Salmo

145 O mi Dios, mi Rei, lo mi duna bo gloria.

Lo mi alabá bo nòmber pa tur eternidat.

 2 Henter dia lo mi alabá bo.

Lo mi alabá bo nòmber pa tur eternidat.

 3 Yehova ta grandi i meresé tur alabansa.

Niun hende no por komprondé kon grandi e ta.

 4 Un generashon tras di otro lo alabá bo pa bo obranan.

Nan lo konta tokante e kosnan poderoso ku bo a hasi.

 5 Nan lo papia tokante bo poder ekstraordinario,*

i ami lo meditá riba bo obranan maravioso.

 6 Nan lo papia tokante bo echonan* impreshonante,

i ami lo laga hende sa kon grandi bo ta.

 7 Nan lo papia ku smak ora nan kòrda riba bo gran bondat,

i nan lo kanta di alegria pa motibu di bo hustisia.

 8 Yehova ta miserikòrdioso i yen di kompashon;*

e tin pasenshi,* i e ta yen di amor leal.

 9 Yehova ta bon pa tur ser bibu,

i su miserikòrdia ta bisto den tur loke e ta hasi.

10 O Yehova, tur bo obranan lo duna bo gloria,

i tur bo sirbidónan leal lo alabá bo.

11 Bo sirbidónan leal lo anunsiá kon glorioso bo reinado ta,

i nan lo papia tokante bo poder.

ל [lámed]

12 Nan lo konta hende tokante e kosnan poderoso ku bo a hasi

i kon maravioso bo reinado ta.

13 Bo reinado ta dura pa semper,

i lo bo sigui goberná durante tur generashon.

14 Yehova ta sostené tur hende ku ta serka di kai,

i e ta yuda tur hende ku ta kargá ku problema.

15 Yen di speransa, tur hende ta warda riba bo;

bo ta duna nan nan kuminda na e debido tempu.

16 Bo ta habri bo man

i satisfasé deseo di tur ser bibu.

17 Yehova semper ta hasi loke ta hustu,

i tur loke e hasi ta demostrá ku e ta fiel.

18 Yehova ta serka di tur hende ku ta hasi orashon na dje,

sí, serka di tur hende ku ta hasi orashon na dje ku sinseridat.*

19 E ta satisfasé deseo di hende ku tin rèspèt profundo p’e.*

E ta tende nan gritu pa yudansa, i e ta salba nan.

20 Yehova ta protehá tur hende ku ta stim’é,

pero lo e kaba ku tur hende malbado.

21 Lo mi* alabá Yehova.

Laga tur ser bibu* alabá su nòmber santu pa tur eternidat.