɛ Ze kokye,+ Yemɔ a wɔ anwuma lɔ la. 10 Eza bɛmmamaa bɛfɛlɛ bɛ adekilevolɛma, ɔluakɛ bɛ Adekilevolɛ kokye, yemɔ a le Kelaese ne. 11 Emomu, ɔwɔ kɛ mɔɔ le kpole kpalɛ wɔ bɛ nu la yɛ bɛ sonvolɛ.+ 12 Awie biala mɔɔ kɛmemaa ɔ nwo zo la,+ bɛkɛha ye aze, na awie biala mɔɔ kɛbɛlɛ ɔ nwo aze la, bɛkɛmaa ye zo.+

13 “Bɛ gyakɔ, mɛla kilehilevolɛma nee Falasiima, nabalabama! ɔluakɛ bɛto anwuma Belemgbunlililɛ ne anu wɔ menli nyunlu; bɛmɛ a bɛnrɛhɔ nu, yɛɛ bɛdabɛ mɔɔ bɛlɛkɔ nu la noko a bɛmmaa bɛ adenle.+ 14* ——

15 “Bɛ gyakɔ, mɛla kilehilevolɛma nee Falasiima, nabalabama!+ ɔluakɛ bɛdua azule nye nee azɛlɛ resee zo bɛkɔkakyi awie, noko saa ɔkakyi ɔwie a bɛmaa ɔ nwo fɛta Gehenna* fane nwiɔ ɔtɛla bɛ.

16 “Bɛ gyakɔ, adekilevolɛma anyenzinliravolɛma+ mɔɔ ka kɛ, ‘Saa awie fa ɛzonlenlɛsua ne ka ndane a, ɔnyɛ ɛhwee; noko saa ɔfa ɛzonlenlɛsua ne anu nvutuke ne ɔka ndane a, ɔdi nwolɛ ɛzonle la.’+ 17 Ahoasea nee anyenzinliravolɛma! Boni a hyia kpalɛ a, nvutuke ne anzɛɛ ɛzonlenlɛsua ne mɔɔ ɛde nvutuke ne anwo la? 18 Bieko, ‘Saa awie fa afɔlemokyea ne ka ndane a, ɔnyɛ ɛhwee; noko saa awie fa ahyɛlɛdeɛ ne mɔɔ wɔ zolɛ la ka ndane a, ɔdi nwolɛ ɛzonle.’ 19 Anyenzinliravolɛma! Boni a hyia kpalɛ a, ahyɛlɛdeɛ ne anzɛɛ afɔlemokyea ne mɔɔ te ahyɛlɛdeɛ ne anwo la? 20 Yemɔti, awie biala mɔɔ fa afɔlemokyea ne ka ndane la fa ye nee zolɛ ninyɛne ne amuala ka ndane; 21 na awie biala mɔɔ fa ɛzonlenlɛsua ne ka ndane la fa ye nee Mɔɔ de nu la ka ndane;+ 22 na awie biala mɔɔ fa anwuma ka ndane la fa Nyamenle belemgbunli ebia ne nee Mɔɔ de zo la ka ndane.

23 “Bɛ gyakɔ, mɛla kilehilevolɛma nee Falasiima, nabalabama! ɔluakɛ bɛkyɛ mente nee dele yɛɛ kumin*+ ne mɔ anu bulu bɛfa ko bɛmaa, noko bɛbu bɛ nye bɛgua Mɛla ne anu ninyɛne mɔɔ hyia kpalɛ, mɔɔ le kɛ pɛlepɛlelilɛ+ nee anwunvɔnezelɛ+ yɛɛ nɔhalɛlilɛ la azo. Ninyɛne ɛhye mɔ a anrɛɛ ɔwɔ kɛ bɛyɛ a, na ɔnle kɛ bɛbu bɛ nye bɛgua ninyɛne mɔɔ ɛha la azo.+ 24 Adekilevolɛma anyenzinliravolɛma,+ bɛsonyi ninyɛne zo bɛye akowule+ wɔ nu noko bɛme afunlumu!+

25 “Bɛ gyakɔ, mɛla kilehilevolɛma nee Falasiima, nabalabama! ɔluakɛ bɛnrinzi kanrɛlɛ nee ɛyɛba nwo,+ noko anyebolo* nee angomedi+ ɛyi bɛ tɛkɛɛ.+ 26 Falasiinli anyenzinliravolɛ, dimoa nrinzi kanrɛlɛ ne nee ɛyɛba ne anu, amaa nwolɛ ne noko ayɛ bɔkɔbɔkɔ.

27 “Bɛ gyakɔ, mɛla kilehilevolɛma nee Falasiima, nabalabama!+ ɔluakɛ bɛle kɛ nla mɔɔ bɛpenti ye fufule mɔɔ nwolɛ le kɛnlɛma,+ noko nuhua le avunli mbowule na debie evinli biala ɛyi ye tɛkɛɛ la. 28 Zɔhane ala a, bɛle kɛ tenlenema wɔ menli nye zo a, noko nabalaba nee mɛladonlɛ ɛyi bɛ tɛkɛɛ.+

29 “Bɛ gyakɔ, mɛla kilehilevolɛma nee Falasiima, nabalabama!+ ɔluakɛ bɛto ngapezoma nla na bɛsiezie tenlenema sɛka,*+ 30 na bɛka kɛ, ‘Saa yɛdɛnlanle aze wɔ yɛ nenyia mɔ mekɛ zo a, anrɛɛ yɛnrɛboa bɛ yɛnrɛmaa bɛnrɛha ngapezoma ne mogya bɛnrɛgua.’ 31 Yemɔti, bɛlɛdi daselɛ bɛatia bɛ nwo kɛ bɛle menli mɔɔ hunle ngapezoma ne mɔ la amra.+ 32 Ɛnee noko bɛmaa bɛ nenyia mɔ kanrɛlɛ ne ɛyi.

33 “Nwɔlɛ mralɛ,+ kɛ ɔkɛyɛ na bɛanriandi Gehenna* ndɛnebualɛ ne ɛ?+ 34 Ɛhye ati, melɛsoa ngapezoma+ nee nrɛlɛbɛvolɛma nee kilehilevolɛma wɔ bɛ nwo ɛkɛ.+ Bɛbahu bie mɔ+ yɛɛ bɛbabɔ bie mɔ mbaka nu, yɛɛ bɛbabila bie mɔ empele+ wɔ bɛ nyianu azua nu, na bɛakpɔ bie mɔ+ wɔ bɛ azua ne mɔ azo, 35 amaa tenlenema mogya mɔɔ bɛhanle bɛguale azɛlɛ ye azo la kɔsɔɔti agua bɛ ti zo, ɔvi tenlenenli Ebɛle+ mogya zo kɔkpula Bɛlakaya ara Zɛkalaya mogya zo, yemɔ a bɛhunle ye wɔ ɛzonlenlɛsua ne nee afɔlemokyea ne avinli la.+ 36 Nɔhalɛ nu meka meahile bɛ kɛ, ninyɛne ɛhye mɔ amuala bara awolɛndoazo ɛhye anwo zo.

37 “Gyɛlusalɛm, Gyɛlusalɛm, wɔmɔ mɔɔ ɛku ngapezoma na ɛsi menli mɔɔ bɛzoa bɛ wɔ ɛ nwo ɛkɛ ne la awolɛ a+—fane nyɛ a ɛnee mekulo kɛ meboɔboa ɛ mra nloa kɛ mɔɔ akɔlɛ ɛrɛladane boɔboa ɔ mra nloa wɔ ɔ ndɛba abo a! Noko wɔangulo.+ 38 Nea! Bɛgyakyi wɔ sua ne bɛmaa wɔ.*+ 39 Na meka meahile bɛ kɛ, ɔvi ɛnɛ mɔɔ kɔ la, bɛnrɛnwu me bieko kɔkpula kɛ bɛbaha kɛ, ‘Nyilalɛ ɛha mɔɔ ɛlɛba wɔ Gyihova* duma nu la!’”+