Bɛhɔ Zo Bɛnyia Ɛlɔlɛ Bɛmaa Bɛ Nwo

 1. Duzu a kile kɛ ɛlɔlɛ mɔɔ wɔ mbusua dɔɔnwo anu la ɛha aze ɛ?

BAEBOLO ne hanle dole ɛkɛ ne kɛ, wɔ awieleɛ mekɛ ne anu, menli ɛnrɛnyia “sonla nwo ɛlɔlɛ.” (2 Tim. 3:1, 3) Yɛnwu kɛ ngapezo ɛhye ɛlɛba nu ɛnɛ. Kɛ neazo la, ewolebɔlɛ ɛmaa mbusua mgbe dɔɔnwo avinli ɛtete, yemaa awovolɛ ne mɔ ɛva bɛ nwo ɛya yɛɛ ngakula ne mɔ noko te nganeɛ kɛ bɛngulo bɛ. Mbusua mɔɔ bɛde sua ko anu bɔbɔ la de ye kɛ nyɛvolɛ. Abusua folɛtuvolɛ bie hanle kɛ: “Mame, papa, yɛɛ ngakula ne mɔ ɛmbɔ adawu, biala adwenle wɔ ye kɔmpita, tabelɛte, fonu anzɛɛ vidio game zo. Mbusua ɛhye mɔ de sua ko anu ɛdeɛ, noko bɛnze bɛ nwo.”

2-3. (a) Kɛ mɔɔ Wulomuma 12:10 kile la, nwane mɔ a ɔwɔ kɛ yɛkulo bɛ a? (b) Duzu a yɛbazuzu nwo wɔ edwɛkɛ ɛhye anu a?

² Yɛngulo kɛ yɛsukoa ewiade ne anu menli ne mɔɔ bɛnlɛ ɛlɔlɛ biala la. (Wlo. 12:2) Emomu, ɔwɔ kɛ yɛsukoa kɛ yɛbanyia ɛlɔlɛ yɛamaa yɛ mbusuafoɔ yɛɛ yɛ mediema diedima. (Kenga Wulomuma 12:10.) Kɛzi ɛlɔlɛ ɛhye de ɛ? Ɛlɔlɛ ɛhye maa mbusuafoɔ mɔɔ bɛbikye bɛ nwo kpalɛ la fa bɛ nwo agɔnwolɛ kyengye. Ɛlɔlɛ zɔhane bie a ɔwɔ kɛ yɛnyia yɛmaa yɛ mediema mɔɔ yɛ nee bɛ wɔ asafo ne anu la a. Saa yɛkulo yɛ nwo a, ɔbamaa koyɛlɛ mɔɔ nwolɛ hyia kpalɛ wɔ nɔhalɛ ɛzonlenlɛ nu la adɛnla yɛ avinli dahuu.​—Maeka 2:12.

³ Amaa yɛahola yɛala ɛlɔlɛ ɛhye bie ali la, bɛmaa yɛnlea mɔɔ yɛbahola yɛazukoa yɛavi Baebolo nu neazo bie mɔ anu la.

 4. Duzu a Gyemise 5:11 maa yɛnwu ye wɔ Gyihova ɛlɔlɛ ne anwo a?

⁴ Baebolo ne maa yɛnwu Gyihova subane ngɛnlɛma ne mɔ. Kɛ neazo la, ɔka kɛ “Nyamenle le ɛlɔlɛ.” (1 Dwɔn 4:8) Yemɔ angomekye bɔbɔ maa yɛbikye ye. Noko eza Baebolo ne ka kɛ “Gyihova lɛ ahunluyelɛyelalɛ.” (Kenga Gyemise 5:11.) Ɛhye maa yɛnwu kɛzi Gyihova kulo yɛ la bɔkɔɔ!

 5. Kɛzi Gyihova da anwunvɔnezelɛ ali ɛ, na kɛ ɔkɛyɛ na yɛazukoa ye ɛ?

⁵ Yɛ ye nzonlɛ kɛ, mekɛ mɔɔ Gyemise 5:11 ɛlɛka Gyihova ahunluyelɛyelalɛ ne anwo edwɛkɛ la, eza ɔhanle subane bieko mɔɔ maa yɛbikye ye la anwo edwɛkɛ​—ye anwunvɔnezelɛ ne. (Ɛzɛ. 34:6) Adenle ko mɔɔ Gyihova dua zo se yɛ anwunvɔne la a le kɛ, ɔfa nvonleɛ mɔɔ yɛyɛ la ɔkyɛ yɛ. (Edw. 51:1) Wɔ Baebolo ne anu, anwunvɔnezelɛ kɔ moa tɛla awie ɛtane mɔɔ yɛfa yɛahyɛ ye la. Anwunvɔnezelɛ le nganeɛdelɛ mɔɔ anu yɛ se mɔɔ awie nyia maa awie mɔɔ ɛlɛnwu amaneɛ la na ɔbɔ mɔdenle kɛ ɔbaboa ye la. Gyihova se ɛhulolɛ mɔɔ ɔlɛ kɛ ɔboa yɛ la le kpole tɛla kɛzi ɛrɛladane te nganeɛ maa ɔ ra la. (Aye. 49:15) Saa yɛkɔ ngyegyelɛ nu a, Gyihova anwunvɔnezelɛ ne ka ye maa ɔboa yɛ. (Edw. 37:39; 1 Kɔl. 10:13) Saa yɛse yɛ mediema anwunvɔne a, yɛbava bɛ ɛtane yɛahyɛ bɛ, yɛɛ saa bɛka yɛ ɛya a, yɛnrɛva bɛ nwo ɛya yɛnrɛzie yɛ nu. (Ɛfɛ. 4:32) Noko adenle titili ko mɔɔ yɛbahola yɛalua zo yɛaze yɛ mediema anwunvɔne la a le kɛ yɛbaboa bɛ wɔ mekɛ mɔɔ bɛlɛyia ngyegyelɛ la. Saa ɛlɔlɛ ka yɛ maa yɛse awie mɔ anwunvɔne a, ɛnee yɛlɛsukoa Gyihova mɔɔ yɛ ahunluyelɛyelalɛ nwo neazo mɔɔ tɛla biala la.​—Ɛfɛ. 5:1.

 6. Kɛzi Dwɔnatan nee Devidi lale ɛlɔlɛ ali hilele bɛ nwo ɛ?

⁶ Baebolo ne ka alesama mɔɔ ɛnli munli mɔɔ vale bɛ nwo agɔnwolɛ kyengye la anwo edwɛkɛ. Fa Dwɔnatan nee Devidi agɔnwolɛvalɛ ne kɛ neazo. Baebolo ne ka kɛ: “Dwɔnatan nee Devidi yɛle agɔnwolɛ kyengye, na Dwɔnatan hulole ye kɛ ɔdaye ɔ nwo la.” (1 Sa. 18:1) Bɛkpokpale Devidi kɛ ɔbali Sɔɔlo agya kɛ belemgbunli. Yemɔ anzi, Sɔɔlo vale Devidi anwo ɛya na ɔbɔle mɔdenle kɛ ɔku ye. Noko mekɛ mɔɔ Sɔɔlo nyianle adwenle kɛ ɔku Devidi la, ɔ ra Dwɔnatan nee ye anyɛ adwenle. Dwɔnatan nee Devidi bɔle bɛ nwo ɛwɔkɛ kɛ bɛbahɔ zo bɛayɛ agɔnwolɛ na bɛaboa bɛ nwo dahuu.​—1 Sa. 20:42.

 7. Duzu a anrɛɛ bahola azi Dwɔnatan nee Devidi adenle kɛ bɛbayɛ agɔnwolɛma a?

⁷ Ɔyɛ azibɛnwo kɛ Dwɔnatan nee Devidi vale bɛ nwo agɔnwolɛ kyengye la, ɔluakɛ anrɛɛ ninyɛne bie mɔ bahola azi bɛ adenle kɛ bɛbayɛ agɔnwolɛma. Kɛ neazo la, ɛnee Dwɔnatan tɛla Devidi kpanyinli kɛyɛ ɛvolɛ 30. Ɔti anrɛɛ Dwɔnatan bahola anyia adwenle kɛ ɔnrɛhola ɔnrɛva awie mɔɔ le kakula na ɔnlɛ anwubielɛ dɔɔnwo wɔ ɛbɛlabɔlɛ nu la agɔnwolɛ. Noko Dwɔnatan annyia adwenle zɛhae, ɛnee ɔbu Devidi kpalɛ.

 8. Duzu ati a ɛsuzu kɛ ɛnee Dwɔnatan le agɔnwolɛ kpalɛ maa Devidi a?

⁸ Anrɛɛ Dwɔnatan bahola amaa ɔ nye abolo Devidi. Dwɔnatan le Belemgbunli Sɔɔlo ara nrenyia, ɔti anrɛɛ ɔbahola yeaha kɛ ɔdaye a ɔwɔ kɛ ɔdi ye papa agya a. (1 Sa. 20:31) Noko ɛnee Dwɔnatan bɛlɛ ɔ nwo aze yɛɛ ɔdi nɔhalɛ ɔmaa Gyihova. Ɔti mɔɔ Gyihova kpalɛ Devidi kɛ ɔdaye a ɔbali Sɔɔlo agya la, ɔliele ɔdole nu. Eza ɔlile nɔhalɛ ɔmaanle Devidi ɔnva nwo kɛ ɛhye maanle Sɔɔlo vale ɔ nwo ɛya la.​—1 Sa. 20:32-34.

 9. Asoo Dwɔnatan maanle ɔ nye bolole Devidi? Kilehile nu.

⁹ Ɛnee Dwɔnatan kulo Devidi kpalɛ yemɔti yeammaa ɔ nye ambolo ye. Ɛnee Dwɔnatan ze ɛda to kpalɛ yɛɛ ɔle kovolɛ mɔɔ ɔlɛ akɛnrasesebɛ. Ɔ nee ye papa Sɔɔlo liele duma kɛ “bɛ nwo yɛ ndɛ tɛla kɔleɛ” yɛɛ “bɛ nwo yɛ se tɛla awenade.” (2 Sa. 1:22, 23) Yemɔti anrɛɛ Dwɔnatan bahola ava ninyɛne mɔɔ ɔkola ɔyɛ la yeadu ɔ nloa anu. Noko Dwɔnatan ambɔ mɔdenle kɛ ɔ nee Devidi su yɛɛ yɛanva ɔ nwo ɛya. Emomu, ɔ nye liele Devidi akɛnrasesebɛ ne nee kɛzi ɔfa ɔ nwo ɔto Gyihova anwo zo la anwo. Nɔhalɛ nu, mɔɔ Devidi hunle Golayate la anzi yɛɛ Dwɔnatan hulole Devidi kɛ ɔdaye ɔ nwo a. Kɛ ɔkɛyɛ na yɛala ɛlɔlɛ ɛhye bie ali yɛahile yɛ mediema diedima ɛ?

10. Saa bɛka kɛ “bɛvi ahonle nu bɛhulo bɛ nwo ngoko kpalɛ” a, ɔkile duzu?

¹⁰ Baebolo ne se ‘yɛvi ahonle nu yɛhulo yɛ nwo ngoko kpalɛ.’ (1 Pita 1:22) Gyihova ɛyɛ ɛhye anwo neazo ɛmaa yɛ. Ɔkulo yɛ kpole kpalɛ, yemɔti saa yɛdi nɔhalɛ yɛmaa ye a, debie biala ɛnle ɛkɛ mɔɔ bazɛkye zɔhane ɛlɔlɛ ne a. (Wlo. 8:38, 39) Edwɛkɛ “bɛhulo bɛ nwo kpalɛ” kile awie mɔɔ ɔlɛmia ɔ nwo ɛsesebɛ kɛ ɔbala ɛlɔlɛ ali la. Ɔdwu mekɛ ne bie a, ɔwɔ kɛ yɛmia yɛ nwo ɛsesebɛ amaa yɛahola yɛala ɛlɔlɛ ali yɛahile yɛ mediema. Saa awie mɔ ka yɛ ɛya a, ɔwɔ kɛ yɛkɔ zo ‘yɛ nee bɛ tɛnla wɔ ɛlɔlɛ nu, yɛbɔ mɔdenle ɛsesebɛ yɛfa anzodwolɛ mɔɔ ka yɛ bɔ nu la yɛtɛnla sunsum nu koyɛlɛ nu.’ (Ɛfɛ. 4:1-3) Saa yɛbɔ mɔdenle ɛsesebɛ kɛ yɛmaa ‘anzodwolɛ mɔɔ ka yɛ bɔ nu la’ adɛnla ɛkɛ a, ɔbamaa yɛabu yɛ nye yɛagua yɛ mediema nvonleɛ zo. Yɛbabɔ mɔdenle kɛ yɛbanwu yɛ mediema kɛ mɔɔ Gyihova nwu bɛ la.​—1 Sa. 16:7; Edw. 130:3.

11. Duzu ati a ɔyɛ a ɔyɛ se kɛ yɛbala ɛlɔlɛ ali a?

¹¹ Ɔyɛ a ɔnla aze kɛ yɛbala ɛlɔlɛ ali yɛahile yɛ mediema, titili saa yɛze nvonleɛ mɔɔ bɛyɛ la a. Ɔda ali kɛ ɛnee ɛhye le ngyegyelɛ maa alimoa Kilisienema bie mɔ. Kɛ neazo la, ɔbayɛ kɛ ɛnee Yiwodea nee Senteki ɛnlɛ ngyegyelɛ kɛ ‘bɛ nee Pɔɔlo bayɛ gyima ɛsesebɛ abɔ edwɛkpa ne nolo.’ Noko ɔlua debie bie ati ɛnee mraalɛ nwiɔ ne anloa ɛnzɛ bɛ nwo. Yemɔti Pɔɔlo dule bɛ folɛ kɛ “bɛnyia adwenle ko ɔlua Awulae ati.”​—Fel. 4:2, 3.

12. Kɛ ɔkɛyɛ na yɛala ɛlɔlɛ ali yɛahile yɛ mediema ɛ?

¹² Kɛ ɔkɛyɛ na yɛala ɛlɔlɛ ali yɛahile yɛ mediema ɛnɛ ɛ? Saa yɛnwu yɛ mediema diedima kpalɛ a, ɔbamaa yɛade bɛ edwɛkɛ bo na yɛanyia ɛlɔlɛ yɛamaa bɛ. Ɔnle kɛ yɛmaa awie mɔ ɛvolɛ anzɛɛ kɛzi bɛtetele bɛ la si yɛ adenle kɛ yɛbala ɛlɔlɛ ali yɛahile bɛ. Kakye kɛ ɛnee Dwɔnatan tɛla Devidi kpanyinli ɛvolɛ kɛyɛ 30, noko ɔvale ye agɔnwolɛ kyengye. Asoo ɛbava awie mɔɔ ɔle kpanyinli ɔtɛla wɔ anzɛɛ ɛtɛla ye kpanyinli la agɔnwolɛ? Saa ɛyɛ zɔ a, ɛbahile kɛ ‘ɛkulo mediema muala.’​—1 Pita 2:17.

13. Duzu ati a ɔyɛ a yɛbikye asafo ne anu amra bie mɔ kpalɛ yɛtɛla bie mɔ ɛ?

¹³ Asoo ɛlɔlɛ mɔɔ yɛda ye ali yɛahile yɛ mediema la kile kɛ yɛbahola yɛabikye awie biala mɔɔ wɔ asafo ne anu la kpalɛ ɔ? Kyɛkyɛ, ɔnrɛhola ɔnrɛyɛ boɛ. Saa kɛmɔ yɛ nee menli bie mɔ anye die debie ko anwo la ati yɛbikye bɛ kpalɛ yɛtɛla menli gyɛne a, nvonleɛ biala ɛnle nwo. Gyisɛse vɛlɛle ye ɛzoanvolɛ ne mɔ amuala “agɔnwolɛma,” noko ɛnee ɔkulo Dwɔn edwɛkɛ kpalɛ. (Dwɔn 13:23; 15:15; 20:2) Noko ɔ nee Dwɔn anli ye boɛ andɛla bɛdabɛ mɔɔ bɛha la. Kɛ neazo la, mekɛ mɔɔ Dwɔn nee ɔ diema Gyemise hanle hilele Gyisɛse kɛ ɔmaa bɛ gyinlabelɛ titili wɔ Nyamenle Belemgbunlililɛ ne anu la, ɔhanle ɔhilele bɛ kɛ: “Me sa fema zo anzɛɛ bɛne zo ɛdɛnlanlɛ ɛdeɛ, ɔnle me ɛdeɛ na meava meamaa.” (Maake 10:35-40) Kɛ mɔɔ Gyisɛse yɛle la, ɔnle kɛ yɛdayɛ noko yɛ nee yɛ gɔnwo mɔ mɔɔ bikye yɛ la di ye boɛ tɛla awie mɔ. (Gye. 2:3, 4) Saa yɛyɛ ye zɔhane a, ɔbamaa mgbakyemgbakyenu ara asafo ne anu, ɔnle kɛ yɛmaa debie zɛhae si.​—Dwu. 17-19.

14. Kɛzi Felepaema 2:3 bahola aboa yɛ yeamaa yɛakpo ɛzulɛ subane ɛ?

¹⁴ Saa yɛkulo yɛ nwo ngoko a, yɛbabɔ asafo ne anwo bane yɛavi ɛzulɛ subane nwo. Kakye kɛ Dwɔnatan ammaa ɔ nye ambolo Devidi yɛɛ yɛambɔ mɔdenle kɛ ɔdie belemgbunlililɛ ne yeavi Devidi asa anu. Yɛ muala yɛbahola yɛazukoa Dwɔnatan neazo ne. Mmamaa ɛ nye bolo ɛ mediema diedima ɔlua mɔɔ bɛkola bɛyɛ la ati, ‘emomu bɛlɛ ɛ nwo aze na bu ɛ gɔnwo mɔ tɛla ɛ nwo.’ (Kenga Felepaema 2:3.) Kakye kɛ awie biala lɛ debie mɔɔ ɔyɛ ɔboa asafo ne a. Saa yɛbɛlɛ yɛ nwo aze a, ɔbamaa yɛanwu ninyɛne mgbalɛ mɔɔ yɛ mediema kola yɛ la na yɛanyia bɛ neazo kɛnlɛma ne azo nvasoɛ.​—1 Kɔl. 12:21-25.

15. Duzu a ɛsukoa ɛfi Tanya nee ye abusua ne edwɛkɛ ne anu a?

¹⁵ Saa yɛlɛyia ngyegyelɛ a, Gyihova dua ɛlɔlɛ mɔɔ yɛ mediema da ye ali nee moalɛ mɔɔ bɛfa bɛmaa yɛ la azo kyekye yɛ rɛle. Fa mɔɔ dole abusua bie mɔɔ hɔle 2019 “Ɛlɔlɛ Ɛnwie Ɛlɛ!” Maanle Maanle Avinli Nyianu mɔɔ bɛyɛle wɔ United States la kɛ neazo. Ɛnee bɛkpɔne Folɛ gyimalilɛ ne bɛlɛkɔ sua nu. Tanya, ninli bie mɔɔ lɛ ngakula nsa la hanle kɛ: “Ɛnee yɛde kale nu yɛlɛkɔ yɛ hotɛle ɛkɛ na kale bie rabɔle yɛ ɛdeɛ ne anu. Awie biala amboda, yemɔti yɛvile yɛ kale ne anu yɛhɔgyinlanle adenle ne anloa, na yɛ nwo bubule yɛ kpalɛ. Awie bie mɔɔ ɛnee gyi adenle ne anloa la hanle hilele yɛ kɛ yɛradɛnla ye kale ne anu. Amuanrɛɛ yɛ mediema ne mɔ mɔɔ hɔle nyianu ne la bie ɔ. Na tɛ ɔ ngomekye a ɔgyinlanle a. Mediema nnu mɔɔ bɛvi Sweden la noko gyinlanle. Mediema mraalɛ ne mɔ yɛle me nee me ra raalɛ ne atuu na ɔmaanle yɛ rɛle kyekyele! Menganle mengilele mediema ne mɔ kɛ bɛhɔ na yɛbara, noko bɛanyɛ. Bɛgyinlanle yɛ nwo ɛkɛ too nɛɛsema vale ambulance ranleanle yɛ, yɛɛ bɛnleanle kɛ yɛ sa ɛha debie biala mɔɔ yɛhyia nwo la. Wɔ ngyegyelɛ mekɛ ɛhye anu, yɛnwunle kɛzi Gyihova kulo yɛ la. Mɔɔ dole yɛ la maanle ɛlɔlɛ mɔɔ yɛlɛ yɛmaa yɛ mediema ne mɔ la yɛle kpole na ɔmaanle ɛlɔlɛ nee anyezɔlɛ mɔɔ yɛlɛ yɛmaa Gyihova la anu yɛle se.” Ɛkakye mekɛ bie mɔɔ ɛhɔle ngyegyelɛ nu na ɛ diema diedinli bie lale ɛlɔlɛ ali hilele wɔ la ɔ?

16. Duzu ati a ɔwɔ kɛ yɛkulo yɛ nwo ngoko a?

¹⁶ Dwenle mɔɔ saa yɛkulo yɛ nwo ngoko a ɔbahola yeavi nu yeara la anwo. Yɛkyekye yɛ mediema arɛle wɔ mekɛ mɔɔ bɛlɛyia ngyegyelɛ la. Yɛmaa koyɛlɛ mɔɔ wɔ Nyamenle menli avinli la yɛ kpole. Yɛmaa menli nwu kɛ yɛle Gyisɛse ɛdoavolɛma na ɛhye twe ahonle kpalɛma ba nɔhalɛ ɛzonlenlɛ nu. Mɔɔ tɛla biala la, ɔmaa yɛwula Gyihova, “anwunvɔnezelɛ Selɛ nee arɛlekyekyelɛ muala Nyamenle ne” anyunlunyia. (2 Kɔl. 1:3) Ɔrɛla ye kɛ, yɛ muala yɛbanyia ɛlɔlɛ na yɛala ye ali yɛahile yɛ mediema dahuu!