Dhugaa Baatonni Yihowaa Yesusitti Ni Amanuu?

Daaniʼel: Akkam jirta Naaʼol. Deebiʼee si arguukootti gammadeera.

Naaʼol: Baga nagaan dhufte.

Daaniʼel: Masaraa Eegumsaafi Dammaqaa! haaraa baʼe sii fideera. Matadureewwan barruulee kanarratti baʼan akka jaallattu nan abdadha.

Naaʼol: Galatoomi. Wantin si gaaffachuu barbaadu waan jiruuf harʼa dhufuukeetti gammadeera.

Daaniʼel: Na gaaffachuu ni dandeessa. Gaaffiinkee maalidha?

Naaʼol: Gidduu kana, nama naa wajjin hojjetu tokkoo wajjin haasaʼaan ture. Waraqaaleen ati naa fidde yaadni isaan qabatan kan namatti tolu taʼuusaa itti himeen ture. Inni garuu Dhugaa Baatonni Yihowaa, Yesusitti waan hin amanneef waraqaa kana dubbisuu akkan hin qabne natti hime. Isin dhuguma Yesusitti hin amantanii? Yeroo ati deebitee dhuftu akkan si gaaffadhu isatti himeen ture.

Daaniʼel: Gaaffii kana na gaafachuukeetti gammadeera. Abbuma dhimmisaa ilaallatu gaafachuunkee sirriidha. Wanta namni tokko itti amanu baruuf, abbuma sana gaafachuurra wanti wayyu hin jiru.

Naaʼol: Anis kanuma yaadeen si gaafadhe.

Daaniʼel: Dhugaa Baatonni Yihowaa Yesusirratti amantii cimaa qabu. Fayyina argachuuf Yesusitti amanuun murteessaa akka taʼe amanna.

Naaʼol: Anis Yesusitti amantu jedheen yaadan ture; namichi naa wajjin hojjetu isin Yesusitti akka hin amanne yeroo natti himu garuu gaaffiitu natti uumame. Yaada kanarratti mariʼannee waan beeknu natti hin fakkaatu.

Daaniʼel: Caqasoota Macaafa Qulqulluu Yesusitti amanuun barbaachisaa akka taʼe ibsan sitti argisiisuu? Dhugaa Baatonni Yihowaa yeroo baayʼee tajaajilarratti caqasoota kanatti ni fayyadamu.

Naaʼol: Tole.

Daaniʼel: Jalqaba yaada Yesusumti Yohannis 14:6⁠rratti dubbate ilaaluun keenya gaariidha. Yaadni kun maree Yesus eergamootasaa keessaa isa tokkoo wajjin godherraa kan fudhatamedha. Caqasichi akkas jedha: “Yesus deebisee, ‘Karichi, dhugaan, jireenyis, ana; anaan yoo taʼe malee, eenyu iyyuu gara abbaa hin dhufu.’” Akka caqasa kanaatti, Abbaatti dhihaachuun kan dandaʼamu karaa eenyuu qofadha?

Naaʼol: Karaa Yesusiin.

Daaniʼel: Sirriidha. Dhugaa Baatonni Yihowaa kana cimsanii amanu. Mee gaaffii tokkon si gaafadha. Namni tokko yeroo kadhannaa dhiheessu maqaa eenyuutiin kadhachuu qaba?

Naaʼol: Maqaa Yesusiin.

Daaniʼel: Sirriidha. Anis yeroo hunda maqaa Yesusiinan kadhannaakoo dhiheessa. Dhugaa Baatonni Yihowaa hundis kadhannaasaanii maqaa Yesusiin dhiheessu.

Naaʼol: Kana beekuun koo gaariidha.

Daaniʼel: Caqasni ilaaluu dandeenyu kan biraanimmoo Yohannis 3:16⁠dha. Yaadni caqasa kanarratti argamu baayʼee barbaachisaa waan taʼeef, yeroo baayʼee yaada ijoo Wangeelaa jedhama. Waaʼee jireenya Yesusiifi tajaajilasaa ilaalchisee wanta barreeffame hunda utuu walitti cuunfitee caqasa kanaan kaaʼuu ni dandeessa. Caqasa kana ni dubbistaa?

Naaʼol: Tole. Akkas jedha: “Waaqayyo, akkasitti tokkicha ilma isaa hamma kennuufitti biyya lafaa jaallate; kun immoo isatti kan amanu hundinuu jireenya bara baraa haa qabaatuuf malee, haa baduuf miti!”

Daaniʼel: Galatoomi. Caqasa kana kanaan dura beektaa?

Naaʼol: Eeyyee, yeroo baayʼee nan dhagaʼa, iddoo tokko tokkottis barreeffamee nan arga.

Daaniʼel: Caqasa beekamaadha. Wanta Yesus jedhe qalbeeffadhu. Jaalalli Waaqayyoo ilmaan namootaatiif jireenya barabaraa akka argamsiisu dubbateera. Kana argachuuf garuu maal gochuu qabna?

Naaʼol: Amantii qabaachuu keenya argisiisuu qabna.

Daaniʼel: Eeyyee. Keessumaa, Ilma Waaqayyoo isa tokkicha kan taʼe Yesus Kiristosirratti amantii qabaachuu qabna. Yaadni amantiin Yesusirratti qabnu jireenya barabaraatiif karaa akka banu argisiisu, fuula 2⁠ffaa barruun sii fide kanaarratti ibsameera. Kaayyoo Masaraa Eegumsaa ilaalchisee yaada inni qabu keessaa tokko, barruun kun “Yesus Kiristos isa jireenya barabaraa akka argannuuf nu duʼeefi yeroo ammaatti Mootii Mootummaa Waaqayyoo taʼee bulchaa jirutti akka amannu nu jajjabeessa” kan jedhudha.

Naaʼol: Amma ifadha. Yaadni Dhugaa Baatonni Yihowaa Yesusitti akka amanan mirkaneessu barruuma keessanirrattiyyuu baʼeera jechuudha.

Daaniʼel: Eeyyee.

Naaʼol: Erga akkas taʼee, namoonni Yesusitti hin amanan kan isiniin jedhan maaliifiree?

Daaniʼel: Sababiin namoonni akkas itti jedhan garaagaraa jiraachuu dandaʼa. Namoonni tokko tokko akkas kan jedhan warra kaanirraa dhagaʼaniiti. Yookiinimmoo yaada dogoggoraa kana kan isaan barsiise geggeessitoota amantiisaanii taʼuu dandaʼa.

Naaʼol: Tarii namoonni Yesusitti hin amanan kan isiniin jedhan, Dhugaa Baatota Yesus utuu hin taʼiin Dhugaa Baatota Yihowaa waan jedhamtaniifii laata?

Daaniʼel: Kunis sababa taʼuu dandaʼa.

Naaʼol: Yeroo baayʼee waaʼee Yihowaa kan dubbattan maaliifi?

Daaniʼel: Tokkoffaa, akkuma Yesus Ilma Waaqayyoo, maqaa dhuunfaa Waaqayyoo isa Yihowaa jedhutti fayyadamuun barbaachisaa akka taʼe amanna. Wanta Yesus kadhannaa gara Abbaasaatti dhiheesserratti dubbate ilaali. Yaadni kun Yohannis 17:26⁠rratti argama. Caqasa kana nuu dubbistaa?

Naaʼol: Eeyyee. “‘Maqaan kee isaan biratti akka beekamu godheera, jaalalli ati ittiin na jaallatte isaan keessa akka jiraatuuf, anis isaan keessa akkan jiraadhuuf, ammas akka beekamu nan godha’ jedhe.”

Daaniʼel: Galatoomi. Yesus maqaa Waaqayyoo beeksisuusaa akka dubbate qalbeeffadhu. Akkas kan godhe maaliif sitti fakkaata?

Naaʼol: Ii . . . ani hin beeku.

Daaniʼel: Caqasa yaada kana ifa nuu godhu kan biraa ilaalluu? Caqasichi Yoʼel 2:32dha. Akkas jedha, “Maqaa Waaqayyoo warri waammatan hundinuu garuu in oolu.” Maqaa Yihowaa waamuun ulaagaa fayyinaaf barbaachisu erga taˈee, Yesus ulaagaa kana sirriitti beeka ture utuu jedhame irratti akka walii galtu nan amana.

Naaʼol: Eeyyee, waliin gala.

Daaniʼel: Kanaaf, Yesus duuka buutoonnisaa maqaa Waaqayyoo akka beekaniifi akka itti fayyadaman kan barbaade fayyinasaaniitiif jedheeti. Sababiin nuti yeroo baayʼee waaʼee Yihowaa itti dubbannu inni guddaanis kanadha. Namoonni maqaa dhuunfaa Waaqayyoo akka beekaniifi maqaasaa kana akka waammatan gargaaruunis barbaachisaa akka taʼe nutti dhagaʼama.

Naaʼol: Namoonni maqaa Waaqayyoo beekuu ykn kallattiidhaan itti fayyadamuu baatanis, waaʼee Waaqayyoo yeroo dubbatanitti waaʼee eenyuu dubbachaa akka jiran garuu beekamaadha.

Daaniʼel: Taʼuu dandaʼa. Haataʼu malee, waaqayyo maqaa dhuunfaasaa nutti himuudhaan, isatti dhihaachuun salphaa akka nuu taʼu godheera.

Naaʼol: Maal jechuu keeti?

Daaniʼel: Fakkeenyaaf, maqaa dhuunfaa Musee beekuun nu hin barbaachisu ture. Namuma Galaana Diimaa gargar hire ykn nama Abboommiin Kurnan itti kenname akka taʼetti qofa isa beekuu dandeenya turre. Maqaa Nohiin beekuunoo dirqama nu barbaachisa turee? Namicha markaba hojjeteefi maatiisaafi bineensota oolche akka taʼetti qofa nuu ibsamuu dandaʼa ture. Yesus Kiristosiinillee, samiirraa akka dhufeefi cubbuu keenyaaf akka duʼetti qofa isa beekuu ni dandeenya turre. Mitii?

Naaʼol: Natti fakkaata.

Daaniʼel: Waaqayyo garuu maqaa dhuunfaa namoota kanaa akka beeknu godheera. Maqaasaanii beekuun keenya seenaansaanii caalaatti akka nuu dhugoomu godha. Musee, Nohiifi Yesusiin arginee kan hin beekne taʼus, maqaasaanii beekuun keenya namoonni kun akka nuu dhugooman godha.

Naaʼol: Dhimma kanarratti karaa kanaan yaadee hin beeku; wanti ati jette garuu sirrii natti fakkaata!

Daaniʼel: Sababiin Dhugaa Baatonni Yihowaa maqaa dhuunfaa Waaqayyootti yeroo baayʼee itti fayyadaman inni kan biraan kanadha. Namoonni akkuma nama itti dhihaachuu dandaʼan tokkootti, Yihowaarratti amantii cimaa akka qabaatan gargaaruu barbaanna. Haataʼu malee, gumaacha Yesus fayyina keenyaaf godheefis iddoo guddaa kennina. Caqasa dabalataa yaada kana nuu mirkaneessu tokko dubbisnuu?

Naaʼol: Tole.

Daaniʼel: Jalqabarratti Yohannis 14:6 dubbisnee turre. Yesus, “Karichi, dhugaan, jireenyis, ana” jechuusaa yaadadhu. Mee ammammoo yaada inni Yohannis 14:1⁠rratti dubbate haa ilaallu. Wanta Yesus dhuma caqasa kanaarratti dubbate nuu dubbistaa?

Naaʼol: Tole. “Waaqayyotti amanaa, anattis amanaa!” jedha.

Daaniʼel: Galatoomi. Caqasni kun, namni tokko Yihowaafi Yesus keessaa filate isa tokkotti qofa amanuu akka qabu argisiisaa?

Naaʼol: Lakki. Yesus lamaansaaniittiyyuu amanuu akka qabnu dubbate.

Daaniʼel: Sirriidha. Waaqayyoofi Yesusirratti amantii akka qabnu dubbachuun qofti gaʼaa akka hin taane akka amantus natti dhagaʼama. Isaanirratti amantii akka qabnu karaa argisiisuun jiraachuu akka qabnu beekamaadha.

Naaʼol: Dhugaadha.

Daaniʼel: Namni tokko Waaqayyoofi Yesusirratti amantii akka qabu argisiisuu kan dandaʼu akkamittiree? Gaaffii kanarratti yeroo biraa mariʼachuu dandeenya.a

Naaʼol: Ni dandaʼama.