Promé Karta pa e Korintionan
3 P’esei Rumannan, mi no por a papia ku boso manera ta papia ku hende ku ta laga spiritu santu guia nan.*+ Al kontrario, mi mester a papia ku boso manera ta papia ku hende ku ta laga pensamentu humano guia nan,* sí, manera ta papia ku mucha chikitu+ ku ta den e kaminda di Kristu. 2 E kosnan ku mi a siña boso tabata manera lechi, no manera kuminda sólido, pasobra boso no tabata sufisiente fuerte. Bon mirá, te ainda boso no ta sufisiente fuerte.+ 3 Ainda boso tin pensamentu humano.*+ E echo ku tin yalursheit i pleitu entre boso ta mustra ku boso ta komportá boso mes manera hende di e mundu akí.+ 4 Pasobra algun di boso ta bisa: “Ami ta sigui Pablo.” Anto otro hende ta bisa: “Ami ta sigui Apolo.”+ Ora boso ta hasi asina, no ta manera hende di e mundu akí boso ta komportá boso mes?
5 Anto ta ken Apolo ta? Sí, ta ken Pablo ta? Nos ta simpel sirbidó+ ku a yuda boso bira kreyente.* Nos a djis kumpli ku e obra ku Señor a duna nos pa hasi. 6 Ami a planta e simia,+ Apolo a muh’é,+ pero ta Dios ta lag’é krese. 7 Pues, ni e persona ku ta planta e simia ni e persona ku ta muh’é no ta importante, sino Dios ku ta lag’é krese.+ 8 E persona ku ta planta i e persona ku ta muha ta traha uní ku otro,* pero kada un lo risibí su rekompensa di akuerdo ku su trabou.+ 9 Nos ta kompañero di trabou di Dios. Boso ta manera un kunuku ku Dios ta kultivá, sí, manera un kas ku Dios ta trahando.+
10 Danki na e bondat inmeresí ku Dios a duna mi, mi a pone un fundeshi+ manera un hende ku ta eksperto den trahamentu di kas.* Awor, otro hende ta trahando algu riba e fundeshi ei. Laga kada hende wak bon kiko nan ta traha riba e fundeshi ei. 11 Hesukristu ta e fundeshi+ ku a ser poné. Pues, niun hende no por pone un otro fundeshi. 12 Un hende kisas ta traha algu riba e fundeshi ei usando oro, plata i piedra kostoso; un otro hende ta traha ku material di palu i diferente sorto di yerba. 13 Na final, ora e dia di prueba yega, lo bira bisto di kiko e obra di kada persona ta trahá. Riba e dia ei, kandela lo saka tur kos na kla.+ Sí, kandela lo demostrá ki sorto di obra kada persona a traha. 14 Si e obra ku un persona a traha riba e fundeshi keda para, e persona lo haña un rekompensa. 15 Si e obra di un persona kima kompletamente, e persona lo sufri pèrdida. E persona mes lo ser salbá, aunke lo ta komo si fuera el a skapa di un kandela.
16 Boso no sa ku boso ta tèmpel di Dios+ i ku spiritu santu di Dios ta biba den boso?+ 17 Si un hende destruí e tèmpel di Dios, Dios lo destruí e hende ei. E tèmpel di Dios ta santu, i boso ta e tèmpel ei.+
18 No laga niun hende gaña su mes: Ken ku ta pensa ku e ta sabí den bista di hende di e mundu* akí mester bira bobo. Esei ta e manera pa e bira realmente sabí. 19 Pasobra sabiduria di e mundu akí ta bobedat pa Dios. Manera Skritura ta bisa: “Dios ta gara hende sabí den nan mes astusia.”+ 20 I un otro kaminda Skritura ta bisa: “Yehova* sa ku loke hende sabí ta pensa no ta bal nada.”+ 21 P’esei, no laga niun persona broma tokante loke hende por hasi. Bon mirá, tur kos ta di boso: 22 Pablo, Apolo, Séfas,*+ humanidat, bida, morto, e kosnan ku ta aki awor òf e kosnan ku lo bini ta di boso; sí, tur kos ta di boso. 23 Anto boso ta di Kristu,+ i Kristu ta di Dios.