• Jaalala Yihowaadhaaf Qabnu Argisiisuu kan Dandeenyu Akkamitti?
    Bara Baraaf Gammachuudhaan Jiraadhu!—Kitaaba Qulqulluu Qoʼachuudhaan Fayyadami

    • Jaalala Yihowaadhaaf Qabnu Argisiisuu kan Dandeenyu Akkamitti?

      Kitaaba Qulqulluu qoʼachuu erga jalqabdee kaasee Waaqayyotti caalaatti akka dhihaatte sitti dhagaʼamaa? Michummaa isaa wajjin qabdu hoo cimsachuu kee itti fufuu ni barbaaddaa? Akkas taanaan, Yihowaan jaalalli isaaf qabdu guddachaa akka deeme yommuu argu, caalaatti akka si jaallatuu fi akka siif yaadu yaadadhu. Maarree atoo akka isa jaallattu argisiisuu kan dandeessu akkamitti?

      1. Yihowaa akka jaallannu argisiisuu kan dandeenyu akkamitti?

      Yihowaadhaaf ajajamuudhaan akka isa jaallannu argisiisna. (1 Yohaannis 5:3 dubbisi.) Inni eenyu iyyuu akka isaaf ajajamu hin dirqisiisu. Kanaa mannaa, isaaf ajajamuuf ykn ajajamuu dhiisuuf akka filannu carraa nuuf kenneera. Maaliif? Yihowaan ‘garaadhaa akka ajajamnu’ barbaada. (Roomaa 6:17) Kana jechuun, dirqamtee utuu hin taʼin jaallattee akka isaaf ajajamtu barbaada jechuu dha. Kutaa 3⁠ffaanii fi kutaa 4⁠ffaan kitaaba kanaa wanta Yihowaa gammachiisu raawwachuudhaan, akkasumas wanta isa gaddisiisu irraa fagaachuudhaan jaalala isaaf qabdu akka argisiistu si gargaaruuf kan qophaaʼe dha.

      2. Jaalala Yihowaadhaaf qabnu argisiisuun ulfaataa taʼuu kan dandaʼu maaliifi?

      “Rakkinni nama qajeelaa hedduu dha.” (Faarfannaa 34:19) Hundi keenya iyyuu cubbuu dhaallee wajjin waldhaansoo goona. Kana malees, rakkinni maallaqaa, jalʼinni haqaa fi rakkoowwan kan biroon nu mudachuu dandaʼu. Yeroo haalli rakkisaan nu mudatu wanta Yihowaan nu irraa barbaadu raawwachuun salphaa taʼuu dhiisuu dandaʼa. Kunis kan taʼe daandii dogoggoraa irra deemuun caalaatti salphaa waan taʼeefi. Taʼus wanta Yihowaan si ajaju amanamummaadhaan yommuu raawwattu wanta kam iyyuu caalaa akka isa jaallattu argisiista. Akkasumas isaaf amanamaa akka taate mirkaneessita. Innis siif amanamaa taʼa. Matumaas si hin dhiisu.—Faarfannaa 4:3 dubbisi.

      CAALAATTI BARADHU

      Yihowaadhaaf ajajamuun kee kan isa gammachiisu maaliif akka taʼee fi kana gochuuf maaltu akka si gargaaru baradhu.

      3. Dhimma siinis ilaallatu

      Kutaa Kitaaba Qulqulluu kan taʼe kitaabni Iyyoob, Seexanni nama Iyyoob jedhamuu fi namoota Yihowaa tajaajiluu barbaadan hunda irratti himata akka dhiheesse dubbata. Iyyoob 1:1, 6–2:10 dubbisaa, achiis gaaffiiwwan kanneen irratti mariʼadhaa:

      • Akka Seexanni jedhetti, Iyyoob Yihowaadhaaf kan ajajamu maaliifi?—Iyyoob 1:9-11 ilaali.

      • Seexanni siinis dabalatee ilmaan namootaa hunda ilaalchisee maal jedheera?—Iyyoob 2:4 ilaali.

      Iyyoob 27:5b dubbisaa, achiis gaaffii kana irratti mariʼadhaa:

      • Iyyoob dhugumaan Yihowaa akka jaallatu kan argisiise akkamitti?

      Seexanni Yihowaa mormaa jira. Amanamummaa Iyyoob isa guutummaan qaama isaa madaaʼee fi obboleettii yeroo ammaatti Yihowaa tajaajilaa jirtu irratti gaaffii kaasaa jira.

      Iyyoob Yihowaadhaaf amanamaa taʼee itti fufuudhaan jaalala isaaf qabu argisiiseera

      Nutis Yihowaadhaaf amanamoo taanee jiraachuudhaan jaalala isaaf qabnu argisiisuu dandeenya

      4. Garaa Yihowaa gammachiisi

      Fakkeenya 27:11 dubbisaa, achiis gaaffiiwwan kanneen irratti mariʼadhaa:

      • Yommuu ogeessa taatuu fi isaaf ajajamtu Yihowaatti maaltu dhagaʼama? Maaliif?

      5. Yihowaadhaaf amanamaa taʼuu ni dandeessa

      Jaalalli Yihowaadhaaf qabnu waaʼee isaa warra kaanitti himuuf nu kakaasa. Isaaf amanamoo taʼuun keenya immoo yeroo ulfaataa taʼutti illee akkas gochuuf nu kakaasa. VIIDIYICHA taphachiisaa, achiis gaaffiiwwan armaan gadii irratti mariʼadhaa.

      VIIDIYOO: Yeroo Mormiin Si Mudatu Amantii Keetiif Falmi (5:09)

      • Waaʼee Yihowaa warra kaanitti himuun sitti ulfaatee beekaa?

      • Viidiyicha irratti akkuma ibsame, Giraayisoon sodaa isaa akka mooʼu maaltu isa gargaare?

      Wanta Yihowaan jaallatu kan jaallannuu fi wanta inni jibbu kan jibbinu yoo taʼe, Yihowaadhaaf amanamoo taʼuun salphaa dha. Faarfannaa 97:10 dubbisaa, achiis gaaffiiwwan kanneen irratti mariʼadhaa:

      • Wanta baratte irratti hundaaʼuudhaan wantoonni Yihowaan jaallatu tokko tokko kam faʼi? Wantoonni inni jibbu tokko tokko hoo maal faʼi?

      • Wanta gaarii taʼe jaallachuu fi wanta hamaa taʼe jibbuu barachuu kan dandeessu akkamitti?

      6. Yihowaadhaaf ajajamuun nu fayyada

      Yihowaadhaaf ajajamuun yeroo hundumaa gaarii dha. Isaayyaas 48:17, 18 dubbisaa, achiis gaaffiiwwan kanneen irratti mariʼadhaa:

      • Yihowaan yeroo hunda wanta nuuf wayyu akka beeku amanuu waan dandeenyu sitti fakkaataa? Maaliif?

      • Kitaaba Qulqulluu qoʼachuun kee fi waaʼee Yihowaa isa Waaqa dhugaa taʼee barachuun kee hanga ammaatti kan si fayyade akkamitti?

      NAMOONNI TOKKO TOKKO AKKANA JEDHU: “Wantin raawwadhu Waaqayyo irratti jijjiirama hin fidu.”

      • Wanti nuti raawwannu Yihowaa gammachiisuu ykn gaddisiisuu akka dandaʼu ibsuuf caqasa kamitti fayyadamuu dandeessa?

      MAAL BARATTE?

      Jaalala Yihowaadhaaf qabdu isaaf ajajamuudhaan, akkasumas yeroo rakkisaa taʼutti illee isaaf amanamaa taʼuudhaan argisiisuu dandeessa.

      Irra Deebii

      • Fakkeenya Iyyoob irraa maal baratte?

      • Jaalala Yihowaadhaaf qabdu argisiisuu kan dandeessu akkamitti?

      • Yihowaadhaaf amanamaa taatee jiraachuuf maaltu si gargaara?

      Galma

      QORANNOO DABALATAA GODHI

      Yihowaadhaafis taʼe gumiidhaaf amanamaa taʼuu kan dandeessu akkamitti akka taʼe ilaali.

      “Nama Amanamaa Taʼeef Amanamaa ni Taata” (16:44)

      Waaʼee himata Seexanni ilmaan namootaa irratti dhiheessee caalaatti baradhu.

      “Iyoob Amanamummaasaa Eegeera” (Macaafni Qulqulluun Dhaamsisaa Maalidha? kutaa 6)

      Ijoolleen illee jaalala Yihowaadhaaf qaban kan argisiisan akkamitti akka taʼe ilaali.

      Yihowaa Gammachiisi (8:16)

      Dargaggeessi dargaggoota kaan irraa dhiibbaan isa irra gaʼaa jiru tokko Yihowaadhaaf amanamaa taʼee itti fufuu kan dandaʼu akkamitti?

      Dhiibbaa Hiriyaa Damdamadhaa! (4:00)