Unda Bo Por Haña Konsuelo

BO SA sinti bo tristu, òf, bo sa sinti bo so?— Bo sa puntra bo mes si tin hende ku ta stima bo?— Tin mucha sa sinti asina. Pero Dios ta primintí nos: “Ami sí lo no lubidá bo.” (Isaias 49:15) Bo no ta haña e kos ei hopi bunita pa pensa ariba?— Sí, Yehova Dios ta stima nos masha hopi mes!

Un di e hendenan ku a skirbi Beibel a bisa: ‘Maske mi tata i mi mama bandoná mi, Señor lo tuma mi.’ (Salmo 27:10) Ta un gran konsuelo pa sa e kos ei, no?— Sí, Yehova ta bisa nos: “No tene miedu, pasobra mi ta ku bo; . . . sí, lo mi sostené bo.”—Isaias 41:10.

Pero tin bes ku Yehova no ta stroba Satanas di trese problema pa nos. Yehova ta asta laga Satanas pone Su sirbidónan pasa den prueba. Un biaha, Diabel a pone Hesus sufri asina tantu ku Hesus a sklama na Yehova: “Mi Dios, mi Dios, pakiko bo a bandoná mi?” (Mateo 27:46) Pero maske Hesus tabata sufri, e tabata sa sí ku Yehova ta stim’é. (Juan 10:17) Pero Hesus tabata sa tambe ku Dios ta laga Satanas pone Su sirbidónan pasa den prueba i hasi nan sufri. Den un otro kapítulo di e buki aki nos ta bai splika dikon Dios ta laga Satanas hasi e kos ei.

Ora nos ta chikitu ainda, tin bes ta difísil pa nos keda sin sinti miedu. Por ehèmpel, bo a yega di pèrdè?— Anto bo a spanta?— Mayoria mucha lo spanta. Un dia e Gran Maestro a konta un kuenta tokante un chikitin ku a pèrdè. Pero den su kuenta, no ta un mucha a pèrdè. Ta un karné.

Abo ta un tiki manera un karné. Bo sa dikon? Wèl, karné no ta hopi grandi ni nan no tin hopi forsa. I nan tin mester di un hende pa sòru pa nan i protehá nan. E hende ku ta sòru pa nan yama wardadó òf kuidadó di karné.

Den su kuenta Hesus a konta di un kuidadó di karné ku tabatin shen karné. Pero un dia un di e karnénan a pèrdè. Kisas el a bai na otro banda di seru pa wak ta kiko tin. Pero sin ku e karné a ripará, el a kana bai leu for di e otronan. Bo por imaginá bo kon e karné a sinti ora el a bira wak rònt anto mira ku e ta su so?—

Kiko e kuidadó di karné a hasi ora el a haña sa ku falta un karné? Bo ta kere ku el a bisa ku ta e karné mes su falta, anto ku e no ta bai wòri su kabes ku e kos ei? Òf el a bai laga e 99 karnénan na un lugá sigur, p’e bai buska esun ku a pèrdè? Bo ta kere ku ta bale la pena pa pasa asina tantu trabou djis pa un karné so?— Si ta abo tabata e karné pèrdí ei, lo bo tabata ke pa e kuidadó di karné bin buská bo?—

E kuidadó di karné tabata stima tur su karnénan masha hopi; asta esun ku a pèrdè. P’esei, el a bai busk’é. Imaginá bo kon kontentu e karné pèrdí a bira ora el a mira e kuidadó di karné ta bini! I Hesus a bisa ku e kuidadó di karné tambe a bira kontentu ora el a haña su karné. E karné ei so a hasié mas kontentu ku tur e 99 otronan ku no a pèrdè. Awor, ta ken ta manera e kuidadó di karné den e kuenta di Hesus? Ta ken ta preokupá pa nos mes tantu ku e kuidadó di karné tabata preokupá pa su bestianan?— Hesus a bisa ku ta su Tata den shelu. I su Tata ta Yehova.

Yehova Dios ta e Gran Kuidadó di su pueblo. E ta stima tur hende ku ta sirbié; mucha manera abo tambe. E no ke pa nada pasa niun di nos, ni pa nos bai pèrdí. Sí, ta dushi pa sa ku Dios ta stima nos asina tantu!—Mateo 18:12-14.

Abo ta sigur ku Yehova Dios ta eksistí?— Bo ta sinti ku e ta un persona real?— Ta bèrdat ku nos no por mira Yehova. Esei ta dor ku e ta un Spiritu. E kurpa ku e tin ta invisibel pa nos wowo. Pero e ta un persona real sí, i e por mira nos. E sa ora nos tin mester di yudansa. I nos por papia kuné den orashon meskos ku nos ta papia ku otro hende aki na tera. Ademas, Yehova ke pa nos papia kuné.

P’esei, si un dia bo ta sinti bo tristu òf bo so, kiko bo mester hasi?— Papia ku Yehova. Hala serka dje, i e lo konsolá bo i yuda bo. Kòrda ku Yehova ta stima bo, asta si bo ta sinti ku bo ta bo so. Laga nos kohe nos Beibel, anto lesa Salmo 23, kuminsando na versíkulo 1. E ta bisa: “SEÑOR ta mi wardadó, lo mi no tin falta di nada. E ta pone mi drumi den lugánan di yerba bèrdè; e ta hiba mi kantu di awanan ketu.”

Anto wak kiko e salmo ta sigui bisa na versíkulo 4: “Maske mi kana den e vaye di sombra di morto, mi no tin miedu di maldat, pasobra abo ta ku mi; bo bara i bo garoti ta konsolá mi.” Ta asina hende ta sinti si nan Dios ta Yehova. Ora nan ta den problema, nan ta haña konsuelo. Ta asina abo tambe ta sinti?—

Meskos ku un wardadó di karné ta sòru ku amor pa su bestianan, asina Yehova ta sòru bon pa su pueblo. E ta mustra nan unda nan mester bai, i nan ta kana kontentu su tras. Asta ora tin problema tur rònt di nan, nan no tin nodi sinti miedu. Un kuidadó di karné ta usa su bara i su garoti pa protehá su karnénan kontra bestia ku por hasi nan algu. Tempu David tabata un hóben, e tabata kuida karné, i Beibel ta konta kon el a yega di protehá su karnénan kontra leon i ber. (1 Samuel 17:34-36) I e pueblo di Dios sa ku Yehova ta protehá nan tambe. Nan por sinti nan trankil, pasobra Dios ta ku nan.

Yehova ta stima su karnénan hopi, i e ta sòru pa nan ku hopi kariño. Beibel ta bisa: ‘Manera un wardadó di karné e lo kuida su mes karnénan. Lo e kohe e lamchinan den su brasa.’—Isaias 40:11.

Bo no ta sinti kontentu di sa kon Yehova ta?— Bo ke ta un di su karnénan?— Karné ta skucha stèm di nan wardadó. Nan ta keda serka di dje. Abo ta tende di Yehova?— Bo ta keda serka di dje?— E ora ei, bo no tin nodi sinti miedu nunka. Yehova lo ta ku bo.