Yòb
35 Eliú a sigui bisa:
2 “Bo tin sigur ku bo tin rason?
Pasobra bo ta bisa: ‘Mi ta mas hustu ku Dios.’
3 Bo ta puntra: ‘Kiko mi ta gana si mi ta hustu?*
Si mi a peka, lo mi no tabata den e mesun situashon akí?’
4 Laga mi kontestá tantu abo
komo bo amigunan ku ta akinan huntu ku bo.
5 Hisa kara wak shelu,
i opservá e nubianan ku ta hopi mas haltu ku bo.
6 Si bo ta hasi piká, bo ta perhudiká Dios?
Si bo ta kometé piká tras di piká, ki daño bo ta hasi Dios?
7 Si bo ta hustu, ta Dios bo ta benefisiá?
Kiko e ta risibí for di bo?
8 Si bo ta hasi maldat, ta hende meskos ku bo bo ta hasi daño.
Si bo ta hasi loke ta hustu, ta hende bo ta benefisiá.
9 Ta hende ta sklama ora nan ta ser oprimí.
Ta hende ta sklama pa haña alivio for di man di hende poderoso ku ta dominá nan.
10 Tòg, niun hende no ta bisa: ‘Laga nos buska nos Gran Dios ku a krea nos.
Laga nos buska e Persona ku ta duna nos motibu pa kanta kantika di alabansa anochi.’
11 Dios ta instruí nos pa nos por ta mas sabí ku e bestianan di tera
i mas sabí ku e paranan di shelu.
12 Hende ta grita pidi ousilio, pero Dios no ta respondé,
pasobra nan ta orguyoso i malbado.
13 No tin duda: Dios no ta skucha sklamashon bashí;*
Dios Todopoderoso no ta skucha sklamashon asina.
14 Bo ta kere ku lo e skucha bo si bo ta keha ku bo no ta mira kon e ta yuda bo?
Bo kaso ta su dilanti, pues bo tin ku warda riba dje.
15 Dios no a rabia ku bo i eksigí bo kuenta i rason;
e no a hasi kaso di bo palabranan sin sentido.
16 Ta pòrnada Yòb tabata papia;
e tabata papia sin konosementu.”