Waaqayyo Kadhannaa Kootiif Deebii ni Kennaa?

Kitaabni Qulqulluunis taʼe seenaan namootaa Waaqayyoo kadhannaa keenyaaf deebii akka kennu argisiisa. Kitaabni Qulqulluun akkana jedha: “[Waaqayyo] fedha warra isa sodaatanii fiixaan in baasa; iyya isaaniis immoo in dhaga’a, isaan in oolchas.” (Faarfannaa 145:19) Haa taʼu malee, Waaqayyoo kadhannaa keetiif deebii kennuun isaa yeroo baayʼee wanta ati raawwatu irratti kan hundaaʼe dha.

Wantoota Waaqayyo iddoo guddaa kennuuf

• Kadhannaa dhiheessuu kan qabnu gara Waaqayyotti malee gara Yesuusitti, gara Maariyaamitti, gara qulqullootaatti, gara maleekotaatti ykn bifa fakkeenyaatti miti. ‘Isa kadhata namaa dhagaʼu’ kan jedhame Yihowaa qofadha.—Faarfannaa 65:2.

• Kadhannaan dhihaachuu kan qabu, fedha ykn ulaagaa Waaqayyoo isa Kitaaba Qulqulluu keessatti ibsamee wajjin haala wal simuun taʼuu qaba.—1 Yohaannis 5:14.

• Aangoo Yesuus amannee fudhachuudhaan maqaa isaatiin kadhachuu qabna. Yesuus, “Karaa koo yoo taʼe malee, eenyu iyyuu gara Abbaa dhufuu hin dandaʼu” jedheera.—Yohaannis 14:6.

• Amantiidhaan kadhachuu qabna; barbaachisaa taanaan amantii keenya akka nuuf guddisu kadhachuu dandeenya.—Maatewos 21:22; Luqaas 17:5.

• Gad of qabuudhaan garaadhaa kadhachuu qabna. Kitaabni Qulqulluun, “Waaqayyo akkas ol kaʼee utuma jiruu, warra gad deebiʼan in ilaala” jedha.—Faarfannaa 138:6.

• Utuu wal irraa hin kutin kadhachuu qabna. Yesuus, “Kadhachuu keessan itti fufaa isiniif ni kennama” jedheera.—Luqaas 11:9.

Wantoota Waaqayyoof jijjiirama hin fidne

• Qomoo kee ykn lammummaa kee. ‘Waaqayyo namoota wal hin caalchisu; kanaa mannaa, saba hundumaa keessaa namni isa sodaatuu fi wanta sirrii taʼe hojjetu isa biratti fudhatama qaba.’—Hojii Ergamootaa 10:34, 35.

• Haala itti kadhattu. Teessee, qommaatee (addaan goombifamtee), jilbeenfattee ykn dhaabattee kadhachuu dandeessa.—1 Seenaa 17:16; Nahimiyaa 8:6; Daaniʼel 6:10; Maarqos 11:25.

• Sagalee kee guddistee ykn utuu sagalee hin dhageessisin kadhachuu kee. Waaqayyo kadhannaa utuu sagalee hin dhageessisinii fi utuu warri kaan hin beekin kadhattu ni deebisa.—Nahimiyaa 2:1-6.

• Wanti si yaaddesse ulfaataa ykn salphaa taʼuu isaa. Waaqayyo, ‘waan siif yaaduuf yaaddoo kee hundumaa isa irratti akka gattu’ si jajjabeessa.—1 Pheexiros 5:7.