Tudu Nzuzulɛ Biala Mɔɔ Tia Nyamenle Anwo Nrɛlɛbɛ La!

 1. Kɔkɔbɔlɛ boni a ɛzoanvolɛ Pɔɔlo vale maanle Kilisienema mɔɔ bɛkpokpa bɛ la ɛ?

ƐZOANVOLƐ Pɔɔlo bɔle kɔkɔ kɛ, “bɛmmasukoa.” Bɛmmasukoa duzu? “Bɛmmasukoa ewiade ɛhye anu menli ne.” (Wlo. 12:2) Pɔɔlo hɛlɛle edwɛkɛ ɛhye maanle ɛvoya mɔɔ limoa Kilisienema. Duzu ati a ɔvale folɛdulɛ ɛhye mɔɔ anyebolo wɔ nu la ɔmaanle menli mɔɔ ɛnee bɛdu bɛ nwo bɛmaa Nyamenle na bɛva sunsum nwuanzanwuanza ne bɛkpokpa bɛ la ɛ?​—Wlo. 1:7.

2-3. Kɛzi Seetan bɔ mɔdenle kɛ ɔtwe yɛ yeavi Gyihova anwo ɛ? Kɛzi yɛbahola yɛadudu ninyɛne mɔɔ “ɛsosɔ ndinli” wɔ yɛ adwenle nu la ɛ?

² Ɛnee ɔgyegye Pɔɔlo ɔluakɛ ɛnee adwenle nzuzulɛ mɔɔ ɛnle kpalɛ mɔɔ Seetan ewiade ne anu amra lɛ la ɛlɛnyia Kilisienema bie mɔ anwo zo tumi. (Ɛfɛ. 4:17-19) Ɛhye kola to yɛ nuhua ko biala. Ɔluakɛ Seetan, ewiade ɛhye nyamenle ne kulo kɛ ɔtwe yɛ ɔfi Gyihova anwo la ati, ɔdua ndenle ngakyile zo. Kɛ neazo la, saa yɛkulo kɛ yɛdie duma a, ɔbahola yealua zo yeahwe yɛ yɛavi Gyihova anwo. Eza ɔbahola yealua yɛ amaamuo, kɛzi bɛtetele yɛ yɛɛ nwomazukoalɛ zo yeanyia yɛ adwenle ne azo tumi.

³ Asoo yɛbahola yɛadudu ninyɛne mɔɔ “ɛsosɔ ndinli” wɔ yɛ adwenle nu la ɔ? (2 Kɔl. 10:4) Yɛ mualɛ mɔɔ Pɔɔlo vale maanle la nzonlɛ: “Yɛlɛtudu nzuzulɛ nee debie biala mɔɔ kpogya mɔɔ bɛmaa ye zo bɛtia Nyamenle anwo nrɛlɛbɛ la, yɛɛ yɛlɛdi nzuzulɛ biala azo konim yɛamaa yeadie Kelaese.” (2 Kɔl. 10:5) Ɛhɛe, ɔlua Gyihova moalɛ zo yɛbahola yɛali adwenle ɛtane zo konim. Kɛ mɔɔ ayile kola maa pɔezen ta la, zɔhane ala a Nyamenle Edwɛkɛ ne kola bɔ yɛ nwo bane fi Seetan ewiade ne tumi nwo a.

 4. Nzenzaleɛ boni mɔ a ɛnee ɔwɔ kɛ yɛ nuhua dɔɔnwo yɛ wɔ mekɛ mɔɔ yɛzukoale nɔhalɛ ne la ɛ?

⁴ Dwenle nzenzaleɛ mɔɔ ɛnee ɔwɔ kɛ ɛyɛ wɔ mekɛ mɔɔ ɛliele Nyamenle Edwɛkɛ ne anu nɔhalɛ ne ɛdole nu na ɛzile kpɔkɛ kɛ ɛsonle Gyihova la anwo. Wɔ yɛ nuhua dɔɔnwo afoa nu, ɛnee ɔwɔ kɛ yɛgyakyi subane ɛtane bie. (1 Kɔl. 6:9-11) Ɔyɛ yɛ fɛ kɛ Gyihova boale yɛ maanle yɛgyakyile subane ɛtane zɛhae mɔ la.

 5. Ninyɛne nwiɔ boni mɔ a Wulomuma 12:2 ka kɛ yɛyɛ a?

⁵ Noko, ɔnle kɛ yɛto yɛ adwenle nu. Ɔnva nwo kɛ yɛnyɛ ɛtane mgbole mɔɔ ɛnee yɛyɛ kolaa na bɛazɔne yɛ la, ɔwɔ kɛ yɛnea boɛ wɔ debie biala mɔɔ bamaa yɛazia yɛabɔ yɛ ɛbɛla dɛba ne mɔ bieko la anwo. Kɛzi yɛbahola yɛayɛ ɛhye ɛ? Pɔɔlo buale kɛ: “Bɛmmasukoa ewiade ɛhye anu menli ne, emomu bɛhakyi bɛ adwenle.” (Wlo. 12:2) Yemɔti, ɔwɔ kɛ yɛyɛ ninyɛne nwiɔ. Mɔɔ limoa, ‘ɔnle kɛ yɛsukoa’ ewiade ne anzɛɛ yɛmaa ɔnyia yɛ nwo zo tumi. Mɔɔ tɔ zo nwiɔ, ɔwɔ kɛ ‘yɛkakyi’ yɛ subane na yɛnyia adwenle fofolɛ.

 6. Duzu a yɛsukoa yɛfi adwenle mɔɔ wɔ Gyisɛse edwɛkɛ mɔɔ wɔ Mateyu 12:43-45 la anu a?

⁶ Ɛhakyilɛ mɔɔ ɛnee Pɔɔlo ɛlɛka nwolɛ edwɛkɛ la kɔ moa tɛla nzenzaleɛ mɔɔ yɛbayɛ wɔ ɛnyelɛ zo la. Ɔfale yɛ ɛbɛlabɔlɛ foa biala anwo. (Nea ɛlɛka “Wɔhakyi Anzɛɛ Wɔyɛ Ɛ Nwo Kɛ Wɔhakyi?”) Ɔwɔ kɛ yɛkakyi yɛ subane, yɛ nganeɛdelɛ nee yɛ nzuzulɛ bɔkɔɔ. Yemɔti, ɔwɔ kɛ yɛ muala yɛbiza yɛ nwo kɛ, ‘Asoo nzenzaleɛ mɔɔ melɛyɛ amaa meayɛ Kilisienenli la le ɛnyelɛzo anzɛɛ amgba melɛyɛ nzenzaleɛ wɔ me adwenle nee me ahonle nu?’ Ngakyile kpole wɔ nu. Wɔ Mateyu 12:43-45, Gyisɛse maanle yɛnwunle mɔɔ ɔwɔ kɛ yɛyɛ la. (Kenga.) Ɛzukoalɛdeɛ mɔɔ anwo hyia la wɔ edwɛkɛ zɔhane anu: Saa yɛye nzuzulɛ ɛtane yɛfi yɛ ti anu a, ɛnee ɔtɛwiele; ɔwɔ kɛ yɛnyia Nyamenle adwenle.

 7. Kɛ ɔkɛyɛ na yɛahola yɛahakyi kɛzi yɛde wɔ yɛ nu la ɛ?

⁷ Asoo yɛbahola yɛahakyi yɛ adwenle anzɛɛ kɛzi yɛde wɔ yɛ nu la ɔ? Nyamenle Edwɛkɛ ne bua kɛ: “Ɔwɔ kɛ bɛmaa bɛkɔ zo bɛyɛ bɛ fofolɛ wɔ tumi ne mɔɔ kile bɛ adwenle ne adenle la anu, na bɛva subane fofolɛ ne mɔɔ bɛbɔle ye wɔ Nyamenle ɛhulolɛ zo wɔ nɔhalɛ tenleneyɛlɛ nee nɔhalɛlilɛ nu la bɛwula.” (Ɛfɛ. 4:23, 24) Ɛhɛe yɛbahola, noko ɔnla aze. Saa yɛkomo atiakunluwɔzo ɛtane zo na yɛgyakyi ninyɛndane ɛyɛlɛ a, ɛnee yɛtɛwiele. Ɔwɔ kɛ yɛkakyi “tumi ne mɔɔ kile [yɛ] adwenle ne adenle la.” Yɛ subane, yɛ nganeɛdelɛ nee yɛ nzuzulɛ mɔɔ yɛkakyi ye la noko boka nwo. Ɔhyia mɔdenlebɔlɛ dahuu.

8-9. Kɛzi adiema nrenyia bie anwubielɛ ne maa yɛnwu deɛmɔti ɔhyia kɛ yɛkakyi kɛzi yɛde wɔ yɛ nu la ɛ?

⁸ Bɛmaa yɛzuzu adiema nrenyia bie mɔɔ ɛnee ɔlɛ ahonle la neazo ne anwo. Mɔɔ ɔgyakyile nza ɛnlonlɛ nee konle la, ɔfɛtale ɔmaanle ɛzɔnenlɛ, na ɔyɛle daselɛlilɛ kpole wɔ ɛleka mɔɔ ɔde la. Noko kenle ko nɔsolɛ bie wɔ ye ɛzɔnenlɛ ne anzi mekɛ ekyi, ɔyiale sɔnea bie mɔɔ ɛnee ɔ nye ɛnla. Nrenyia bie mɔɔ ɛbo la vale konle doale ye wɔ ye sua nu. Alimoa ne ɛnee yɛ diema ne ɛngulo kɛ ɔko. Noko, mɔɔ nrenyia ne dendɛle tiale Gyihova duma ne la, yɛ diema ne angola ɔ nwo sɔ. Ɔlile nrenyia ne anwo gyima. Duzu ati a ɔyɛle zɔhane a? Baebolo ne mɔɔ ɔsukoa la maanle ɔhomole ye basabasayɛlɛ subane ne azo, noko ɛnee ɔtɛkolale ɔtɛkakyile tumi ne mɔɔ kile ye adwenle ne adenle la. Kile kɛ, ɔtɛkakyile kɛzi amgba ɔde wɔ ye nu la.

⁹ Noko, adiema ɛhye ammaa ɔ sa nu ando. (Mrɛ. 24:16) Ɔlua mgbanyima ne mɔ moalɛ zo, ɔnyianle anyuhɔlɛ kpalɛ. Awieleɛ bɔkɔɔ ne, ɔfɛtale kɛ asafo nu kpanyinli. Kenle ko nɔsolɛ bie, ɔyiale tɛnlabelɛ bie mɔɔ le kɛ mɔɔ ɔhɔle nu mekɛ bie la wɔ Belemgbunlililɛ Asalo ne anyunlu. Nrenyia bie mɔɔ ɛbo la rale kɛ ɔbo mgbanyima ne mɔ ko. Duzu a yɛ diema ne yɛle a? Ɔvile mɛlɛbɛnwoaze nu ɔ nee nzabovonli ne dendɛle wɔ adenle kɛnlɛma zo ɔmaanle nrenyia ne ahonle dɔle ye azule nu, na ɔboale ye ɔmaanle ɔhɔle sua nu. Duzu a zile a? Yɛ diema ne ɛhakyi tumi ne mɔɔ kile ye adwenle ne adenle la. Yehakyi bɔkɔɔ yerayɛ awie mɔɔ lɛ anzodwolɛ na ɔbɛlɛ ɔ nwo aze​—ɛhye wulale Gyihova anyunlunyia!

10. Amaa yɛahola yɛahakyi kɛzi yɛde wɔ yɛ nu la, duzu a ɔwɔ kɛ yɛyɛ a?

¹⁰ Yɛnrɛhola yɛnrɛyɛ nzenzaleɛ ɛhye mɔ kenle ko yɛɛ ɔmmaa mgbane ala. Bie a ɔbahyia kɛ ‘yɛbɔ mɔdenle kpalɛ’ wɔ ɛvolɛ dɔɔnwo anu. (2 Pita 1:5) Yɛnrɛhola yɛnrɛha kɛ ɔluakɛ yɛva ɛvolɛ dɔɔnwo yɛzonle Gyihova la ati, ɔle kpalɛ. Ɔwɔ kɛ yɛbɔ mɔdenle yɛkakyi kɛzi yɛde wɔ yɛ nu la. Ninyɛne bie mɔ mɔɔ yɛbayɛ la baboa yɛ. Bɛmaa yɛzuzu ɛhye mɔ bie anwo.

11. Kɛzi asɔneyɛlɛ boa yɛ maa yɛkakyi tumi ne mɔɔ kile yɛ adwenle ne adenle la ɛ?

¹¹ Asɔneyɛlɛ le debie mɔɔ limoa mɔɔ anwo hyia. Ɔwɔ kɛ yɛyɛ asɔne kɛ mɔɔ edwɛndolɛnli ne yɛle la: “O Nyamenle, bɔ ahonle mɔɔ anu te la wula me nu, na maa me sunsum fofolɛ mɔɔ gyi kpundii la.” (Edw. 51:10) Ɔwɔ kɛ yɛdie yɛto nu kɛ ɔhyia kɛ yɛkakyi tumi ne mɔɔ kile yɛ adwenle ne adenle la, na yɛsɛlɛ Gyihova kɛ ɔboa yɛ. Duzu ati a yɛdie yɛdi kɛ Gyihova baboa yɛ amaa yɛayɛ nzenzaleɛ a? Ɛwɔkɛ mɔɔ Gyihova bɔle Yizilayɛma mɔɔ anzo yɛ se wɔ Yizikeɛle mekɛ zo la bahola amaa yɛ anwosesebɛ: “Mebamaa bɛanyia ahonle fofolɛ na meamaa bɛ sunsum fofolɛ . . . Na meamaa bɛ tieyɛ ahonle.” (Yiz. 11:19) Ɛnee Gyihova kulo kɛ ɔboa Yizilayɛma zɔhane ɔmaa bɛkakyi, na ɔlɛ ɛhulolɛ kɛ ɔbaboa yɛdayɛ noko.

12-13. (a) Kɛ mɔɔ Edwɛndolɛ 119:59 kile la, duzu a ɔwɔ kɛ yɛdwenledwenle nwo a? (b) Kpuya boni mɔ a ɔwɔ kɛ ɛbiza ɛ nwo a?

¹² Debie mɔɔ tɔ zo nwiɔ mɔɔ anwo hyia la a le kɛ ɛbadwenledwenle ninyɛne nwo. Ɔwɔ kɛ yɛdwenledwenle Nyamenle Edwɛkɛ ne mɔɔ yɛkenga ye alehyenlɛ biala la anwo kpalɛ, amaa yɛanwu nzuzulɛ nee subane mɔɔ ɔwɔ kɛ yɛkakyi ye la. (Kenga Edwɛndolɛ 119:59; Hib. 4:12; Gye. 1:25) Ɔwɔ kɛ yɛnea kɛ saa yɛ nye die ewiade adwenle bie anwo a. Ɔwɔ kɛ yɛdie sinlidɔlɛ mɔɔ yɛlɛ la yɛto nu na yɛbɔ mɔdenle kɛ yɛbadu ɔ bo.

¹³ Kɛ neazo la, biza ɛ nwo kɛ: ‘Asoo melɛ anyebolo anzɛɛ nungulehwenlɛ subane wɔ me ahonle nu?’ (1 Pita 2:1) ‘Asoo anwomemaazo subane wɔ me nu ɔlua ɛleka mɔɔ bɛtetele me, me nwomazukoalɛ anzɛɛ me ezukoa gyinlabelɛ ti ɔ?’ (Mrɛ. 16:5) ‘Asoo mebu me nye megua bɛdabɛ mɔɔ bɛnlɛ ninyɛne mɔɔ melɛ la bie anzɛɛ bɛvi ɛleka gyɛne la anwo zo?’ (Gye. 2:2-4) ‘Asoo me nye die ninyɛne mɔɔ Seetan ewiade ne kanvo kile la anwo?’ (1 Dwɔn 2:15-17) ‘Asoo me nye die anyelielɛ ninyɛne mɔɔ nla nu ɛbɛlatane yɛɛ basabasayɛlɛ wɔ nu la anwo?’ (Edw. 97:10; 101:3; Emɔso 5:15) Kpuya ɛhye mɔ anwo mualɛ bamaa wɔanwu ɛleka mɔɔ ɔwɔ kɛ ɛyɛ nzenzaleɛ la. Saa yɛkola yɛkakyi yɛ nzuzulɛ nee nganeɛdelɛ ɛtane “mɔɔ ɛsosɔ ndinli” wɔ yɛ ahonle nu la a, yɛbazɔ yɛ anwuma Selɛ ne anye kpole.​—Edw. 19:14.

14. Duzu ati a ɔhyia kɛ yɛkpa agɔnwolɛma kpalɛ a?

¹⁴ Debie mɔɔ tɔ zo nsa mɔɔ anwo hyia la a le kɛ yɛbakpa agɔnwolɛma kpalɛ. Saa yɛdie yɛto nu anzɛɛ yɛnlie yɛndo nu bɔbɔ a, yɛ gɔnwo mɔ nyia yɛ nwo zo tumi kpalɛ. (Mrɛ. 13:20) Yɛta yɛyia menli mɔɔ bɛmboa yɛ bɛmmaa yɛnnyia Nyamenle adwenle la wɔ gyima nu anzɛɛ sukulu nu. Noko, yɛbahola yɛanyia agɔnwolɛma kpalɛ wɔ yɛ Kilisiene ayia ne mɔ abo. Ɛkɛ ne a yɛbanyia anwosesebɛmaanlɛ wɔ “ɛlɔlɛ nee gyima kpalɛ ɛyɛlɛ nu” a.​—Hib. 10:24, 25.

15-16. Kɛzi Seetan bɔ mɔdenle kɛ ɔkakyi yɛ adwenle ɛ?

¹⁵ Kakye kɛ, Seetan kulo kɛ ɔkakyi yɛ adwenle. Ɔkulo kɛ ɔdua adenle biala azo ɔsɛkye ndelebɛbo mɔɔ yɛnyia ye wɔ Nyamenle Edwɛkɛ ne anu la.

¹⁶ Seetan tɛkɔ zo tɛbiza kpuya ne mɔɔ ɔbizale Yive wɔ Yidɛn tola ne anu la: ‘Asoo amgba Nyamenle se . . . ?’ (Mɔl. 3:1) Wɔ ewiade ɛhye mɔɔ Seetan di zolɛ tumi la anu, ɔmaa kpuya le kɛ ɛhye mɔ ba yɛ adwenle nu: ‘Asoo amgba Nyamenle kyi menli mɔɔ bɛ awodeɛ le ko la agyalɛ? Asoo amgba Nyamenle ɛngulo kɛ ɛdi Bolonyia nee awolɛkenle? Asoo amgba Nyamenle ɛngulo kɛ ɛdie mogya? Asoo amgba Nyamenle ne mɔɔ lɛ ɛlɔlɛ la ɛngulo kɛ ɛ nee wɔ alɔvolɛ mɔɔ bɛdu bɛ la tu?’

17. Saa awie biza yɛ diedi ne anwo kpuya mɔɔ maa yɛ adwenle nu yɛ yɛ kesee la a, duzu a ɔwɔ kɛ yɛyɛ a, na duzu a Kɔlɔsaema 2:6, 7 ka kɛ ɔbavi nu yeara a?

¹⁷ Ɔwɔ kɛ yɛnyia anwodozo wɔ ninyɛne mɔɔ yɛdie yɛdi la anu. Saa yɛamkpondɛ kpuya zɛhae mɔ anwo mualɛ a, ɔbahola yeamaa yɛ adwenle nu ayɛ yɛ kesee. Adwenle nu keseeyɛlɛ zɛhae kola sɛkye yɛ adwenle nee yɛ diedi ne. Yemɔti, duzu a ɔwɔ kɛ yɛyɛ a? Nyamenle Edwɛkɛ ne bɔ yɛ amaneɛ kɛ yɛhakyi yɛ adwenle amaa yɛazɔ yɛanlea yɛanwu “Nyamenle ɛhulolɛdeɛ ne mɔɔ le kpalɛ na ɔsɔ ɛnyelɛ na ɔdi munli la.” (Wlo. 12:2) Nyamenle Edwɛkɛ ne mɔɔ yɛbazukoa ye dahuu la bamaa yɛanyia anwodozo wɔ nɔhalɛ ne mɔɔ yɛzukoa yɛvi Baebolo ne anu la anu. Yɛbahola yɛanyia anwodozo bɔkɔɔ kɛ, Gyihova ngyinlazo ne mɔ tenrɛ. Akee, yɛbagyinla “kpundii wɔ diedi ne anu” kɛ baka mɔɔ ɔ bo ndinli ne yɛ se la.​—Kenga Kɔlɔsaema 2:6, 7.

18. Duzu a baboa yɛ amaa Seetan ewiade ne annyia yɛ adwenle ne azo tumi a?

¹⁸ Ɔwɔ kɛ yɛ nuhua ko biala yɛ ye diedi ne anwo gyima amaa yeagyinla kpundii. Yemɔti, kɔ zo yɛ fofolɛ wɔ tumi ne mɔɔ kile wɔ adwenle ne adenle la anu. Yɛ asɔne dahuu; sɛlɛ Gyihova kɛ ɔva ye sunsum ne ɔboa wɔ. Dwenledwenle ninyɛne nwo kpalɛ na kɔ zo nea kɛzi ɛdwenle la kpalɛ. Kpondɛ agɔnwolɛma kpalɛ; ɛ nee menli mɔɔ bamaa wɔanyia adwenle kpalɛ la ɛdu. Saa ɛyɛ zɔ a, ɔnrɛmaa Seetan ewiade ne ɛnrɛnyia ɛ nwo zo tumi, na ɛhye baboa wɔ yeamaa wɔadudu “nzuzulɛ nee debie biala mɔɔ kpogya mɔɔ bɛmaa ye zo bɛtia Nyamenle anwo nrɛlɛbɛ la.”​—2 Kɔl. 10:5.