Santiago
4 Di unda e bringamentu i pleitamentu ku tin den boso ta bini? Akaso esei no ta bini di boso deseonan karnal ku ta hiba un lucha den boso kurpa? 2 Boso ta deseá, i tòg boso no tin. Boso ta sigui odia* i kudishá otro, i tòg boso no por haña. Boso ta sigui pleita i bringa. Boso no tin, pasobra boso no ta pidi Dios. 3 Anto ora boso pidi, boso no ta haña, pasobra boso ta pidi ku mal intenshon, esta, pa por satisfasé boso deseonan karnal.
4 Hendenan infiel,* boso no sa ku amistat ku mundu ta enemistat ku Dios? P’esei, ken ku ke ta amigu di mundu ta hasi su mes enemigu di Dios. 5 Òf boso ta kere ku ta pòrnada e skritura ta bisa: “E spiritu di envidia ku tin den nos konstantemente ta anhelá diferente kos”? 6 Sinembargo, e bondat inmeresí ku Dios ta duna ta mas grandi ku e spiritu di envidia ei. P’esei e skritura ta bisa: “Dios ta oponé hende orguyoso, pero e ta duna bondat inmeresí na hende humilde.”
7 P’esei, someté boso na Dios; ma oponé Diabel, i lo e hui for di boso. 8 Hala serka Dios, i lo e hala serka boso. Limpia boso man, pekadónan, i purifiká boso kurason, boso ku ta indesiso. 9 Sea tristu, lamentá i yora. Laga boso harimentu kambia den lamentashon, i boso goso den desesperashon. 10 Someté boso humildemente na Yehova, i lo e halsa boso.
11 Stòp di papia kontra otro, rumannan. Esun ku ta papia kontra un ruman òf ta husga su ruman ta papia kontra lei i ta husga lei. Awor bon, si bo ta husga lei, bo no ta un hende ku ta kumpli ku lei, sino un hues. 12 Ta ún legisladó i hues tin, esun ku por salba i destruí. Ma abo, ken bo ta, pa bo ta husga bo próhimo?
13 Awor skucha, boso ku ta bisa: “Awe òf mañan nos lo biaha bai e stat akí i keda einan un aña, i nos lo hasi negoshi i gana plaka,” 14 miéntras ku boso no sa kon boso bida lo ta mañan. Pasobra boso ta manera neblina ku ta aparesé pa un ratu i despues ta disparsé. 15 En bes di esei, boso mester bisa: “Si Yehova ke, nos lo biba i hasi esaki òf esaya.” 16 Ma awor boso ta orguyoso di boso bromamentu arogante. Tur e bromamentu ei ta malu. 17 P’esei, si un hende sa kon pa hasi loke ta korekto i tòg no ta hasié, esei ta un piká p’e.