Segundo Krónikanan

17 Yehósafat a bira rei na lugá di su tata, Asa. Yehósafat a hasi su mes mas i mas poderoso na Israel. 2 El a pone trupa di sòldá den tur e statnan fortifiká di Huda. El a lanta pòst militar na Huda i den e statnan den teritorio di Efraím ku su tata, Asa, a konkistá. 3 Yehova tabata ku Yehósafat pasobra Yehósafat a sigui ehèmpel* di su antepasado David i e no a sirbi e diosnan Baal. 4 El a buska guia di* e Dios di su tata, i el a kumpli ku* e mandamentunan di Dios. Yehósafat no a hasi loke e reinan di Israel tabata hasi. 5 Yehova a establesé e reino di Yehósafat firmemente.* I henter Huda tabata duna Yehósafat regalo. El a bira masha riku, i e tabata un hòmber masha respetá. 6 Ku kurashi, el a kumpli ku e mandamentunan* di Yehova. El a eliminá e lugánan sagrado* i e palunan sagrado* ku tabatin na Huda.

7 Den e di tres aña di su gobernashon, Yehósafat a manda yama algun di su alto funshonarionan, esta, Bèn-Hail, Abdías, Zakarías, Netanel i Mikaías, i el a duna nan òrdu pa bai instruí e hendenan den e statnan na Huda. 8 Semaías, Netanías, Zebadías, Ásaèl, Semiramòt, Yehónatan, Adonías, Tobías i Tòb-Adonías, kendenan tabata levita, a kompañá nan. Elisama i Yehóram, kendenan tabata saserdote, tambe a bai ku nan. 9 Nan tabatin e bukinan* di Lei di Yehova huntu ku nan pa instruí e pueblo di Huda. I nan a pasa den tur e statnan na Huda, i nan a instruí e hendenan.

10 Tur e reinonan den bisindario di Huda tabatin miedu di Yehova; nan no a bin bringa kontra Yehósafat. 11 E filisteonan tabata duna Yehósafat regalo i plaka komo belasting. E arabirnan tabata trese, for di nan tou di bestia, 7.700 chubatu di karné i 7.700 chubatu di kabritu p’e.

12 Yehósafat tabata bira mas i mas poderoso. Na Huda, el a konstruí vários fòrti i tambe vários stat pa usa komo depósito. 13 El a kuminsá vários proyekto grandi na e statnan di Huda. Anto e tabatin hopi sòldá, guerero balente, stashoná na Herúsalèm. 14 E hòmbernan akí tabata agrupá segun nan famia.* Awor ta sigui un lista di e komandantenan di e trupanan di sòldá, segun nan kas paterno: Di Huda, tabatin Adna, komandante di 1.000, huntu ku 300.000 guerero balente. 15 Bou di mando di Adna, tabata sigui Yehohanan, kende tambe tabata komandante di 1.000. Yehohanan tabata kompañá pa 280.000 sòldá. 16 Tabatin tambe Amasías, yu hòmber di Zikri, ku 200.000 guerero balente. Amasías, kende a ofresé su mes komo boluntario pa traha pa Yehova, tambe tabata komandante di 1.000, bou di mando di Adna. 17 Di e tribu di Bènyamin, tabatin Elyada, un guerero balente, ku 200.000 sòldá, armá ku bog i eskudo. 18 Bou di mando di Elyada, tabatin Yehózabat, ku 180.000 sòldá, kla pa bataya. 19 Tur e hòmbernan ei tabata den servisio di e rei. Fuera di e trupanan akí, tabatin tambe e hòmbernan ku Rei a stashoná den e statnan fortifiká den henter Huda.