Hesus A Kumpli ku Profesia di Isaías

Hesus a tende ku e fariseonan i e partidarionan di Heródes a plania pa mat’é. P’esei, e ku su disipelnan a bai Laman di Galilea. Un multitut grandi for di tur parti a bini serka Hesus. Nan a bini di Galilea, for di e statnan Tiro i Sidon ku tabata situá na kosta, for di e parti ost di Riu Yordan, for di Herúsalèm i for di Idumea ku tabata situá mas den zùit. I Hesus a kura hopi di nan. P’esei, e hendenan ku tabatin malesa grave tabata pusha pa yega serka dje. Nan no tabata warda pa é mishi ku nan; nan mes tabata mishi kuné.—Marko 3:9, 10.

Debí ku e multitut tabata asina grandi, Hesus a bisa su disipelnan pa prepará un boto chikitu pa e por a hala for di kosta i evitá ku e multitut tabata pèrta riba dje. Di e manera ei, e por a siña e multitut for di e boto òf bai otro área kantu di kosta pa siña mas hende.

Disipel Mateo a skirbi ku loke Hesus a hasi a kumpli ku “loke profeta Isaías a papia.” (Mateo 12:17) Na kua profesia di Isaías Mateo tabata referí?

“Wak! Mi sirbidó ku mi a skohe, mi stimá, esun ku tin mi aprobashon! Lo mi dun’é mi spiritu, i lo e mustra e nashonnan kiko ta berdadero hustisia. Lo e no pleita ni grita, ni ningun hende lo no tende su stèm den e kayanan prinsipal. Lo e no trapa riba ningun kaña kibrá, i lo e no paga ningun mecha ku ta huma, sino te ora ku e laga hustisia triunfá. Sí, e nashonnan lo karga speransa den su nòmber.”—Mateo 12:18-21; Isaías 42:1-4.

Ta klaru ku ta Hesus ta e sirbidó stimá ku tin Dios su aprobashon. Kontrali na e tradishonnan di religionnan falsu ku a stroba hende di haña sa kiko ta berdadero hustisia, Hesus sí a yuda hende komprondé kiko ta berdadero hustisia. E fariseonan tabatin nan propio manera di apliká e Lei di Dios. De echo, ni hende malu nan no tabata yuda riba sabat. P’esei, pa mustra hende kiko e hustisia di Dios ta enserá i ku e tabatin Dios su spiritu santu, Hesus a aliviá e hendenan di e karga pisá ku tradishonnan inhustu a trese kuné. Ta p’esei e lidernan religioso tabata busk’é pa mata. Esta un krueldat!

Kiko ke men ku ‘lo e no a pleita ni grita i ku ningun hende lo no a tende su stèm den e kayanan prinsipal’? Wèl, ora Hesus a kura hende, e no tabata ke pa nan ni e demoñonan “laga hende sa ta ken e ta.” (Marko 3:12) E no tabata ke pa hende haña sa di dje via propaganda ni via informenan ineksakto i emoshonal ku lo a pasa di boka pa boka.

Ademas, Hesus a konsolá hende ku den sentido figurativo tabata manera kaña kibrá, doblá i trapá. Nan tabata manera mecha ku ta huma; tabata komo si fuera nan último vlam di bida tabata serka di paga. Hesus no a trapa ningun kaña kibrá ni e no a paga ningun mecha ku tabata huma i ku tabata serka di paga. Mas bien, ku ternura i amor el a lanta ánimo di hende mansu. No tin duda, pa medio di Hesus e nashonnan por tin speransa!