Rut
3 Un dia, Rut su suegra Noemí a bis’é: “Mi yu, mi mester buska un hogar* pa bo pa bai bo bon. 2 Bóaz ta nos famia. E ta esun ku a laga bo traha huntu ku e mucha muhénan ku ta kosechá p’e. Awe nochi, e ta bai traha* na e plenchi di bati kosecha. 3 Pues, dal un baño, hunta bo kurpa ku poko zeta perfumá, bisti bo mihó paña* i bai na e plenchi di bati kosecha. No lag’é sa ku bo t’ei sino te despues ku e kaba di kome i bebe. 4 Ora e bai drumi, wak unda e ta kai drumi. Bai serka dje, i kita e paña di tapa for di su pia i kai drumi einan. E mes lo bisa bo kiko bo tin ku hasi.”
5 Rut a kontest’é: “Tur loke bo bisa mi, lo mi hasi.” 6 Pues, el a bai na e plenchi di bati kosecha i a hasi tur loke su suegra a mand’é hasi. 7 Mientrastantu, Bóaz a kome i bebe, i su kurason tabata kontentu. Kaba, el a kai drumi banda di e monton di puspas. Despues, Rut a bai serka dje ketu ketu, kita e paña di tapa for di su pia i kai drumi einan. 8 Meianochi, Bóaz a kuminsá tembla. El a lanta sinta i mira un hende muhé drumí na su pia. 9 Bóaz a puntr’é: “Ta ken bo ta?” El a kontest’é: “Ta Rut, bo sirbidó. Habri bo paña riba bo sirbidó,* pasobra bo ta un famia yegá ku por saka nos for di difikultat.”* 10 Anto Bóaz a bis’é: “Yehova bendishoná bo, mi yu. E biaha akí, bo a mustra mas amor leal ku e promé biaha, pasobra bo no a bai buska un kasá entre e hòmbernan yòn, sea riku òf pober. 11 Pues, mi yu, no tene miedu. Lo mi hasi pa bo tur loke bo a pidi mi, pasobra tur hende den stat sa ku bo ta un muhé ekselente. 12 Ta bèrdat ku mi ta un famia yegá di Elímelèk, pero tin un famia mas yegá ku mi. 13 Keda akinan awe nochi. Si mainta resultá ku e ke saka boso for di difikultat, ta bon; lag’é hasié. Pero si e no ke hasié, mi ta hura den nòmber di Yehova, e Dios bibu, ku mi mes lo saka boso for di difikultat. Keda drumi akinan te mainta.”
14 Pues, Rut a keda drumi na Bóaz su pia te mainta, i el a lanta ora ku tabata skur ainda, promé ku hende por a rekonos’é. Bóaz a bis’é: “No laga niun hende sa ku un hende muhé a bini na e plenchi di bati kosecha.” 15 Bóaz a bis’é tambe: “Trese e mantel ku bo tin bistí i habrié.” Rut a hasi esei, i Bóaz a basha seis midí* di puspas den e mantel p’e bai kuné. Despues, Bóaz a bai stat bèk.
16 Ora Rut a yega kas, su suegra a puntr’é: “Kon a bai,* mi yu?” Rut a kont’é tur loke e hòmber a hasi p’e. 17 Anto Rut a bis’é: “El a duna mi e seis midínan akí di puspas i a bisa mi: ‘No bai man bashí serka bo suegra.’” 18 Noemí a bis’é: “Mi yu, warda trankil pa wak kiko lo sosodé, pasobra e hòmber ei lo no sosegá tanten ku e no resolvé e asuntu awe.”