Omarana, o fori na gwọlọ izede sansan re ne dje uruemru esiri ọrhẹ ọghọ rẹn igbehian i Jehova. (Rom. 12:10) Izede ọgo? Psalm 15:4 ọ hunute izede owu taghene ohworho ro rhiẹ ọpha ruẹ i Jehova uvuẹn ibọkpọ ye, “o vwo wene ive yi-i, ọrhọ tobọ biomu riẹn dede.” Arha nyamwu ive ọwa-an, nọ lẹrhẹ ọwan ha ẹkuọn rẹn awọrọ. (Matt. 5:37) Jerẹ udje, Jehova o fiẹrorhọ ye taghene eri rọnmọ ne, ina nyamwu ive orọnmo aye. Oma ọ ji merhiẹn ọke emiemọ i rha damoma nyamwu ive aye i ve rẹn emọ aye. Ẹgwọlọ re vwo kpahen Osolobrugwẹ ọrhẹ ereva ọwan, ono mwu ọwan rha damoma nyamwuẹ ive ọwan. Izede ọrọrọ ra na họghọ rẹn igbehian i Jehova, yẹ ọrẹ ene vwo uruemru re dede epha ọrhẹ uruemru ghwologhwolo. (Rom. 12:13) Erhe lele imizu ukoko na ghwọghọ ọke kugbe, ọnọ lẹrhẹ ọwan tikẹrẹ aye rhọ, ji ruẹ onyerẹnkugbe ọwan rhẹ i Jehova gbanhonrhọ. Habaye, erhe vwo uruemru re dede epha, na hẹrokele i Jehova. w24.06 12 ¶15-16

Ihworho ri vwo omeriotọre yi Jehova o dje urhomẹmro na riẹn. (Matt. 11:25) Omeriotọre yọ ha userhumu rẹn ọwan sabu yono urhomẹmro na. (Acts 8:​30, 31) Ọrẹn, ana vi jomarhotọre na ja rha kparoma. Omẹkpare ọnọ sabu lẹrhẹ ọwan rhe roro taghene iroro ọwan, ọ gba te iruemru-urhi Baibol ọrhẹ ọkpọvi rẹ ukoko i Jehova o tiobọnẹ. Na sabu sẹrorẹ omeriotọre ọwan, ana vi karorhọ taghene Jehova o vwo omẹgbanhon ghwẹ ọwan omamọ. (Ps. 8:​3, 4) Ana ji sabu nẹrhomo vwe i Jehova nọ ha userhumu rẹn ọwan vwo omeriotọre, ji rhiẹ ihworho re rhiabọ dede uyono. Jehova ọnọ ha userhumu rẹn ọwan vwo ọdaremẹro kpahen i Baibol na ọrhẹ ọkpọvi ukoko yi, ukperẹ ono rhiẹ iroro ọwan. Ọke we rhe ruẹ uyono i Baibol omobọ, djokarhọ oborẹ ọsoriẹ i Jehova o vwo ẹgwọlọ kpahen omeriotọre ọrhẹ oborẹ o vwo utuoma kpahen omẹkpare te, ọrhẹ uruemru ra vwonma. Habaye, damoma vwo omeriotọre, orhianẹ a yẹruọ uphẹn ẹga rọ lẹrheruọ titi ibiesuọn. w24.07 10 ¶8-9

Avwẹ ẹgbukpe 1919 rhe, Jesu o yono idibo yi ji ruẹ ẹkwaphiẹrhotọre owian aghwoghwo na, nyoma ẹko ehworhare ezẹko ra djẹha. (Luke 12:42) Itiọrurhomẹmro, Jehova ọ ha ebrurhọ rhẹ owian aye. (Isa. 65:​13, 14) Orhianẹ ọwan i vwe ruẹ ekwakwa lele ẹkwaphiẹrhotọre-e, manẹ a vwa sabu wian owian ri Jesu ọ yẹrẹ ọwa-an. (Matt. 28:​19, 20) Jerẹ udje, gba haye taghene ikoko sansan a wian okegbe aghwoghwo ro jerẹ aye; o fiotọre taghene ana rha wian okogho na yanghan yanghan. Ọke ọrana, na na rha wian okogho ezẹko ọke ephian, ọrẹn a wian erọrọ kakaka-a. O vwo ebrurhọ erọrọ ra mẹrẹn fọkime e ruẹ ekwakwa lele ẹkwaphiẹrhotọre? Jerẹ oborẹ i Jesu o ruẹ ekwakwa lele ẹkwaphiẹrhotọre ọke rọ ha otọrakpọ na, omaran o ji ruẹ ọke ọnana. w24.04 8-9 ¶2-4