ਓਪਰੇ ਅਤੇ ਖੁਸਰੇ ਲਈ ਦਿਲਾਸਾ

 6. ਭਵਿੱਖਬਾਣੀ ਵਿਚ ਕਿਨ੍ਹਾਂ ਦੋ ਸਮੂਹਾਂ ਵੱਲ ਧਿਆਨ ਦਿੱਤਾ ਗਿਆ ਸੀ?

⁶ ਅਗਲੀਆਂ ਆਇਤਾਂ ਵਿਚ ਯਹੋਵਾਹ ਨੇ ਦੋ ਸਮੂਹਾਂ ਨਾਲ ਗੱਲ ਕੀਤੀ ਜੋ ਉਸ ਦੀ ਸੇਵਾ ਕਰਨੀ ਚਾਹੁੰਦੇ ਸਨ, ਪਰ ਜਿਨ੍ਹਾਂ ਨੂੰ ਮੂਸਾ ਦੀ ਬਿਵਸਥਾ ਦੇ ਅਧੀਨ ਯਹੂਦੀ ਕਲੀਸਿਯਾ ਵਿਚ ਆਉਣਾ ਮਨ੍ਹਾ ਸੀ। ਅਸੀਂ ਪੜ੍ਹਦੇ ਹਾਂ: “ਓਪਰਾ ਜਿਹ ਨੇ ਆਪਣੇ ਆਪ ਨੂੰ ਯਹੋਵਾਹ ਦੇ ਮਗਰ ਲਾ ਲਿਆ ਹੈ, ਏਹ ਨਾ ਆਖੇ, ਯਹੋਵਾਹ ਮੈਨੂੰ ਆਪਣੀ ਪਰਜਾ ਵਿੱਚੋਂ ਅੱਡ ਕਰ ਦੇਵੇਗਾ, ਨਾ ਖੁਸਰਾ ਏਹ ਆਖੇ, ਵੇਖੋ ਮੈਂ ਸੁੱਕਾ ਰੁੱਖ ਹਾਂ।” (ਯਸਾਯਾਹ 56:3) ਓਪਰੇ ਨੂੰ ਇਸ ਗੱਲ ਦਾ ਫ਼ਿਕਰ ਸੀ ਕਿ ਉਸ ਨੂੰ ਇਸਰਾਏਲ ਤੋਂ ਅੱਡ ਕੀਤਾ ਜਾਵੇਗਾ। ਖੁਸਰਾ ਇਸ ਬਾਰੇ ਚਿੰਤਾ ਕਰਦਾ ਸੀ ਕਿ ਉਸ ਦੇ ਨਾਂ ਨੂੰ ਕਾਇਮ ਰੱਖਣ ਲਈ ਉਸ ਦੇ ਬੱਚੇ ਨਹੀਂ ਹੋਣਗੇ। ਦੋਹਾਂ ਨੂੰ ਹੌਸਲਾ ਰੱਖਣਾ ਚਾਹੀਦਾ ਸੀ। ਇਸ ਦਾ ਕਾਰਨ ਸਮਝਣ ਤੋਂ ਪਹਿਲਾਂ ਆਓ ਆਪਾਂ ਦੇਖੀਏ ਕਿ ਬਿਵਸਥਾ ਦੇ ਅਧੀਨ ਇਹ ਦੋ ਸਮੂਹ ਇਸਰਾਏਲ ਦੀ ਕੌਮ ਨਾਲੋਂ ਕਿਵੇਂ ਵੱਖਰੇ ਸਨ।

 7. ਇਸਰਾਏਲ ਵਿਚ ਬਿਵਸਥਾ ਓਪਰਿਆਂ ਉੱਤੇ ਕਿਹੜੀਆਂ ਪਾਬੰਦੀਆਂ ਲਾਉਂਦੀ ਸੀ?

⁷ ਬੇਸੁੰਨਤੀ ਓਪਰੇ ਲੋਕ ਇਸਰਾਏਲ ਦੇ ਨਾਲ ਭਗਤੀ ਨਹੀਂ ਕਰ ਸਕਦੇ ਸਨ। ਮਿਸਾਲ ਲਈ, ਉਹ ਪਸਾਹ ਵਿੱਚੋਂ ਨਹੀਂ ਖਾ ਸਕਦੇ ਸਨ। (ਕੂਚ 12:43) ਭਾਵੇਂ ਦੇਸ਼ ਦੇ ਕਾਨੂੰਨਾਂ ਦੀ ਪਾਲਣਾ ਕਰਨ ਵਾਲੇ ਓਪਰਿਆਂ ਨੂੰ ਇਨਸਾਫ਼ ਮਿਲ ਸਕਦਾ ਸੀ ਅਤੇ ਉਨ੍ਹਾਂ ਨੂੰ ਪਰਾਹੁਣਚਾਰੀ ਦਿਖਾਈ ਜਾਂਦੀ ਸੀ, ਪਰ ਇਸਰਾਏਲ ਦੀ ਕੌਮ ਨਾਲ ਉਨ੍ਹਾਂ ਦਾ ਕੋਈ ਪੱਕਾ ਰਿਸ਼ਤਾ ਨਹੀਂ ਸੀ। ਕੁਝ ਲੋਕ ਬਿਵਸਥਾ ਦੇ ਅਨੁਸਾਰ ਪੂਰੀ ਤਰ੍ਹਾਂ ਚੱਲਣ ਦਾ ਫ਼ੈਸਲਾ ਕਰਦੇ ਸਨ, ਅਤੇ ਨਿਸ਼ਾਨੀ ਵਜੋਂ ਉਨ੍ਹਾਂ ਦੇ ਮਰਦ ਸੁੰਨਤ ਕਰਾਉਂਦੇ ਸਨ। ਇਸ ਤਰ੍ਹਾਂ ਉਹ ਨਵਧਰਮੀ ਬਣ ਜਾਂਦੇ ਸਨ ਅਤੇ ਉਨ੍ਹਾਂ ਨੂੰ ਯਹੋਵਾਹ ਦੇ ਘਰ ਦੇ ਵਿਹੜੇ ਵਿਚ ਭਗਤੀ ਕਰਨ ਦਾ ਵਿਸ਼ੇਸ਼ ਅਧਿਕਾਰ ਮਿਲਦਾ ਸੀ ਅਤੇ ਇਸਰਾਏਲ ਦੀ ਕਲੀਸਿਯਾ ਦਾ ਹਿੱਸਾ ਸਮਝਿਆ ਜਾਂਦਾ ਸੀ। (ਲੇਵੀਆਂ 17:10-14; 20:2; 24:22) ਲੇਕਿਨ ਨਵਧਰਾਮੀ ਲੋਕ ਵੀ ਇਸਰਾਏਲ ਨਾਲ ਯਹੋਵਾਹ ਦੇ ਨੇਮ ਦੇ ਪੂਰੇ ਹਿੱਸੇਦਾਰ ਨਹੀਂ ਬਣ ਸਕਦੇ ਸਨ ਅਤੇ ਉਨ੍ਹਾਂ ਨੂੰ ਵਾਅਦਾ ਕੀਤੇ ਗਏ ਦੇਸ਼ ਵਿਚ ਜ਼ਮੀਨ ਨਹੀਂ ਪ੍ਰਾਪਤ ਹੁੰਦੀ ਸੀ। ਦੂਸਰੇ ਓਪਰੇ ਭਵਨ ਵੱਲ ਪ੍ਰਾਰਥਨਾ ਕਰ ਸਕਦੇ ਸਨ ਅਤੇ ਜਾਜਕਾਈ ਰਾਹੀਂ ਬਲੀਆਂ ਚੜ੍ਹਾ ਸਕਦੇ ਸਨ ਜੇ ਇਹ ਬਲੀਆਂ ਬਿਵਸਥਾ ਦੇ ਅਨੁਸਾਰ ਸਨ। (ਲੇਵੀਆਂ 22:25; 1 ਰਾਜਿਆਂ 8:41-43) ਪਰ ਇਸਰਾਏਲੀ ਉਨ੍ਹਾਂ ਨਾਲ ਇਸ ਤੋਂ ਜ਼ਿਆਦਾ ਮੇਲ-ਜੋਲ ਨਹੀਂ ਰੱਖ ਸਕਦੇ ਸਨ।

ਖੁਸਰਿਆਂ ਨੂੰ ਸਦੀਪਕ ਨਾਮ ਦਿੱਤਾ ਗਿਆ

 8. (ੳ) ਬਿਵਸਥਾ ਵਿਚ ਖੁਸਰਿਆਂ ਬਾਰੇ ਕੀ ਵਿਚਾਰ ਸੀ? (ਅ) ਗ਼ੈਰ-ਯਹੂਦੀ ਕੌਮਾਂ ਵਿਚ ਖੁਸਰਿਆਂ ਨੂੰ ਕਿਸ ਕੰਮ ਲਈ ਵਰਤਿਆ ਜਾਂਦਾ ਸੀ, ਅਤੇ ‘ਖੁਸਰੇ’ ਸ਼ਬਦ ਦਾ ਕਦੀ-ਕਦੀ ਕੀ ਮਤਲਬ ਹੋ ਸਕਦਾ ਹੈ?

⁸ ਇਸਰਾਏਲ ਦੀ ਕੌਮ ਵਿਚ ਖੁਸਰਿਆਂ ਕੋਲ ਕੌਮ ਦੇ ਪੂਰੇ ਮੈਂਬਰ ਹੋਣ ਦਾ ਹੱਕ ਨਹੀਂ ਸੀ, ਭਾਵੇਂ ਕਿ ਉਨ੍ਹਾਂ ਦੇ ਮਾਪੇ ਯਹੂਦੀ ਸਨ।a (ਬਿਵਸਥਾ ਸਾਰ 23:1) ਬਾਈਬਲ ਦੇ ਜ਼ਮਾਨੇ ਵਿਚ ਕੁਝ ਗ਼ੈਰ-ਯਹੂਦੀ ਕੌਮਾਂ ਵਿਚ ਖੁਸਰਿਆਂ ਨੂੰ ਖ਼ਾਸ ਪਦਵੀਆਂ ਦਿੱਤੀਆਂ ਜਾਂਦੀਆਂ ਸਨ ਅਤੇ ਯੁੱਧ ਵਿਚ ਕੁਝ ਗ਼ੁਲਾਮ ਨਿਆਣਿਆਂ ਦੇ ਅੰਗ ਕੱਟੇ ਜਾਂਦੇ ਸਨ। ਖੁਸਰਿਆਂ ਨੂੰ ਸ਼ਾਹੀ ਦਰਬਾਰਾਂ ਵਿਚ ਦਰਬਾਰੀਆਂ ਵਜੋਂ ਰੱਖਿਆ ਜਾਂਦਾ ਸੀ। ਇਕ ਖੁਸਰਾ “ਤੀਵੀਆਂ ਦਾ ਰਾਖਾ,” “ਸੁਰੀਤਾਂ ਦਾ ਰਾਖਾ,” ਜਾਂ ਇਕ ਰਾਣੀ ਦਾ ਸੇਵਾਦਾਰ ਹੋ ਸਕਦਾ ਸੀ। (ਅਸਤਰ 2:3, 12-15; 4:4-6, 9) ਇਸਰਾਏਲੀ ਲੋਕ ਅਜਿਹਾ ਕੁਝ ਨਹੀਂ ਕਰਦੇ ਸਨ ਅਤੇ ਨਾ ਹੀ ਉਹ ਖੁਸਰਿਆਂ ਨੂੰ ਖ਼ਾਸ ਨੌਕਰੀਆਂ ਜਾਂ ਇਸਰਾਏਲੀ ਰਾਜਿਆਂ ਦੀ ਸੇਵਾ ਕਰਨ ਲਈ ਚੁਣਦੇ ਸਨ।

 9. ਖੁਸਰਿਆਂ ਨੂੰ ਯਹੋਵਾਹ ਨੇ ਕਿਹੜਾ ਦਿਲਾਸਾ ਦਿੱਤਾ ਸੀ?

⁹ ਇਸਰਾਏਲ ਵਿਚ ਖੁਸਰਿਆਂ ਨੂੰ ਸੱਚੇ ਪਰਮੇਸ਼ੁਰ ਦੀ ਭਗਤੀ ਪੂਰੀ ਤਰ੍ਹਾਂ ਕਰਨ ਤੋਂ ਰੋਕਿਆ ਜਾਂਦਾ ਸੀ। ਇਸ ਦੇ ਨਾਲ-ਨਾਲ ਉਨ੍ਹਾਂ ਦਾ ਇਸ ਗੱਲ ਤੋਂ ਵੀ ਵੱਡਾ ਅਪਮਾਨ ਹੁੰਦਾ ਸੀ ਕਿ ਉਹ ਆਪਣੇ ਪਰਿਵਾਰ ਦਾ ਨਾਂ ਕਾਇਮ ਰੱਖਣ ਲਈ ਬੱਚੇ ਨਹੀਂ ਪੈਦਾ ਕਰ ਸਕਦੇ ਸਨ। ਤਾਂ ਫਿਰ ਉਨ੍ਹਾਂ ਨੂੰ ਭਵਿੱਖਬਾਣੀ ਦੇ ਅਗਲੇ ਸ਼ਬਦਾਂ ਤੋਂ ਕਿੰਨਾ ਦਿਲਾਸਾ ਮਿਲਿਆ ਹੋਵੇਗਾ! ਅਸੀਂ ਪੜ੍ਹਦੇ ਹਾਂ: “ਯਹੋਵਾਹ ਤਾਂ ਇਉਂ ਆਖਦਾ ਹੈ, ਉਨ੍ਹਾਂ ਖੁਸਰਿਆਂ ਨੂੰ ਜੋ ਮੇਰੇ ਸਬਤਾਂ ਨੂੰ ਮੰਨਦੇ, ਅਤੇ ਜੋ ਕੁਝ ਮੈਨੂੰ ਭਾਉਂਦਾ ਓਹੀ ਚੁਣਦੇ, ਅਤੇ ਮੇਰੇ ਨੇਮ ਨੂੰ ਫੜੀ ਰੱਖਦੇ ਹਨ, ਮੈਂ ਉਨ੍ਹਾਂ ਨੂੰ ਆਪਣੇ ਘਰ ਵਿੱਚ ਅਤੇ ਆਪਣੀਆਂ ਕੰਧਾਂ ਦੇ ਅੰਦਰ, ਇੱਕ ਯਾਦਗਾਰ ਅਤੇ ਇੱਕ ਨਾਮ, ਪੁੱਤ੍ਰਾਂ ਧੀਆਂ ਨਾਲੋਂ ਚੰਗਾ ਦਿਆਂਗਾ। ਮੈਂ ਓਹਨਾਂ ਨੂੰ ਇੱਕ ਸਦੀਪਕ ਨਾਮ ਦਿਆਂਗਾ, ਜੋ ਮਿਟਾਇਆ ਨਾ ਜਾਵੇਗਾ।”​—ਯਸਾਯਾਹ 56:4, 5.