Say Baleg a Balangkantis So Niparungtal

SAY peles a sistema na mundon walad silong na panangontrol nen Satanas so walaan na taloran manunan elemento a sikara so pakukurangen na “dios na sayan mundo.” Saraya so pulitikal a pananguley, baleg a panangontrol na negosyo tan impluensya, tan relihyon. Diad inlabas na saray milenyo na awaran, sarayan taloran sengegan so pirmin kaantabay na kada pananguley a sistema. Dinan ed sarayan mabibiskeg a puersa so insimbolo na “ina na saray balangkantis”?​—2 Corinto 4:3, 4, The Jerusalem Bible; Apocalipsis 12:9; 17:5.

Unong ed pasingawey nen Juan a nasisingbat dia, saray manuley, “saray arari ed dalin,” so mabulbulos ya akiakdol ed sikato ed pilalawanan. (Apocalipsis 18:3) (Say maawaran ya ebidensya na saya so nipresenta ed ontumbok iran pahina.) Sirin, say Babilonia a Baleg so agnayarin mangisimbolo ed mapulitikan manuley ed sistema na mundo.

Anto so nipaakar ed baleg a negosyo ya onggagalaw dia ed kurakurang na too natan? Peteg a sakey a mabiskeg ya impluensya ed dakerakel a nasyones tan, diad epekto, mandeside no siopa so mayaman tan no siopa so pobre. Kasin saya so Babilonia a Baleg? Sakey ya anghel so angiter na makanan pakabidbiran ed si Juan a mangebat ed sayan tepet. Inyabawag to so makapakebbiew a nagawa​—inkagba na Babilonia! Abalang toray kliente to tan saray kainarowan to, a biglan sikato so aromog dan makapasanok. Siopa ni, nilikud ed saray “arari ed dalin,” so kaiba na saray maparanay ya ondadalaw ed sikato? Imbaga na anghel: “Lapud alak na sanok na pilalawanan to et amin na saray nasyones so naplag, tan saray arari ed dalin so akilawanan ed sikato, tan saray managbiahen lumalako na dalin so nagmaliw a mayaman nisesengeg ed pakayari na makapabaing a likeliket to.” On, saray lumalako ed mundo so agunggunaan diad impisusyo ed sikato tan pinabaleg da so “makapabaing a likeliket to.” Sirin, sikato so agnayarin mangisimbolo ed baleg a negosyo diad sankamundoan a kalaknab.​—Apocalipsis 18:3.

Sirin, diad kurang na eliminasyon, say mapulitikan pananguley tan panangontrol na baleg a negosyo tan impluensya so nipaliis la. Anto so atilak ed sikatayo? Sikato so sektor na pakayari a mipetekan met ed kadudusa, “lapud diad espiritistikon agagamil mo et amin na saray nasyones so apalikdo.” Aminsan a mabiskeg balet natan et onkakapuy ya elementon angimpluensyan tuloy ed panagnonot tan kiwas na saray nasyones nanlapulad saray agew na kadaanan a Babilonia. Sikato so sakey a walaan na “sakey a panarian ed saray arari na dalin”​—salanti, palson relihyon!​—Apocalipsis 17:18; 18:23.

On, nayarin ompatnag a makapakigtot ed arum iran masimoon a relihyoson totoo, say Babilonia a Baleg, ina na saray balangkantis, so sakey a simbolo na sankamundoan ya imperyo na palson relihyon nen Satanas. Sikato so sakey a simbolo na saray relihyon na mundo ya akikumpromiso ed saray pananguley ya elemento na pulitika tan pinansyal ed interon awaran.

Babilonia a Manangisugsug na Gulo

Mitukoyan ed mapropetikon pasingawey, say Babilonia a Baleg so baleg a balangkantis ya angitonton ed saray nasyones, totoo, tan saray tribu diad saray maralan bakal, krusadas, tan saray benditas, ya amendisyon ed sikara ed saray inkantasyon, masanton danum, pikakasi, tan mapetang iran patriotikon paliwawa.a​—Apocalipsis 18:24.

Say klero to, nagkalautla ed saray chaplain to, so mabulbulos a kagawaan na saray manuley diad impanunson ed karaklan a totoo diad panagpateyan na duaran guerra mundial tan arum iran manunan gutgutan. Say Katoliko so amatey ed Katoliko, tan say Protestante so amatey na Protestante, diad inkapirdi na 50 ya anggad 60 milyon a bilay ed duaran guerra mundial a bakal lambengat.

Diad sayan aliwawaan a koma-20 siglo, sayan tawir na relihyon so nantultuloy a mamupusnak na gulaan tan patey​—aliwa lambengat ed loob na Kakristianoan ed saray panaarap na Katoliko a sumpad Protestante noagta ontan met ed aliwan-Kristianon mundo ed Islam a sumpad Judaismo, Hinduismo a sumpad Islam, Budhaismo a sumpad Hinduismo, Sikhismo a sumpad Hinduismo, tan arum nira.

Nagkalalo ni, say relihyon so naynay a nanlabay a mangisekar na impluensya ed “saray arari na dalin,” a ginetma ton desidien so destino ra tan saray kasandi ra. Antikey a salaysayen tayo so pigaran ehemplo.

[Paimano ed Leksab]

[Litrato ed pahina 4]

Dinan ed saraya​—pulitika, baleg a negosyo, odino relihyon​—so irepresenta na “Babilonia a Baleg”?