Capítulo 119

Hibá cerca Anás, anto cerca Caifás

NAN a hiba Jesús, mará manera un gewoon criminal, cerca Anás, e poderoso ex-sumosacerdote. Anás tabata sumosacerdote ora Jesús como un mucha homber di 12 aña a sorprendé maestro rabínico den e tempel. Varios yiu di Anás a sirbi despues como sumosacerdote, i ne tempo ei su nuero Caifás a ocupa e puesto.

Probablemente nan a hiba Jesús promé ne cas di Anás pa motibo dje prominencia dje sacerdote principal pa mashá tempo den asunto religioso hudío. E bishita ei pa mira Anás a permiti tempo pa sumosacerdote Caifás reuni e Sanedrín, e corte halto hudío di 71 miembro, i també pa reuni testigo falso.

Awor Anás, e sacerdote principal, a haci Jesús pregunta tocante su disípelnan i tocante su siñanza. Pero, Jesús a contesta: “Mi a papia cu mundo públicamente. Mi semper a siña den sinagoga i den e tempel, unda tur hudío ta reuni; i mi no a papia nada na secreto. Pakico bo ta hacími pregunta? Puntra esnan cu a tende loke mi a papia cu nan. Mira! eseinan sa loke mi a papia.”

Cu esei, un oficial cu a para cerca Jesús a dalé un boftá na cara, i a puntra: “Esei ta e manera pa contesta e sacerdote principal?”

Jesús a contesta: “Si mi a papia malu, duna testimonio dje malu; pero si tabata bon, pakico bo ta dalmi?” Despues di tal intercambio, Anás a manda Jesús mará cerca Caifás.

Ya caba tur sacerdote principal i anciano i scriba, sí, henter e Sanedrín, a cuminza reuni. Ta parce cu nan lugar di reuni tabata den e cas di Caifás. Tabata claramente contrario cu ley hudío pa haci tal huzgamento riba anochi dje pascu hudío. Pero esei no a stroba lider religioso di cumpli cu nan mal propósito.

Hopi siman promé, ora Jesús a resusita Lázaro, e Sanedrín a determina caba entre nan mes di cu Jesús mester muri. I solamente dos dia anterior, riba diarazón, autoridad religioso a tuma conseho hunto pa coge Jesús via conspiracion mañoso i maté. Imaginábo, nan realmente a condené promé cu nan a huzgué!

Awor nan a haci esfuerzo pa haya testigonan pa duna testimonio falso di manera cu nan por lanta un caso contra Jesús. Pero, nan no por haya testigo cu a duna testimonio armonioso. Despues, dos a presenta cu e pretension: “Nos a tendé bisa, ‘Lo mi kibra e tempel cu man a traha i den tres dia lo mi lanta un otro cu man no a traha.’”

Caifás a puntra: “Bo no ta contesta nada? Kico ta e testimonio ei cu nan ta duna contra bo?” Pero Jesús a warda silencio. Asta den hacimento di acusacion falso, pe humiliacion dje Sanedrín, e testigonan no por a duna testimonio armonioso. Pues, e sumosacerdote a purba un otro táctico.

Caifás tabata sa ki lihé hudío a reacciona ora hende a bisa cu nan tabata e Yiu di Dios mes. Na dos ocasion caba, nan tabata lihé pa yama Jesús blasfemador cu a merece morto, uno tabata ora nan a haci equibocacion di imaginánan cu Jesús a bisa cu e tabata igual cu Dios. Awor, usando maña, Caifás a exigi: “Pe Dios bibo mi ta ponébo bao di huramento di bísanos si bo ta Cristo e Yiu di Dios!”

Apesar di loke hudío a kere, Jesús realmente tabata e Yiu di Dios. I kedando ketu por a dúnanan di comprende cu el a nenga di ser Cristo. Pues, cu curashi, Jesús a contesta: “Mi tá; i boso lo mira e Yiu di hende sintá na man drechi di poder i biniendo cu nubia di cielo.”

Anto, Caifás, cu un demonstracion dramático, a sker su paña i a sclama: “El a blasfemá! Ki necesidad mas nos tin di testigo? Mira! awor boso a tende e blasfemia. Kico boso ta opina?”

E Sanedrín a contesta: “E ta merece morto.” Anto nan a cuminza tené di mofa, i nan a bisa hopi cos den blasfemia contra dje. Nan a bofta su cara i a scupié. Otronan a tapa tur su cara i a dalé cu nan moquete i a bisé cu sarcasmo: “Profetiza contra nos, Cristo. Ken a dalbo?” Tal conducta ilegal i abusivo a sosode durante e huzgamento djanochi. Mateo 26:57-68; 26:3, 4; Marco 14:53-65; Lucas 22:54, 63-65; Juan 18:13-24; 11:45-53; 10:31-39; 5:16-18.

▪ Unda nan a hiba Jesús promé, i kico a pasé ei?

▪ Unda nan a hiba Jesús despues, i pa cua propósito?

▪ Con Caifás por a haci e Sanedrín declara cu Jesús a merece morto?

▪ Cua conducta abusivo i ilegal a sosode durante e huzgamento?