Lakkoofsa

17 Achiis Yihowaan Museedhaan akkana jedhe: 2 “Israaʼelotatti dubbadhu; tokkoon tokkoon mana abbootii+ irraa, jechuunis ajajjoota tokkoon tokkoon mana abbootii irraa ulee tokko tokko, walumaa galatti uleewwan 12 fudhadhu. Maqaa tokkoon tokkoon isaaniis ulee isaanii irratti barreessi. 3 Tokkoon tokkoon dura buutota mana abbootii irraa uleen tokko tokko waan fudhatamuuf, maqaa Aaron ulee Leewwii irratti barreessi. 4 Uleewwan kana dunkaana walgaʼii keessa Dhugaa Baatuu+ sana dura, bakka ani yeroo hundumaa isinitti itti mulʼadhu+ sana kaaʼi. 5 Uleen nama ani filadhuu+ ni lata; anis gungummii Israaʼelonni ana irrattii+ fi isin irratti gunguman+ nan dhaabsisa.”

6 Kanaafuu, Museen Israaʼelotatti ni dubbate; ajajjoonni isaanii hundis tokkoon tokkoon ajajjoota mana abbootiitiif ulee tokko tokko godhanii walumaa galatti uleewwan 12 isaaf ni kennan; uleen Aaronis uleewwan isaanii gidduu jira ture. 7 Achiis Museen uleewwan sana dunkaana Dhugaa Baatuu keessa Yihowaa dura ni kaaʼe.

8 Guyyaa itti aanutti Museen yommuu gara dunkaana Dhugaa Baatuu sanaatti seenu, kunoo, uleen Aaron inni mana Leewwii bakka buʼu latee, daraaree, abaaboo baafatee fi firii almoondii bilchaate godhatee ture. 9 Achiis Museen uleewwan sana hundumaa Yihowaa duraa gara guutummaa saba Israaʼelitti gad ni baase. Isaanis uleewwan sana ni ilaalan; tokkoon tokkoon isaaniis ulee ofii isaanii ni fudhatan.

10 Achiis Yihowaan Museedhaan, “Gungummiin isaan ana irratti gunguman akka dhaabbatuuf, akkasumas isaan akka hin duuneef, ilmaan fincilaa+ sanaaf mallattoo akka taʼuuf+ ulee Aaron+ deebisiitii Dhugaa Baatuu sana dura kaaʼi” jedhe. 11 Museenis yeruma sana akkuma Yihowaan isa ajaje ni godhe. Inni akkanuma ni godhe.

12 Israaʼelonnis yeroo kanatti Museedhaan akkana jedhan: “Amma duʼuu keenya; dhugumaan dhumuu keenya; hundi keenya dhumuuf jenna! 13 Namni godoo qulqulluu Yihowaatti dhihaatu kam iyyuu ni duʼa!+ Akka kanaan duunee dhumuuf jennaa?”+