ਯਹੋਵਾਹ ਬਾਰੇ ਸਿੱਖਣਾ ਇਕ ਸੁਹਾਵਣੇ ਸਫ਼ਰ ਵਾਂਗ ਹੈ। ਪਰ ਕਦੇ-ਕਦੇ ਇਸ ਸਫ਼ਰ ਵਿਚ ਕੁਝ ਰੁਕਾਵਟਾਂ ਆ ਸਕਦੀਆਂ ਹਨ। ਇਸ ਲਈ ਸ਼ਾਇਦ ਤੁਹਾਨੂੰ ਸਿੱਖਦੇ ਰਹਿਣਾ ਔਖਾ ਲੱਗੇ। ਇਸ ਪਾਠ ਵਿਚ ਅਸੀਂ ਜਾਣਾਂਗੇ ਕਿ ਬਾਈਬਲ ਤੋਂ ਸਿੱਖਦੇ ਰਹਿਣ ਦਾ ਸਾਨੂੰ ਕੀ ਫ਼ਾਇਦਾ ਹੋਵੇਗਾ। ਨਾਲੇ ਇਹ ਵੀ ਜਾਣਾਂਗੇ ਕਿ ਮੁਸ਼ਕਲਾਂ ਆਉਣ ਤੇ ਕਿਹੜੀ ਗੱਲ ਸਾਡੀ ਮਦਦ ਕਰੇਗੀ ਤਾਂਕਿ ਅਸੀਂ ਹਾਰ ਨਾ ਮੰਨੀਏ ਅਤੇ ਸਿੱਖਦੇ ਰਹੀਏ।

1. ਬਾਈਬਲ ਤੋਂ ਸਿੱਖਣ ਦਾ ਤੁਹਾਨੂੰ ਕੀ ਫ਼ਾਇਦਾ ਹੋਵੇਗਾ?

“ਪਰਮੇਸ਼ੁਰ ਦਾ ਬਚਨ ਜੀਉਂਦਾ ਅਤੇ ਸ਼ਕਤੀਸ਼ਾਲੀ ਹੈ।” (ਇਬਰਾਨੀਆਂ 4:12) ਬਾਈਬਲ ਤੋਂ ਤੁਸੀਂ ਯਹੋਵਾਹ ਦੀ ਸੋਚ ਜਾਣ ਪਾਓਗੇ ਅਤੇ ਤੁਹਾਨੂੰ ਇਹ ਵੀ ਪਤਾ ਲੱਗੇਗਾ ਕਿ ਉਹ ਤੁਹਾਨੂੰ ਕਿੰਨਾ ਪਿਆਰ ਕਰਦਾ ਹੈ। ਅਸੀਂ ਬਾਈਬਲ ਨੂੰ ਸਿਰਫ਼ ਜਾਣਕਾਰੀ ਲੈਣ ਲਈ ਨਹੀਂ ਪੜ੍ਹਦੇ, ਸਗੋਂ ਇਸ ਤੋਂ ਸਾਨੂੰ ਸਹੀ ਫ਼ੈਸਲੇ ਕਰਨ ਦੀ ਸਮਝ ਅਤੇ ਚੰਗੇ ਭਵਿੱਖ ਦੀ ਉਮੀਦ ਮਿਲਦੀ ਹੈ। ਇੰਨਾ ਹੀ ਨਹੀਂ, ਬਾਈਬਲ ਦੇ ਜ਼ਰੀਏ ਅਸੀਂ ਯਹੋਵਾਹ ਨਾਲ ਦੋਸਤੀ ਕਰ ਪਾਉਂਦੇ ਹਾਂ। ਬਾਈਬਲ ਵਿਚ ਇੰਨੀ ਤਾਕਤ ਹੈ ਕਿ ਇਹ ਸਾਡੀ ਜ਼ਿੰਦਗੀ ਬਦਲ ਸਕਦੀ ਹੈ। ਪਰ ਇੱਦਾਂ ਤਾਂ ਹੀ ਹੋ ਸਕਦਾ ਹੈ ਜੇ ਅਸੀਂ ਸਿੱਖਦੇ ਰਹੀਏ।

2. ਇਹ ਸਮਝਣਾ ਜ਼ਰੂਰੀ ਕਿਉਂ ਹੈ ਕਿ ਬਾਈਬਲ ਦੀਆਂ ਸੱਚਾਈਆਂ ਅਨਮੋਲ ਹਨ?

ਬਾਈਬਲ ਦੀਆਂ ਸੱਚਾਈਆਂ ਇਕ ਕੀਮਤੀ ਖ਼ਜ਼ਾਨੇ ਵਾਂਗ ਹਨ। ਇਸੇ ਕਰਕੇ ਬਾਈਬਲ ਸਾਨੂੰ ਕਹਿੰਦੀ ਹੈ ਕਿ “ਸੱਚਾਈ ਨੂੰ ਖ਼ਰੀਦ ਤੇ ਇਸ ਨੂੰ ਕਦੇ ਵੇਚੀ ਨਾ।” (ਕਹਾਉਤਾਂ 23:23) ਜੇ ਅਸੀਂ ਇਹ ਗੱਲ ਸਮਝਾਂਗੇ ਕਿ ਬਾਈਬਲ ਦੀਆਂ ਸੱਚਾਈਆਂ ਕਿੰਨੀਆਂ ਅਨਮੋਲ ਹਨ, ਤਾਂ ਅਸੀਂ ਬਾਈਬਲ ਦੀ ਸਟੱਡੀ ਜਾਂ ਅਧਿਐਨ ਕਰਦੇ ਰਹਾਂਗੇ, ਫਿਰ ਚਾਹੇ ਸਾਨੂੰ ਕਿੰਨੀਆਂ ਵੀ ਮੁਸ਼ਕਲਾਂ ਕਿਉਂ ਨਾ ਆਉਣ।—ਕਹਾਉਤਾਂ 2:4, 5 ਪੜ੍ਹੋ।

3. ਸਟੱਡੀ ਜਾਰੀ ਰੱਖਣ ਵਿਚ ਯਹੋਵਾਹ ਤੁਹਾਡੀ ਕਿਵੇਂ ਮਦਦ ਕਰੇਗਾ?

ਸਾਰੇ ਜਹਾਨ ਦਾ ਮਾਲਕ ਅਤੇ ਤੁਹਾਡਾ ਦੋਸਤ ਯਹੋਵਾਹ ਚਾਹੁੰਦਾ ਹੈ ਕਿ ਤੁਸੀਂ ਉਸ ਨੂੰ ਚੰਗੀ ਤਰ੍ਹਾਂ ਜਾਣੋ ਅਤੇ ਇੱਦਾਂ ਕਰਨ ਵਿਚ ਉਹ ਤੁਹਾਡੀ ਮਦਦ ਕਰੇਗਾ। ਉਹ ‘ਤੁਹਾਡੇ ਵਿਚ ਇੱਛਾ ਪੈਦਾ ਕਰਨ ਦੇ ਨਾਲ-ਨਾਲ ਤੁਹਾਨੂੰ ਤਾਕਤ ਬਖ਼ਸ਼ੇਗਾ।’ (ਫ਼ਿਲਿੱਪੀਆਂ 2:13 ਪੜ੍ਹੋ।) ਜੇ ਕਦੇ-ਕਦੇ ਤੁਹਾਨੂੰ ਬਾਈਬਲ ਦੀ ਸਟੱਡੀ ਜਾਰੀ ਰੱਖਣੀ ਜਾਂ ਸਿੱਖੀਆਂ ਗੱਲਾਂ ਲਾਗੂ ਕਰਨੀਆਂ ਔਖੀਆਂ ਲੱਗਣ, ਤਾਂ ਯਹੋਵਾਹ ਤੁਹਾਡੇ ਅੰਦਰ ਇੱਛਾ ਪੈਦਾ ਕਰ ਸਕਦਾ ਹੈ। ਇੰਨਾ ਹੀ ਨਹੀਂ, ਉਹ ਤੁਹਾਨੂੰ ਮੁਸ਼ਕਲਾਂ ਜਾਂ ਵਿਰੋਧ ਸਹਿਣ ਦੀ ਤਾਕਤ ਵੀ ਦੇ ਸਕਦਾ ਹੈ। ਇਸ ਲਈ ਯਹੋਵਾਹ ਨੂੰ ਪ੍ਰਾਰਥਨਾ ਕਰਦੇ ਰਹੋ ਕਿ ਉਹ ਸਟੱਡੀ ਜਾਰੀ ਰੱਖਣ ਵਿਚ ਤੁਹਾਡੀ ਮਦਦ ਕਰੇ।—1 ਥੱਸਲੁਨੀਕੀਆਂ 5:17.

ਹੋਰ ਸਿੱਖੋ

4. ਬਾਈਬਲ ਦੀ ਸਟੱਡੀ ਨੂੰ ਅਹਿਮੀਅਤ ਦਿਓ

ਕਦੇ-ਕਦੇ ਅਸੀਂ ਜ਼ਿੰਦਗੀ ਦੀ ਭੱਜ-ਦੌੜ ਵਿਚ ਇੰਨੇ ਰੁੱਝ ਜਾਂਦੇ ਹਾਂ ਕਿ ਸ਼ਾਇਦ ਸਾਨੂੰ ਲੱਗੇ ਕਿ ਸਾਡੇ ਕੋਲ ਸਟੱਡੀ ਕਰਨ ਲਈ ਸਮਾਂ ਹੀ ਨਹੀਂ ਹੈ। ਉਦੋਂ ਅਸੀਂ ਕਿਹੜੀ ਗੱਲ ਯਾਦ ਰੱਖ ਸਕਦੇ ਹਾਂ? ਫ਼ਿਲਿੱਪੀਆਂ 1:10 ਪੜ੍ਹੋ। ਫਿਰ ਇਨ੍ਹਾਂ ਸਵਾਲਾਂ ʼਤੇ ਚਰਚਾ ਕਰੋ:

• ਤੁਹਾਡੇ ਖ਼ਿਆਲ ਨਾਲ ਜ਼ਿੰਦਗੀ ਵਿਚ “ਜ਼ਿਆਦਾ ਜ਼ਰੂਰੀ ਗੱਲਾਂ” ਕਿਹੜੀਆਂ ਹਨ?

• ਤੁਸੀਂ ਸਟੱਡੀ ਨੂੰ ਪਹਿਲ ਦੇਣ ਲਈ ਕੀ ਕਰ ਸਕਦੇ ਹੋ?

1. 1. ਜੇ ਤੁਸੀਂ ਇਕ ਬਾਲਟੀ ਵਿਚ ਪਹਿਲਾਂ ਰੇਤਾ ਪਾਓ ਅਤੇ ਫਿਰ ਵੱਟੇ, ਤਾਂ ਤੁਸੀਂ ਉਸ ਵਿਚ ਸਾਰੇ ਵੱਟੇ ਨਹੀਂ ਪਾ ਸਕੋਗੇ

2. 2. ਜੇ ਤੁਸੀਂ ਪਹਿਲਾਂ ਵੱਟੇ ਪਾਓ, ਤਾਂ ਉਸ ਵਿਚ ਕਾਫ਼ੀ ਰੇਤਾ ਵੀ ਪੈ ਜਾਵੇਗਾ। ਉਸੇ ਤਰ੍ਹਾਂ, ਜੇ ਤੁਸੀਂ ਪਹਿਲਾਂ “ਜ਼ਿਆਦਾ ਜ਼ਰੂਰੀ” ਕੰਮ ਕਰੋਗੇ, ਤਾਂ ਤੁਸੀਂ ਉਨ੍ਹਾਂ ਨੂੰ ਚੰਗੀ ਤਰ੍ਹਾਂ ਕਰ ਪਾਓਗੇ ਅਤੇ ਇਸ ਦੇ ਨਾਲ-ਨਾਲ ਤੁਹਾਡੇ ਕੋਲ ਦੂਸਰੇ ਕੰਮਾਂ ਲਈ ਵੀ ਸਮਾਂ ਹੋਵੇਗਾ

ਇਨਸਾਨ ਹੋਣ ਦੇ ਨਾਤੇ ਸਾਨੂੰ ਜ਼ਿੰਦਗੀ ਵਿਚ ਪਰਮੇਸ਼ੁਰ ਦੀ ਅਗਵਾਈ ਜਾਂ ਸੇਧ ਦੀ ਲੋੜ ਹੈ। ਬਾਈਬਲ ਦੀ ਸਿੱਖਿਆ ਲੈ ਕੇ ਸਾਡੀ ਇਹ ਲੋੜ ਪੂਰੀ ਹੁੰਦੀ ਹੈ। ਮੱਤੀ 5:3 ਪੜ੍ਹੋ। ਫਿਰ ਇਸ ਸਵਾਲ ʼਤੇ ਚਰਚਾ ਕਰੋ:

• ਸਟੱਡੀ ਨੂੰ ਪਹਿਲ ਦੇਣ ਨਾਲ ਕੀ ਫ਼ਾਇਦਾ ਹੋਵੇਗਾ?

5. ਹਾਰ ਨਾ ਮੰਨੋ

ਵੀਡੀਓ: ਉਸ ਨੇ ਹਾਰ ਨਹੀਂ ਮੰਨੀ  (5:22)

• ਜਦੋਂ ਫ੍ਰਾਂਚੇਸਕੋ ਨੇ ਆਪਣੀ ਮੰਮੀ ਅਤੇ ਦੋਸਤਾਂ ਨੂੰ ਦੱਸਿਆ ਕਿ ਉਹ ਬਾਈਬਲ ਤੋਂ ਸਿੱਖ ਰਿਹਾ ਹੈ, ਤਾਂ ਉਨ੍ਹਾਂ ਨੂੰ ਕਿੱਦਾਂ ਲੱਗਾ?

• ਜਦੋਂ ਫ੍ਰਾਂਚੇਸਕੋ ਨੇ ਹਾਰ ਨਹੀਂ ਮੰਨੀ ਅਤੇ ਸਟੱਡੀ ਕਰਨੀ ਨਹੀਂ ਛੱਡੀ, ਤਾਂ ਉਸ ਨੂੰ ਕਿਹੜੀਆਂ ਬਰਕਤਾਂ ਮਿਲੀਆਂ?

2 ਤਿਮੋਥਿਉਸ 2:24, 25 ਪੜ੍ਹੋ। ਫਿਰ ਇਨ੍ਹਾਂ ਸਵਾਲਾਂ ʼਤੇ ਚਰਚਾ ਕਰੋ:

• ਤੁਸੀਂ ਜੋ ਸਿੱਖ ਰਹੇ ਹੋ, ਉਸ ਬਾਰੇ ਤੁਹਾਡੇ ਘਰਦਿਆਂ ਅਤੇ ਦੋਸਤਾਂ ਨੂੰ ਕਿੱਦਾਂ ਲੱਗਦਾ ਹੈ?

• ਜੇ ਕਿਸੇ ਨੂੰ ਚੰਗਾ ਨਾ ਲੱਗੇ ਕਿ ਤੁਸੀਂ ਸਟੱਡੀ ਕਰ ਰਹੇ ਹੋ, ਤਾਂ ਇਨ੍ਹਾਂ ਆਇਤਾਂ ਮੁਤਾਬਕ ਤੁਹਾਨੂੰ ਕਿੱਦਾਂ ਪੇਸ਼ ਆਉਣਾ ਚਾਹੀਦਾ ਹੈ ਅਤੇ ਕਿਉਂ?

6. ਯਹੋਵਾਹ ʼਤੇ ਭਰੋਸਾ ਰੱਖੋ, ਉਹ ਤੁਹਾਡੀ ਮਦਦ ਜ਼ਰੂਰ ਕਰੇਗਾ

ਵੀਡੀਓ: ਯਹੋਵਾਹ ਦੀ ਮਦਦ ਨਾਲ ਅਸੀਂ ਬਦਲ ਸਕਦੇ ਹਾਂ  (3:56)

• ਯਹੋਵਾਹ ਨੂੰ ਖ਼ੁਸ਼ ਕਰਨ ਲਈ ਜਿਮ ਨੇ ਕਿਹੜੇ-ਕਿਹੜੇ ਬਦਲਾਅ ਕੀਤੇ?

• ਜਿਮ ਦੀ ਕਿਹੜੀ ਗੱਲ ਤੁਹਾਨੂੰ ਸਭ ਤੋਂ ਚੰਗੀ ਲੱਗੀ?

ਇਬਰਾਨੀਆਂ 11:6 ਪੜ੍ਹੋ। ਫਿਰ ਇਨ੍ਹਾਂ ਸਵਾਲਾਂ ʼਤੇ ਚਰਚਾ ਕਰੋ:

• ਯਹੋਵਾਹ ਉਨ੍ਹਾਂ ਲੋਕਾਂ ਲਈ ਕੀ ਕਰਦਾ ਹੈ ਜਿਹੜੇ “ਜੀ-ਜਾਨ ਨਾਲ” ਉਸ ਨੂੰ ਜਾਣਨ ਤੇ ਉਸ ਦੀ ਇੱਛਾ ਪੂਰੀ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ?

• ਇਸ ਆਇਤ ਮੁਤਾਬਕ ਜਦੋਂ ਤੁਸੀਂ ਸਟੱਡੀ ਕਰਨ ਲਈ ਮਿਹਨਤ ਕਰਦੇ ਹੋ, ਤਾਂ ਯਹੋਵਾਹ ਨੂੰ ਕਿੱਦਾਂ ਲੱਗਦਾ ਹੈ?

ਹੁਣ ਤਕ ਅਸੀਂ ਸਿੱਖਿਆ

ਮੁਸ਼ਕਲਾਂ ਆਉਣ ਦੇ ਬਾਵਜੂਦ ਵੀ ਜੇ ਅਸੀਂ ਸਟੱਡੀ ਕਰਦੇ ਰਹਿੰਦੇ ਹਾਂ, ਤਾਂ ਅਸੀਂ ਅੱਜ ਅਤੇ ਹਮੇਸ਼ਾ ਲਈ ਖ਼ੁਸ਼ੀ-ਖ਼ੁਸ਼ੀ ਜੀਵਾਂਗੇ। ਯਹੋਵਾਹ ʼਤੇ ਭਰੋਸਾ ਰੱਖੋ, ਉਹ ਤੁਹਾਡੀ ਮਦਦ ਜ਼ਰੂਰ ਕਰੇਗਾ।

ਤੁਸੀਂ ਕੀ ਕਹੋਗੇ?

• ਬਾਈਬਲ ਦੀਆਂ ਸੱਚਾਈਆਂ ਤੁਹਾਡੇ ਲਈ ਇਕ ਕੀਮਤੀ ਖ਼ਜ਼ਾਨੇ ਵਾਂਗ ਕਿਉਂ ਹਨ?

• ਤੁਸੀਂ “ਜ਼ਿਆਦਾ ਜ਼ਰੂਰੀ ਗੱਲਾਂ” ਨੂੰ ਅਹਿਮੀਅਤ ਦੇਣ ਲਈ ਕੀ ਕਰ ਸਕਦੇ ਹੋ?

• ਬਾਈਬਲ ਤੋਂ ਸਿੱਖਦੇ ਰਹਿਣ ਲਈ ਤੁਹਾਨੂੰ ਯਹੋਵਾਹ ਤੋਂ ਮਦਦ ਕਿਉਂ ਮੰਗਣੀ ਚਾਹੀਦੀ ਹੈ?

ਇਹ ਵੀ ਦੇਖੋ

ਚਾਰ ਤਰੀਕੇ ਜਾਣੋ ਜਿਨ੍ਹਾਂ ਦੀ ਮਦਦ ਨਾਲ ਕਈ ਲੋਕ ਆਪਣੇ ਸਮੇਂ ਨੂੰ ਚੰਗੀ ਤਰ੍ਹਾਂ ਵਰਤ ਸਕੇ ਹਨ।

“ਸਮਝਦਾਰੀ ਨਾਲ ਆਪਣਾ ਸਮਾਂ ਵਰਤੋ” (ਜਾਗਰੂਕ ਬਣੋ!,  ਮਾਰਚ-ਅਪ੍ਰੈਲ 2014)

ਇਕ ਪਤੀ ਨੂੰ ਚੰਗਾ ਨਹੀਂ ਲੱਗਾ ਕਿ ਉਸ ਦੀ ਪਤਨੀ ਬਾਈਬਲ ਦੀ ਸਿੱਖਿਆ ਲੈ ਰਹੀ ਹੈ। ਵੀਡੀਓ ਵਿਚ ਦੇਖੋ ਕਿ ਯਹੋਵਾਹ ਨੇ ਉਸ ਔਰਤ ਦੀ ਮਦਦ ਕਿਵੇਂ ਕੀਤੀ।

ਯਹੋਵਾਹ ਸਾਨੂੰ ਆਪਣਾ ਭਾਰ ਚੁੱਕਣ ਦੀ ਤਾਕਤ ਦਿੰਦਾ ਹੈ  (5:05)

ਦੇਖੋ ਕਿ ਜਦੋਂ ਇਕ ਔਰਤ ਨੇ ਹਾਰ ਨਹੀਂ ਮੰਨੀ, ਤਾਂ ਇਹ ਗੱਲ ਉਸ ਦੇ ਪਤੀ ਲਈ ਬਰਕਤ ਕਿਵੇਂ ਸਾਬਤ ਹੋਈ।

ਮੈਂ ਸੱਚਾਈ  ʼਤੇ ਮੁਕੱਦਮਾ ਚਲਾਇਆ  (6:30)

ਕਈ ਲੋਕ ਇਲਜ਼ਾਮ ਲਾਉਂਦੇ ਹਨ ਕਿ ਯਹੋਵਾਹ ਦੇ ਗਵਾਹ ਪਰਿਵਾਰਾਂ ਵਿਚ ਫੁੱਟ ਪਾਉਂਦੇ ਹਨ। ਪਰ ਕੀ ਉਨ੍ਹਾਂ ਦੀ ਇਹ ਗੱਲ ਸੱਚ ਹੈ?

“ਕੀ ਯਹੋਵਾਹ ਦੇ ਗਵਾਹ ਪਰਿਵਾਰਾਂ ਨੂੰ ਤੋੜਦੇ ਹਨ ਜਾਂ ਮਜ਼ਬੂਤ ਕਰਦੇ ਹਨ?” (jw.org ʼਤੇ ਲੇਖ)

ਸਾਨੂੰ ਸਾਰਿਆਂ ਨੂੰ ਕਈ ਫ਼ੈਸਲੇ ਕਰਨੇ ਪੈਂਦੇ ਹਨ। ਕਈ ਫ਼ੈਸਲਿਆਂ ਦਾ ਸਾਡੀ ਜ਼ਿੰਦਗੀ ʼਤੇ ਅਤੇ ਯਹੋਵਾਹ ਨਾਲ ਸਾਡੇ ਰਿਸ਼ਤੇ ʼਤੇ ਗਹਿਰਾ ਅਸਰ ਪੈਂਦਾ ਹੈ, ਜਿਵੇਂ ਅਸੀਂ ਵਿਆਹ ਕਰਾਈਏ ਜਾਂ ਨਾ, ਅਸੀਂ ਕਿੱਥੇ ਰਹਾਂਗੇ ਜਾਂ ਘਰ ਦਾ ਗੁਜ਼ਾਰਾ ਕਿਵੇਂ ਚਲਾਵਾਂਗੇ। ਸਹੀ ਫ਼ੈਸਲੇ ਕਰਨ ਨਾਲ ਅਸੀਂ ਜ਼ਿੰਦਗੀ ਵਿਚ ਖ਼ੁਸ਼ ਰਹਿੰਦੇ ਹਾਂ ਅਤੇ ਯਹੋਵਾਹ ਦੇ ਦਿਲ ਨੂੰ ਵੀ ਖ਼ੁਸ਼ ਕਰਦੇ ਹਾਂ।

1. ਸਹੀ ਫ਼ੈਸਲੇ ਕਰਨ ਵਿਚ ਬਾਈਬਲ ਸਾਡੀ ਕਿੱਦਾਂ ਮਦਦ ਕਰ ਸਕਦੀ ਹੈ?

ਕਿਸੇ ਮਾਮਲੇ ਬਾਰੇ ਫ਼ੈਸਲਾ ਕਰਨ ਤੋਂ ਪਹਿਲਾਂ ਸਾਨੂੰ ਮਦਦ ਲਈ ਯਹੋਵਾਹ ਨੂੰ ਪ੍ਰਾਰਥਨਾ ਕਰਨੀ ਚਾਹੀਦੀ ਹੈ। ਫਿਰ ਸਾਨੂੰ ਬਾਈਬਲ ਵਿੱਚੋਂ ਖੋਜਬੀਨ ਕਰਨੀ ਚਾਹੀਦੀ ਹੈ ਕਿ ਯਹੋਵਾਹ ਉਸ ਮਾਮਲੇ ਬਾਰੇ ਕੀ ਸੋਚਦਾ ਹੈ। (ਕਹਾਉਤਾਂ 2:3-6 ਪੜ੍ਹੋ।) ਯਹੋਵਾਹ ਨੇ ਕੁਝ ਮਾਮਲਿਆਂ ਬਾਰੇ ਬਾਈਬਲ ਵਿਚ ਸਿੱਧੇ-ਸਿੱਧੇ ਹੁਕਮ ਦਿੱਤੇ ਹਨ ਕਿ ਸਾਨੂੰ ਕੀ ਕਰਨਾ ਚਾਹੀਦਾ ਹੈ ਤੇ ਕੀ ਨਹੀਂ। ਜੇ ਅਸੀਂ ਇਹ ਹੁਕਮ ਮੰਨਾਂਗੇ, ਤਾਂ ਸਾਡਾ ਹੀ ਭਲਾ ਹੋਵੇਗਾ।

ਪਰ ਜਦੋਂ ਕਿਸੇ ਮਾਮਲੇ ਬਾਰੇ ਬਾਈਬਲ ਵਿਚ ਕੋਈ ਸਿੱਧਾ ਹੁਕਮ ਨਹੀਂ ਦਿੱਤਾ ਗਿਆ ਹੁੰਦਾ, ਉਦੋਂ ਸਾਨੂੰ ਕੀ ਕਰਨਾ ਚਾਹੀਦਾ? ਉਦੋਂ ਵੀ ਯਹੋਵਾਹ ਸਾਡੀ ਮਦਦ ਕਰੇਗਾ ਅਤੇ ਸਾਨੂੰ ‘ਉਸ ਰਾਹ ਪਾਵੇਗਾ ਜਿਸ ਰਾਹ ਸਾਨੂੰ ਜਾਣਾ ਚਾਹੀਦਾ ਹੈ।’ (ਯਸਾਯਾਹ 48:17) ਕਿਵੇਂ? ਸਾਡੀ ਮਦਦ ਕਰਨ ਲਈ ਯਹੋਵਾਹ ਨੇ ਬਾਈਬਲ ਵਿਚ ਬਹੁਤ ਸਾਰੇ ਅਸੂਲ ਲਿਖਵਾਏ ਹਨ। ਇਨ੍ਹਾਂ ਅਸੂਲਾਂ ਤੋਂ ਪਤਾ ਲੱਗਦਾ ਹੈ ਕਿ ਕਿਸੇ ਮਾਮਲੇ ਬਾਰੇ ਯਹੋਵਾਹ ਕੀ ਸੋਚਦਾ ਅਤੇ ਕਿੱਦਾਂ ਮਹਿਸੂਸ ਕਰਦਾ ਹੈ। ਕਈ ਵਾਰ ਬਾਈਬਲ ਦਾ ਕੋਈ ਬਿਰਤਾਂਤ ਪੜ੍ਹ ਕੇ ਵੀ ਸਾਨੂੰ ਪਤਾ ਲੱਗਦਾ ਹੈ ਕਿ ਯਹੋਵਾਹ ਕਿੱਦਾਂ ਮਹਿਸੂਸ ਕਰਦਾ ਹੈ। ਜਦੋਂ ਅਸੀਂ ਸਮਝ ਜਾਂਦੇ ਹਾਂ ਕਿ ਯਹੋਵਾਹ ਦੀ ਕੀ ਸੋਚ ਹੈ, ਤਾਂ ਅਸੀਂ ਅਜਿਹੇ ਫ਼ੈਸਲੇ ਕਰ ਪਾਉਂਦੇ ਹਾਂ ਜਿਨ੍ਹਾਂ ਤੋਂ ਉਹ ਖ਼ੁਸ਼ ਹੁੰਦਾ ਹੈ।

2. ਕੋਈ ਵੀ ਫ਼ੈਸਲਾ ਕਰਨ ਤੋਂ ਪਹਿਲਾਂ ਸਾਨੂੰ ਕਿਹੜੀਆਂ ਗੱਲਾਂ ਧਿਆਨ ਵਿਚ ਰੱਖਣੀਆਂ ਚਾਹੀਦੀਆਂ ਹਨ?

ਬਾਈਬਲ ਦੱਸਦੀ ਹੈ: “ਹੁਸ਼ਿਆਰ ਇਨਸਾਨ ਹਰ ਕਦਮ ਸੋਚ-ਸਮਝ ਕੇ ਚੁੱਕਦਾ ਹੈ।” (ਕਹਾਉਤਾਂ 14:15) ਇਸ ਦਾ ਮਤਲਬ ਹੈ ਕਿ ਕੋਈ ਵੀ ਫ਼ੈਸਲਾ ਕਰਨ ਤੋਂ ਪਹਿਲਾਂ ਸਾਨੂੰ ਚੰਗੀ ਤਰ੍ਹਾਂ ਸੋਚਣਾ ਚਾਹੀਦਾ ਹੈ ਕਿਉਂਕਿ ਸਾਡੇ ਸਾਮ੍ਹਣੇ ਕਈ ਰਾਹ ਹੋ ਸਕਦੇ ਹਨ। ਇਸ ਲਈ ਅਸੀਂ ਖ਼ੁਦ ਨੂੰ ਪੁੱਛ ਸਕਦੇ ਹਾਂ: ‘ਬਾਈਬਲ ਦੇ ਕਿਹੜੇ ਅਸੂਲ ਮੇਰੀ ਮਦਦ ਕਰ ਸਕਦੇ ਹਨ? ਇਹ ਫ਼ੈਸਲਾ ਲੈਣ ਤੋਂ ਬਾਅਦ ਕੀ ਮੈਨੂੰ ਖ਼ੁਸ਼ੀ ਹੋਵੇਗੀ ਜਾਂ ਪਛਤਾਵਾ? ਮੇਰੇ ਫ਼ੈਸਲੇ ਦਾ ਦੂਜਿਆਂ ʼਤੇ ਕੀ ਅਸਰ ਹੋਵੇਗਾ? ਸਭ ਤੋਂ ਜ਼ਰੂਰੀ ਗੱਲ, ਕੀ ਯਹੋਵਾਹ ਮੇਰੇ ਫ਼ੈਸਲੇ ਤੋਂ ਖ਼ੁਸ਼ ਹੋਵੇਗਾ?’—ਬਿਵਸਥਾ ਸਾਰ 32:29.

ਯਹੋਵਾਹ ਪਰਮੇਸ਼ੁਰ ਨੂੰ ਇਹ ਦੱਸਣ ਦਾ ਹੱਕ ਹੈ ਕਿ ਕੀ ਚੰਗਾ ਹੈ ਅਤੇ ਕੀ ਬੁਰਾ। ਉਸ ਦੇ ਹੁਕਮਾਂ ਅਤੇ ਅਸੂਲਾਂ ਦੀ ਮਦਦ ਨਾਲ ਅਸੀਂ ਸਹੀ-ਗ਼ਲਤ ਵਿਚ ਫ਼ਰਕ ਦੇਖ ਸਕਦੇ ਹਾਂ। ਜਦੋਂ ਅਸੀਂ ਇਨ੍ਹਾਂ ਹੁਕਮਾਂ ਅਤੇ ਅਸੂਲਾਂ ਨੂੰ ਚੰਗੀ ਤਰ੍ਹਾਂ ਜਾਣਾਂਗੇ ਤੇ ਹਰ ਹਾਲ ਵਿਚ ਇਨ੍ਹਾਂ ਨੂੰ ਮੰਨਾਂਗੇ, ਤਾਂ ਅਸੀਂ ਆਪਣੀ ਜ਼ਮੀਰ ਨੂੰ ਸਹੀ ਤਰੀਕੇ ਨਾਲ ਢਾਲ ਰਹੇ ਹੋਵਾਂਗੇ। (ਰੋਮੀਆਂ 2:14, 15) ਫਿਰ ਸਾਡੀ ਜ਼ਮੀਰ ਸਹੀ ਫ਼ੈਸਲੇ ਕਰਨ ਵਿਚ ਸਾਡੀ ਮਦਦ ਕਰੇਗੀ।

ਹੋਰ ਸਿੱਖੋ

3. ਬਾਈਬਲ ਮੁਤਾਬਕ ਚੱਲੋ

ਵੀਡੀਓ: ਬਾਈਬਲ ਦੇ ਅਸੂਲਾਂ ਮੁਤਾਬਕ ਚੱਲੋ  (5:54)

• ਯਹੋਵਾਹ ਨੇ ਸਾਨੂੰ ਕਿਹੜੀ ਆਜ਼ਾਦੀ ਦਿੱਤੀ ਹੈ?

• ਉਸ ਨੇ ਸਾਨੂੰ ਇਹ ਆਜ਼ਾਦੀ ਕਿਉਂ ਦਿੱਤੀ ਹੈ?

• ਇਸ ਆਜ਼ਾਦੀ ਦਾ ਸਹੀ ਇਸਤੇਮਾਲ ਕਰਨ ਲਈ ਯਹੋਵਾਹ ਨੇ ਸਾਨੂੰ ਕੀ ਦਿੱਤਾ ਹੈ?

ਬਾਈਬਲ ਦੇ ਇਕ ਅਸੂਲ ਵੱਲ ਧਿਆਨ ਦਿਓ। ਅਫ਼ਸੀਆਂ 5:15, 16 ਪੜ੍ਹੋ। ਫਿਰ ਚਰਚਾ ਕਰੋ: ਤੁਸੀਂ ਕਿਵੇਂ ‘ਆਪਣੇ ਸਮੇਂ ਨੂੰ ਚੰਗੀ ਤਰ੍ਹਾਂ ਵਰਤ ਸਕਦੇ ਹੋ’ ਤਾਂਕਿ . . .

• ਤੁਸੀਂ ਹਰ ਰੋਜ਼ ਬਾਈਬਲ ਪੜ੍ਹ ਸਕੋ?

• ਤੁਸੀਂ ਹੋਰ ਵਧੀਆ ਪਤੀ, ਪਤਨੀ, ਮਾਪੇ, ਪੁੱਤ ਜਾਂ ਧੀ ਬਣ ਸਕੋ?

• ਤੁਸੀਂ ਸਭਾਵਾਂ ਵਿਚ ਜਾ ਸਕੋ?

4. ਸਹੀ ਫ਼ੈਸਲੇ ਕਰਨ ਲਈ ਆਪਣੀ ਜ਼ਮੀਰ ਨੂੰ ਢਾਲੋ

ਵੀਡੀਓ: “ਆਪਣੀ ਜ਼ਮੀਰ ਨੂੰ ਸਾਫ਼ ਰੱਖੋ”  (5:13)

• ਵੀਡੀਓ ਵਿਚ ਭੈਣ ਨੇ ਕਿਹੜੇ ਕਦਮ ਚੁੱਕੇ ਤਾਂਕਿ ਉਹ ਬਾਈਬਲ ਮੁਤਾਬਕ ਆਪਣੀ ਜ਼ਮੀਰ ਨੂੰ ਢਾਲ ਸਕੇ ਅਤੇ ਅਜਿਹਾ ਫ਼ੈਸਲਾ ਕਰ ਸਕੇ ਜਿਸ ਤੋਂ ਯਹੋਵਾਹ ਖ਼ੁਸ਼ ਹੋਵੇ?

ਸਾਨੂੰ ਦੂਜਿਆਂ ਨੂੰ ਇਹ ਕਿਉਂ ਨਹੀਂ ਕਹਿਣਾ ਚਾਹੀਦਾ ਕਿ ਉਹ ਸਾਡੇ ਲਈ ਫ਼ੈਸਲੇ ਕਰਨ? ਇਬਰਾਨੀਆਂ 5:14 ਪੜ੍ਹੋ। ਫਿਰ ਇਨ੍ਹਾਂ ਸਵਾਲਾਂ ʼਤੇ ਚਰਚਾ ਕਰੋ:

• ਦੂਜਿਆਂ ਨੂੰ ਸਾਡੇ ਲਈ ਫ਼ੈਸਲੇ ਕਰਨ ਲਈ ਕਹਿਣਾ ਸੌਖਾ ਹੁੰਦਾ ਹੈ, ਪਰ ਸਾਨੂੰ ਆਪ ਕਿਹੜਾ ਫ਼ਰਕ ਦੇਖਣ ਦੇ ਕਾਬਲ ਬਣਨਾ ਚਾਹੀਦਾ ਹੈ?

• ਸਾਡੀ ਜ਼ਮੀਰ ਨੂੰ ਢਾਲਣ ਅਤੇ ਵਧੀਆ ਫ਼ੈਸਲੇ ਲੈਣ ਵਿਚ ਮਦਦ ਕਰਨ ਲਈ ਕਿਹੜੇ ਇੰਤਜ਼ਾਮ ਕੀਤੇ ਗਏ ਹਨ?

5. ਦੂਜਿਆਂ ਦੀ ਜ਼ਮੀਰ ਨੂੰ ਧਿਆਨ ਵਿਚ ਰੱਖੋ

ਇੱਕੋ ਮਾਮਲੇ ਬਾਰੇ ਹਰੇਕ ਦਾ ਫ਼ੈਸਲਾ ਵੱਖੋ-ਵੱਖਰਾ ਹੋ ਸਕਦਾ ਹੈ। ਤਾਂ ਫਿਰ ਫ਼ੈਸਲੇ ਕਰਦੇ ਵੇਲੇ ਅਸੀਂ ਦੂਜਿਆਂ ਦੀ ਜ਼ਮੀਰ ਨੂੰ ਧਿਆਨ ਵਿਚ ਕਿਵੇਂ ਰੱਖ ਸਕਦੇ ਹਾਂ? ਇਨ੍ਹਾਂ ਦੋ ਹਾਲਾਤਾਂ ਉੱਤੇ ਗੌਰ ਕਰੋ:

ਹਾਲਾਤ 1: ਇਕ ਭੈਣ ਨੂੰ ਮੇਕ-ਅੱਪ ਕਰਨਾ ਬਹੁਤ ਪਸੰਦ ਹੈ। ਪਰ ਜਦੋਂ ਉਹ ਨਵੀਂ ਮੰਡਲੀ ਵਿਚ ਜਾਂਦੀ ਹੈ, ਤਾਂ ਉਹ ਦੇਖਦੀ ਹੈ ਕਿ ਉੱਥੋਂ ਦੀਆਂ ਜ਼ਿਆਦਾਤਰ ਭੈਣਾਂ ਨੂੰ ਮੇਕ-ਅੱਪ ਕਰਨਾ ਚੰਗਾ ਨਹੀਂ ਲੱਗਦਾ।

ਰੋਮੀਆਂ 15:1 ਅਤੇ 1 ਕੁਰਿੰਥੀਆਂ 10:23, 24 ਪੜ੍ਹੋ। ਫਿਰ ਇਨ੍ਹਾਂ ਸਵਾਲਾਂ ʼਤੇ ਚਰਚਾ ਕਰੋ:

• ਇਨ੍ਹਾਂ ਆਇਤਾਂ ਮੁਤਾਬਕ ਉਹ ਭੈਣ ਸ਼ਾਇਦ ਕੀ ਕਰਨ ਦਾ ਫ਼ੈਸਲਾ ਕਰੇ? ਜੇ ਤੁਸੀਂ ਕਿਸੇ ਅਜਿਹੇ ਵਿਅਕਤੀ ਦੇ ਨਾਲ ਹੋ ਜਿਸ ਦੀ ਜ਼ਮੀਰ ਉਸ ਨੂੰ ਕੋਈ ਕੰਮ ਕਰਨ ਤੋਂ ਰੋਕਦੀ ਹੈ, ਪਰ ਤੁਹਾਡੀ ਜ਼ਮੀਰ ਨਹੀਂ ਰੋਕਦੀ, ਤਾਂ ਤੁਸੀਂ ਕੀ ਕਰੋਗੇ?

ਹਾਲਾਤ 2: ਇਕ ਭਰਾ ਜਾਣਦਾ ਹੈ ਕਿ ਹੱਦ ਵਿਚ ਰਹਿ ਕੇ ਸ਼ਰਾਬ ਪੀਣੀ ਬਾਈਬਲ ਮੁਤਾਬਕ ਗ਼ਲਤ ਨਹੀਂ ਹੈ। ਫਿਰ ਵੀ ਉਸ ਨੇ ਫ਼ੈਸਲਾ ਕੀਤਾ ਹੈ ਕਿ ਉਹ ਸ਼ਰਾਬ ਨਹੀਂ ਪੀਵੇਗਾ। ਇਕ ਦਿਨ ਉਸ ਨੂੰ ਕਿਤੇ ਖਾਣੇ ʼਤੇ ਸੱਦਿਆ ਜਾਂਦਾ ਹੈ ਅਤੇ ਉੱਥੇ ਉਹ ਮੰਡਲੀ ਦੇ ਭਰਾਵਾਂ ਨੂੰ ਸ਼ਰਾਬ ਪੀਂਦੇ ਦੇਖਦਾ ਹੈ।

ਉਪਦੇਸ਼ਕ ਦੀ ਕਿਤਾਬ 7:16 ਅਤੇ ਰੋਮੀਆਂ 14:1, 10 ਪੜ੍ਹੋ। ਫਿਰ ਇਨ੍ਹਾਂ ਸਵਾਲਾਂ ʼਤੇ ਚਰਚਾ ਕਰੋ:

• ਇਨ੍ਹਾਂ ਆਇਤਾਂ ਮੁਤਾਬਕ ਉਹ ਭਰਾ ਸ਼ਾਇਦ ਕੀ ਕਰਨ ਦਾ ਫ਼ੈਸਲਾ ਕਰੇ? ਜੇ ਤੁਸੀਂ ਕਿਸੇ ਨੂੰ ਕੋਈ ਅਜਿਹਾ ਕੰਮ ਕਰਦੇ ਦੇਖਦੇ ਹੋ ਜੋ ਤੁਹਾਡੀ ਜ਼ਮੀਰ ਨੂੰ ਸਹੀ ਨਹੀਂ ਲੱਗਦਾ, ਤਾਂ ਤੁਸੀਂ ਕੀ ਕਰੋਗੇ?

ਸਹੀ ਫ਼ੈਸਲੇ ਕਰਨ ਲਈ ਕੀ ਕਰੀਏ?

1. ਪ੍ਰਾਰਥਨਾ ਕਰੋ। ਸਹੀ ਫ਼ੈਸਲੇ ਕਰਨ ਲਈ ਯਹੋਵਾਹ ਤੋਂ ਮਦਦ ਮੰਗੋ।—ਯਾਕੂਬ 1:5.

2. ਖੋਜਬੀਨ ਕਰੋ। ਬਾਈਬਲ ਅਤੇ ਬਾਈਬਲ-ਆਧਾਰਿਤ ਪ੍ਰਕਾਸ਼ਨਾਂ ਵਿੱਚੋਂ ਅਜਿਹੇ ਅਸੂਲ ਲੱਭੋ ਜੋ ਤੁਹਾਡੇ ਹਾਲਾਤਾਂ ʼਤੇ ਲਾਗੂ ਹੁੰਦੇ ਹਨ। ਇਸ ਤੋਂ ਇਲਾਵਾ, ਤੁਸੀਂ ਤਜਰਬੇਕਾਰ ਭੈਣਾਂ-ਭਰਾਵਾਂ ਨਾਲ ਵੀ ਗੱਲ ਕਰ ਸਕਦੇ ਹੋ।

3. ਸੋਚ-ਵਿਚਾਰ ਕਰੋ। ਸੋਚੋ ਕਿ ਤੁਹਾਡੇ ਫ਼ੈਸਲੇ ਦਾ ਤੁਹਾਡੀ ਅਤੇ ਦੂਜਿਆਂ ਦੀ ਜ਼ਮੀਰ ʼਤੇ ਕੀ ਅਸਰ ਪਵੇਗਾ।

ਹੁਣ ਤਕ ਅਸੀਂ ਸਿੱਖਿਆ

ਸਹੀ ਫ਼ੈਸਲੇ ਕਰਨ ਲਈ ਇਹ ਜਾਣਨਾ ਬਹੁਤ ਜ਼ਰੂਰੀ ਹੈ ਕਿ ਯਹੋਵਾਹ ਕਿਸੇ ਮਾਮਲੇ ਬਾਰੇ ਕਿੱਦਾਂ ਮਹਿਸੂਸ ਕਰਦਾ ਹੈ। ਨਾਲੇ ਸਾਨੂੰ ਇਹ ਵੀ ਸੋਚਣਾ ਚਾਹੀਦਾ ਹੈ ਕਿ ਸਾਡੇ ਫ਼ੈਸਲੇ ਦਾ ਦੂਜਿਆਂ ʼਤੇ ਚੰਗਾ ਅਸਰ ਹੋਵੇਗਾ ਜਾਂ ਮਾੜਾ।

ਤੁਸੀਂ ਕੀ ਕਹੋਗੇ?

• ਤੁਸੀਂ ਅਜਿਹੇ ਫ਼ੈਸਲੇ ਕਿਵੇਂ ਕਰ ਸਕਦੇ ਹੋ ਜਿਨ੍ਹਾਂ ਤੋਂ ਯਹੋਵਾਹ ਖ਼ੁਸ਼ ਹੋਵੇ?

• ਤੁਸੀਂ ਆਪਣੀ ਜ਼ਮੀਰ ਨੂੰ ਸਹੀ ਫ਼ੈਸਲੇ ਕਰਨ ਲਈ ਕਿਵੇਂ ਢਾਲ ਸਕਦੇ ਹੋ?

• ਤੁਸੀਂ ਫ਼ੈਸਲੇ ਕਰਦੇ ਵੇਲੇ ਦੂਸਰਿਆਂ ਦੀ ਜ਼ਮੀਰ ਨੂੰ ਧਿਆਨ ਵਿਚ ਕਿਵੇਂ ਰੱਖ ਸਕਦੇ ਹੋ?

ਇਹ ਵੀ ਦੇਖੋ

ਤੁਸੀਂ ਅਜਿਹੇ ਫ਼ੈਸਲੇ ਕਿਵੇਂ ਕਰ ਸਕਦੇ ਹੋ ਜਿਨ੍ਹਾਂ ਕਰਕੇ ਪਰਮੇਸ਼ੁਰ ਨਾਲ ਤੁਹਾਡੀ ਦੋਸਤੀ ਗੂੜ੍ਹੀ ਹੋਵੇ?

“ਉਹ ਫ਼ੈਸਲੇ ਕਰੋ ਜਿਨ੍ਹਾਂ ਨਾਲ ਪਰਮੇਸ਼ੁਰ ਦੀ ਵਡਿਆਈ ਹੁੰਦੀ ਹੈ” (ਪਹਿਰਾਬੁਰਜ, 15 ਅਪ੍ਰੈਲ 2011)

ਆਓ ਇਸ ਗੱਲ ਨੂੰ ਹੋਰ ਚੰਗੀ ਤਰ੍ਹਾਂ ਸਮਝੀਏ ਕਿ ਯਹੋਵਾਹ ਕਿੱਦਾਂ ਸਾਨੂੰ ਸਲਾਹ ਦਿੰਦਾ ਹੈ।

ਯਹੋਵਾਹ ਆਪਣੇ ਲੋਕਾਂ ਦੀ ਅਗਵਾਈ ਕਰਦਾ ਹੈ  (9:50)

ਆਓ ਦੇਖੀਏ ਕਿ ਕਿਹੜੀਆਂ ਗੱਲਾਂ ਨੇ ਇਕ ਆਦਮੀ ਦੀ ਔਖਾ ਫ਼ੈਸਲਾ ਕਰਨ ਵਿਚ ਮਦਦ ਕੀਤੀ।

ਯਹੋਵਾਹ ਬਰਕਤਾਂ ਦੀ ਗਾਰੰਟੀ ਦਿੰਦਾ ਹੈ  (5:46)

ਜਦੋਂ ਕਿਸੇ ਮਾਮਲੇ ਬਾਰੇ ਯਹੋਵਾਹ ਸਾਨੂੰ ਸਿੱਧਾ-ਸਿੱਧਾ ਨਹੀਂ ਦੱਸਦਾ ਕਿ ਸਾਨੂੰ ਕੀ ਕਰਨਾ ਚਾਹੀਦਾ ਹੈ, ਉਦੋਂ ਵੀ ਅਸੀਂ ਉਸ ਦਾ ਦਿਲ ਕਿਵੇਂ ਖ਼ੁਸ਼ ਕਰ ਸਕਦੇ ਹਾਂ? ਆਓ ਜਾਣੀਏ।

“ਕੀ ਬਾਈਬਲ ਹਰ ਗੱਲ ਲਈ ਸਪੱਸ਼ਟ ਹੁਕਮ ਦਿੰਦੀ ਹੈ?” (ਪਹਿਰਾਬੁਰਜ, 1 ਦਸੰਬਰ 2003)