Levítiko

1 Yehova a yama Moises i, for di e tènt di reunion,* el a bis’é: 2 “Papia ku e israelitanan* i bisa nan: ‘Si un di boso ke trese un bestia komo ofrenda pa Yehova, e bestia mester ta sea un toro, un baka, un karné òf un kabritu.

3 Si e persona ke ofresé un toro komo ofrenda kimá, e toro mester ta yòn i salú. Di su propio boluntat, e mester tres’é dilanti di Yehova na entrada di e tènt di reunion. 4 E mester pone su man riba kabes di e bestia ku mester ofresé komo ofrenda kimá, i Dios lo aseptá e ofrenda i pordoná su pikánan.

5 Mester mata e toro yòn dilanti di Yehova. I e desendientenan* di Áròn, esta, e saserdotenan, mester ofresé e sanger na Dios* i spat e sanger riba tur e bandanan di e altar, sí, e altar ku ta keda na entrada di e tènt di reunion. 6 Mester soya* e bestia pa ofrenda kimá i kòrta e bestia na pida pida. 7 E desendientenan di Áròn, esta, e saserdotenan, mester pone karbon sendí riba e altar i pone e palunan riba e kandela. 8 Nan mester pone e pidanan di e bestia* i su kabes i sebu* riba e palunan ku ta kima riba e altar. 9 Mester laba e mondongo i e pianan* di e bestia ku awa, i e saserdote mester laga tur kos kima riba e altar i saka huma. Ta un ofrenda kimá, un ofrenda ku ta ser kimá pa Yehova, i su holó ta agradabel* p’e.

10 Si e persona ta ofresé un karné òf un kabritu komo ofrenda kimá, e bestia mester ta un bestia machu i salú. 11 Anto mester mata e bestia dilanti di Yehova na banda nort di e altar. I e desendientenan di Áròn, esta, e saserdotenan, mester spat e sanger riba tur e bandanan di e altar. 12 Mester kòrta e bestia na pida pida, i e saserdote mester pone e pidanan di e bestia, huntu ku su kabes i sebu,* riba e palunan ku ta kima riba e altar. 13 Mester laba e mondongo i e pianan di e bestia ku awa. E saserdote mester ofresé tur e kosnan ei i laga nan kima riba e altar i saka huma. Ta un ofrenda kimá, un ofrenda ku ta ser kimá pa Yehova, i su holó ta agradabel p’e.

14 Pero si e persona ke ofresé un para komo ofrenda kimá na Yehova, e mester ofresé un tòrteldùif òf un palomba yòn. 15 E saserdote mester hiba e para na e altar, kòrta su garganta* i laga e para kima riba e altar i saka huma, ma e mester laga e sanger basha* na banda di e altar bini abou. 16 E saserdote mester saka e para su bus,* ranka su plumanan i benta nan banda di e altar, parti ost, kaminda ta benta shinishi.* 17 E mester kòrta kurpa di e para habrié banda di su dos alanan, sin partié na dos. Anto e saserdote mester laga e para kima riba e altar i saka huma. Ta un ofrenda kimá, un ofrenda ku ta ser kimá pa Yehova, i su holó ta agradabel p’e.’”