1 Tesalonisensenan

3 Pues, ora nos no por a wanta esei mas, nos a pensa ku ta mihó nos keda Aténas nos so; 2 i nos a manda Timoteo, nos ruman i Dios su sirbidó* den proklamashon di e bon notisia tokante Kristu, pa fortalesé* i konsolá boso en konekshon ku boso fe, 3 pa e tribulashonnan akí no mester sagudí ningun di boso. Pues, boso mes sa ku nos no por evitá di pasa den e kosnan akí. 4 Pasobra asta tempu nos tabata serka boso, nos tabata bisa boso di antemano ku nos lo pasa den tribulashon, i manera boso sa, esei ta loke a sosodé tambe. 5 Ta p’esei mes, ora ku mi no por a wanta mas, mi a manda Timoteo pa mi haña sa di boso fieldat, pasobra podisé e Tentadó di un manera òf otro a hinka boso den tentashon, i nos trabou duru kisas a resultá enbano.

6 Pero Timoteo a kaba di yega for di einan i a duna nos e bon notisia di boso fieldat i amor; i el a bisa nos ku boso semper tin grato rekuerdo di nos i ku boso ta anhelá pa mira nos meskos ku nos tambe ta anhelá pa mira boso. 7 Ta p’esei rumannan, den tur nos angustia* i tribulashon, nos a haña konsuelo pa motibu di boso i pa motibu di e fieldat ku boso ta demostrá. 8 Komo ku boso ta para firme den union ku Señor, nos a bolbe haña bida. 9 Pues, kon nos lo por gradisí Dios pa boso i pa tur e goso ku nos ta sinti dilanti dje pa motibu di boso? 10 Ademas, di dia i anochi nos ta hasi súplikanan masha ferviente pa mira boso kara i pa agregá loke ta falta pa asina boso por tin un fe firme.

11 Awor bon, ku nos Dios i Tata i nos Señor Hesus habri kaminda pa nos por bini serka boso. 12 Ademas, mi ta spera ku Señor ta laga boso krese, sí, abundá den amor pa otro i pa tur hende, meskos ku nos tambe ta abundá den amor pa boso; 13 pa asina e por hasi boso kurason firme, intachabel i santu dilanti di nos Dios i Tata durante e presensia di nos Señor Hesus huntu ku tur su santunan.