QOʼANNAA 4

Caqasoota Sirriitti Beeksisuu

Maatewos 22:41-45

YAADA IJOO: Caqasa tokko dubbisuu kee dura sammuu dhaggeeffattoota keetii qopheessi.

Caqasicha maaliif akka dubbistu yaadi. Caqasa hunda dhaggeeffattoonni kee qabxii caqasichatti fayyadamtee ibsuu barbaaddu irratti akka xiyyeeffatan karaa godhuun beeksisi.

Yaada naannoo isaa jiru tilmaama keessa galchi. Caqasa tokko eenyu akka dubbate ykn barreesse kan beeksistu yoo taʼe wanti dubbachaa jirtu sirrii taʼuu isaa mirkaneessi.
Kitaaba Qulqulluu akka ragaatti caqasi. Namoota Waaqayyotti amananitti yommuu dubbattu, Kitaabni Qulqulluun “Dubbii Waaqayyoo” taʼuu isaa fi kanaan kan kaʼes madda ogummaa hunda irra caalu taʼuu isaa akka hubatan godhi.
Caqasicha xiyyeeffannaadhaan akka hordofan kakaasi. Gaaffii caqasicha irraa deebii argatu tokko gaafadhu, rakkina caqasichi hiikuuf gargaaru tokko kaasi, ykn dhugaa buʼuuraa seenaa Kitaaba Qulqulluu sana keessatti ibsame tokko dubbadhu.

Waaʼee barumsichaa fi caqasa sanaa wanta dhaggeeffattoonni kee dursanii beekan tilmaama keessa galchi. Caqasa beekamaa taʼe tokko illee karaa nama hawwatuun beeksisuudhaan, dhaggeeffattoonni kee hubannaa dabalataa argachuu akka dandaʼan isaan gargaari.