Sababiiwwan Bara 2023 Abdiidhaan Eeggachuuf Nu Kakaasan—Kitaabni Qulqulluun Maal Jedha?

Barri 2023 yeroo jalqabu, hundi keenyayyuu ofii keenyaafis taʼe maatii keenyaaf wanta gaarii hawwina. Yeroo gara fuulduraa abdiidhaan eeggachuuf kan nu kakaasu maalidha?

Kitaabni Qulqulluun rakkinni yeroo ammaatti nu mudachaa jiru kan turu yeroo muraasaaf qofa akka taʼee fi yeroo dhihootti furmaata akka argatu dubbata. “Jajjabina Kitaabota Qulqulluu keessaa argamuun abdii qabaachuu akka dandeenyuuf, wantoonni [Kitaaba Qulqulluu keessatti] barreeffaman hundi barumsa akka irraa argannuuf barreeffaman.”—Roomaa 15:4.

•  Waaʼee abdii Kitaabni Qulqulluun kennuu caalaatti barachuuf mata duree, “Abdii Amansiisaa Gara Fuulduraatti Raawwatamu” jedhamu dubbisi.

Kitaabni Qulqulluun abdiin akkuma “qofoo dooniitti lubbuu qabee [akka] dhaabu” dubbata. (Ibroota 6:19) Abdiin kun cimsee nu dhaabuu dandaʼa. Rakkina yeroo ammaatti nu mudachaa jiru akka dandamannu, akkasumas ilaalcha gaarii fi gammachuu dhugaa akka qabaannu nu gargaara. Fakkeenyaaf:

•  Abdiin Kitaaba Qulqulluu nama araada wajjin walʼaansoo gochaa ture tokko kan gargaare akkamitti akka taʼe ilaali. Viidiyoo Akkaataa Jireenyaa Kootti hin Gammanne jedhamu ilaali.

•  Abdiin Kitaaba Qulqulluu yeroo nama jaallannu duʼaan dhabnutti kan nu gargaaru akkamitti akka taʼe baradhu. Viidiyoo Jajjabina Warra Nama Jaalatan Duʼaan Dhabaniif Taʼu jedhamu ilaali.

Namoonni hedduun wanta gaarii akka argatan kan abdatan taʼus, waaʼee kanaa mirkanaaʼoo taʼuu hin dandaʼan. Abdiin Kitaabni Qulqulluun kennu garuu kanarraa addadha. Akkas kan jennu maaliifi? Waadaawwan Kitaaba Qulqulluu keessatti argaman kan gale Yihowaaa isa “sobuu hin dandeenye” waan taʼeefi. (Tiitoo 1:2) Waadaa gale hunda raawwachuuf humna kan qabu Yihowaa qofadha; inni “wanta gochuu barbaade hundumaa” gochuu ni dandaʼa.—Faarfannaa 135:5, 6.

Abdii amansiisaa Kitaabni Qulqulluun kennurraa akka fayyadamtu miira hoʼaadhaan si affeerra. “Kitaabota Qulqulluu of eeggannoodhaan” qoruudhaan amantii irratti qabdu cimsachuu dandeessa. (Hojii Ergamootaa 17:11) Kitaaba Qulqulluu Nu wajjin tolaan qoʼachuudhaan kana ofuma keetiin mirkaneeffachuu dandeessa. Bara 2023 abdiidhaan jalqabi!