Salmo
Na e direktor musikal. Un salmo di David.
3 Loke shelu ta papia no ta un idioma, ni e no ta saka palabra;
hende no ta tende su stèm.
4 Tòg shelu su testimonio* a yega tur kaminda riba tera,
i su mensahe a yega te na e partinan di mas leu di tera habitá.
Den shelu, Dios a harma un tènt pa solo.
5 Anto solo ta sali briante meskos ku un brùidehòm ku ta sali for di su kamber,
i solo ta kontentu meskos ku un hòmber fuerte ta kontentu pa kore un kareda.
6 E ta sali for di un punta di shelu,
i e ta dal un buèlta i bai te na e otro punta.
Nada no ta skapa su kalor.
7 E leinan di Yehova ta perfekto; nan ta duna hende forsa atrobe.*
E spièrtamentunan* di Yehova ta konfiabel; nan ta hasi hende sin eksperensia sabí.
8 E òrdunan di Yehova ta hustu; nan ta hasi hende su kurason kontentu.
E mandamentunan di Yehova ta puru; nan ta habri hende su wowo.
9 Rèspèt profundo* pa Yehova ta algu puru; e ta dura pa semper.
E desishonnan* di Yehova ta konfiabel; nan ta hustu den tur sentido.
10 Nan ta mas deseabel ku oro,
sí, mas deseabel ku un kantidat grandi di oro puru.*
Nan ta mas dushi ku stropi di abeha, sí, mas dushi ku e stropi di abeha di mas puru.
11 Mi Dios, bo leinan ta spièrta bo sirbidó p’e no bai den mal kaminda.
Hende ku obedesé nan ta haña gran rekompensa.
12 Ken ta konsiente di su mes fayonan?
Pordoná mi mi pikánan ku mi no ta konsiente di dje.
13 Protehá mi di arogansia.
No lag’é dominá mi.