Lukas

3 Den e di 15 aña di e reinado di Tiberio Sésar—tempu Ponsio Pilato tabata gobernador di Hudea, Heródes* tabata gobernante di distrito di Galilea, ma su ruman Felipe tabata gobernante di distrito di e region di Iturea i di Trakonite, i Lisanias tabata gobernante di distrito di Abilene 2 den e dianan di Kaifas i di Sumo Saserdote Anas—Huan, yu di Zakarías, a haña un mensahe di Dios den desierto.

3 Di manera ku e tabata prediká den henter e área rònt di Riu Hordan i tabata bisa e hendenan ku nan tabatin ku batisá komo símbolo di arepentimentu pa haña pordon di piká, 4 manera ta pará skirbí den e buki di profeta Isaías: “Skucha! Tin un hende ta grita den desierto: ‘Prepará e kaminda di Yehova! Drecha e kaminda su dilanti. 5 Mester yena tur roi i basha tur seru i seritu abou, i e kamindanan ku tin bògt mester bira stret, i e kamindanan yen di baranka mester bira pareu, 6 i tur hende lo mira esun ku Dios lo usa pa trese salbashon.’”

7 P’esei, el a bisa e gran kantidat di hende ku tabata bini serka dje pa batisá: “Rasa di kolebra venenoso! Ta ken a bisa boso ku boso por skapa di e rabia di Dios ku ta na kaminda? 8 Mihó boso produsí fruta ku ta mustra ku boso a arepentí! No bisa den boso mes: ‘Ta Abraham ta nos tata,’ pasobra mi ta bisa boso ku Dios tin poder pa duna Abraham yu for di e piedranan akí. 9 De echo, e hacha ta poné kaba na rais di e palu. Pues, lo kap tur palu ku no ta pari bon fruta i tira nan den kandela.”

10 I e multitut a puntr’é: “Kiko nos mester hasi anto?” 11 El a kontestá: “Laga esun ku tin dos paña kompartí ku esun ku no tin nada, i laga esun ku tin algu di kome hasi meskos.” 12 Asta kobradó di belasting* a bini serka dje pa e batisá nan, i nan a bis’é: “Maestro, kiko nos mester hasi?” 13 El a bisa nan: “No eksigí mas ku e tarifa di belasting.” 14 Algun sòldá tambe a puntr’é: “Kiko nos mester hasi?” I el a bisa nan: “No ranka plaka for di ningun hende ni akusá ningun hende falsamente, ma keda satisfecho ku loke boso ta haña pa mantené boso mes.”

15 Awor, komo ku e pueblo tabata den ekspektativa di Kristu, i nan tur tabata rasoná den nan kurason tokante Huan: “Akaso e ta e Kristu?,”* 16 Huan a kontestá, bisando nan tur: “Ami di mi parti ta batisá boso ku awa, ma ta bini ún ku ta mas fuerte ku mi, i mi no ta digno di lòs e strèpnan di su sandalia. Lo e batisá boso ku spiritu santu i kandela. 17 E skòp pa separá trigu for di bagas ta den su man pa hasi su plenchi di bati trigu limpi limpi i pa rekohé e trigu den su mangasina, ma e bagas lo e kima ku kandela ku no por paga.”

18 Pues, Huan a animá nan den hopi manera mas i a sigui deklará e bon notisia na e pueblo. 19 Ma Huan a skual Heródes, e gobernante di distrito, en konekshon ku Herodías, esposa di e ruman hòmber di Heródes, i en konekshon ku tur e kosnan malu ku Heródes a hasi. 20 Anto Heródes a agregá un maldat mas na tur eseinan: El a sera Huan den prizòn, pasobra Huan a skual e.

21 Awor bon, ora ku tur hende tabata batisá, Hesus tambe a batisá. I segun ku e tabata hasi orashon, shelu a habri, 22 i spiritu santu a baha riba dje den forma di un palomba, i un stèm for di shelu a bisa: “Abo ta mi Yu stimá; bo tin mi aprobashon.”