Romanonan

4 Ya ku esei ta e kaso, kiko nos lo bisa di Abraham, nos antepasado? 2 Por ehèmpel, si Abraham a ser deklará hustu komo resultado di su obranan, lo e tabatin un motibu pa broma; ma no serka Dios. 3 Pasobra kiko e skritura ta bisa? “Abraham a pone fe den Yehova, i pa e motibu ei Dios a konsider’é un hòmber hustu.” 4 Awor bon, e salario di e hende ku ta traha no ta ser konsiderá komo un bondat inmeresí, sino komo algu ku e tin derecho riba dje.* 5 Di otro banda, e hende ku no ta traha—esta, esun ku no tin obra pero ku ta pone fe den esun ku ta deklará e pekadó hustu—ta ser konsiderá un hòmber hustu pa motibu di su fe. 6 Asina David tambe ta papia di e felisidat di e hende ku Dios ta konsiderá hustu, apesar ku su obranan no ta na pleno armonia ku Lei: 7 “Felis ta esnan kende nan aktonan di maldat a ser pordoná i kende nan pikánan a ser tapá; 8 felis ta e hende kende su piká Yehova no ta keda kòrda.”

9 Akaso e felisidat akí ta bini pa hende sirkunsidá so òf pa hende ku no ta sirkunsidá tambe? Nos ta bisa: “Dios a konsiderá Abraham un hòmber hustu pa motibu di su fe.” 10 Pero ki ora Dios a konsider’é un hòmber hustu? Ora e tabata sirkunsidá òf ora e no tabata sirkunsidá? No ora e tabata sirkunsidá, ma ora e no tabata sirkunsidá. 11 I el a risibí un señal, esta, sirkunsishon, komo un seyo* di e posishon hustu ku e tabatin pa medio di su fe ora e no tabata sirkunsidá, pa asina e por a bira tata di tur hende ku Dios ta konsiderá hustu pa motibu di nan fe, aunke nan no ta sirkunsidá; 12 i pa e por a bira tata tambe di desendiente sirkunsidá, no solamente di esnan ku ta pega na sirkunsishon físiko, sino tambe di esnan ku ta kana estrechamente den e pasonan di e fe ku nos tata Abraham tabatin tempu ku e no tabata sirkunsidá.

13 Pues, no ta pa medio di lei Abraham òf su desendientenan a haña e promesa ku lo e tabata heredero di un mundu,* sino ta pa medio di e posishon hustu ku e tabatin pa motibu di su fe. 14 Pasobra si ta esnan ku ta pega na lei ta heredero, fe ta pèrdè su balor i e promesa ta keda eliminá. 15 En realidat, Lei ta someté hende na rabia di Dios, pero kaminda no tin lei, no tin kibramentu di lei tampoko.

16 Ta p’esei e promesa tabata pa medio di fe, basá riba Dios su bondat inmeresí, pa tur desendiente di Abraham por ta garantisá di esei, no solamente esnan ku ta pega na Lei, sino tambe esnan ku tin e mesun fe ku Abraham tabatin. I e ta tata di nos tur. 17 (Ta manera ta pará skirbí: “Mi a hasi bo tata di hopi nashon.”) E promesa akí a keda garantisá den bista di Dios, Esun den ken Abraham tabatin fe, i kende ta duna bida na e mortonan i ta yama e kosnan ku no ta eksistí komo si fuera nan ta eksistí. 18 Aunke a parse ku Abraham no tabatin base pa speransa, tòg el a karga speransa i tabatin fe ku lo el a bira tata di hopi nashon. El a kere den loke Dios a bis’é: “Asina bo desendientenan lo ta.” 19 I maske su fe no a bira débil, el a pensa riba su kurpa ku tabata kasi morto kaba—ya ku e tabatin mas o ménos 100 aña di edat—i tambe riba Sara su matris ku tabata morto.* 20 Pero, pa motibu di e promesa di Dios, e tabatin fe i no a duda ningun ora so, ma a bira poderoso pa medio di su fe, dunando gloria na Dios, 21 i e tabata plenamente konvensí ku loke Dios a primintí, e por a hasi tambe. 22 Pues, “pa e motibu ei Dios a konsider’é un hòmber hustu.”

23 Sinembargo, e palabranan den e Skritura ku ta bisa ku “Dios a konsider’é un hòmber hustu” no tabata p’e so, 24 sino pa nos tambe ku Dios ta konsiderá hustu, pasobra nos ta kere den esun ku a lanta Hesus, nos Señor, for di morto. 25 Hesus a keda entregá na morto pa motibu di nos faltanan i a ser lantá for di morto a fin ku Dios por deklará nos hustu.