Yòb

30 Yòb a sigui bisa:

“Hòmber mas yòn ku mi ta hari mi.

Mi tabata nenga di laga nan tatanan

yuda mi kachónan kuida mi tounan di bestia.

 3 Miseria i hamber ta laga nan keda morto kansá;

nan ta kou loke tera seku,

destruí i desolá ta produsí.

 4 Nan ta kita blachi salu for di e matanan

i kome rais marga di palu di mondi.

 5 Hende a kore ku nan for di komunidat;

hende ta grita nan manera ora ta kore ku ladron.

 6 Nan ta biba riba baranka steil,*

den buraku i den kueba.

 7 Nan ta sklama for di entre e matanan di mondi,

i nan ta krem huntu bou di e matanan di sumpiña.

 8 Nan ta yu di hende bobo; nan ta hende ku no ta sirbi pa nada;

a kore ku nan* for di nan tera.

 9 Awor, nan ta hasi bofon di mi, asta den nan kantikanan;

mi a bira kos di hasi chèrchi di dje* pa nan.

10 Nan ta odia mi, i nan ta keda leu for di mi;

nan no tin miedu di skupi den mi kara.

11 Dios a kita tur poder for di mi* i humiá mi;

p’esei, nan no tin niun tiki rèspèt mas pa mi.*

12 Nan a sera kabes, i for di man drechi, nan a bin ataká mi;

nan ta persiguí mi

i blòkia mi kaminda pa kaba ku mi.

13 Nan ta destruí e kamindanan*

i pone mi sufri mas;

anto no tin niun hende pa stòp nan.*

14 Ta komo si fuera nan ta drenta via un muraya kibrá i ataká mi;

nan ta bula drenta pa hasi mi mas daño.

15 Mi ta sinti mi masha angustiá;

hende no tin rèspèt mas pa mi;*

e speransa ku mi tabatin di haña alivio a disparsé manera nubia.

16 Mi* no tin forsa mas;*

dia pa dia, mi ta sufri mas i mas.

17 Anochi, mi wesunan ta morde sin fin;*

doló ta kaba ku mi.

18 Mi paña* ta ser trosí ku forsa enorme;*

mi paña ta choka mi, manera un krag pèrtá.

19 Dios a benta mi den lodo;

mi a para bira stòf i shinishi.

20 O Dios, mi ta sklama na bo pa yudansa, pero bo no ta kontestá mi;

mi ta aserká* bo, pero bo ta keda wak mi duru den mi kara.

21 Bo a bira kontra mi na un manera kruel;

bo ta ataká mi ku tur bo forsa.*

22 Bo ta hisa mi na laira i laga bientu bai ku mi;

tormenta ta benta mi p’aki i p’aya.*

23 Mi sa ku lo bo entregá mi den man di morto

i lag’é hiba mi na e kas kaminda tur hende bibu ta bai.

24 Niun hende no ta ataká un hòmber indefenso*

ku ta sklama pa yudansa den tempu di kalamidat.

26 Mi a spera kos bon, pero mi a haña mi ku malu;

mi a spera lus, pero mi a haña mi ku skuridat.

27 Dia aden dia afó, mi ta sufri;

mi ta intrankil i masha preokupá.

29 Mi a bira ruman di kachó di mondi*

i amigu di abestrus.

30 Mi kueru a bira pretu, i e ta kaska;

mi wesunan ta kima.*

31 Mi arpa ta toka músika di luto so,

i mi flùit ta pa kompañá hende ku ta yora.”