Ɛzela

8 Mbusua mgbanyima nee menli mɔɔ nee me vi Babelɔn hɔle wɔ Belemgbunli Atazɛzɛse mekɛ zo mɔɔ bɛdianle bɛ abusua abusua la ɛne:+ 2 Fenɛhaze abozoamra anu,+ Gɛhyɔm; Yetamaa abozoamra anu,+ Daneɛle; Devidi abozoamra anu, Hatɛhye; 3 Hyɛkanaya nee Peelɔhye abozoamra anu, Zɛkalaya, ɛnee mrenyia 150 boka ɔ nwo; 4 Peehate-mowabe abozoamra anu,+ Zɛlahaya ara Ɛleɛho-yinae, ɛnee mrenyia 200 boka ɔ nwo; 5 Zatu abozoamra anu,+ Gyeheezayɛle ara Hyɛkanaya, ɛnee mrenyia 300 boka ɔ nwo; 6 Eden abozoamra anu,+ Dwɔnatan ara Yibɛde, ɛnee mrenyia 50 boka ɔ nwo; 7 Yilam abozoamra anu,+ Atalaya ara Gyɛhyeya, ɛnee mrenyia 70 boka ɔ nwo; 8 Hyɛfataya abozoamra anu,+ Maekeɛle ara Zɛbadaya, ɛnee mrenyia 80 boka ɔ nwo; 9 Dwowabe abozoamra anu, Gyɛhayɛle ara Obadaya, ɛnee mrenyia 218 boka ɔ nwo; 10 Beenae abozoamra anu, Dwosefaya ara Hyɛlomete, ɛnee mrenyia 160 boka ɔ nwo; 11 Bibae abozoamra anu,+ Bibae ara Zɛkalaya, ɛnee mrenyia 28 boka ɔ nwo; 12 Azegaade abozoamra anu,+ Hakatan ara Dwoheenan, ɛnee mrenyia 110 boka ɔ nwo; 13 Adonaekam abozoamra anu,+ bɛdabɛ mɔɔ bɛli amozi la, bɛ aluma ɛne: Ɛlefɛlɛte, Gyiyayɛle nee Hyɛmaya, ɛnee mrenyia 60 boka bɛ nwo; 14 Begevae abozoamra anu,+ Yutae nee Zabade, ɛnee mrenyia 70 boka bɛ nwo.

15 Memboɔboale bɛ nloa wɔ azule ne mɔɔ se ba Aheeva la anloa+ na yɛdɛnlanle ɛkɛ ne kenle nsa. Noko mɔɔ meneɛnleanle menli ne nee ɛsɔfo ne mɔ anu la, meannwu Livaenli biala wɔ ɛkɛ. 16 Yemɔti menzoanle memaanle bɛhɔvɛlɛle Ɛleyizɛ, Ɛleɛle, Hyɛmaya, Ɛleneetan, Gyeelebe, Ɛleneetan, Neetan, Zɛkalaya nee Mɛhyɛlam mɔɔ bɛle mgbanyima la, yɛɛ Dwɔyalebe nee Ɛleneetan mɔɔ bɛle kilehilevolɛma la. 17 Akee menzoanle bɛ kɛ bɛhɔ Yedo mɔɔ le kpanyinli wɔ ɛleka bie mɔɔ bɛfɛlɛ ye Kasefaya la ɛkɛ. Menzele bɛ kɛ bɛha bɛhile Yedo nee ɔ mediema mrenyia ne mɔ, ɛzonlenlɛsua ne anu sonvolɛma ne* mɔɔ bɛwɔ Kasefaya la kɛ bɛva menli mɔɔ bazonle wɔ yɛ Nyamenle ne sua ne anu la bɛrɛlɛ yɛ. 18 Kɛmɔ yɛ Nyamenle ne kpalɛyɛlɛ ɛsalɛ ne wɔ yɛ nwo zo la ati, bɛvale nrenyia nrɛlɛbɛvolɛ bie mɔɔ vi Yizilayɛ ara Livae anlɔnra Maalae+ abozoamra anu mɔɔ bɛfɛlɛ ye Hyɛlibaya+ la bɛrale. Ɔ nee ɔ mra yɛɛ ɔ mediema mrenyia, bɛle mrenyia 18; 19 yɛɛ Hahyabaya nee Gyɛhyeya mɔɔ vi Mɛlɛlae+ abozoamra anu la, ɔ mediema mrenyia nee bɛ mra mrenyia, bɛle mrenyia 20. 20 Na ɛnee ɛzonlenlɛsua ne anu sonvolɛma ne* noko le 220, na bɛhɛlɛle bɛ muala aluma. Devidi nee mgbanyima ne mɔ vale bɛ maanle kɛ bɛboa Livaema ne.

21 Akee menganle kɛ bɛmaa yɛhye ɛhɔne wɔ azule Aheeva ne anloa, yɛbɛlɛ yɛ nwo aze wɔ yɛ Nyamenle ne anyunlu na yɛkpondɛ yɛ adendulɛ ne anwo adehilelɛ yɛvi ye ɛkɛ yɛmaa yɛdayɛ nee yɛ mra yɛɛ yɛ ninyɛne kɔsɔɔti. 22 Ɔyɛle me nyiane kɛ mebazɛlɛ belemgbunli ne kɛ ɔmaa yɛ sogyama nee mgbɔnwɔkavoma ɔmaa bɛbɔ yɛ nwo bane wɔ adenle nu bɛvi yɛ agbɔvolɛ nwo, ɔluakɛ yɛhanle yɛhilele belemgbunli ne kɛ: “Yɛ Nyamenle ne kpalɛyɛlɛ ɛsalɛ ne wɔ menli mɔɔ kpondɛ ye la kɔsɔɔti anwo zo,+ noko ye anwosesebɛ nee ye ɛya ne wɔ menli mɔɔ kpo ye la kɔsɔɔti anwo zo.”+ 23 Yemɔti yɛhyele ɛhɔne na yɛkpondɛle yɛ adendulɛ ne anwo adehilelɛ yɛvile yɛ Nyamenle ne ɛkɛ, na ɔdiele yɛ nzɛlɛlɛ.+

24 Akee menyele ɛsɔfo mgbanyima 12 menziele ahane, bɛmɛ a le Hyɛlibaya nee Hahyabaya+ yɛɛ bɛ mediema mrenyia bulu. 25 Akee menzuzule dwɛtɛ fufule ne, nvutuke ne nee ahyɛnze ne mɔ, ninyɛne mɔɔ belemgbunli ne nee ye folɛtuvoma nee ye mgbanyima yɛɛ Yizilayɛma kɔsɔɔti mɔɔ ɛnee wɔ ɛkɛ ne la vale boale yɛ Nyamenle ne sua ne la memaanle bɛ.+ 26 Yemɔti ninyɛne mɔɔ menzuzule menwulale bɛ sa nu la a le dwɛtɛ fufule talɛnte* 650, dwɛtɛ fufule ahyɛnze 100 mɔɔ le talɛnte 2, nvutuke talɛnte 100, 27 nvutuke ahyɛnze ngyikyi 20 mɔɔ le daleke* 1,000, yɛɛ kɔbele kpalɛ mɔɔ ta na ɔsonle bolɛ kɛ nvutuke la ahyɛnze 2.

28 Akee menzele bɛ kɛ: “Bɛle nwuanzanwuanza bɛmaa Gyihova+ yɛɛ ahyɛnze ne mɔ le nwuanzanwuanza, na dwɛtɛ fufule ne nee nvutuke ne le afɔlebɔdeɛ mɔɔ bɛvi bɛ ɛhulolɛ nu bɛva bɛmaa Gyihova, bɛ nenyia mɔ Nyamenle ne a. 29 Bɛnlea bɛ boɛ kɔkpula kɛ bɛbazuzu bɛ wɔ ɛsɔfo mgbanyinli ne mɔ nee Livaema yɛɛ Yizilayɛ mbusua mgbanyima ne mɔ anyunlu wɔ Gyɛlusalɛm+ wɔ Gyihova sua ne ekpumgbunli ne mɔ* anu la.” 30 Na ɛsɔfo ne mɔ nee Livaema ne liele dwɛtɛ fufule ne nee nvutuke ne yɛɛ ahyɛnze ne mɔ mɔɔ bɛzuzule bɛmaanle bɛ la, amaa bɛava bɛara yɛ Nyamenle ne sua ne anu wɔ Gyɛlusalɛm.

31 Akee yɛdule yɛ bo wɔ azule Aheeva+ ne anloa wɔ siane ne mɔɔ limoa la kenle ne mɔɔ tɔ zolɛ 12 la azo+ kɛ yɛkɔ Gyɛlusalɛm, na ɛnee yɛ Nyamenle ne asa wɔ yɛ nwo zo, na ɔliele yɛ ɔvile kpɔvolɛ ne nee busiama asa anu wɔ adenle nu. 32 Yemɔti yɛrale Gyɛlusalɛm+ na yɛdɛnlanle ɛkɛ ne kenle nsa. 33 Na ye kenle nna ne azo, yɛzuzule dwɛtɛ fufule ne nee nvutuke ne yɛɛ ahyɛnze ne mɔ wɔ yɛ Nyamenle ne sua ne anu+ na yɛvale yɛmaanle ɛsɔfo Yulaegya ara Mɛlemɔto+ na ɛnee Fenɛhaze ara Ɛlieza wɔ ɔ nwo ɛkɛ, yɛɛ ɛnee Gyɛhyua ara Dwozabade+ nee Bɛnuwae+ ara Nowadaya mɔɔ bɛle Livaema la wɔ bɛ nwo ɛkɛ. 34 Bɛdianle debie biala na bɛzuzule, na bɛhɛlɛle nuhua ɛlomboɛ ne kɔsɔɔti bɛdole ɛkɛ. 35 Menli mɔɔ vi akɛlɛzonlenlɛ nu rale la bɔle ɛyelalɛ afɔle maanle Yizilayɛ Nyamenle ne, Yizilayɛma kɔsɔɔti nlankɛ nyinli 12.+ Eza yɛvale mboane nyinli 96+ nee mboane mralɛ nyinli 77 yɛbɔle ɛyelalɛ afɔle yɛɛ yɛvale mbɔnkye nyinli 12+ yɛbɔle ɛtane afɔle; ɛnee ɛhye mɔ amuala le ɛyelalɛ afɔlebɔdeɛ maa Gyihova.+

36 Akee yɛvale belemgbunli ne mɛla ne mɔ yɛmaanle+ belemgbunli ne maanzinli zo neavolɛma* yɛɛ amɛnladoma mɔɔ nea maanzinli mɔɔ wɔ Azule Ne Anzi*+ lɔ la azo la, na bɛboale menli ne nee nɔhalɛ Nyamenle ne sua ne.+