QOʼANNAA 2

Bifa Mariitiin Dhiheessuu

2 Qorontos 2:17

YAADA IJOO: Akkuma yeroo kaan dubbattutti, miira barumsa kee fi dhaggeeffattoota keetiif qabdu haala argisiisuun garaadhaa dubbadhu.

Kadhannaa fi of eeggannoodhaan qophaaʼi. Ofii kee irratti utuu hin taʼin, ergaa kee irratti xiyyeeffachuuf akka si gargaaru kadhadhu. Qabxiiwwan ijoo dabarsuu barbaaddu sammuutti qabadhu. Yaadicha jecha mataa keetiin ibsi; jechoota barreeffamicha irra jiran akkuma jiranitti dubbisuudhaan hin dhiheessin.

Kitaaba Qulqulluu ykn barreeffama kan biraa irraa dubbisuu yoo barbaadde yaadicha utuu hin guggufatin dubbisuuf barreeffamicha sirriitti hubadhu. Yaadni namootaa yoo caqasame, jechoota isaanii garmalee diraamaa utuu hin fakkeessin miiraan dubbisi.
Garaadhaa dubbadhu. Dhaggeeffattoonni kee ergicha dhagaʼuun kan isaan barbaachisu maaliif akka taʼe yaadi. Xiyyeeffannaa isaaniif kenni. Yoo kana goote akkaataan itti dhaabbattu, fuulli kee fi sochiin qaamaa kee garaadhaa dubbachaa akka jirtuu fi miira michoomaa akka qabdu argisiisu.

Akka uumama ofiitti dubbachuu jechuun dantaa dhabuu jechuu miti. Dubbii ifa taʼee fi seer-luga afaanii sirrii taʼetti fayyadamuudhaan ergaa keetiif kabaja akka qabdu argisiisi.
Gara dhaggeeffattoota keetii ilaali. Bakka akkas gochuun nama hin mufachiisnetti ija dhaggeeffattoota keetii ilaalaa dubbadhu. Yommuu haasaa kennitu dhaggeeffattoota kee hundumaa ariitiidhaan ilaaluu mannaa yeroo tokkotti nama tokko ilaali.