‘Nyamenle Liele Bɛ Ahyɛlɛdeɛ Ne Mɔ Dole Nu’

1-3. (a) Kpuya boni mɔ a yɛbazuzu nwo a? (b) Nɔhalɛ ɛzonlenlɛ nwo ninyɛne titili nna boni mɔ a yɛbazuzu nwo a? (Nea mɔlebɛbo nvoninli ne.)

EBƐLE ɛlɛneɛnlea ye mboane ne anu. Yevi ɛlɔlɛ nu yezie nane ɛhye mɔ ɔvi bɛ awolɛ nu. Akee ɔye bie, ɔku bɛ na ɔfa ɔmaa Nyamenle kɛ ahyɛlɛdeɛ. Asoo Gyihova balie ɛzonlenlɛ ɛhye mɔɔ sonla mɔɔ ɛnli munli ɛlɛfa amaa ye la ado nu?

² Ɛzoanvolɛ Pɔɔlo hɛlɛle ye wɔ Ebɛle anwo kɛ: “Nyamenle liele ye ahyɛlɛdeɛ ne mɔ dole nu.” Noko, Gyihova kpole Keen afɔlebɔlɛ ne. (Kenga Hibuluma 11:4.) Ɛhye maa yɛbiza kpuya ɛhye mɔ. Duzu ati a Nyamenle liele Ebɛle ɛzonlenlɛ ne dole nu noko yeanlie Keen ɛdeɛ ne yeando nu a? Duzu a yɛbahola yɛazukoa yɛavi Keen nee Ebɛle yɛɛ menli gyɛne mɔɔ bɛ nwo edwɛkɛ wɔ Hibuluma tile 11 ne la neazo ne mɔ anu a? Mualɛ ne mɔ bamaa yɛade mɔɔ nɔhalɛ ɛzonlenlɛ kile la abo kpalɛ.

³ Mekɛ mɔɔ yɛlɛsuzu ninyɛne mɔɔ sisile ɔvi Ebɛle mekɛ zo badwu Yizikeɛle mekɛ zo anwo sikalɛ la, yɛ ninyɛne titili nna mɔɔ maa Nyamenle die ɛzonlenlɛ bie to nu la nzonlɛ: Ɔwɔ kɛ bɛfa bɛmaa Gyihova, ɔyɛ debie kpalɛ, Nyamenle die kɛzi bɛfa bɛmaa la to nu, na bɛfa adwenle kpalɛ bɛyɛ.

4, 5. Duzu a maanle Keen nyianle adwenle kɛ ɔwɔ kɛ ɔfa ye ahyɛlɛdeɛ ne ɔmaa Gyihova a?

⁴ Kenga Gyɛnɛsese 4:2-5. Ɛnee Keen ze kɛ ɔfa ye ahyɛlɛdeɛ ne yeamaa Gyihova. Ɛnee ɔlɛ mekɛ dɔɔnwo yɛɛ nwolɛ adenle kɛ ɔbazukoa Gyihova anwo debie. Mɔɔ ɔ nee ɔ diema Ebɛle vale bɛ ahyɛlɛdeɛ ne mɔ maanle la, ɛnee ɔka ekyii bɛdi ɛvolɛ 100.a Bɛkayɛ mgbanyinli la, ɛnee bɛze Yidɛn tola ne anwo edwɛkɛ, bie a bɛnwunle azɛlɛ kpalɛ zɔhane wɔ moamoa. Ɔbayɛ kɛ bɛnwunle kyɛlɔbe ne mɔ mɔɔ razile adenle ne la. (Gyn. 3:24) Ɛnee bɛ awovolɛ ɛha ɛhile bɛ kɛ Gyihova a bɔle ngoane kɔsɔɔti a na ye mɔlebɛbo bodane mɔɔ ɔlɛ ɔmaa alesama la le ngakyile fi mɔɔ bɛwɔ nu kɛkala la anwo​—bɛlɛ ye ngyikyingyikyi too bɛbawu. (Gyn. 1:24-28) Bie a ɛhye mɔ a maanle Keen nyianle adwenle kɛ ɔwɔ kɛ ɔfa ye ahyɛlɛdeɛ ne ɔmaa Nyamenle a.

⁵ Ɔbayɛ kɛ duzu bieko a maanle Keen bɔle ye afɔle ne a? Ɛnee Gyihova ɛha kɛ ‘ralɛ’ bie bara, awie mɔɔ ɔbabɛtɛ “ɛwɔlɛ ne” mɔɔ bɛlɛbɛlale Yive maanle ɔzile kpɔkɛ ɛtane ne la ati. (Gyn. 3:4-6, 14, 15) Kɛmɔ Keen le belamunli ralɛ la ati, bie a ɔzuzule kɛ ɔdaye a ɔle ɛwɔkɛ ‘ralɛ’ zɔhane a. (Gyn. 4:1) Bieko, Gyihova nee alesama mɔɔ ɛtane wɔ bɛ nwo la hɔle zo lile adwelie; mɔɔ Adam yɛle ɛtane bɔbɔ la, Nyamenle dendɛle hilele ye, ɔda ali kɛ ɔluale anwumabɔvolɛ nwo zo. (Gyn. 3:8-10) Keen bɔle ye afɔle ne wiele la, Gyihova nee ye dendɛle. (Gyn. 4:6) Ɛnee ɔze ye wienyi kɛ ɔfɛta kɛ yɛsonle Gyihova.

6, 7. Asoo ɛnee nvonleɛ wɔ Keen afɔlebɔdeɛ ne anzɛɛ kɛzi ɔbɔle ye la anwo ɔ? Kilehile nu.

⁶ Duzu ati a Gyihova anye anlie Keen afɔlebɔlɛ ne anwo a? Asoo ɛnee ye ahyɛlɛdeɛ ne ɛnle kpalɛ la ati ɔ? Baebolo ne ɛnga. Ɔka ye sikalɛ kɛ Keen vale “azɛlɛ ne azo mbakama ne bie.” Nzinlii, Gyihova hilele ye wɔ Mɛla ne mɔɔ ɔvale ɔmaanle Mosisi la anu kɛ ɔdie afɔlebɔlɛ zɛhae ɔto nu. (Nɔm. 15:8, 9) Suzu tɛnlabelɛ ne noko anwo nea. Mekɛ zɔhane, nya nya ala a ɛnee alesama di a. (Gyn. 1:29) Na kɛmɔ ɛnee Nyamenle ɛwa azɛlɛ ne mɔɔ wɔ Yidɛn ne anzi lɔ la amonle la ati, Keen vɛle kpalɛ na yeanyia ninyɛne mɔɔ ɔvale ɔbɔle afɔle ne la. (Gyn. 3:17-19) Ɔvale aleɛ kpalɛ mɔɔ bɛyɛ gyima ɛsesebɛ na bɛanyia ye la a ɔbɔle afɔle ne a! Noko, Gyihova anlie Keen afɔlebɔlɛ ne ando nu.

⁷ Ɛnee nvonleɛ wɔ kɛzi ɔvale ahyɛlɛdeɛ ne ɔmaanle la anwo ɔ? Keen ambɔ ye wɔ adenle kpalɛ zo ɔ? Yɛnlie yɛnli. Kɛmɔti ɛ? Ɔluakɛ mɔɔ Gyihova kpole Keen afɔlebɔlɛ ne la, Yeandendɛ yeantia kɛzi ɔbɔle afɔle ne la. Bɛanga kɛzi Keen anzɛɛ Ebɛle bɔle bɛ afɔle ne la anwo edwɛkɛ biala. Ɛnee akee ngyegyelɛ ne a le boni?

8, 9. (a) Duzu ati a Gyihova anye anlie Keen anzɛɛ ye afɔlebɔdeɛ ne anwo a? (b) Duzu a nwolɛ hyia kpalɛ wɔ Keen nee Ebɛle anwo edwɛkɛ ne anu a?

⁸ Edwɛkɛ ne mɔɔ Pɔɔlo hɛlɛle hɔmaanle Hibuluma ne la maa ɔda ali kɛ adwenle mɔɔ Keen vale bɔle afɔle ne la ɛnle kpalɛ. Ɛnee Keen ɛnlɛ diedi. (Hib. 11:4; 1 Dwɔn 3:11, 12) Ɛhye ati a Gyihova anye anlie Keen​—sonla mumua ne​—nee ye afɔlebɔlɛ ne anwo la. (Gyn. 4:5-8) Gyihova le ɛlɔlɛ Selɛ, ɔti ɔbɔle mɔdenle kɛ ɔtenrɛ ɔ ra ne. Noko Keen kpole Gyihova moalɛ ne. Ɔmaanle nwonane ne mɔɔ ɛnli munli la gyima ne mɔ​—“ɛkpɔlɛ, konle, nungule”​—yile ye sɛkɛlɛneɛ adenle zo ahonle ne. (Gal. 5:19, 20) Ye ahonle ɛtane ne ati, ɛzonlenlɛ kpalɛ biala mɔɔ ɔbɔle mɔdenle kɛ ɔfa yeamaa la yɛle mgbane. Ye neazo ne maa yɛnwu kɛ nɔhalɛ ɛzonlenlɛ ɛngile yɛ nwo mɔɔ yɛtu yɛamaa Gyihova wɔ ɛnyelɛzo la ala.

⁹ Baebolo ne ka Keen anwo edwɛkɛ dɔɔnwo​—yɛde kɛ Gyihova nee ye dendɛle, yɛkenga Keen mualɛ ne mɔ yɛɛ yɛze ɔ mra bɔbɔ aluma nee ninyɛne mɔɔ bɛyɛle la bie mɔ. (Gyn. 4:17-24) Noko Ebɛle ɛdeɛ, yɛnlɛ ɔ nwo kɛlɛtokɛ biala mɔɔ kile kɛ ɔwole mralɛ yɛɛ bɛangɛlɛ edwɛkɛ mɔɔ ɔhanle la anu biala wɔ Baebolo ne anu. Noko ye nyɛleɛ ne tɛtendɛ tɛkile yɛ ɛnɛ. Kɛzi?

10. Kɛzi Ebɛle yɛle nɔhalɛ ɛzonlenlɛ nwo neazo ɛ?

¹⁰ Ebɛle bɔle ye afɔle ne maanle Gyihova ɔluakɛ ɛnee ɔze kɛ Ɔ ngomekye a ɔfɛta kɛ bɛbɔ bɛmaa ye a. Ɔvale ahyɛlɛdeɛ mɔɔ le kpalɛ tɛla biala la a ɔmaanle a​—ɔvale “ye mboane ne mɔɔ bɛlimoale bɛwole bɛ la bie.” Kɛlɛtokɛ ne anga kɛ ɔbɔle ye afɔle ne wɔ afɔlemokyea zo anzɛɛ yeambɔ ye wɔ afɔlemokyea zo ɛdeɛ, noko ɔda li kɛ kɛzi ɔvale ye ahyɛlɛdeɛ ne ɔmaanle la le kpalɛ. Noko duzu a maa Ebɛle ahyɛlɛdeɛ ne yɛ ngakyile a​—neazo mɔɔ ɔyɛle ye ɛvolɛ apenle nsia mɔɔ ɛpɛ nu noko yɛkola yɛsukoa debie yɛfi nu la​—a le adwenle mɔɔ ɔvale ɔyɛle la. Gyihova Nyamenle anu diedi nee ye tenlene ngyinlazo ne mɔ anwo ɛlɔlɛ a hanle Ebɛle a. Kɛzi yɛnwu ye zɔ ɛ?

11. Duzu ati a Gyisɛse hanle kɛ Ebɛle le tenlenenli a?

¹¹ Mɔɔ limoa la, suzu mɔɔ Gyisɛse hanle ye wɔ Ebɛle, awie mɔɔ ɔze ye kpalɛ la anwo nea. Mɔɔ Ebɛle de aze la, ɛnee Gyisɛse de ngoane nu wɔ anwuma. Gyisɛse anye liele Adam ara ɛhye anwo kpalɛ. (Mrɛ. 8:22, 30, 31; Dwɔn 8:58; Kɔl. 1:15, 16) Ɔti mɔɔ Gyisɛse hanle Ebɛle anwo edwɛkɛ kɛ ɔle “tenlenenli” la, ɛnee ɔlɛdi debie mɔɔ ɔnwunle ye la anwo daselɛ. (Mat. 23:35) Tenlenenli a le awie mɔɔ die to nu kɛ Gyihova a ɔwɔ kɛ ɔfa kpalɛ nee ɛtane nwo ngyinlazo ɔmaa la. Noko ɔyɛ mɔɔ tɛla zɔ la​—ɔfa ye edwɛkɛ nee ye nyɛleɛ ɔkile kɛ ɔdie ngyinlazo zɔhane mɔ ɔto nu. (Fa toto Luku 1:5, 6 anwo.) Ɔdie mekɛ na awie anyia duma kɛ ɔle tenlenenli. Ɔti kolaa na Ebɛle ava ye ahyɛlɛdeɛ ne amaa Nyamenle bɔbɔ la, bie a ɛnee bɛze ye kɛ ɔfa Gyihova ngyinlazo ɔbɔ ye ɛbɛla. Anrɛɛ ɔbayɛ se. Ɔ diema kpanyinli ne anyɛ neazo kpalɛ ammaa ye​—ɛnee Keen ahonle ɛzɛkye. (1 Dwɔn 3:12) Ebɛle mame anli mɛla ne mɔɔ Nyamenle vale maanle la azo, yɛɛ ye papa dele Gyihova anwo atua, ɛnee ɔkulo kɛ ɔdaye mumua ne ɔsi mɔɔ le kpalɛ nee ɛtane la anwo kpɔkɛ. (Gyn. 2:16, 17; 3:6) Ebɛle bɔle ɛbɛla mɔɔ le ngakyile kolaa fi mɔɔ ye abusua ne bɔle la anwo, na ɛhye kile kɛ ɔlɛ akɛnrasesebɛ!

12. Duzu a ɛnee le ngakyile wɔ Keen nee Ebɛle avinli a?

¹² Akee yɛ kɛzi ɛzoanvolɛ Pɔɔlo hilele kɛ abusuabɔlɛ wɔ diedi nee tenleneyɛlɛ avinli la nzonlɛ. Pɔɔlo hɛlɛle kɛ: “Diedi a maanle Ebɛle bɔle afɔle mɔɔ sonle bolɛ tɛla Keen ɛdeɛ ne la maanle Nyamenle a, na ɔlua diedi zɔhane azo bɛlile ɔ nwo daselɛ kɛ ɔle tenlenenli.” (Hib. 11:4) Pɔɔlo hilele kɛ Ebɛle ɛnle kɛ Keen la, Gyihova nee adenle mɔɔ ɔdua zo ɔyɛ Ye ninyɛne la anu diedi mɔɔ vi ahonle nu mɔɔ ɔnyianle la a hanle ye a.

13. Duzu a yɛsukoa yɛfi Ebɛle neazo ne anu a?

¹³ Ebɛle neazo ne maa yɛnwu kɛ ahonle mɔɔ anu te la ala a kola maa yɛfa nɔhalɛ ɛzonlenlɛ yɛmaa a​—ahonle mɔɔ Gyihova anu diedi ɛyi ye tɛkɛɛ na ɔdie ye tenlene ngyinlazo ne mɔ ɔto nu bɔkɔɔ la. Bieko, yɛnwu kɛ dɔɔnwo boka nɔhalɛ ɛzonlenlɛ nwo tɛla yɛ nwo mɔɔ yɛtu yɛamaa kokye ala la. Ɔwɔ kɛ ɔda ali wɔ yɛ ɛbɛlabɔlɛ kɔsɔɔti anu dahuu.

14. Duzu ati a Gyihova liele Nowa, Ebileham nee Gyekɔbo ahyɛlɛdeɛ ne mɔ dole nu a?

¹⁴ Ebɛle a le sonla mɔɔ ɛnli munli mɔɔ limoa mɔɔ zonlenle Gyihova wɔ nɔhalɛ nu a, noko tɛ ɔ ngomekye a ɔyɛle zɔ a. Ɛzoanvolɛ Pɔɔlo bobɔle menli gyɛne mɔɔ bɛzonlenle Gyihova kpalɛ la aluma​—bie mɔ a le Nowa, Ebileham nee Gyekɔbo. (Kenga Hibuluma 11:7, 8, 17-21.) Wɔ bɛ ɛbɛlabɔlɛ nu, tete selɛma ɛhye mɔ anu ko biala bɔle afɔle maanle Gyihova na Gyihova liele bɛ ahyɛlɛdeɛ ne mɔ dole nu. Duzu ati ɔ? Ɔluakɛ bɛyɛle ninyɛne dɔɔnwo bɛbokale bɛ nwo mɔɔ bɛdule bɛmaanle la anwo​—eza bɛ nuhua ko biala yɛle ninyɛne titili ne mɔ mɔɔ nwolɛ hyia wɔ nɔhalɛ ɛzonlenlɛ nu la amuala. Suzu bɛ neazo ne mɔ anwo nea.

15, 16. Kɛzi Nowa lile ninyɛne nna ne mɔɔ nwolɛ hyia wɔ nɔhalɛ ɛzonlenlɛ nu la anwo gyima ɛ?

¹⁵ Adam wule la, ɔ nzi ɛvolɛ 126 pɛ yɛɛ bɛwole Nowa a; noko ɔnyinle wɔ ewiade mɔɔ ɛnee adalɛ ɛzonlenlɛ ɛbu wɔ nu la anu.b (Gyn. 6:11) Wɔ mbusua mɔɔ ɛnee wɔ azɛlɛ ye azo kolaa na Azuyilɛ ne ara la kɔsɔɔti anu, Nowa nee ye abusua ne ala a zonlenle Gyihova a. (2 Pita 2:5) Wɔ Azuyilɛ ne anzi, debie hanle Nowa maanle ɔzile afɔlemokyea mɔɔ limoa mɔɔ bɛha nwolɛ edwɛkɛ wɔ Baebolo ne anu la, na ɔbɔle afɔle ɔmaanle Gyihova. Nowa luale deɛ ɛhye mɔɔ ɔvile ye ahonle nu ɔyɛle la azo ɔmaanle ye abusua ne nee alesama mɔɔ ɛha mɔɔ bɛbavi ye nu bɛara la nwunle ye wienyi kɛ​—Gyihova angomekye a ɔfɛta kɛ bɛfa ɛzonlenlɛ bɛmaa ye a. Ɛnee nane dɔɔnwo wɔ ɛkɛ ne noko ɔvale “nane mɔɔ bɛ nwo te yɛɛ abɔdeɛ mɔɔ tu mɔɔ bɛ nwo te la amuala bie” ɔbɔle afɔle. (Gyn. 8:20) Ɛnee ɛhye mɔ le afɔlebɔdeɛ kpalɛ bɔkɔɔ, ɔluakɛ Gyihova mumua ne hanle kɛ bɛ nwo te.​—Gyn. 7:2.

¹⁶ Nowa bɔle ɛyelalɛ afɔle ɛhye mɔ wɔ afɔlemokyea ne mɔɔ ɔzile la azo. Asoo kɛzi ɔzonlenle la le kpalɛ? Ɛhɛe. Kɛlɛtokɛ ne ka kɛ Gyihova anye liele afɔle ne evuanlɛ ne anwo na ɔyilale Nowa nee ɔ mra mrenyia ne mɔ. (Gyn. 8:21; 9:1) Noko adwenle mɔɔ Nowa vale bɔle afɔle ne la a le debie titili mɔɔ maanle Gyihova liele dole nu a. Afɔlebɔlɛ ne mɔ le adenle bieko mɔɔ Nowa luale zo lale diedi kpole mɔɔ ɔlɛ ye wɔ Gyihova nee Ye ndenle mɔɔ ɔdua zo ɔyɛ ye ninyɛne anu la ali a. Kɛmɔ Nowa hɔle zo diele Gyihova na ɔvale Ye ngyinlazo ne mɔ ɔyɛle gyima la ati, Baebolo ne ka kɛ ‘ɔ nee nɔhalɛ Nyamenle ne luale.’ Ɔti, Nowa nyianle duma mɔɔ wɔ ɛkɛ ne dahuu la kɛ ɔle tenlenenli.​—Gyn. 6:9; Yiz. 14:14; Hib. 11:7.

17, 18. Kɛzi Ebileham lile ninyɛne nna ne mɔɔ nwolɛ hyia wɔ nɔhalɛ ɛzonlenlɛ nu la anwo gyima ɛ?

¹⁷ Ɛnee adalɛ ɛzonlenlɛ ɛbɔ Ebileham ɛyia. Wɔ suakpole Ɛɛle azo, ɛleka mɔɔ Ebileham vi la, ɛnee ɛzonlenlɛsua kpole bie mɔɔ bɛfa bɛdi siane nyamenle Nanna eni la wɔ ɛkɛ.c Mekɛ bie ɛnee Ebileham papa bɔbɔ sonle adalɛ nyamenle. (Dwɔh. 24:2) Noko Ebileham kpale kɛ ɔbazonle Gyihova. Ɔbayɛ kɛ ɔzukoale nɔhalɛ Nyamenle ne anwo debie ɔvile ye nenyia Hyɛm, Nowa amra mrenyia ne mɔ anu ko ɛkɛ. Bɛwole ye la ɛvolɛ 150 pɛle nu kolaa na Hyɛm awu.

¹⁸ Ebileham bɔle afɔle dɔɔnwo wɔ ye ngoane mekɛ kɔsɔɔti anu. Noko dahuu bɛyɛ ɛzonlenlɛ nu nyɛleɛ ɛhye mɔ bɛmaa ahenle mɔɔ ɔ ngomekye ala a ɔfɛta kɛ bɛyɛ bɛmaa ye la, Gyihova. (Gyn. 12:8; 13:18; 15:8-10) Asoo Ebileham zieziele ɔ nwo kɛ ɔfa afɔlebɔdeɛ mɔɔ le kpalɛ bɔkɔɔ la yeamaa Gyihova ɔ? Yɛnyia kpuya ɛhye anwo mualɛ wɔ mekɛ mɔɔ Ebileham lale ɛhulolɛ mɔɔ ɔlɛ kɛ ɔfa ɔ ra Ayezeke mɔɔ ɔkulo ye kpalɛ yeabɔ afɔle ali la. Mekɛ zɔhane, Gyihova hanle kɛzi ɔwɔ kɛ Ebileham bɔ afɔle ne la anwo edwɛkɛ kɔsɔɔti hilele ye. (Gyn. 22:1, 2) Na ɛnee Ebileham lɛ ɛhulolɛ kɛ ɔbali zo. Gyihova ammaa Ebileham angu ɔ ra ne. (Gyn. 22:9-12) Gyihova liele Ebileham ɛzonlenlɛ ne dole nu ɔluakɛ ɛnee ɔlɛ adwenle kpalɛ. Pɔɔlo hɛlɛle kɛ: “Ebileham nyianle diedi wɔ Gyihova anu na bɛbule ye nyɛleɛ ne kɛ ɔle tenlene.”​—Wlo. 4:3.

19, 20. Kɛzi Gyekɔbo lile ninyɛne nna ne mɔɔ nwolɛ hyia wɔ nɔhalɛ ɛzonlenlɛ nu la anwo gyima ɛ?

¹⁹ Gyekɔbo lile ye ngoane mekɛ ne dɔɔnwo wɔ Keena, azɛlɛ ne mɔɔ Gyihova vale bɔle Ebileham nee ɔ bo zo amra ɛwɔkɛ la azo. (Gyn. 17:1, 8) Ɔle ɛleka mɔɔ menli ne vale bɛ nwo wulale ɛzonlenlɛ mɔɔ ɛnle kpalɛ fee la anu, ɔti Gyihova hanle kɛ azɛlɛ ne “bave menli mɔɔ de zo la agua bɛ lɔ.” (Lɛv. 18:24, 25) Mɔɔ Gyekɔbo lile ɛvolɛ 77 la, ɔvile Keena, ɔgyale, na nzinlii ɔnyianle abusua kpole bie na ɔ nee bɛ ziale rale. (Gyn. 28:1, 2; 33:18) Noko ɛnee ye abusua ne anu amra bie mɔ wɔ adalɛ ɛzonlenlɛ nu. Noko mɔɔ Gyihova zele Gyekɔbo kɛ ɔhɔ Bɛtɛle na ɔzi afɔlemokyea la, ɔyɛle ye ndɛndɛ. Ɔlimoale ɔzele ye abusua ne kɛ: “Bɛye adalɛ nyamenle ne mɔ bɛvi bɛ avinli na bɛde bɛ nwo.” Akee ɔlile adehilelɛ ne mɔɔ bɛvale bɛmaanle ye la amuala azo.​—Gyn. 35:1-7.

²⁰ Gyekɔbo zile afɔlemokyea dɔɔnwo wɔ Ɛwɔkɛ Azɛlɛ ne azo, noko Gyihova ala a ɔvale ye ɛzonlenlɛ ɔmaanle ye dahuu a. (Gyn. 35:14; 46:1) Kɛzi Gyekɔbo afɔlebɔdeɛ ne mɔ kpalɛ de, kɛzi ɔzonlenle Nyamenle nee adwenle mɔɔ ɛnee ɔlɛ la ati, Baebolo ne hanle kɛ, “edwɛkɛ biala ɛnle ɔ nwo,” edwɛkɛ ɛhye maa yɛnwu kɛ Nyamenle liele ye dole nu. (Gyn. 25:27) Gyekɔbo luale ye ɛbɛlabɔlɛ zo, ɔyɛle neazo kɛnlɛma ɔmaanle Yizilayɛ maanle ne mɔɔ ɛnee bɛbayɛ ɔ bo zo amra la.​—Gyn. 35:9-12.

21. Duzu a yɛsukoa yɛfi nɔhalɛ ɛzonlenlɛ nwo neazo mɔɔ tete selɛma ne yɛle la anu a?

²¹ Duzu a yɛsukoa ye wɔ nɔhalɛ ɛzonlenlɛ nwo yɛvi tete selɛma ne mɔ neazo ne anu a? Yɛdayɛ noko, menli mɔɔ yɛ abusua ne anu amra bie mɔ bɔbɔ boka nwo mɔɔ bɛbahola bɛahwe yɛ bɛavi ɛzonlenlɛ mɔɔ di munli mɔɔ yɛbava yɛamaa Gyihova anwo la ɛbɔ yɛ ɛyia. Amaa yɛagyinla ngyegyelɛ ɛhye mɔ anloa la, ɔwɔ kɛ yɛnyia Gyihova anu diedi kpole na yɛnyia anwodozo kɛ ye tenlene ngyinlazo ne mɔ tɛla biala. Yɛda diedi zɔhane ali ɔlua tieyɛ mɔɔ yɛyɛ yɛmaa Gyihova nee yɛ mekɛ, yɛ anwosesebɛ yɛɛ yɛ anwonyia mɔɔ yɛfa yɛsonle ye la azo. (Mat. 22:37-40; 1 Kɔl. 10:31) Nea kɛzi ɔmaa anwosesebɛ kɛ yɛbanwu kɛ saa yɛfa yɛ anwosesebɛ kɔsɔɔti yɛsonle Gyihova wɔ adenle mɔɔ ɔkile yɛ la azo na yɛfa adwenle kpalɛ yɛyɛ a ɔbu yɛ tenlenema a!​—Kenga Gyemise 2:18-24.

22-24. Kɛzi Mɛla ne zile zo kɛ ahenle mɔɔ Yizilayɛma babɔ afɔle amaa ye, afɔlebɔdeɛ ne yɛɛ kɛzi bɛbabɔ ye la anwo hyia ɛ?

²² Gyihova vale Mɛla ne maanle Gyekɔbo abozoamra, ɔti ɛnee bɛze mɔɔ ɔkpondɛ yeavi bɛ ɛkɛ ne la. Saa bɛtie Gyihova a, bɛbayɛ ye “agyapadeɛ titili” nee “maanle nwuanzanwuanza.” (Ɛzɛ. 19:5, 6) Yɛ kɛzi Mɛla ne zile ninyɛne titili nna ne azo la nzonlɛ.

²³ Gyihova hanle ahenle mɔɔ ɔwɔ kɛ Yizilayɛma fa bɛ ɛzonlenlɛ ne maa ye la anwo edwɛkɛ wienyi. Gyihova hanle kɛ: ‘Bɛmmasonle nyamenle gyɛne biala bɛboka me nwo.’ (Ɛzɛ. 20:3-5) Ɛnee ɔwɔ kɛ bɛfa afɔlebɔdeɛ mɔɔ le kpalɛ bɔkɔɔ la a bɛmaa ye a. Kɛ neazo la, ɛnee ɔwɔ kɛ bɛfa nane mɔɔ te kpɔkɛ na nvonleɛ biala ɛnle nwo la a bɛbɔ afɔle a. (Lɛv. 1:3; Dit. 15:21; fa toto Malakae 1:6-8 anwo.) Livaema nyianle ahyɛlɛdeɛ mɔɔ bɛvale bɛrɛlɛle Gyihova la bie, noko bɛdabɛ mumua ne bɛbɔle afɔle. Ɛnee ɔwɔ kɛ mɔɔ bɛvale bɛmaanle la fi ‘ahyɛlɛdeɛ kɔsɔɔti mɔɔ bɛva bɛmaa bɛ la anu kpalɛ ne’ anu. (Nɔm. 18:29) Mɔɔ fale kɛzi Yizilayɛma zonlenle la anwo la, bɛvale deɛ ne, ɛleka ne yɛɛ kɛzi ɔwɔ kɛ bɛbɔ afɔle bɛmaa Gyihova la anwo adehilelɛ fɔɔnwo bɛmaanle bɛ. Bɛvale mɛla mɔɔ bo 600 mɔɔ ɔbahile bɛ mɔɔ ɔwɔ kɛ bɛyɛ la bɛmaanle bɛ, na bɛzele bɛ kɛ: “Ɔwɔ kɛ bɛnea boɛ na bɛyɛ mɔɔ Gyihova bɛ Nyamenle ne ɛha ɛhile bɛ la pɛpɛɛpɛ. Bɛmmamakyi bɛkɔ fema zo anzɛɛ bɛne zo.”​—Dit. 5:32.

²⁴ Ɛnee ɛleka mɔɔ Yizilayɛma bɔ bɛ afɔle ne mɔ la anwo hyia ɔ? Ɛhɛe. Gyihova maanle ye menli ne zile ɛdanlɛsua na ɛkɛ ne a nɔhalɛ ɛzonlenlɛ hɔle zo a. (Ɛzɛ. 40:1-3, 29, 34) Mekɛ zɔhane, saa ɛnee Yizilayɛma kulo kɛ Nyamenle die bɛ afɔlebɔlɛ to nu a, ɛnee ɔwɔ kɛ bɛfa bɛkɔ ɛleka mɔɔ ɛdanlɛsua ne wɔ la.d​—Dit. 12:17, 18.

25. Duzu a nwolɛ hyia kpalɛ wɔ afɔlebɔlɛ nu a? Kilehile nu.

²⁵ Noko debie mɔɔ ɛnee nwolɛ hyia kpalɛ la a le Yizilayɛnli ne adwenle mɔɔ ɔlɛ la! Ɛnee ɔwɔ kɛ Gyihova nee ye ngyinlazo ne mɔ anwo ɛlɔlɛ mɔɔ vi ahonle nu la a ka ye a. (Kenga Ditilɔnomi 6:4-6.) Saa Yizilayɛma sonle Gyihova ɔluakɛ ɔwɔ kɛ bɛsonle ye la ati a, ɔnlie bɛ afɔlebɔlɛ ne ɔndo nu. (Aye. 1:10-13) Gyihova luale ngapezonli Ayezaya anwo zo ɔlale ye ali kɛ bɛngola bɛnva ɛzonlenlɛ mɔɔ ɛnvi ahonle nu la bɛmbɛlɛbɛla ye, ɔhanle kɛ: ‘Menli ɛhye mɔ fa bɛ nloa di me eni, na bɛ ahonle ɛdeɛ, ɔmbikye me fee.’​—Aye. 29:13.

26. Mɔlebɛbo ne, gyima boni a Sɔlɔmɔn ɛzonlenlɛsua ne lile wɔ nɔhalɛ ɛzonlenlɛ nu a?

²⁶ Yizilayɛma hɔdɛnlanle Ɛwɔkɛ Azɛlɛ ne azo la anzi ɛvolɛ ɛya dɔɔnwo anu, Sɔlɔmɔn zile ɛleka mɔɔ nɔhalɛ ɛzonlenlɛ bahɔ zo na ɔle kpole ɔtɛla ɛdanlɛsua ne la. (1 Arl. 7:51; 2 Ek. 3:1, 6, 7) Alimoa ne, Gyihova angomekye a bɛbɔle afɔle bɛmaanle ye wɔ ɛkɛ a. Sɔlɔmɔn nee ye menli ne vale afɔlebɔdeɛ kpalɛ dɔɔnwo maanle wɔ kɛzi Nyamenle Mɛla ne hilele la azo. (1 Arl. 8:63) Noko tɛ kakɛ mɔɔ bɛbɔle ye wɔ sua ne anwo nee afɔle dodo mɔɔ bɛbɔle la a maanle Gyihova liele bɛ ɛzonlenlɛ ne dole nu a. Mɔɔ ɛnee hyia la a le bɛdabɛ mɔɔ bɛvale ahyɛlɛdeɛ ne bɛmaanle la adwenle mɔɔ bɛlɛ la. Sɔlɔmɔn zile edwɛkɛ ɛhye azo wɔ mekɛ mɔɔ bɛyila ɛzonlenlɛsua ne azo la. Ɔhanle kɛ: “Bɛva bɛ ahonle muala bɛzonle Gyihova yɛ Nyamenle ne na bɛli ye ngyehyɛleɛ nee ye mɛla ne mɔ azo kɛ mɔɔ bɛyɛ ye ɛnɛ la.”​—1 Arl. 8:57-61.

27. Duzu a Yizilayɛ arelemgbunli nee bɛ maanlema ne yɛle a, na boni a Gyihova yɛle ye wɔ nwo a?

²⁷ Noko Yizilayɛma angɔ zo anli belemgbunli ne folɛdulɛ kpalɛ ne azo. Bɛanli nɔhalɛ ɛzonlenlɛ nu ninyɛne titili ne mɔ anu bie azo. Yizilayɛ arelemgbunli nee bɛ menli ne maanle bɛzɛkyele bɛ ahonle, bɛanlie Gyihova bɛanli bieko, yɛɛ bɛanli ye tenlene ngyinlazo ne mɔ azo. Gyihova vile ɛlɔlɛ nu zoanle ye ngapezoma ne fane dɔɔnwo kɛ bɛhɔdendɛ bɛhile bɛ na bɛbɔ bɛ kɔkɔ wɔ mɔɔ bavi bɛ nyɛleɛ ne mɔ anu ara la anwo. (Gyɛ. 7:13-15, 23-26) Ngapezoma zɔhane mɔ anu titili ko a le nɔhavo Yizikeɛle. Ɔdɛnlanle aze wɔ mekɛ mɔɔ ɛnee nɔhalɛ ɛzonlenlɛ nwo ɛra edwɛkɛ kpole la anu.

28, 29. Duzu a yɛze ye wɔ Yizikeɛle anwo a? (Nea ɛlɛka “Yizikeɛle​—Ye Ɛbɛlabɔlɛ Nee Ye Mekɛ Zo.”)

²⁸ Ɛnee Yizikeɛle ze kɛzi bɛsonle wɔ ɛzonlenlɛsua ne mɔɔ Sɔlɔmɔn zile anu la. Ɛnee ye papa le ɛsɔfo na saa ye mekɛ dwu a ɔkɔyɛ gyima wɔ ɛzonlenlɛsua ne anu. (Yiz. 1:3) Ɔbayɛ kɛ Yizikeɛle anye liele wɔ ye ngakula nu. Ɔda ali kɛ ye papa hilehilele ye Gyihova nee Mɛla ne anwo debie. Mɔɔ bɛwole ye la, ɛnee bɛnwu “Mɛla buluku ne” wɔ ɛzonlenlɛsua ne anu.e Belemgbunli mɔɔ ɛnee ɛlɛdi tumi la a le Belemgbunli kpalɛ Dwosaya, na mɔɔ ɔdele la maanle ɔmianle mɔdenle mɔɔ ɛnee ɔlɛbɔ yeamaa nɔhalɛ ɛzonlenlɛ ahɔ zo la anu.​—2 Arl. 22:8-13.

²⁹ Kɛ mɔɔ nɔhavoma mɔɔ li ɔ nyunlu yɛle ala la, ɔyɛle ninyɛne nna ne mɔɔ nwolɛ hyia wɔ nɔhalɛ ɛzonlenlɛ nu la. Saa yɛsukoa ye buluku ne a, yɛbanwu kɛ ɔzonlenle Gyihova angomekye, ɔhɔle zo ɔyɛle mɔɔ ɔbahola la yɛɛ ɔdiele Gyihova na ɔyɛle mɔɔ ɔhanle kɛ ɔyɛ la wɔ adenle mɔɔ ɔhilele ye la azo. Ɔyɛle ɛhye mɔ amuala ɔluakɛ ɛnee ɔlɛ nɔhalɛ diedi. Noko yɛnrɛhola yɛnrɛha kɛ ye mekɛ zo amra dɔɔnwo noko yɛle ye zɔ. Ɔlɛnyi la, ɔdiele Gyɛlɛmaya mɔɔ ɔbɔle ye gyimalilɛ ne abo wɔ 647 K.Y.M., na ɔvale mɔdenlebɔlɛ ɔbɔle Gyihova ndɛnebualɛ mɔɔ ɛnee ɛlɛba anwo kɔkɔ la ngapezo ne mɔ.

30. (a) Duzu a Yizikeɛle ngapezo ne mɔ da ye ali a? (b) Duzu a le ngapezo, na kɛzi ɔwɔ kɛ yɛte mɔɔ Yizikeɛle hanle nwolɛ edwɛkɛ la abo ɛ? (Nea ɛlɛka “Kɛzi Yɛbade Yizikeɛle Ngapezo Ne Mɔ Abo La.”)

³⁰ Yizikeɛle ngɛlɛlera ne mɔɔ vi sunsum nu la maa yɛnwu kɛzi Nyamenle menli ne hwenle bɛ nwo vile Ye ɛzonlenlɛ nwo la. (Kenga Yizikeɛle 8:6.) Mɔɔ Gyihova bɔle ɔ bo kɛ ɔtwe Dwuda anzo la, ɛnee ɔboka bɛdabɛ mɔɔ bɛwɔ akɛlɛzonlenlɛ nu wɔ Babelɔn la anwo. (2 Arl. 24:11-17) Bɛvale ye bɛdole efiade ɛdeɛ, noko bɛandwe ɔ nzo. Ɛnee Gyihova kpondɛ kɛ ɔyɛ gyima bie wɔ Ye menli ne avinli. Ɛnyelɛzodeɛnwunlɛ mɔɔ yɛ nwanwane nee ngapezo mɔɔ Yizikeɛle hɛlɛle dole ɛkɛ la hilele kɛzi bɛbava nɔhalɛ ɛzonlenlɛ bɛazie ɛkɛ ne bieko wɔ Gyɛlusalɛm la. Noko eza bɛyɛ mɔɔ tɛla zɔ​—bɛmaa yɛnwu kɛzi awieleɛ bɔkɔɔ ne bɛbava nɔhalɛ ɛzonlenlɛ bɛazie ɛkɛ ne bieko bɛamaa bɛdabɛ mɔɔ bɛkulo Gyihova amuala la.

31. Duzu a buluku ɛhye baboa yɛ yeamaa yɛayɛ a?

³¹ Wɔ buluku ɛhye anu, yɛbanwu ninyɛne mɔɔ ɛlɛkɔ zo wɔ anwuma, ɛleka mɔɔ Gyihova de la anwo debie ekyi, kɛzi bɛguale nɔhalɛ ɛzonlenlɛ nwo evinli bɔkɔɔ, kɛzi Gyihova vale nɔhalɛ ɛzonlenlɛ ziele ɛkɛ ne bieko na ɔgyinlanle ye menli ne anzi nee mɔɔ ɔbazi kenle bie, mekɛ mɔɔ awie biala mɔɔ de ngoane nu bazonle Gyihova la. Yɛbazuzu ɛnyelɛzodeɛnwunlɛ mɔɔ limoa mɔɔ Yizikeɛle yɛle nwolɛ kɛlɛtokɛ la anwo wɔ tile mɔɔ doa zo la anu. Ɔmaa yɛpɛ Gyihova nee ye ahyehyɛdeɛ ne foa mɔɔ wɔ anwuma la anwo nvoninli, yɛɛ ɔsi deɛmɔti ɔ ngomekye a ɔfɛta kɛ yɛfa nɔhalɛ ɛzonlenlɛ mɔɔ di munli yɛmaa ye la azo.