Deuteronomio

34 Anto for di e sabananan di Móab, Moises a subi seru Nebo, tòp di Pisga, ku ta keda enfrente di Yériko. I Yehova a mustr’é henter e pais, esta, for di Gálad te Dan; 2 henter teritorio di Nèftali, di Efraím i di Mánases; henter teritorio di Huda te na e laman ku ta keda na wèst;* 3 i Néguèv i Distrito Yordan,* inkluyendo vaye di Yériko, e stat di palu di dadel, te na Zoar.

4 Anto Yehova a bisa Moises: “Esaki ta e pais ku mi a hura Ábraham, Ísak i Yákòb ku lo mi duna nan. Mi a bisa nan: ‘Mi ta bai duna bo desendientenan* e pais akí.’ Mi a laga bo mir’é ku bo propio wowo, pero lo bo no krusa e riu bai einan.”

5 Despues di esei, Moises, sirbidó di Yehova, a muri einan, na Móab, manera Yehova a bisa. 6 El a dera Moises den un vaye na Móab, enfrente di Bèt-Péòr. I te awe, niun hende no sa unda su graf ta. 7 Moises tabatin 120 aña ora el a muri. Su bista no a bai atras ni e no a pèrdè su vigor. 8 E pueblo di Israel a yora Moises 30 dia largu den e sabananan di Móab. Despues di esei, e dianan di luto pa Moises a kaba.

9 Hosue, yu di Nun, tabata yen di sabiduria,* pasobra Moises a pone su man riba dje i Moises a nombr’é komo su susesor. I e israelitanan a kuminsá skucha Hosue, i nan a hasi manera Yehova a bisa Moises ku nan mester a hasi. 10 Pero nunka mas a lanta un profeta na Israel manera Moises; Yehova tabatin un amistat será kuné.* 11 Moises a hasi tur e señalnan i e milagernan ku Yehova a mand’é hasi na Egipto dilanti di Fárao, dilanti di tur Fárao su sirbidónan i dilanti di tur e hendenan di Fárao su pais. 12 I dilanti di henter Israel, Moises a hasi kos grandi i impreshonante.*