11 ਜਿਹੜੇ ਯਹੂਦੀ ਮੋਆਬ, ਅੰਮੋਨ, ਅਦੋਮ ਅਤੇ ਹੋਰ ਦੇਸ਼ਾਂ ਵਿਚ ਸਨ, ਉਨ੍ਹਾਂ ਸਾਰਿਆਂ ਨੇ ਵੀ ਸੁਣਿਆ ਕਿ ਬਾਬਲ ਦੇ ਰਾਜੇ ਨੇ ਬਾਕੀ ਬਚੇ ਲੋਕਾਂ ਨੂੰ ਯਹੂਦਾਹ ਵਿਚ ਰਹਿਣ ਦਿੱਤਾ ਸੀ ਅਤੇ ਉਸ ਨੇ ਸ਼ਾਫਾਨ ਦੇ ਪੋਤੇ, ਅਹੀਕਾਮ ਦੇ ਪੁੱਤਰ ਗਦਲਯਾਹ ਨੂੰ ਉਨ੍ਹਾਂ ʼਤੇ ਅਧਿਕਾਰੀ ਨਿਯੁਕਤ ਕੀਤਾ ਸੀ। 12 ਇਸ ਲਈ ਸਾਰੇ ਯਹੂਦੀ ਉਨ੍ਹਾਂ ਸਾਰੀਆਂ ਥਾਵਾਂ ਤੋਂ ਵਾਪਸ ਆਉਣ ਲੱਗ ਪਏ ਜਿੱਥੇ ਉਹ ਖਿੰਡ ਗਏ ਸਨ। ਉਹ ਯਹੂਦਾਹ ਦੇ ਮਿਸਪਾਹ ਵਿਚ ਗਦਲਯਾਹ ਕੋਲ ਆਏ। ਉਨ੍ਹਾਂ ਨੇ ਵੱਡੀ ਤਾਦਾਦ ਵਿਚ ਦਾਖਰਸ ਅਤੇ ਗਰਮੀਆਂ ਦੇ ਫਲ ਇਕੱਠੇ ਕੀਤੇ।