Huan

2 Awor bon, dos dia despues tabatin un fiesta di kasamentu na Kana di Galilea, i Hesus su mama tabata einan. 2 Hesus i su disipelnan tambe tabata invitá na e fiesta di kasamentu.

3 Ora ku biña a kaba, Hesus su mama a bis’é: “Nan no tin mas biña.” 4 Ma Hesus a kontest’é: “Kiko mi tin di haber ku bo?* Mi ora no a yega ainda.” 5 Su mama a bisa esnan ku tabata sirbi: “Kiko ku e bisa boso hasi, hasié.” 6 Awor, einan tabatin seis tinashi di piedra pa pone awa aden, manera e reglanan di purifikashon di e hudiunan a eksigí. Kada un por a karga dos òf tres midí di líkido.* 7 Hesus a bisa e sirbidónan: “Yena e tinashinan ku awa.” I nan a yena nan te na rant. 8 I el a bisa nan: “Saka un poko awor i hib’é pa e direktor di e fiesta di kasamentu.” Pues, nan a hib’é p’e. 9 Ora e direktor di e fiesta di kasamentu a purba e awa ku awor a bira biña, el a manda yama e brùidehòm. E direktor no tabata sa di unda e biña a bini, ma e sirbidónan ku a saka e awa sí tabata sa esei. 10 El a bisa e brùidehòm: “Tur hende ta sirbi e mihó biña promé, i ora e hendenan ta burachi, nan ta sirbi esun inferior. Ma abo a warda e mihó biña pa awor.” 11 Hesus a hasi esaki na Kana di Galilea: esei tabata su promé milager. Di e manera ei el a manifestá su gloria i su disipelnan a pone fe den dje.

12 Despues di esaki, Hesus i su mama, su rumannan i su disipelnan a baha bai Kapernaum, ma nan no a keda hopi dia einan.

13 Awor bon, e Pasku* di e hudiunan tabata serka, i Hesus a subi bai Herúsalèm. 14 I den tèmpel el a haña hende ku tabata bende baka, karné i palomba i tambe e kambiadónan di plaka sintá na nan lugá. 15 Di manera ku el a traha un zuip di kabuya i a kore ku e karnénan i ku e bakanan for di tèmpel, huntu ku esnan ku tabata bende nan, i el a basha e monedanan di e kambiadónan di plaka abou i bòltu nan mesanan. 16 Anto el a bisa esnan ku tabata bende palomba: “Saka e kosnan ei fo’i djaki! Stòp di hasi e kas di mi Tata un kas di negoshi!” 17 Su disipelnan a kòrda ku ta pará skirbí: “E zelo ku mi tin pa bo kas lo kima manera kandela.”

18 Anto e hudiunan a puntr’é: “Ki señal bo tin pa proba nos ku bo tin derecho di hasi e kosnan akí?” 19 Hesus a kontestá nan: “Basha e tèmpel akí abou, i den tres dia lo mi lant’é bèk.” 20 Anto e hudiunan a bis’é: “A tuma 46 aña pa traha e tèmpel akí, i abo lo lant’é den tres dia?” 21 Ma e tèmpel ku e tabata papia di dje tabata su kurpa. 22 Pero ta despues ku el a lanta for di morto su disipelnan a kòrda ku e tabatin kustumber di bisa esaki; i nan a kere e Skritura i e palabranan ku Hesus a papia.

23 Sinembargo, ora e tabata na Herúsalèm pa e Fiesta di Pasku, hopi hende a kuminsá pone fe den su nòmber, segun ku nan tabata mira e milagernan ku e tabata hasi. 24 Ma Hesus no tabatin muchu konfiansa den nan, pasobra e tabata konosé nan tur 25 i pasobra ningun hende no tabatin nodi di kont’é tokante di hende, ya ku e mes tabata sa kiko ta biba den kurason di hende.