Konklushon

1, 2. Dikon ta masha importante pa nos kultivá fe awe? Splika esei ku un ilustrashon.

FE. Un palabra chikitu ku ta representá un kualidat masha bunita. Pero ora nos ta papia di fe, ta bon pa nos konekt’é mesora ku un otro palabra: “Urgente!” Pasobra si nos no tin fe, nos mester buska manera pa kultiv’é urgentemente. Anto si nos tin fe, ta urgente e ora ei pa nos proteh’é i aliment’é. Dikon?

² Suponé ku bo ta krusando un desierto masha grandi. Bo tin mester di awa urgentemente. Asina ku bo haña un poko awa, lo bo tin ku proteh’é kontra solo pa e no seka. Pero tambe lo bo tin ku haña un manera pa keda yena bo bòter di awa. Wèl, awe nos ta biba den un desierto spiritual, sí, den un mundu ku no ta interesá den adorá Yehova, i kaminda berdadero fe—meskos ku e awa—ta skars i ta seka umbes si bo no proteh’é i keda yen’é òf aliment’é. Nos tin mester di fe urgentemente, pasobra meskos ku nos no por sobrebibí sin awa, asina nos relashon ku Yehova no por sobrebibí sin fe.—Rom. 1:17.

 3. Kon Yehova ta yuda nos fortalesé nos fe, i kiko ta dos kos importante ku nos mester hasi?

³ Yehova sa ku nos tin mester di fe urgentemente, i e sa tambe kon difísil ta awe pa kultivá fe i manten’é fuerte. P’esei el a duna nos ehèmpelnan ku nos por imitá. Yehova a inspirá apòstel Pablo pa skirbi: “Imitá esnan ku pa medio di fe i pasenshi ta risibí loke Dios a primintí.” (Heb. 6:12) P’esei e organisashon di Yehova ta animá nos mashá pa hasi nos bèst pa imitá e ehèmpel di hòmber- i muhénan fiel, manera esnan ku nos a analisá den e buki akí. Pero kiko mas nos mester hasi despues di a analisá nan bida? Dos kos ta importante: (1) Sigui fortalesé nos fe i (2) tene nos speransa bon kla na mente.

 4. Kiko ta mustra ku Satanas ta un enemigu di fe, pero dikon esei no mester spanta nos?

⁴ Sigui fortalesé bo fe. E pió enemigu di fe ta Satanas, e gobernante di e mundu akí. El a kombertí mundu den un tipo di desierto kaminda ta difísil pa kultivá fe. Satanas ta hopi mas poderoso ku nos. Akaso nos mester tin miedu ku nos lo no por desaroyá nos fe i fortales’é? Klaru ku nò! Yehova, e Amigu di tur hende ku ke kultivá berdadero fe, ta sigurá nos ku si E ta na nos banda, nos por oponé Diabel i asta pon’é hui for di nos! (Sant. 4:7) Nos ta resistí Diabel ora ku tur dia nos ta saka tempu pa kultivá i fortalesé nos fe. Kon asina?

 5. Splika kon e hòmber- i muhénan fiel menshoná den Beibel a kultivá fe.

⁵ Manera nos a mira, e hòmber- i muhénan fiel menshoná den Beibel no a nase ku fe. Nan bida ta duna prueba ku fe ta un fruta di Yehova su spiritu santu. (Gal. 5:22, 23) Nan tabata hasi orashon pa pidi Yehova yuda nan, i kada biaha el a hasi nan fe mas fuerte. Laga nos imitá nan, i no lubidá nunka ku Yehova gustosamente ta duna su spiritu santu na hende ku ta pidié i ku ta aktua na armonia ku nan orashonnan. (Luk. 11:13) Kiko mas nos por hasi?

 6. Kon nos por saka e mayor benefisio for di e relatonan di Beibel?

⁶ Den e buki akí nos a trata djis un par di ehèmpel di personanan ku tabatin un fe remarkabel. Tin masha hopi mas! (Lesa Hebreonan 11:32.) For di kada un di e personahenan akí nos por siña hopi kos. Pues, ta bale la pena pa nos tuma tempu pa, huntu ku orashon, nos hasi un estudio personal profundo di nan bida. Si nos ta djis lesa e relatonan tokante e personanan di fe akí aribariba, esei lo no ta sufisiente pa fortalesé nos fe manera mester ta. Pa benefisiá plenamente di nos lesamentu, nos tin ku tuma tempu pa konsiderá e konteksto i investigá e background di e relatonan di Beibel. Si nos keda kòrda ku e hòmber- i muhénan imperfekto ei tabatin “mesun sintimentunan ku nos,” nan ehèmpel lo bira mas real pa nos. (Sant. 5:17) Nos lo por pone nos mes na nan lugá i imaginá kon nan a sinti nan ora nan a konfrontá e mesun tipo di problema- i retonan ku nos tambe ta konfrontá awe.

7-9. (a) Kon e hòmber- i muhénan di fe di tempu bíbliko lo a reakshoná si nan tabatin ku adorá Yehova na e manera ku nos ta hasié awe? (b) Dikon nos tin ku sigui fortalesé nos fe ku obra?

⁷ Un otro manera ku nos por fortalesé nos fe ta pa medio di e kosnan ku nos ta hasi, pasobra Beibel ta bisa ku “fe sin obra ta morto.” (Sant. 2:26) Djis imaginá bo kon kontentu e hòmber- i muhénan ku nos a analisá den e buki akí lo tabata si nan a haña e tarea di hasi e trabou ku Yehova ta pidi nos awe hasi.

⁸ Abraham, por ehèmpel, a usa altarnan simpel di piedra den desierto pa adorá Yehova. Kon bo ta kere Abraham lo a reakshoná si Yehova a bis’é ku e por a rindi adorashon na dje huntu ku gruponan organisá di sirbidó di Yehova? Kiko si e por a reuní huntu ku e rumannan ei den Salònnan di Reino agradabel i na kongresonan grandi, kaminda e promesanan ku el a mira “djaleu” ta ser analisá i spliká ku luho di detaye? (Lesa Hebreonan 11:13.) Anto Elías mester a ehekutá e profetanan malbado di Baal, miéntras ku e tabata purba di sirbi Yehova bou di mando di un rei malbado i apóstata. Kon bo ta kere Elías lo a reakshoná si Yehova a bis’é ku su tarea tabata pa hasi bishitanan amikal serka e hendenan pa duna nan un mensahe di konsuelo i speransa? Muy probablemente e hòmber- i muhénan di fe menshoná den Beibel lo no a duda niun ora so pa aseptá e oportunidat pa adorá Yehova manera nos ta hasié awe.

⁹ Pues, laga nos sigui fortalesé nos fe pa medio di obra. Di e manera ei nos realmente ta imitá e ehèmpel di e hòmber- i muhénan di fe ku nos ta lesa di dje den Dios su Palabra inspirá. Manera e Introdukshon a trese dilanti, mas i mas nos lo kuminsá mira nan komo amigu. I den futuro serkano nos lo biba huntu ku nan, i nan lo ta nos amigunan di bèrdat.

10. Kiko nos lo ta kontentu di por hasi den Paradeis?

¹⁰ Tene bo speransa bon kla na mente. Hòmber- i muhénan fiel semper a haña fortalesa den e speransa ku Dios a duna nan. Abo tambe ta haña fortalesa for di esei? Por ehèmpel, pensa un ratu riba ki dushi lo ta di por topa sirbidónan fiel di Dios ora nan lanta den e ‘resurekshon di hende hustu.’ (Lesa Echonan 24:15.) Bo a pensa kaba riba algun pregunta ku lo bo ke hasi nan?

11, 12. Den e mundu nobo, kiko lo bo ke puntra (a) Abel? (b) Noe? (c) Abraham? (d) Rut? (e) Abigail? (f) Èster?

¹¹ Por ehèmpel, lo bo ta ansioso pa puntra Abel kon su mayornan tabata? Òf lo bo ke puntr’é: “Bo a yega di papia ku e kerubinnan ku tabata vigilá e entrada di Edén? Nan a kontestá bo?” Kisas lo bo ke puntra Noe: “Bo tabatin miedu di e gigantenan? Kon bo a kuida tur e bestianan ei den e arka henter un aña?” I si bo topa Abraham, kisas lo bo por puntr’é: “Bo tabatin kontakto ku Sèm? Ken a siña bo tokante Yehova? Tabata difísil pa bai for di Ur?”

¹² Bo a pensa kaba riba e preguntanan ku lo bo ke hasi e muhénan fiel ku lo ser resusitá? “Rut, kiko a konvensé bo pa bira un sirbidó di Yehova?” “Abigail, bo tabatin miedu di konta Nabal ku bo a yuda David?” “Èster, kiko a para di abo ku Mardokeo despues di loke nos ta lesa den e relato di Beibel?”

13. (a) Kiko hende ku resusitá kisas lo ke puntra bo? (b) Kiko bo ta pensa di e speransa di topa ku hòmber i muhé fiel di antigwedat?

¹³ Klaru ku e hòmber- i muhénan fiel ei tambe lo tin masha hopi pregunta pa bo. Lo ta masha emoshonante pa konta nan tokante e periodo kulminante di e último dianan i kon Yehova a bendishoná su pueblo durante e tempu difísil ei. Sin duda, nan lo keda masha konmoví ora nan tende kon Yehova a kumpli ku tur su promesanan. Den e mundu nobo, nos lo no tin nodi di usa nos imaginashon mas pa pensa kon e sirbidónan leal di Dios ku ta ser menshoná den Beibel tabata. Nan lo ta huntu ku nos den Paradeis! P’esei, sigui hasi bo bèst awor pa nan ta real pa bo. Sigui imitá nan fe. E ora ei boso, komo bon amigu, lo por sigui sirbi Yehova huntu pa semper!