Yizikeɛle

16 Gyihova nee me dendɛle bieko kɛ: 2 “Sonla ra, maa Gyɛlusalɛm ɛnwu ye bɛkyi nyɛleɛ ne mɔ.+ 3 Ka kɛ, ‘Mɔɔ Tumivolɛ Awulae Gyihova ɛha ɛhile Gyɛlusalɛm la ɛne: “Ɛ bo vi Keena azɛlɛ zo yɛɛ ɛkɛ ne a bɛwole wɔ a. Wɔ papa le Amɔlenli+ yɛɛ wɔ mame le Hɛtenli.+ 4 Kenle mɔɔ bɛwole wɔ la, bɛampɛ ɛ kotoa nyɛma, bɛanva nzule bɛambia wɔ amaa ɛ nwo ade, bɛanva ngyenle bɛamkpokpa wɔ yɛɛ bɛankyekye wɔ wɔ ɛdanlɛ nu. 5 Awie annwu wɔ anwunvɔne na yeayɛ ninyɛne ɛhye mɔ anu bie yeamaa wɔ. Awie biala akunlu anyelɛyela ye ammaa wɔ. Emomu, bɛvuandinle wɔ bɛdole ɛbɔ nu ɔluakɛ kenle mɔɔ bɛwole wɔ ala la yɛɛ bɛhyile wɔ* a.

6 “‘“Mɔɔ melɛpɛ nu wɔ ɛ nwo ɛkɛ ne la, menwunle kɛ ɛlɛbede wɔ wɔ mogya ne anu, na mɔɔ ɛnee ɛla ɛkɛ wɔ wɔ mogya ne anu la, menganle kɛ: ‘Nyia ngoane!’ Ɛhɛe, mɔɔ ɛnee ɛla ɛkɛ wɔ wɔ mogya ne anu la menganle mengilele wɔ kɛ: ‘Nyia ngoane!’ 7 Memaanle ɛyɛle menli dɔɔnwo kpalɛ kɛ mbaka mɔɔ fifi ɛbɔ nu la, na ɛnyinle na ɛyɛle tendenle na ɛvale agudeɛ ngɛnlɛma ɛzieziele ɛ nwo. Ɛ nyɛfo gyinlegyinlanle zolɛ yɛɛ wɔ enrinli vile; noko ɛnee ɛnwula ɛhwee yɛɛ ɛlɛ ɛ nwo zɔ.”’

8 “‘Mɔɔ mese ɛ nwo ɛkɛ ne na menwunle wɔ la, menwunle kɛ yedwu mekɛ mɔɔ bɛkulo wɔ a. Ɔti mendɛlɛle me ɛdanlɛ* ne anu menguale ɛ nwo+ na mengedale ɛ nwo ne mɔɔ ɛnee la zolɛ la azo na menganle ndane me nee wɔ yɛle ngyekyeleɛ na ɛyɛle me ɛdeɛ,’ Tumivolɛ Awulae Gyihova a se a. 9 ‘Akee menvale nzule membiale wɔ na menrinzinle ɛ nwo mogya ne na memkpokpale wɔ nwole.+ 10 Na menvale ɛdanlɛ mɔɔ bɛnwo nu la mengedale wɔ na menvale nwoma* kɛnlɛma mgbɔlaboa memaanle wɔ na menkyekyele wɔ wɔ lenen kɛnlɛma nu, na menvale ndanlɛ mɔɔ bɛ awolɛ yɛ se la mengedale wɔ. 11 Menvale agudeɛ menzieziele wɔ na menvale ngɛba menguale ɛ sa na menvale ndweabane mendole ɛ kɔme. 12 Eza menvale ngɛba menwulale ɛ bonyi nu yɛɛ asomadeɛ menwulowulale ɛ nzo nu na membɔle wɔ abotile kɛnlɛma bie. 13 Ɛvale nvutuke nee dwɛtɛ fufule ɛzieziele ɛ nwo, yɛɛ ɛhedale lenen kɛnlɛma, ɛdanlɛ mɔɔ ye bolɛ yɛ se yɛɛ ɛdanlɛ mɔɔ bɛnwo nuhua la. Ɛnee ɛdi esamo kpalɛ, wolɛ nee nwole, na ɛnyinle na ɛ nwo yɛle fɛ kpole kpalɛ,+ na ɛfɛtale kɛ ɛyɛ ɔbahyema.’”*

14 “‘Ɔlua wɔ anwofɛlɛko ti, wɔ duma dendenle hɔle maanle maanle ne mɔ anu,+ ɔluakɛ ɛnee ɔdi munli ɔboalekɛ menvale me anyunlunyia ne mengedale ɛ nwo zo,’+ Tumivolɛ Awulae Gyihova a se a.”

15 “‘Noko ɛlile wɔ anwofɛlɛko nzi,+ na duma mɔɔ ɛliele la ati ɛbɔle tuutuu ɛbɛla.+ Ɛ nee awie biala mɔɔ ɛlɛpɛ nu la bɔle tuutuu ɛbɛla,+ na wɔ anwofɛlɛko ne yɛle ye ɛdeɛ. 16 Ɛvale wɔ ndanlɛ ne mɔ bie ɛyɛle ɛzonlenlɛ ɛleka ngɛnlɛma na ɛbɔle tuutuu ɛbɛla wɔ ɛkɛ+—ɔnle kɛ bɛyɛ ninyɛne ɛhye mɔ, anzɛɛ ɔsi bɔbɔ. 17 Eza ɛvale wɔ agudeɛ* ngɛnlɛma ne mɔ mɔɔ bɛvale nvutuke nee dwɛtɛ fufule a bɛyɛle mɔɔ menvale memaanle wɔ la bie ɛyɛle ananze mrenyia na ɛ nee bɛ bɔle tuutuu ɛbɛla.+ 18 Na ɛvale wɔ ndanlɛ mɔɔ bɛnwo nu la ɛguale bɛ nwo,* na ɛvale me nwole nee me ayilevuanlɛ ɛbɔle afɔle ɛmaanle bɛ.+ 19 Na paano ne mɔɔ menvale memaanle wɔ—mɔɔ bɛvale esamo kpalɛ, nwole yɛɛ wolɛ a bɛyɛle mɔɔ menvale memaanle wɔ kɛ ɛli la—ɛdawɔ noko ɛvale ɛbɔle afɔle evuanlɛ mɔɔ bɛ nye die nwolɛ* la ɛmaanle bɛ.+ Ɛhye pɛpɛɛpɛ a hɔle zo a,’ Tumivolɛ Awulae Gyihova a se a.”

20 “‘Ɛvale ɛ mra mrenyia nee ɛ mra mraalɛ mɔɔ ɛwole bɛ ɛmaanle me+ la ɛbɔle afɔle ɛmaanle ananze ne mɔ kɛ bɛli+—asoo wɔ tuutuu ɛbɛla ne ɛtɛdwule moa somaa ɔ? 21 Ɛhunle me mra mrenyia, na ɛvuandinle bɛ ɛguale senle nu ɛvale bɛ ɛbɔle afɔle.+ 22 Mekɛ mɔɔ ɛfa ɛ nwo wɔawula wɔ bɛkyi nyɛleɛ nee wɔ tuutuu ɛbɛla ne mɔ amuala anu la, wɔangakye wɔ ngakula nu mɔɔ ɛnee ɛnwula ɛhwee na ɛlɛ ɛ nwo zɔ, na ɛlɛbede wɔ wɔ mogya ne anu la. 23 Wɔ wɔ ɛtane ne mɔ amuala anzi, gyakɔ, wɔ gyakɔ,’+ Tumivolɛ Awulae Gyihova a se a. 24 ‘Ɛyɛle ezukue nee ɛzonlenlɛ ɛleka* wɔ gua biala azo. 25 Ɛyɛle ɛzonlenlɛ ɛleka* wɔ ɛleka titili ne mɔ wɔ gua biala azo, na ɛhakyile wɔ anwofɛlɛko ne ɛmaanle ɔyɛle kyibadeɛ ɔlua ɛ nwo mɔɔ ɛvale ɛmaanle* awie biala mɔɔ ɛnee ɛlɛpɛ nu,+ na ɛmaanle wɔ tuutuu ɛbɛla ne zonle la ati.+ 26 Ɛ nee ɛ gɔnwo mɔ Yigyibitima mɔɔ bɛle ahulomraalɛ* la bɔle tuutuu ɛbɛla,+ na ɛvale wɔ tuutuubɔlɛ dɔɔnwo ne ɛhanle me ɛya. 27 Akee mebadende me sa wɔ ɛ nwo zo na meade wɔ aleɛ zo+ na meaye wɔ meamaa mraalɛ mɔɔ bɛkyi wɔ,+ mɔɔ le Filisitiama, menli mɔɔ wɔ ɛbɛla ɛtane ne yɛle bɛ nyiane la ɛhulolɛdeɛ.*+

28 “‘Kɛmɔ yeande wɔ la ati, ɛ nee Aseleama bɔle tuutuu ɛbɛla,+ noko mekɛ mɔɔ ɛ nee bɛ bɔle tuutuu ɛbɛla ne wiele la, eza yeande wɔ. 29 Ɔti ɛbɔle tuutuu ɛbɛla dɔɔnwo wɔ gualilɛma* azɛlɛ ne azo yɛɛ ɛ nee Kaledeama bɔle bie,+ na ɛhye bɔbɔ ande wɔ. 30 Nea kɛzi ɛnee wɔ ahonle ɛnde kpɔkɛ,* wɔ mekɛ mɔɔ ɛyɛle ninyɛne ɛhye mɔ amuala, ɛyɛle wɔ nyɛleɛ kɛ tuutuunli mɔɔ nyiane ɛnle ɔ nye zo la a!’ Tumivolɛ Awulae Gyihova a se a.+ 31 ‘Noko mekɛ mɔɔ ɛyɛle wɔ ezukue wɔ ɛleka titili ne mɔ wɔ awɔdenle biala azo na ɛyɛle ɛzonlenlɛ ɛleka* wɔ gua biala azo la, ɛnee ɛnle kɛ tuutuunli la ɔluakɛ wɔanlie ahatualɛ biala. 32 Ɛle agyalɛzɛkyelɛ raalɛ mɔɔ gyakyi ɔ hu ɛkɛ ɔkɔfa nyɛvolɛ a!+ 33 Menli kyɛ tuutuuma kɔsɔɔti ninyɛne,+ noko wɔmɔ a ɛmaa bɛdabɛ mɔɔ bɛkulo wɔ la kɔsɔɔti ninyɛne a,+ na ɛmaa bɛ belaebo kɛ bɛvi ɛleka biala bɛrɛla bɛ nee wɔ ɛrabɔ tuutuu ɛbɛla.+ 34 Ɛnle kɛ mraalɛ mɔɔ ɛha mɔɔ bɛbɔ tuutuu ɛbɛla la. Awie biala ɛmbɔ tuutuu ɛbɛla kɛ mɔɔ ɛbɔ ye la! Ɛtua awie mɔ kakɛ, na wɔmɔ bɛndua wɔ kakɛ. Wɔ ɛdeɛ ne le ngakyile.’

35 “Ɛhye ati, O tuutuunli,+ tie Gyihova edwɛkɛ. 36 Mɔɔ Tumivolɛ Awulae Gyihova ɛha la ɛne: ‘Kɛmɔ bɛwola wɔ atiakunluwɔzo ɛtane ne bɛgua na bɛye ɛ nwo wɔ mekɛ mɔɔ ɛ nee wɔ kulovolɛma nee wɔ bɛkyi ninyɛne kɔsɔɔti yɛɛ wɔ kyibadeɛ ananze* ne mɔ+ bɔ tuutuu ɛbɛla, na eza ɛfa ɛ mra mrenyia mogya ɛbɔ afɔle ɛmaa bɛ la ati,+ 37 melɛboɔboa wɔ kulovolɛma kɔsɔɔti mɔɔ wɔmaa bɛ nye ɛlie, bɛdabɛ mɔɔ wɔhulo bɛ la kɔsɔɔti nee bɛdabɛ mɔɔ wɔhyi bɛ la kɔsɔɔti anloa. Mebaboɔboa bɛ nloa meavi ɛleka kɔsɔɔti meara ɛ nwo zo na meaye ɛ nwo meamaa bɛanlea, na bɛanwu kɛ ɛlɛ ɛ nwo zɔ bɔkɔɔ.+

38 “‘Mebava ndɛnebualɛ mɔɔ fɛta agyalɛzɛkyelɛma+ nee mraalɛ mɔɔ ka mogya gua la meahwe ɛ nzo,+ na mebava ɛya nee nungulehwenlɛ meaha wɔ mogya meagua.+ 39 Mebava wɔ meawula bɛ sa nu, na bɛabubu wɔ ezukue nee wɔ ɛzonlenlɛ ɛleka ne mɔ* bɛagua aze;+ na bɛbayeye ɛ nwo ndanlɛ+ nee wɔ agudeɛ* ngɛnlɛma ne mɔ+ na bɛamaa wɔalɛ ɛ nwo zɔ. 40 Bɛbava menli dɔɔnwo bɛara ɛ nwo zo,+ na bɛbazi wɔ awolɛ+ na bɛava bɛ konle dadeɛ ne mɔ bɛahu wɔ.+ 41 Bɛbava senle bɛayela wɔ azua ne mɔ+ na bɛabua wɔ ndɛne wɔ mraalɛ dɔɔnwo anye zo; na meava wɔ tuutuu ɛbɛla ne meara ye awieleɛ,+ na wɔagyakyi kakɛ ɛdualɛ. 42 Mebamaa me ɛya ne mɔɔ meva ye ɛ nwo la aha aze,+ na me ɛya kpole ne avi ɛ nwo zo;+ na mebayɛ koonwu na ɛnrɛha me ɛya bieko.’

43 “‘Kɛmɔ wɔangakye wɔ ngakula nu+ na wɔyɛ ninyɛne ɛhye mɔ amuala wɔva wɔha me ɛya la ati, melɛfa mɔɔ ɛvi wɔ nyɛleɛ ne anu ɛra la meagua ɛ ti zo,’ Tumivolɛ Awulae Gyihova a se a, ‘na ɛnrɛbɔ wɔ ɛbɛla ɛtane ne yɛɛ ɛnrɛyɛ wɔ bɛkyi nyɛleɛ ne bieko.

44 “‘Nea! Awie biala mɔɔ bu ɛrɛlɛ la babu ɛ nwo ɛrɛlɛ ɛhye: “Kɛzi mame ne de la, zɔhane ala a ɔ ra raalɛ ne noko de a!”+ 45 Ɛle wɔ mame mɔɔ kpole ɔ hu nee ɔ mra la, ara raalɛ. Yɛɛ ɛle ɛ mediema mraalɛ ne mɔ mɔɔ bɛkpole bɛ hu mɔ nee bɛ mra la, adiema raalɛ. Bɛ mame le Hɛtenli yɛɛ bɛ papa le Amɔlenli.’”+

46 “‘Ɛ diema raalɛ kpanyinli a le Samɛlea+ mɔɔ ɔ nee ɔ mra mraalɛ* ne mɔ de wɔ sɔlɔ* la,+ yɛɛ ɛ diema raalɛ kakula a le Sodɔm+ mɔɔ ɔ nee ɔ mra mraalɛ ne mɔ de wɔ nyiakɛ* la.+ 47 Tɛ bɛ ndenle ne mɔ ala a ɛvale nu a yɛɛ tɛ bɛ bɛkyi nyɛleɛ ne mɔ ala a ɛyɛle bie a, emomu wɔ mekɛ ekyi bie ala anu wɔkpɔlɔ wɔdɛla bɛ bɔbɔ wɔ wɔ ɛbɛla kɔsɔɔti anu.+ 48 Mekɛ ala mɔɔ mede aze la,’ Tumivolɛ Awulae Gyihova a se a, ‘Ɛ diema raalɛ Sodɔm nee ɔ mra mraalɛ ne mɔ anyɛ mɔɔ ɛ nee ɛ mra mraalɛ ne mɔ ɛyɛ la bie. 49 Nea! Ɛhye a le ɛtane mɔɔ ɛ diema raalɛ Sodɔm yɛle a: Ɛnee ɔ nee ɔ mra mraalɛ ne mɔ+ le anwomemaazo+ na bɛlɛ aleɛ dɔɔnwo+ yɛɛ bɛde anzodwolɛ nu;+ noko bɛamboa mɔɔ bɛlɛkile ye nyane la nee ehyianli.+ 50 Bɛhɔle zo bɛyɛle anwomemaazo+ nee bɛkyi nyɛleɛ wɔ me nye zo,+ ɔti menwunle kɛ ɔwɔ kɛ meye bɛ mefi ɛkɛ.+

51 “‘Anzɛɛ Samɛlea+ anyɛ ɛtane dɔɔnwo ne mɔɔ ɛyɛle la foa ko bɔbɔ. Ɛmaanle wɔ bɛkyi nyɛleɛ ne yɛle dɔɔnwo dɛlale bɛ ɛdeɛ ne, wɔ bɛkyi nyɛleɛ ne mɔ kɔsɔɔti ati, ɛ mediema mraalɛ ne mɔ yɛle tenlenema.+ 52 Akee gyinla wɔ anyiemgba ne anloa ɔluakɛ wɔhile* kɛ ɛ mediema mraalɛ ne mɔ nyɛleɛ le kpalɛ. Kɛmɔ wɔyɛ bɛkyi ninyɛne wɔmaa wɔ ɛtane ɛzo ɛdɛla bɛ la ati, bɛle tenlenema bɛtɛla wɔ. Ɔti kɛkala, wɔbɔ anyiemgba noko gyinla wɔ anyiemgba ne anloa ɔluakɛ wɔmaa ɛ mediema mraalɛ ne mɔ ɛyɛ tenlenema ɛdɛla wɔ.’

53 “‘Na mebaboɔboa bɛ menli mɔɔ wɔ akɛlɛzonlenlɛ nu la, Sodɔm nee ɔ mra mraalɛ ne mɔ yɛɛ bɛ menli mɔɔ wɔ akɛlɛzonlenlɛ nu yɛɛ Samɛlea nee ɔ mra mraalɛ ne mɔ yɛɛ bɛ menli mɔɔ wɔ akɛlɛzonlenlɛ nu la anloa; mebaboɔboa ɛdawɔ noko wɔ menli mɔɔ wɔ akɛlɛzonlenlɛ nu la anloa meaboka bɛ nwo,+ 54 amaa wɔazoa wɔ anyiemgba; na wɔanwu kɛ wɔbɔ anyiemgba ɔlua mɔɔ wɔyɛ wɔva wɔkyekye bɛ rɛle la ati. 55 Ɛ mediema mraalɛ ne mɔ, Sodɔm nee ɔ mra mraalɛ ne mɔ, bɛazia ayɛ kɛ bɛ dɛba ne la, yɛɛ Samɛlea nee ɔ mra mraalɛ ne mɔ bɛazia ayɛ kɛ bɛ dɛba ne la, na ɛdawɔ nee ɛ mra ne mɔ noko bɛazia ayɛ kɛ bɛ dɛba ne la.+ 56 Ɛnee ɛ diema raalɛ Sodɔm ɛnfɛta kɛ ɛkɛbɔ ye duma wɔ kenle mɔɔ ɛmemaanle ɛ nwo zo la, 57 kolaa na bɛakpa wɔ amumuyɛ ne anwo ɛdanlɛ.+ Kɛkala Selea amra mraalɛ ne mɔ nee menli mɔɔ zuozua wɔ la tendɛ tia wɔ, yɛɛ Filisitia amra mraalɛ ne mɔ,+ bɛdabɛ mɔɔ bɛbɔ wɔ bɛyia la amuala golo ɛ nwo. 58 Mɔɔ bavi wɔ ɛbɛla ɛtane ne mɔɔ wɔbɔ nee wɔ bɛkyi nyɛleɛ ne anu ara la, bagua ɛ ti zo,’ Gyihova a se a.”

59 “Ɔluakɛ mɔɔ Tumivolɛ Awulae Gyihova ɛha la ɛne: ‘Mɔɔ wɔyɛ la mebava bie meayɛ wɔ,+ ɔluakɛ wɔanli me ngyekyeleɛ ne azo na wɔva wɔdo ndane ne.+ 60 Noko mebahakye ngyekyeleɛ ne mɔɔ me nee wɔ yɛle wɔ wɔ ngakula nu la, na me nee wɔ bayɛ ngyekyeleɛ mɔɔ wɔ ɛkɛ ne dahuu la.+ 61 Ɛbahakye wɔ nyɛleɛ ne na nyiane ahu wɔ+ wɔ mekɛ mɔɔ ɛlɛdie ɛ mediema mraalɛ ne mɔ, bɛdabɛ mɔɔ bɛtɛla wɔ mgbanyinli nee bɛdabɛ mɔɔ bɛle ngakula la, na mebava bɛ meamaa wɔ kɛ mralɛ mraalɛ, noko tɛ wɔ ngyekyeleɛ ne ati ɔ.’

62 “‘Na medame mumua ne me nee wɔ bayɛ ngyekyeleɛ; na ɛbanwu kɛ medame a mele Gyihova a. 63 Akee ɛbahakye na ɛ nyunlu agua aze na nyiane ti, ɛnrɛhola ɛ nloa buke bieko,+ wɔ mekɛ mɔɔ meva mehyɛ wɔ* ɔnva nwo mɔɔ wɔyɛ la amuala la,’+ Tumivolɛ Awulae Gyihova a se a.”