Bɛva Ɛtane Bɛhyɛ Bɔkɔɔ

1, 2. Duzu ati a ɔhyia kɛ ɛsuzu kɛzi ɛfa ɛtane ɛkyɛ la anwo a?

GYIHOVA Edwɛkɛ ne maa yɛnwu ye adwenle wɔ ɛtane nwo nee kɛzi ɔ nee yɛ di wɔ mekɛ mɔɔ yɛbayɛ ɛtane la. Ye Edwɛkɛ ne eza maa yɛnwu dɔɔnwo wɔ fakyɛ nwo. Wɔ edwɛkɛ mɔɔ lumua la anu, yɛzuzule kɛzi subane mɔɔ Devidi nee Manasɛ lale ye ali manle bɛnyianle Gyihova ɛkɛ fakyɛ la anwo. Nyane mɔɔ bɛlile ye bɛ ahonle nu la manle bɛhanle bɛ ɛtane na bɛgyakyile, yɛɛ bɛnlunle bɛ nwo nɔhalɛ nu. Yemɔti, bɛnyianle Gyihova anyunlu ɛlolɛ.

² Bɛmaa yɛzuzu fakyɛ nwo wɔ adenle fofolɛ zo. Saa menli mɔɔ Manasɛ manle bɛnwunle amaneɛ la anu bie le ɛ nwo sonla a, anrɛɛ adwenle boni a ɛbanyia ye ɔ nwo a? Asoo anrɛɛ ɛbava Manasɛ ɛtane wɔahyɛ ye? Kpuyia ɛhye anwo hyia ɛnɛ, ɔluakɛ yɛwɔ ewiade mɔɔ mɛlazobulɛ, basabasayɛlɛ nee angomedi wɔ nu la anu. Yemɔti duzu ati a ɔwɔ kɛ Keleseɛnenli nyia fakyɛ subane ɛ? Yɛɛ saa awie ka wɔ anzɛɛ wɔ kulovolɛ bie ɛya anzɛɛ sisi wɔ a, duzu a baboa wɔ yeamaa wɔahomo ɛ nwo zo, wɔayɛ mɔɔ Gyihova kulo, na wɔava wɔahyɛ ye a?

3-5. (a) Ndonwo boni a Gyisɛse vale boale ye tievolɛma ɔmanle bɛnwunle kɛzi fakyɛ nwo hyia la ɛ? (b) Adwenle boni a wɔ Gyisɛse ndonwo ne mɔɔ wɔ Mateyu 18:21-35 la anzi a?

³ Ɔwɔ kɛ yɛnyia ɛhulolɛ kɛ yɛbava bɛdabɛ mɔɔ bɛfo yɛ la ɛtane yɛahyɛ bɛ ɔnva nwo kɛ bie a bɛwɔ asafo ne anu anzɛɛ bɛnle nu la. Ɛhye anwo hyia ɔluakɛ ɔbamaa anzondwolɛ ara yɛ nee yɛ mbusuafoɔ, yɛ gɔnwo mɔ, awie mɔ, nee Gyihova avinli. Ngɛlɛlera ne maa yɛnwu ye kɛ ɔwɔ kɛ Keleseɛnenli fa awie mɔ ɛtane kyɛ bɛ ɔnva nwo fane dodo mɔɔ bɛkɛvo ye la. Gyisɛse vale sonvolɛ bie mɔɔ ɛnee tua kakɛ la yɛle ndonwo hilele ndelebɛbo mɔɔ wɔ edwɛkɛ ɛhye anu la anu.

⁴ Ɛnee sonvolɛ ne tua ɔ menle kakɛ mɔɔ ɔ nee gyimayɛvo kenle 60,000,000 ahatualɛ le ko la, noko ɔ menle ne vale hyɛle ye. Yemɔ anzi, sonvolɛ ne vindele na ɔnwunle ɔ gɔnwo sonvolɛ bie mɔɔ ɔtua ye ezukoa mɔɔ ɔle kenle 100 ahatualɛ la. Ɔ gɔnwo ne zɛlɛle ye kɛ ɔnyia abotane, noko sonvolɛ ne mɔɔ bɛva ye kakɛ kpole ne bɛhyɛ ye la manle bɛdole ɔ gɔnwo sonvolɛ ne efiade. Mɔɔ ɔyɛle la hanle ɔ menle ne ɛya na ɔzele sonvolɛ ne kɛ: “Anrɛɛ ɛnee ɔwɔ kɛ ɛdawɔ noko ɛnwu ɛ gɔnwo sonvolɛ ne anwunvɔne, kɛmɔ menzele wɔ anwunvɔne la. Belemgbunli ne vale ɛya kpole na ɔmanle bɛhɔdole [sonvolɛ ne mɔɔ yeanva ɛtane yeangyɛ la] efiade kɛ bɛdea ye kɔkpula mekɛ mɔɔ ɔkɛdua ye kakɛ ne amuala la.”—Mat. 18:21-34.

⁵ Adwenle boni a wɔ Gyisɛse ndonwo ne anzi a? Ɔdwulale ye edwɛkɛ ne kɛ: “Zɔhane ala yɛɛ saa bɛdabɛ noko bɛanyeye bɛ ahonle nu bɛanva bɛ gɔnwo mɔ anwo edwɛkɛ bɛangyɛ bɛ a Egya mɔɔ wɔ anwuma la bayɛ bɛ nuhua ko biala a.” (Mat. 18:35) Gyisɛse edwɛkɛ ne anu la ɛkɛ wienyi. Ɛtane mɔɔ yɛyɛ ye dahuu ɔlua munli mɔɔ yɛnli la kile kɛ yɛnfɛta Gyihova anyunlunyia ne. Noko akee, ɔlɛ ɛhulolɛ kɛ ɔbava yeahyɛ yɛ yeamaa yɛ nwo ade saanwu. Ɛhye ati, awie biala mɔɔ kulo kɛ ɔ nee Gyihova nyia agɔnwolɛvalɛ la ɔwɔ kɛ fa ɔ gɔnwo mɔ nvonleɛ kyɛ bɛ. Kɛmɔ Gyisɛse hanle ye wɔ ye Boka Zo Ɛdendɛlɛ ne anu la: “Saa bɛfa menli mɔɔ ɛvo bɛ la ɛtane bɛkyɛ bɛ a, yɛɛ bɛ anwuma Selɛ ne ɔdaye ɔkɛva bɛ ɛtane ɛdeɛ ne mɔ ɔkɛhyɛ bɛ a. Na saa bɛanva menli mɔɔ ɛvo bɛ la ɛtane ne mɔ bɛangyɛ bɛ a, bɛ Ze mɔɔ wɔ anwuma la ɔdaye ɔnrɛva bɛ ɛtane ne mɔ ɔnrɛhyɛ bɛ.”—Mat. 6:14, 15.

 6. Duzu ati a ɔdwu mekɛ ne bie a ɔyɛ se kɛ yɛbava ɛtane yɛahyɛ ɛ?

⁶ Bie a ɛbaha kɛ ‘ɔle zɔ,’ noko ‘ye ɛhanlɛ ɛnyɛ se kɛ ye ɛyɛlɛ la.’ Ɛhye le nɔhalɛ ɔluakɛ fane dɔɔnwo ne ala, saa awie fo yɛ a ɔka yɛ nganeɛdelɛ. Awie mɔɔ bɛvo ye la bahola ava ɛya, yeade nganeɛ kɛ bɛye ye bɛmaa yemɔti ɔwɔ kɛ pɛlepɛlelilɛ di gyima anzɛɛ ɔdi nzenralɛ. Nɔhalɛ nu, bie mɔ te nganeɛ kɛ bɛnrɛhola bɛnrɛva ahenle mɔɔ ɛvo bɛ la ɛtane bɛnrɛhyɛ ye ɛlɛ. Saa ɔle zɔ wɔ wɔ afoa nu a, kɛzi ɛbahola wɔanyia fakyɛ subane ne mɔɔ Gyihova kpondɛ la ɛ?

7, 8. Saa awie nyɛleɛ ɛtane bie ka wɔ ɛya a, duzu a baboa wɔ yeamaa wɔava ye ɛtane wɔahyɛ ye a?

⁷ Saa bɛ nee yɛ anli ye boɛ anzɛɛ yɛte nganeɛ kɛ bɛ nee yɛ anli ye boɛ a, ɔmaa yɛfa ɛya. Kpavolɛ ko hanle kɛzi ɔyɛle ye debie wɔ mekɛ bie mɔɔ ɔvale ɛya la kɛ: ‘Menvile sua nu na menganle kɛ menrɛzia bieko ɛlɛ. Ɛnee ɔle wawaa mekɛ, na mengɔkpɔsale awɔdenle kɛnlɛma bie azo. Kɛzi ɛkɛ ne le koonwu nee anwoma kɛnlɛma mɔɔ ɛnee ɛlɛbɔ la manle me ahonle dwole. Akee menunle me nwo na menziale mengɔle sua nu.’ Kɛmɔ anwubielɛ ɛhye kile la, saa ɛmaa ɛ nwo mekɛ ɛmaa wɔ ahonle ka aze na ɛdwenle tɛnlabelɛ ne anwo kpalɛ a, ɔnrɛmaa ɛnrɛha edwɛkɛ anzɛɛ ɛnrɛyɛ debie mɔɔ amozii ɛbanlu ɛ nwo a.—Edw. 4:4; Mrɛ. 14:29; Gye. 1:19, 20.

⁸ Na saa ɔba ye kɛ ɛya ne ɛnvi ɛkɛ ne noko ɛ? Bɔ mɔdenle kɛ ɛbanwu deɛmɔti wɔva ɛya la. Ɔbahola yeara ye kɛ bɛ nee wɔ anli ye boɛ ɔ? Anzɛɛ ɛte nganeɛ kɛ ahenle anye fuu yɛle debie mɔɔ ɔbamaa wɔali nyane ɔ? Asoo ɔle nɔhalɛ kɛ mɔɔ ahenle yɛle la ɛnle kpalɛ? Saa ɛte deɛmɔti ɛvale ɛya la abo a, ɔbamaa wɔanwu Ngɛlɛlera nu ngyinlazo mɔɔ ɔwɔ kɛ ɛfa ɛdi tɛnlabelɛ ne anwo gyima la. (Bɛgenga Mrɛlɛbulɛ 15:28; 17:27.) Ɛhye mɔɔ ɛbayɛ la bamaa wɔazuzu edwɛkɛ ne anwo boɛ na wɔanyia ɛhulolɛ kɛ ɛbava wɔahyɛ. Ɔnva nwo kɛzi ɛhye ɛyɛlɛ bayɛ wɔ ɛse la, saa ɛfa ɛdi gyima a, ɔboa ɔmaa Nyamenle edwɛkɛ ne fedefede wɔ “adwenle nee [wɔ] ahonle nu” na ɛsukoa Gyihova fakyɛ subane ne.—Hib. 4:12.

9, 10. (a) Saa ɛsuzu kɛ awie ɛvo wɔ a, kɛzi ɔwɔ kɛ ɛyɛ wɔ nyɛleɛ ɛ? (b) Kɛzi adwenle kpalɛ nee fakyɛ subane mɔɔ ɛbanyia la baboa wɔ ɛ?

⁹ Ninyɛne dɔɔnwo kɔ zo wɔ ewiade ye anu mɔɔ bɛkola bɛka ɛya a. Kɛ neazo la, bie a ɛnee ɛlɛka kale na ɔhale ekyii na awie ava ye ɛdeɛ ne abɔ wɔ ɛdeɛ ne anu. Duzu a ɛbayɛ a? Bie a ɛnee wɔde anzɛɛ wɔgenga ye ɛlɛ kɛ debie zɛhae bie ɛzi yemaa delavama ne ɛli butule. Noko kɛ Keleseɛnenli la, ɛnrɛhulo kɛ ɛbayɛ bie.

¹⁰ Ɔbayɛ kpalɛ kɛ yɛbadwenle edwɛkɛ ne anwo kolaa na yɛayɛ nwolɛ debie. Bie a ɛnee ɛboka nwolɛ bie la ati a ɔrale ye zɔ a, ɔluakɛ ɛnee wɔ adwenle wɔ ɛleka bie. Yɛɛ bie noko a ɛnee delava ɛhendeɛ ne kale ne ɛlɛgyegye ye. Kpɔkɛ mɔɔ ndonwo ɛhye gyi zo la a le kɛ saa yɛnyia ndelebɛbo, adwenle mɔɔ anu la ɛkɛ, nee ɛhulolɛ kɛ yɛbava ɛtane yɛahyɛ a, ɔboa ɔmaa yɛkomo ɛyavalɛ nee nyanelilɛ zo. Nolobɔvo ne 7:9 ka kɛ: “Mmafa ɛya ndɛndɛ, ɔluakɛ koasea a fa ɛya sie ye nu a.” Mmafa edwɛkɛ ahonle zo. Mekɛ dɔɔnwo ne ala, bie a yɛbanyia adwenle kɛ awie mɔ anye fuu ɛvo yɛ. Noko kɛmɔ bɛnli munli la ati a bɛfo yɛ a. Anzɛɛ bie a yɛande mɔɔ ɔzile la abo kpalɛ. Yemɔti kakye kɛ ɛnrɛde deɛmɔti menli yɛ ninyɛne anzɛɛ ka edwɛkɛ bie mɔ la abo ɛnrɛwie. Ɛhye ati, nyia ɛhulolɛ kɛ ɛbala ɛlɔlɛ ali ɔlua ɛtane fakyɛ zo na ɛ nye balie.—Bɛgenga 1 Pita 4:8.

11. Kɛ Belemgbunlililɛ ne anwo nolobɔlɛma la, duzu a ɔwɔ kɛ yɛyɛ ye wɔ subane mɔɔ menli da ye ali wɔ edwɛkpa ne anwo la anwo a?

¹¹ Kɛzi ɛbahola wɔahomo ɛ nwo zo wɔ mekɛ mɔɔ awie ɛha edwɛkɛ ɛtane ɛhile wɔ wɔ daselɛlilɛ nu la ɛ? Mekɛ mɔɔ Gyisɛse zoanle edwɛkpakavoma 70 ne la, ɔhanle kɛ saa bɛdwu awuke biala anu a, bɛze bɛ kɛ anzondwolɛ ɛha bɛ. Gyisɛse hanle kɛ: “Saa awie mɔɔ kpondɛ anzonudwolɛ la bie wɔ awuke ne anu a bɛ anzonudwolɛ ne nee ye badɛnla. Na saa bie ɛnle ɛkɛ ne a bɛ anzonudwolɛ ne bazia ara bɛ nwo.” (Luku 10:1, 5, 6) Saa menli tie edwɛkɛ ne a yɛ nye die, ɔluakɛ yɛze kɛ bɛbanyia nvasoɛ wɔ zo. Noko akee, ɔdwu mekɛ ne bie a bɛndie. Duzu a ɔwɔ kɛ yɛyɛ a? Gyisɛse hanle kɛ yɛ anzondwolɛ ne ɛzia ɛrɛla yɛ nwo zo. Ɔnva nwo nyɛleɛ biala mɔɔ menli ne bala ye ali la, ɔwɔ kɛ yɛfi awuke ne anu anzondwolɛ nu. Saa yɛfa ɛya a, yɛnrɛhola yɛnrɛnyia anzondwolɛ.

12. Kɛmɔ Pɔɔlo hanle ye wɔ Ɛfɛsɛsema 4:31, 32 la, kɛzi ɔwɔ kɛ yɛyɛ yɛ nyɛleɛ ɛ?

¹² Tɛ mekɛ mɔɔ yɛwɔ daselɛlilɛ nu la angome a ɔwɔ kɛ yɛkpondɛ anzonudwolɛ a, emomu wɔ tɛnlabelɛ biala anu. Ɛhulolɛ mɔɔ yɛlɛ kɛ yɛfa awie mɔ ɛtane yɛahyɛ bɛ la ɛngile kɛ yɛdie bɛ nvonleɛ yɛado nu anzɛɛ yɛyɛ kɛ asɛɛ mɔɔ bɛyɛ la ɛngyegye yɛ. Fakyɛ kile kɛ ɛye ɛya mɔɔ awie ɛha wɔ la wɔavi wɔ adwenle nu na wɔazɔ anzondwolɛ mɔɔ ɛlɛ la anu kpalɛ. Bie mɔ ɛmaa awie mɔ nyɛleɛ ɛzɛkye bɛ anyelielɛ ɔluakɛ bɛhɔle zo bɛdwenledwenlenle kɛzi bɛ nee bɛ lile la anwo wɔ adenle ɛtane zo. Mmamaa nzuzulɛ ɛhye mɔ komo ɛ nwo zo. Kakye kɛ saa ɛfa ɛya ɛsie wɔ nu a ɛ nye ɛnrɛlie ɛlɛ. Ɛhye ati, fa ɛtane kyɛ!—Bɛgenga Ɛfɛsɛsema 4:31, 32.

13. (a) Kɛzi Keleseɛnenli “kuohua senle samɛnlakɛ” wɔ ye kpɔvolɛ ti zo ɛ? (b) Saa yɛda subane kpalɛ ali a duzu a fi nu ba a?

¹³ Ɔdwu mekɛ ne bie a yɛbɔ mɔdenle kɛ yɛboa menli mɔɔ bɛnle Keleseɛnema na bɛfo yɛ la yeamaa bɛanwu mɔɔ Baebolo ne ka la. Ɛzoanvolɛ Pɔɔlo hɛlɛle kɛ: “‘Saa ɛhɔne ɛlɛku wɔ kpɔvolɛ a, maa ye aleɛ ɔli; saa nzuhɔne ɛlɛku ye a, maa ye nzule ɔnlo; ɔluakɛ saa ɛyɛ ye zɔhane a, ɛnee ɛlɛkuohua senle samɛnlakɛ ɔ ti zo.’ Bɛmmamaa ɛtane fo bɛ nwo zo; bɛva kpalɛyɛlɛ bɛli ɛtane nwo zo konim.” (Wulo. 12:20, 21) Saa yɛda subane kpalɛ ali wɔ mekɛ mɔɔ menli ɛha yɛ ɛya la a, ɔmaa bɛkakyi bɛ nyɛleɛ na bɛ nee yɛ di wɔ adenle kɛnlɛma zo. Saa yɛda ndelebɛbo nee anwunvɔnezelɛ ali yɛkile menli mɔɔ fo yɛ la a, ɔboa ɔmaa bɛsukoa mɔɔ Baebolo ne kilehile la. Kɛ ɔde ye biala la, saa yɛda subane kɛnlɛma ali a, ɔmaa menli dwenle deɛmɔti yɛle ngakyile la anwo.—1 Pita 2:12; 3:16.

14. Ɔnva nwo kɛzi awie nee yɛ lile wɔ adenle ɛtane zo la, duzu ati a ɔnle kɛ yɛfa ɛya yɛsie yɛ nu a?

¹⁴ Ɔdwu mekɛ ne bie a, ɔnle kpalɛ kɛ yɛ nee menli bie mɔ badu. Menli ɛhye mɔ bie a le bɛdabɛ mɔɔ bɛyɛle ɛtane na bɛanlu bɛ nwo yemɔti bɛdule bɛ la. Saa sonla ɛhye yɛle debie manle ɛlile nyane a, ɔbayɛ se kɛ ɛbava ye ɛtane wɔahyɛ ye bɔbɔ wɔ mekɛ mɔɔ yenlu ɔ nwo la, ɔluakɛ mɔɔ ɔyɛle la anwo nyane tɛbɔ wɔ nu. Saa ɔba ye zɛhae a, ɔwɔ kɛ ɛkɔ zo ɛsɛlɛ Gyihova kɛ ɔboa wɔ ɔmaa ɛva ahenle mɔɔ ɛyɛ wɔ ɛtane ne la ɛtane ɛhyɛ ye. Ɛhye anwo hyia kpalɛ ɔluakɛ yɛnrɛhola yɛnrɛnwu mɔɔ ɔwɔ awie ahonle nu la. Gyihova a ze a. Ɔneɛnlea sonla adwenle nee ye nganeɛdelɛ nu yɛɛ ɔnyia abotane wɔ yɛ nvonleɛ nwo. (Edw. 7:9; Mrɛ. 17:3) Yemɔti a Ngɛlɛlera ne ka kɛ: “Saa awie yɛ bɛ ɛtane a, bɛmmadi ye nzenralɛ. Bɛbɔ mɔdenle bɛyɛ mɔɔ awie biala nea a ɛnee nwolɛ te la. Bɛbɔ mɔdenle kɛ bɛ nee menli kɔsɔɔti kɛdɛnla anzonudwolɛ nu. Ayi mɔ, bɛmmafa ɛtane bɛtua ɛtane kakɛ ɛlɛ, bɛgyakyi debie biala anu bɛmaa Nyamenle ɛya ne. Ɔluakɛ Nyamenle Edwɛkɛ ne se, ‘Nzenralɛ le me ɛdeɛ, mebadua ɛtane kakɛ, Awulae a se a.’” (Wulo. 12:17-19) Asoo yɛbahola yɛabua ndɛne fɔɔnwo? Kyɛkyɛ. (Mat. 7:1, 2) Noko yɛbahola yɛanyia anwondozo kɛ Nyamenle ndɛnebualɛ tenrɛ.

15. Duzu a yɛnwu ye menli mɔɔ fo yɛ la anwo a ɔnrɛmaa yɛnrɛva bɛ nwo ɛya a?

¹⁵ Saa yɛte nganeɛ kɛ awie nee yɛ anli ye boɛ a, ɔwɔ kɛ yɛkakye kɛ ahenle noko ɛlɛbɔ mɔdenle kɛ ɔbali ngyegyelɛ bie azo. Yɛ kɔsɔɔti yɛle ɛtanevolɛma. (Wulo. 3:23) Gyihova ze kɛ yɛnli munli ɔti ɔse yɛ anwunvɔne. Yemɔti, ɔle kpalɛ kɛ yɛbazɛlɛ yɛamaa ahenle mɔɔ ɛvo yɛ la. Ɔnrɛra ye ɛlɛ kɛ yɛbanyia awie mɔɔ yɛlɛsɛlɛ yɛamaa ye la anwo ɛya. Gyisɛse manle ɔlale ali wienyi kɛ ɔnle kɛ yɛfa awie mɔ anwo ɛya yɛsie yɛ nu, saa bɔbɔ bɛ nee yɛ anli ye boɛ a. Ɔhanle kɛ: “Bɛhulo bɛ kpɔvolɛma na bɛzɛlɛ bɛmaa bɛdabɛ mɔɔ bɛyɛ bɛ kpɔdekpɔde la.”—Mat. 5:44.

16, 17. Saa Asafo nu mgbanyima si kpɔkɛ kɛ ɛtanevolɛ bie ɛnlu ɔ nwo a, kɛzi ɔwɔ kɛ yɛyɛ yɛ nyɛleɛ ɛ, na duzu ati ɔ?

¹⁶ Gyihova ɛmaa Keleseɛne mgbanyima adenle kɛ bɛnlea bɛli ɛtane mɔɔ bɛyɛ ye wɔ asafo ne anu la anwo gyima. Mediema ɛhye mɔ ɛnnwu edwɛkɛ ne amuala kɛ Nyamenle la ɛdeɛ, noko bɛbɔ mɔdenle bɛdua sunsum nwuanzanwuanza ne moalɛ zo bɛmaa bɛ kpɔkɛzilɛ nee adehilelɛ mɔɔ wɔ Nyamenle Edwɛkɛ ne anu la yia. Zɔhane ati, saa bɛsɛlɛ Gyihova ɛkɛ moalɛ wɔ kpɔkɛzilɛ bie anwo a, mɔɔ bɛkɛha la nee Gyihova adwenle yia.—Mat. 18:18.

¹⁷ Wɔ tɛnlabelɛ zɛhae anu, nɔhalɛlilɛ nwo hyia kpalɛ. Asoo ɛbava ɛtane wɔahyɛ na wɔala ɛlɔlɛ ali wɔahile menli mɔɔ bɛla ye ali kɛ bɛnlu bɛ nwo la? (2 Kɔl. 2:5-8) Ɛhye ɛyɛlɛ ɛnla aze, titile saa ɛtane ne tiale wɔ anzɛɛ wɔ busuanli bie a. Kɛ ɔde ye biala la, saa ɛfa ɛ rɛle ɛwula Gyihova anu na ɛnyia anwondozo kɛ ɔbalua asafo ne azo yeali ninyɛne nwo gyima kpalɛ a, ɛbayɛ mɔɔ tenrɛ la. Ɛbamaa yeala ali kɛ ɛfa ɛtane ɛkyɛ bɔkɔɔ.—Mrɛ. 3:5, 6.

18. Saa yɛfa ɛtane yɛkyɛ a, duzu nvasoɛ a yɛnyia a?

¹⁸ Saa yɛfi ahonle nu yɛfa ɛtane yɛkyɛ a, yɛnyia nvasoɛ dɔɔnwo. Ɔmaa yɛnyia kpɔkɛdelɛ kpalɛ ɔluakɛ yɛnva ɛya nee nyanelilɛ yɛnzie yɛ nu. Eza ɔmaa yɛ nee awie mɔ nyia agɔnwolɛvalɛ kpalɛ. Noko saa yɛnva ɛtane yɛngyɛ a, ɔmaa adwenledwenle tɔ yɛ nwo na ɔka yɛ kpɔkɛdelɛ. Eza ɔmaa ɔyɛ se kɛ yɛ nee awie mɔ babɔ. Deɛmɔti ɔhyia kpalɛ kɛ yɛfa ɛtane yɛkyɛ la a le kɛ, ɔmaa yɛ nee yɛ anwuma Selɛ Gyihova nyia agɔnwolɛvalɛ mɔɔ anu yɛ se.—Bɛgenga Kɔlɔsaema 3:12-14.